Yohanis 8
8
1Na nɔng Yesus koo ogu Kutula Girarruny. 2Na bhorroyɔ shaw waga na ogu doraa Tumu barara tu kɛngɔ. Na zugo kumulɔng muktiyaa na assa nɔng. Na nɔng tɛa bay na kamadhtɔ. 3Na zuga madhdhɛa zugo Damiya Tumu bere kàjjɛa Muse ko zuga kɔbhbhɛa damiya Bhɛrɛsi dhiganda tɛrite ku hummey dhaa ibhɛsɛnɛ hunde ɛl ko hiriye toye na hoyɛy bhɛa nɛnɛ. Na ayɛ lɔgɔ na kichil zukke kɛrghɛnɔ. 4Na seyɛsɛ Yesus, “Hira madhdhiye, agge ngatɛrita wa arta :zugu hunde me lollumo na assana :hiriyɔye na ibhtɛsɛa toye. 5Nɔng Damiya Tumu bere kàjjɛa Muse, se zukte ngas messɛ ngangaye maya kuy bɛnne na rɛssɛyɔ. Na inye mɛa seni ɛnɛng?” 6Yɔk bhee bere ghinɛ ngangaye, a ngaya se kɔɔnggɛ nɔng na kɔjɔyay ganggua senno kibhtɛye.
Na nɔng Yesus dhugumu na tɔgɔdhu lɔgɔ bay gidhadhang hallagiyɔ. 7Na hunaa ghinnɛa dirrte, nɔng bana na sɛɛsɛ, “Bhɛa nu hunde lɔ hirre bere lɔga gɛrsa ngani kemesso dhulde, ga kɔchɔ ngatɛrita sabbɔ.” 8Na dhugumu na tɔgɔdhu lɔgɔ bay gidhadhang sɛgɛn.
9Na yɔk hunaa shikkɛa ngalɔktaye, salala dhɔnɛ dhɔnɛ kumulɔng. Na gee bere salallɛ sabbɔye, a zuga bibiyo. Na koo salala bhoy ko bhee Yesus ko tɛriyaa gina dhɔynɛnɛ tu kɛngɔ bhichang. 10Na Yesus bana na ghinu tɛri na sɛɛsɛ, “Ngatɛrita, na zugaa chillɛinyɛa wa ago ori? Na chɔɔ dhɔnɛ inde ujjukkaninyi ninggɛ dhul?”
11Na nɔng seu, “Ee, chɔɔ dhɔnɛ ninggɛ dhul, Komoru.”
Na sɛɛsɛ :Yesusi, “A challi. Hunde a ngangaye, ko anye lɔkte kujjukkanɛinyi ninggɛ. Na mɛa bana ogo na wurtɔ lɔga gɛrsa sɛgɛn ngamesi!”
Lɔga Yesus Kɔbhɛsɛna Zugo Bhɛa Lɔga Gɛnyɛ Anɛa Dhere
12Na koo Yesus yogɛsɛ zugo lɔgɔ sɛgɛn na sɛɛsɛ, “Anye kani hɔldina zuga bhakkɛa ba kumulɔng. Na inde yɛbhbhany anye na kɔbhbhanyde, ale jɔana hɔldina lɔmma basseya iho dhul na mugurɔ dhɔkkɔy ngani ngayiriyo.”
13Na zuga kɔbhbhɛa damiya Bhɛrɛsi seyɛsɛ nɔng, “Ay, agge ngakɛ̀yɛbhbhinyo ke ngaya kɔbhbhagɛiy lɔga sabbaa nunuye.”
14Na nɔng Yesus yagɛsɛ na sɛɛsɛ, “Anye ko hunde chɔɔ kɔ̀ɔbhagung lɔga sabbaa nanu, ngalɔkta kɔɔbhbhagungge a dhere ke ngaya anye kaggaɛ bhɛa bere kugunɛi ko bhee ale kɔgɔyɛye. Nɔng anye hunde bere kuguni ori na ale kɔgɔ oriye, igge imaggo dhul. 15Igge nɔng anno ngagiya kedhdho lɔgɔ damiya kedhdhɛa :zugu na ujjukkano zugoye. Na nɔng anye chɔɔ hirre dhɔnɛ ngakujjukkanno dhul. 16Na chɔɔ ko hunde anye kègen lɔga zugony na kùjjuga, lɔga ganyu a dhere ke ngaya kɛlɛo ko Baba nanu bere ekkononyi na bhichang ngakihɛoye. 17Chɔɔ ko nɔng Damiya nu a nganda se, ‘Lɔga orronɛa :zuga ku ramman kawarre na kɔbhbhanɛa, a dhereye.’ 18Yɔk zuga bere korrono ngalɔkta ganyde kawarre na kɔɔbhbhano, kanno ramman. Kona kani anye, kona a Baba nanu bere ekkononyi.”
19Na yɔk ghini na seyɛsɛ, “Na chogonuye nunde i ori?”
Na nɔng yagɛsɛ na sɛɛsɛ, “Anye ko Baba nanu igge ngagayiyyo. Nɔng hunde bɔɔ taktanyu anye, ko nɔng Baba nanu anda bɔɔ takto.” 20Yɔk ngalɔkta bere yokkono hunde madhɛsɛn zugo lɔgɔ doraa Tumu barara tu kɛngɔ jaa bhɛa ojjɛa :zugu ahaa senno kayɛ Tumuye. Na hirre idhar nɔng garu ke ngaya kolea nɛnɛ ngani keteyɛoye.
21Na koo sɛɛsɛ zugo sɛgɛn, “Nɔng anye ale kokka. Na nɔng igge ale lameonyu na rɛsɛo lɔga gu gɛrsa.#8.21 Yesus ngaya senɛ, “...igge ale lameonyu na rɛsɛo lɔga gu gɛrsaye,” a bhɛa dhugunnonɛa lɔga gulsachina Ayhudhi hunde ale lamiɛ hirre ibbaysi zugoye. Nɔng Yesus hunde a nganda ɛl ko yɔk kari na marrɛye imaggɛyɔ. Na yɔk ale rɛsɛ lɔga gɛ gɛrsa ke ngaya Yesus ngayɛbhɛoye. Na gɔrre ale kɔgɔɛ :anyoye, bhee hɛyɛo :iggeu, ninggɛ.”
22Na zuga Ayhudhi mɛzzi kɛngɔ na se, “Na ngaya senɛ, ‘Gɔrre kɔgɔɛ :anyoye, bhee hɛyɛo :iggeu, ninggɛye,’ dha a bhɛa senno keseɛ ɛnɛng? Na dha se kɔgɔn rɛ ka?”
23Na Yesus tɔrɛ sɛgɛn na sɛɛsɛ, “Igge anno zuga bhakko ba bay. Nɔng anye kani hira tumony tundune. Na igge anno zuga ngabaya. Na nɔng anye hira ngabaya ngakaniyo. 24Anye annaa kennagungu, ‘Igge ale rɛsɛo lɔga gu gɛrsa.’ Na mɛa hunde marro lɔgaa koyokkogungu hunde kani nɛng na ngayɛbhbhooye, ale rɛsɛo lɔga gu gɛrsa dhere.”
25Na yɔk ghini na seyɛsɛ, “Na ngangaye, inye ani hir inong?”
Na nɔng yagɛsɛ na sɛɛsɛ, “Na kèe kani hira bɔɔ taa kudhugunnogungu rɛa nanu hunde kani hir inongge chi. 26Yɔk lɔkte kɔlɔmi :anyo na keni kòyogogung na kùjjugayɛungge a mɛri. Na nɔng hira bere ekkononyi a hira yokkono lɔga ku dhere. Na lɔga bere kishikkani bhɛa nɛnɛ, anye mɛa koyogɛsɛn zuga bhakkɛa ba kumulɔng.”
27Yɔk ngalɔkta yogɛsɛnde hunde a lɔga Babaa nɛnɛ Tumuye, yɔk bere ngani kutunggɛsɛayo. 28Na koo sɛɛsɛ :Yesusi, “Igge hunde ale ibhbhano Hiri Hoynɛ na ilakkoye, ngakaldonu ale ungusɛɛno hunde dhaa kani hira bere kudhugunnogungu rɛa nanu hunde kani nɛng, ko hunde chɔɔ ngalɔkta koyokkogungge agga bere madhdhaganyi :Babaa nanu dibte. Yɔk lɔkte kɛsɛdhdhan na kemesi sabbaa nanu ninggɛ. 29Nɔng hira bere ekkononyi, kɛllo ko anye kari. Bhichang ngadhɔttanyo ke ngaya kemesɛ lɔga hinnono :nɛa kali kali na hinisa nɛnɛ anɛ hɔliye.” 30Na hunaa ngani yokkono ngalɔktaye, zuga bo mɛra yɛbhɛ nɔng.
Lɔga Ashaa Awurahami
31Na nɔng yogɛsɛ zugaa Ayhudhi wa ngani yɛbhbhanɛa nɔng lɔgɔ na sɛɛsɛ, “Igge hunde ibhbho lɔga ganyu tiiye, ngangaye, teyo zuga kɔbhbhanyu anye dhere. 32Na hɛo na ale gao lɔga ku dhere. Na ngalɔktonu ku dhereye ale bhelekkogungɛ bhɛa hɔla.”
33Na ghini na seyɛsɛ, “Na kèe agge kanno ashaa Awurahami na chɔɔ gaymanyaa hir konnuny ngani kèteyeyo dhul. Na ngaya sennagɛiy, ‘Ale bhelekkinyano na ɛllo bhee hɔliye’ a bhɛa seni sɛɛ ɛnɛng?”
34Na nɔng yagɛsɛ na sɛɛsɛ, “A challi, ga shigitɔ! Hira messo lɔga gɛrsa, a gaymaya lɔga gɛrsa. 35Nɔng gaymaya mesinɛna dorigiye ko eygoa dori kari dhul ngaɛllo. Na nɔng eriya#8.35 Tuga Giriki ngaya se “eriya doriye,” ɛlɛhɛn ke may. dori ɛl ko zuga gɛnyɛ kari dhul ko kingi. 36Na mɛa hunde Eriya Tumu kebhelegogung bhee hɔli, ale ɛllo hurr dhere. 37Nɔng bhɛa anɛo ashaa Awurahami kaggaunggɔ. Na nɔng igge anno ngagiya ɛllo kɔk na senno indonyu ke ngaya marɛo lɔga ganyuye. 38Yɔk ngalɔkta koyokkogungge agga bere korroni huna kɛllo ko Baba nanu. Na ko igge messo lɔga bere shikkano bhɛa babaa nu.”
39Na yɔk yaktɛsɛ na seyɛsɛ, “Agge baba nayo a Awurahami.”
Na nɔng Yesus sɛɛsɛ, “Hunde te ashaa Awurahami, anda messo lɔga bere messo :nɛa. 40Na nɔng igge anno ngagiya hinnogonyu rɛsɛ na senno indonyu hira koyokkogungu lɔga ku dhere bere kishikkani bhɛa Tumuye! Nɔng Awuraham annaa bere nganga ngani kemessao. 41Nɔng igge anno ngagiya messo lɔga messo :babaa nuye chi.”
Na yɔk tamara na seyɛsɛ, “Ay, agge nɔng irrichchaga ngakannoo! Baba nayo a :Tumu dhɔnɛnɛ!”
Lɔga Erroa Moldoyny
42Na sɛɛsɛ :Yesusi, “Hunde Tumu kete Baba nu, anda ibhbhaganyu hinisi, ke ngaya bere kugunɛ bhɛa nɛnɛ na mɛa kihɛ ngayaye. Anye bere ekkononyi :nɛa. Sabbaa nanu ngani kèseayo na kùgoo. 43Na bhee lɔga koyokkoni ngaungusɛɛnooye, a ore? A ngaya lɔga koyokkoni :anyo marɛo na ngashigɛoyoye. 44Nɔng igge anno erroa babaa nu Moldoyny na senno mesigi lɔga hinnono :nɛa. Nɔng a hira bere nissono zugo kingi na marra lɔga ku dhere ke ngaya lɔga ku dhere bhɛa nɛnɛ ningginɛnɛye. Na chɔɔ hunde mɛzzi butomoye, yokkono kabiya nɛnɛ butomo ke ngaya anɛ butogi na butomo bere shigininyanɛ bhɛa nɛnɛye. 45Na nɔng igge anye ngayɛbhbhanyuo ke ngaya koyokkonɛ lɔga ku dhereye. 46Na mɛa bhɛa nu inde kesea bere orrogony hunde kemesi lɔga gɛrsa na se kichillɛanyde, a nɛng? Ninggɛ. Na anye hunde kani nganda koyokkon lɔga ku dhereye, lɔ ɔng ngayɛbhbhanyuoye? 47Nɔng inde ku eriya Tumuye, a inde shik lɔga Tumuye. Na nɔng igge bhee lɔga Tumu ngashigɛoyoye, a ngaya erroa gɛnyɛ ngaanɛoyoye.”
Lɔga Yokkonɛa :Yesusi Lɔga Rɛa Nɛnɛ
48Na zuga Ayhudhi seyɛsɛ nɔng, “Ngangaye, ngaya kesenɛo inye ani hira ku Samariyay na lɔmi mɛnɛngiye, dhere ngayo?”
49Na nɔng yagɛsɛ na sɛɛsɛ, “Anye mɛnɛngi ninggɛnanyɔ. Anye kajjɛ Baba nanu diram, na nɔng igge ujjukkananyu na ajjanyu liya. 50Nɔng anye bhɛa keni kɔdhɔnggɛany :zugu na kayɛany diram ngakalamiyo. Na nɔng hira hinno bhɛa senno zugo kayɛany diram ihe. Nɔng chɔɔ a Hira Kedhdho Lɔga Zugony. 51A challi, ga shigitɔ! Inde bhɛk lɔga ganyuye ale ko kingi ngani ngarɛsso dhul.”
52Na yɔk seyɛsɛ, “Mɛa hunde dhaa ani hira tɔkkaginyiye, wa katakto shɛɛ! Chɔɔ Awuraham ko zuga bere yogɛsɛnɛa zugo lɔga dhugunono :Tumu annaa bere erta. Na inye mɛa seni, ‘Inde bhɛk lɔga ganyuye ale ko kingi ngani ngarɛsso dhul,’ ɛnɛng? 53Ngangaye, inye seni jorron baba nayo Awuraham ka? Ngajorronno. Nɔng Awuraham sabbaa nɛnɛ rɛ ko zuga bere yogɛsɛnɛa zugo lɔga dhugunono :Tumu bere annaa erta kingi. Na mɛa inye ojji rɛ te ɔng?”
54Na nɔng yagɛsɛ na sɛɛsɛ, “Anye hunde kɔ̀dhɔng rɛa nanu na kaynɛ diram, bhee ku hologun ninggɛ. Na nɔng ngahirra dhɔngngo :iggeu na senno ‘A Tumua nayoye’ a Babaye nany ajjany dirambe rɛ. 55Igge anno zuga imaggo nɔng, na nɔng anye kaggayɔ. Na chɔɔ ko hunde kèse ‘Anye kimagiyɔ,’ ngangaye, ketewa butogi hunde nuye. Na nɔng anye kaggayɔ na kɛbhɛgi lɔga gɛnyɛ. 56Nɔng kokonga nu Awuraham annaa bere dɛlla bhɛa senno karɛ kala ale kugunɛi :anyo na ibhɛsɛna hini. Na koo arra na hini tewa hɔli.”
57Na ghini :zuga Ayhudhi na seyɛsɛ, “Na kèe oynyaa gunyu chɔɔ zugo ramman ko tɔmmɔn ngani keteyo na Awuraham bere ori minang?”
58Na nɔng sɛɛsɛ, “A challi, ga shigitɔ! Chɔɔ huna bere Awuraham ngani kirrittiyaayo, anye bere kihi chi.” 59Na hunaa senɛsɛna zugo ngangaye, yɔk hinisi te chichi#8.59 hinisi te chichi Tuga Giriki ngalɔkta sennɛ, “...hinisi te chichiye...” ninggɛ. Na bhee kɔgɔdhdhɛsɛno ngalɔkta Surichɛnde a ngaya hunde zugo mukkanɛ bɛna na kɔchɔ Yesuse, mukkanɛ ke dɛmneya kadhdhanɛa lɔga ɛlla Damiya Tumu bere kàjjɛa Muse. na ibhta bɛna na kɔchɔttɔ. Na nɔng mesu milmil milmil na bhona doraa Tumu barara tu kɛngɔ na ogo.
Currently Selected:
Yohanis 8: SUQ
Highlight
Share
Copy
Want to have your highlights saved across all your devices? Sign up or sign in
©2023 Suri Translation Project which is a project of the Ethiopian Evangelical Church Mekane Yesus
