Yohan 14
14
Yeesus, te weech pis te Fater
1Yeesus saat:
— Kept net petriipt. Klaapt an Hërkot un klaapt aach an mich. 2An mayn Fater sayn haus sin fiil tsimre, un ich raume en plats uf fer aych. Wen es net soo weyer, het ich tas aych xon kesaat. 3Un, noo tëm ich en plats uf keraumt hon fer aych, khome ich tsurik un nëme aych mit meyer tas, woo ich sin, sayt teyer aach. 4Un teyer wist te weech fer an tas plats woo ich hiin keen.
5Too hot Thoome kefroot:
— Hër, meyer wise net woo tuu hiin keest. Wii khëne meyer tan te weech wise?
6Yeesus hot keantwort:
— Ich sin te weech, ti woerheet un es leewe; nimant khan pis an te Fater khome wen es net is torich mich. 7Yets woo teyer mich khënt, wërt teyer aach mayn Fater khëne. Un tsayt yets, khënt teyer em un hot em kesiin.
8Filip saat fer Yeesus:
— Hër, tsaych uns te Fater, un soo prayche meyer sonst niks hon.
9Yeesus hot keantwort:
— Ich sin xon soo lang pay aych, Filip, un tuu khënst mich imer noch net? Weyer mich siit, siit aach te Fater. Warom saast tuu: “Tsaych uns te Fater”? 10Meechst tuu net klaawe tas ich im Fater sin un tas te Fater in mich is?
Too saat Yeesus fer ti tisiple:
— Was ich fer aych saan, saan ich net in mayn aychne naame; te Fater, woo in meyer is, is weyer sayn aarwat macht. 11Klaapt an was ich saan: ich sin im Fater un te Fater is in mich. Wen teyer net klaapt weeche mayn wërter, klaapt am weenichsten weche tas tings woo ich mache. 12Ich fersichre es aych tas tas woer is: weyer an mich klaapt wërt tas tings mache woo ich mache, un pis noch kreeser wii tii, wayl ich keen pay mayne Fater. 13Un ales was teyer ferlangt in mayne naame, mache ich, soo tas te Fater sayn kloor torich em Soon reweleyert kept. 14Ich wëre ales tuun woo teyer meyer ferlangt in mayn naame.
Yeesus ferxprecht te Hayliche Kayst
15Yeesus saat wayter:
— Wen teyer mich liipt, heyert mayn kepoote aan. 16Ich ferlange fer te Fater, un eyer wërt aych en anere Hilfer kewe, te Kayst fon te Woerheet, woo fer imer pay aych playpt. 17Ti welt khan net tee Kayst aan nëme, wayl se em net siin un net khëne khan. Awer teyer khënt iim, wayl eyer is pay aych un wil in aych leewe.
18— Ich lose aych net inxtich, wii khiner oone eltre, awer ich khome tsurik fer mit aych se playwe. 19In khorts tsayt wërt ti welt mich net mer siin, awer teyer wërt mich siin. Un, wayl ich leewe, wërt teyer aach leewe. 20Wen tee taach khomt, wërt teyer se wise kriin tas ich in mayne Fater leewe un tas teyer in mich leept, soo wii ich in aych leewe.
21— Weyer mayn kepoote aan nëmt un noo keet, pewayst tas er mich liipt. Un mayne Fater wërt liipe tee woo mich liipt, un ich wërt tëm aach liipe un tëm tsayche weyer ich sin.
22Too hot Yuutas, net te Yuutas Iskariotes, kefroot:
— Hër, wii khan tas meechlich sin tas tuu ploos fer uns tsaychst weyer tuu pist un net fer ti kans welt?
23Yeesus hot keantwort:
— Te persoon woo mich liipt, tuut mayn wort aan heere, un mayne Fater wil tee liipe. Un mayne Fater un ich wole mit tem leewe khome. 24Te persoon woo mich net liipt, keet net mayn wort noo. Un tii wërter woo teyer am heere sayt sin net mayn, awer fom Fater, woo mich kexikt hot.
25— Ich sin tas am saan soo lang wii ich pay aych sin. 26Awer te Hilfer, te Hayliche Kayst, woo te Fater xike tuut in mayne naame, tuut aych aler tings lërne un macht tas teyer erinere tuut ales was ich aych saat.
27— Ich lose te friite pay aych. Is mayn friite woo ich aych kewe. Ich kewe aych te friite net soo wii ti welt se aych kept. Kept net petriipt un praycht khee pang hon. 28Teyer het keheyert was ich saat: “Ich keen, awer khome tsurik fer mit aych se playwe”. Wen teyer mich liipe teet, teet teyer aych fraye, wayl teyer wist tas ich noo em Fater keen; wayl te Fater is kreeser wii ich. 29Ich saan tas yets, eep tas tings paseyert, tas, wën es paseere tuut, teyer tas ales klaawe khënt. 30Ich khan net lang mit aych wayter xpreche, wayl tee woo an tii welt xikt is am khome. Tee hot khee kraft iwich mich. 31Awer ti welt mus wise tas ich te Fater liipe un tas, tesweche, ich ales mache was er xikt.
— Xtayt uf, meyer keen too fort!
Currently Selected:
Yohan 14: NTHunsrik
Highlight
Share
Copy
Want to have your highlights saved across all your devices? Sign up or sign in
2022 Sociedade Bíblica do Brasil
