Yohanis 10
10
Lɔga Hira Ku Kadhinyogiya Iwonɛna Ko Ga Ahaa Gɛnyɛ Iwoo
1Na Yesus sɛɛsɛ zuga kɔbhbhɛa damiya Bhɛrɛsi,#10.1 Tuga Giriki ngalɔkta sennɛ, “Na Yesus sɛɛsɛ zuga kɔbhbhɛa damiya Bhɛrɛsiye,...” ninggɛ. “A challi, ga shigitɔ! Hirre hattana tenya mɛdɛrniuny sari tan kona na waran ngadhoonooye, ngandonu a ɔgɔrchagi ko chimtay. 2Na nɔng inde dhoono warande a ɛnaa iwoo mɛdɛrni. 3Na hira ungusɛa mɛdɛrni osɛn ɛnaa mɛdɛrniuny waran. Na ɛna ubhbhurisi sara gɛ bhiy bhiy na yɔk gaɛ tuga nɛnɛ na itton bhɔ. 4Na hunde ittonu bhɔ na te ushaye, nɔng jim sabbɔ na yɔk kɔbhinɛ wurtɔ ke ngaya gaɛ tuga nɛnɛye. 5Na chɔɔ hunde kishigi tukte hirre ana, jorrɛ chuk ke ngaya imagɛ tugɔye. Na ngakɔbhbhɛo dhul.” 6Na Yesus hunaa ɛlɛhɛnɛsɛa zugo ngalɔktaye, yɔk rɛgɛ na timagayɛ.
7Na koo Yesus tɔrɛ sɛgɛn na sɛɛsɛ, “A challi, ga shigitɔ! Kartina tenya mɛdɛrniuny kani :anyo. 8Na zuga bere jimmananyɛa sabbɔ yɔk a ɔgɔrchaga ko chimta. Na mɛdɛrni yɔk annaa bere ngani kishiktao. 9Nɔng waran kani :anyo. Na inde dhoony anyeye, bassɔ. Na chɔɔ tunnuk toye na bhono bhɔ. Na jɔana bhɛa ihɛa shɛɛ na ghɛnɛ ke na bo challa. 10Nɔng ɔgɔrchagi kun ogor ko nisa ko iggarisi sɔng. Na nɔng anye huna bere kuguni, keni kaynɛ bassey na kɛdhɛytɛ goore.
11“Kadhinyogiya kiwonɛni shɛɛ kani :anyo. Nɔng hira ku kadhinyogiya iwonɛna shɛɛ bhɛk mɛdɛrniya gɛnyɛ na chɔɔ rɛsɛ yɔk. 12Nɔng hira iwoo mɛdɛrni ke sayo ko ɛnaa mɛdɛrniuny#10.12 ɛnaa mɛdɛrniuny Ngaya se “ɛnaa mɛdɛrniunyde,” a bhɛa kènɛa kadhinyogiya ku ɛnaa iwonɛna shɛɛ. ngahɛtto. Hira iwoo ke sayo hunde or yoyaye, nɔng dhɔ mɛdɛrni na nge na oddɛsɛn yoya. Na yoya ammɛ na gena bhassaɛyɔ. 13Nɔng hira iwoo ke sayo bhee dhɔyɛ mɛdɛrni na ngessɛye, a ngaya ga gɛnyɛ ngaannɛo na ngatɔgiyɛoye.
14“Kadhinyogiya kiwonɛni shɛɛ kani :anyo. Na mɛdɛrniya ganyu kaggayɔ, na ko yɔk gaanyɛ 15damiya kagganɛnɛo ko Baba nanu Tumu. Na kɛbhɛgi shɛɛ na chɔɔ kɛrɛsɛ yɔk. 16Yɔk mɛdɛrniya ganyu ngatenyda ningginɛna, bhokkonnɔ ɛllɛ. Na maya kɔgɔ na kɔtɔkkandɔ. Na ko yɔk ale gaɛ tuga nanu na idhoynɛ ke dhɔnɛ na iwo :hira dhɔnɛna. 17Nɔng anye bhee ibhbhagɛany :Babaa nanu Tumu hini gooreye, a ngaya kibhbhanɛ rɛa nanu ɛna na kèrɛ na kabanay sɛgɛnde. 18Na chɔɔ hirre maggagany rɛsɛ na nissonyi ninggɛ. Na ko hunde kère, kɛrɛsi ke ngaya kihinnonɛ :ɛnaye. Nɔng anye kɔlɔmi buyna kɛrɛsɛi ko na kabansanɛi kari ke ngaya anɛ lɔga bere ajjanyi :Babaa nanuye.”
19Na hunaa shikkɛa ngalɔktaye, zuga Ayhudhi kendɛ kɛngɔ sɛgɛn. 20Na ga bo mɛra se, “Ngahirra lɔ mɛnɛngi, na dhaa tɔgɛsɛ na te lollu. Na igge chirarro kɛ ɔng?”
21Na yɔk gen se, “Ay! Hira amma :lollu lɔkte ku nganga ngayokkonoo. Anda mɛnɛngi hira kawarɛ chaga, kawarɛ oonoyɔ?”
Lɔga Zuga Ayhudhi Yesus Ngayɛbhɛayo
22Nɔng ngakaldonu bere Yerusalemɔ ba anna kolea Gibiriya Kadhdhanɛa :Zugu Kala Bere Onyonɛa Doraa Tumu Barara Ridhing#10.22 Dha bere oynya 168 oo 167 huna Yesus ngani kirriytɛayo, zuga baa Soriya ko komoruya nɛ kèe Antiyo Ibhibhanɛ dha bere dhakkanɛ Yerusalem. Na kɔdhdhɛ chɔwachina na uddulɛsɛnɛ tumua nɛ kèe Zus go Doraa Tumu Barara. Na zuga Ayhudhi koo tɛldi oynya sizzi na dhakta ɔra nɛ na tonydo Doraa Tumu Barara ridhinga bɔɔ messɛa :ngazuktonu. Na aynde ko mɛa toye kadhdhanɛ ngaoynyaonu na ammɛ Gibiriya Onyonɛa Doraa Tumu Barara Ridhingge. na ba anna asanday. 23Na Yesus nɔng bere yireo doraa Tumu barara tu kɛngɔ bhɛa kèleo Boloya Sɔlɔmɔni. 24Na zuga Ayhudhi muktiyaa na bakta nɔng na seyɛsɛ, “Ngangaye seni kàrakteo ko hinisi chɔɔ ore? Hunde ani Kirisose,#10.24 “Kirisos” a bhɛa kènɛa “Hira Bɛrrana :Tumu ku Komoruya Ibbayseo Zugo.” ga dhugunogiy rɛ dib!”
25Na yagɛsɛ :Yesusi na sɛɛsɛ, “Anye annaa bɔɔ koyogogungɔ na ngayɛbhbhoo. Yɔk ngalɔkta bu dhandal kemesi sara Babaa nanuye, dhɔllanɛ lɔga ganyu 26na nɔng igge ngayɛbhbhoo ke ngaya mɛdɛrniya ganyu ngaanɛoyoye. 27Yɔk mɛdɛrniya ganyu kaggayɔ. Na ko yɔk gaɛ tuga nanu na kɔbhbhanyɛyɔ. 28Na kajjɛ basseya iho dhul na ngagarsɛ. Na chɔɔ inde ale mayichchonony bhɛa ɛlɛa siya nanu, ninggɛ dhul. 29Nɔng Baba nanu bere ajjanyi yɔk anna jorrono zugo kumulɔng.#10.29 Dadabinyaa Lɔga Tumu tuga Giriki gena sennɛ, “Nɔng Baba nanu bere ajjanyi zuga jorronɛa zugo kumulɔng.” Na inde mayichchono bhɛa ɛlɛa siya nɛnɛ ninggɛ dhul. 30Anye ko Baba nanu Tumu kanno dhɔnɛ.”
31Na zuga Ayhudhi ibhta bɛna sɛgɛn na kɔchɔ na kinditɔ. 32Na nɔng Yesus dhugunɛsɛ lɔgɔ dib na sɛɛsɛ, “Anye annaa bere kɔdhɔlagungɔ lɔga bo mɛra dhandala ajjanyi :Babaa nanu Tumu. Na mɛa bhɛa ngalɔkta, gee gɛrɛ senno chɔyɛanyu :iggeu bɛnneye, a giyong?”
33Na yɔk yaktɛsɛ na seyɛsɛ, “Bhee kenno kɔ̀chɔyɛiny bɛnneye, a ngaya anɛ hiri hung na ojjɛ rɛ ke Tumu na dhɔmɛ nɔngge. Nɔng bhee kenno kɔ̀chɔyɛiny ngalɔkta dhandal bere mesiye ngayo.”
34Na nɔng yagɛsɛ na sɛɛsɛ, “Lɔga bere senno :Tumu sennɛa, ‘Annaa bere kennagungu, “Igge anno tumo gen,”’ bere dadaba Damiya nu toye ngani kɔ̀tɔgɔndɛsɛo, dha? 35-36Na hunde Tumu a nganda bere senɛsɛn zuga ajjɛa lɔga gɛnyɛ, ‘Anno tumo gena,’ na chɔɔ anda bhee kàmalɛ lɔga gɛnyɛ ninggɛye go, na mɛa bhee bansagɛanyu na sennagɛanyu, ‘Dhɔmi Tumuye,’ a ore? A ngaya kesenɛ, ‘Kani Eriya Tumuye,’ dha? Nɔng Tumu annaa bere ibhaanyɔ anye na kɛngaanyɔ na ojjonyɔ ke eriya nɛnɛ na egoonyɔ ba. 37Na mɛa hunde lɔga messo :Babaa nanu anye ngakemesiyoye, ngayɛbhbhanyu. 38Na nɔng hunde kemessa lɔga messo :nɛaye, ko hunde anye ngayɛbhbhanyu, yɛbhɛ ngalɔkta bu barar kemesiye na aynde ale ungusɛɛno na gayɛo bhɛa anye ko Babaa nanu kanɛo dhɔnɛye.” 39Na zugo hunaa shikkɛa ngalɔktaye, bandɛsɛ na kibhigi sɛgɛn. Na nɔng jaru.
40Na koo wagu na ogo chɔɔ kidhoa bere churɛa :Yohanisi zugo sabbɔ kènno Yordanos tandɔ na tɛu ngonu ungge muchugi. 41Na zuga bo mɛra hoya na assa nɔng na se, “Nɔng Yohanis lɔkte bu barari annaa ngani kemessao dhul. Na yɔk lɔga ngahirra bere yokkogiy :Yohanisi kumulɔng, dha bere a dhere.” 42Na zugaa honynyo ngoonu, ga bo mɛra yɛbhɛ Yesus.
Currently Selected:
Yohanis 10: SUQ
Highlight
Share
Copy
Want to have your highlights saved across all your devices? Sign up or sign in
©2023 Suri Translation Project which is a project of the Ethiopian Evangelical Church Mekane Yesus
