Yohan 15

Yeesus, te trauwe xtok

1Yeesus saat:

— Ich sin te echte trauwe xtok, un mayne Fater is te pauer. 2Al ti reepe woo khee trauwe kewe, tuut eyer ap hake, wën se ach aan mich sin. Awer ti reepe woo trauwe kewe tuut eyer xnayte, tas se sauwer kewe un noch mee trauwe kewe. 3Teyer sayt xon sauwer torich ti untericht woo ich aych kep hon. 4Playpt fereenicht mit mich, un ich wil fereenicht playwe mit aych. Wayl, soo wii ti reep ploos trauwe kept wën se fereenicht is mit te plans, soo aach teyer khënt ploos fruchte kewe wën teyer fereenicht playpt mit mich.

5— Ich sin te trauwe xtok, un teyer sayt ti reepe. Weyer fereenicht is mit mich un ich mit tëm, tee kep fiil fruchte, wayl oone mich khënt teyer niks mache. 6Weyer net fereenicht playpt mit mich wërt wech keworef un wërt fertrokne. Wërt wii ti trokne reepe woo kesamelt kewe un ins fayer kexmis, woo se ferprënt kewe. 7Wën teyer mit mich fereenicht playpt, un mayn wërter in aych playwe, wërt teyer ales kriin was teyer ferlangt. 8Un ti kloor fon mayne Fater tuut sich rewelere wën teyer fiil fruchte protutseyert un soo tsayche tuut tas teyer mayn tisiple sayt. 9Soo wii mayne Fater mich liipt, liipe ich aych; tesweche, playpt fereenicht mit mich torich mayne liipe uf aych. 10Wën teyer mayn kepoote noo keet, tuun ich aych wayter liipe, soo wii ich mayne Fater sayn kepoote noo keen un te Fater tuut mich wayter liipe.

11— Ich sin tas am saan tas mayn frayt in aych playpt, un ayer frayt komplët sin sol. 12Mayne kepoot is tee: liipt eene em anere soo wii ich aych liipe.#Yo 13.34; 15.17; 1Yn 3.23; 2Jn 5 13Nimant hot mee liipe uf sayn froynte wii tee woo sayn leewe kept weche tëne. 14Teyer sayt mayn froynte wën teyer macht was ich xike. 15Ich nëne aych nime knechte, wayl te knecht wees net was sayne hër macht; awer, nëne aych froynte, wayl ich saan imer fer aych ales was ich fon mayne Fater keheyert hon. 16Tas waart net teyer woo mich raus kesuucht hot; es keeche teel, es waar ich woo aych raus kesuucht hon tas teyer keen solt un fruchte kept, un tas tii fruchte net ferloer keen. Tas, tas te Fater aych ales kept was teyer ferlange tuut in mayne naame. 17Was ich aych xike is tas: liipt eene em anere.

Yeesus sayn aanhënger kewe keyacht

18Yeesus saat wayter:

— Wën ti welt aych hase tuut, erinert aych tas ti mich te eyerxt kehast hot. 19Wën teyer fon te welt weyert, teet ti welt aych liipe wayl teyer fon te welt weyert. Awer ich hon aych raus kesuucht unich ti layt fon te welt, un teyer sayt nime tëm. Tesweche tuut ti welt aych hase. 20Erinert aych an was ich saat: “Te knecht is net importanter wii sayne hër”. Wën ti layt woo fon te welt sin mich keyacht hon, wëre tii aych aach yachte; wën tii mayn kepoote noo kang sin, wëre tii aach ayer untericht noo keen.#Mt 10.24; Lk 6.40; Yo 13.16 21Weche mich, tuun tii layt tas ales keeche aych mache, wayl se net khëne tee woo mich kexikt hot. 22Tii hete khee ëne sinte wën ich net khom weyer un tas tëne kesaat het. Awer yëts hon ti layt khee ausreet fer sayn sinte. 23Weyer mich hast, hast aach mayne Fater. 24Wën ich net unich tëne tas tings kemach het woo nimant kemach hat, hete tii khee ëne sinte. Awer yets hon se kesiin was ich kemach hon un tuun wayter hase soo fiil mich wii mayne Fater. 25Awer tas paseyert tas sich in hale tuut was in tëne iire Kesets kexrip is: “Tii hon mich kehast oone uersach.”#Sl 35.19; 69.4

26Yeesus saat wayter:

— Wën te Hilfer khome tuut, te Kayst fon te Woerheet, woo fom Fater khomt, tee tuut iwich mich xpreche. Un tas sin ich woo tee Hilfer xike tuun, fom Fater heyer fer aych. 27Un teyer tuut aach iwer mich xpreche wayl teyer sayt pay mich tsayt am aanfank.

Currently Selected:

Yohan 15: NTHunsrik

Highlight

Copy