Lɔgɔ Sabba 2
2
1Na lɔga bere kèghendonɛa ba ko ahaa ɛlla tumɔ kumulɔng, urruknyɛsɛ nganga. 2Na Tumu dheya zinggo na unga ku issabbay ayawsu. 3Na tuhu kala unga ku issabbay na kete na kɛnginyana na anna barari ke ngaya anɛ kala dheshshanɛa zinggo na ayawsɛaye. 4Na lɔga bere kèghendonɛa ba ko tumu a nganga.
Lɔga Kèghendonɛa Adam Ko Ngahɛwan
Na Komoru Tumu huna bere ghendono ba ko tumu, 5kɛnɔ ko lanya ko ahaa kàmma ko ahaa chillanɛa ba toye dha bere ninggɛ ke ngaya bere Komoru Tumu guyɔ ngani kemessoiysho na chɔɔ hirre kɔhinɛ ninggɛye. 6Yɔk ma dha bere dhudhuttanɛ ba toye na ɔmɔrɔdhɔgganɛ ba kumulɔng. 7Na Komoru Tumu koo dhamuyo ba na lashiu na tegenyo ke hiri na hɔngɛsɛ hɔngay girɔngichinne na hiri tɔlɔmu bassey.
8Na koo bhɛlɛsɛ hiri dara bo mɔdhɔsa Ɛdɛnɔ gɔra yaluny na kabhaktɔ. 9Na koo tegenyo kɛna bo challa kawarɛ bhɔlbhɔla kàmma tayɛn kari. Na dha bere ngadartonu kɛrghɛn lɔ kɛnde ku ramman, kona a kɛya ajjiy basseya iho dhul, kona anna ajjiy bhɛa kàggayɛa bho na kɛ̀ngɛrɛa lɔga gɛrsa ko ga challa.
10Na kidhoa ɔmɔrɔdhɔgganna ngadartonu dha bere bansana Ɛdɛnɔ tan konnɔ. Na kɔ na chalgatinya ke kidhona wush. 11Na kidhoa sabbune keli Beson na kɔ na dok baa kèe Hawula lɔmma worginya. 12Nɔng Hawula dha bere lɔ worginyaa bo dhidhinga ko bɛna bo gaw dhandala kàtallanɛa birinyaa mɛra ko kɛga bo hɛtta ko dhɔllanga ɔngɔnaa hur hur. 13Na kidho kona keli Giyon na kɔ na dok baa Itiyobiya.#2.13 Tuga Hibiru se, “...Kush.” 14Na kona keli Tekeros na nɔng anna dhoo Asor kaanyi gɔra yaluny. Na kona keli Ibiratis.
15Na Komoru Tumu ibha hiri na ojju dara bo mɔdhɔsa iho Ɛdɛnɔ na kɛbhɛktɔ.#2.15 Tuga Hibiru se, “...Ɛdɛnɔ na kulal ba na kɛbhɛktɔ.” 16Na madhɛsɛ lɔgɔ na sɛɛsɛ, “Yɔk ngakɛnda kawarɛ kumulɔng bhayaga. 17Na nɔng ngakɛta kàggaɛ bho na kɛ̀ngɛrɛ lɔga gɛrsa ko ga challaye, ngaami. Hunde ussuye, rɛsiyɔ.”
18Na seu, “Hiri hunde bhak bhichangge, a gɛrsi. Ga kètegenyɛsɛ hira ɛana na kabhaga kari.”
19Nɔng Komoru Tumu annaa bere ibhbhana ba na ghendono ke kɛginya ko shɔa kumulɔng. Na tɔkka bhɛa ihɛa hiriyɔ na katak sarre kɔdhdhɛsɛn :nɛaye. Na hiri tɔgɔdhɛsɛ aha kumulɔng sara na te ga gɛ keliyɛa dhul. 20Na huna messo nganga, dha bere kɔdhdhɛsɛn ahaa kìwoo ko kɛginya ko shɔa sara kumulɔng.
Na nɔng hirre ɛl ko nɔng kari na ɛana, dha bere ngani kɔ̀jɔɛsɛo. 21Na Komoru Tumu koo tabhɛsɛ hiri ungo. Na hunaa ungusso gɛkte, nɛga gigeya rogonyeyiny kona na bhɛa nigganɛa ulubu ayugɔ. 22Na rogonyeya niggana bhɛa nɛnɛ tegenyo ke ngahi na ayɛsɛ hiri.
23Na hiri seu, “Yee, kèe nganda a rɛa kèghendono gigeya nanu ko ayuga nanu! Na maya kèli hira ngaha ke ngaya kèghendonɛ bhɛa hira mayaye.”#2.23 Tuga Hibiru “hira ngaha” keli “Ishsha” na na maya keli “Ish” na aynde Adam kɔdhdhɛsɛn hira ɛana nɔng sarre kèe Ishshaye. 24Na mɛa a bhee hira maya dhɔyɛ jɔnɛ ko chɔgɔnɛ na ɛlɛ ko tɛriya nɛnɛ na rammane anɛ rɛa dhɔnɛnaye.
25Nɔng hiri ko tɛriya nɛnɛ dha bere woɛ ngaulo na liya ngaammɛo.
Currently Selected:
Lɔgɔ Sabba 2: SUQ
Highlight
Share
Copy
Want to have your highlights saved across all your devices? Sign up or sign in
©2023 Suri Translation Project which is a project of the Ethiopian Evangelical Church Mekane Yesus
