Markos 2
2
Lɔga Ibbaysiyɛa :Yesusi Hira Chudhinɛna
1Na Yesus hunaa iho ngonu ungge muchugi na koo wokkono Kibirombe, shigi :zugu hunde dha bɔɔ waga na tɛu dori konnɔ ɔr toye ngonuye. 2Na koo zugo muktiyaa na hoya na dori dhiyɛ dhik na chɔɔ tu kɛngɔ ngani ngahɛtinɛnɛo na bhee ɛlɛ :zugu garu. Na madhɛsɛ :Yesusi lɔga Tumu. 3Na zug gena hoyɛy hirre chudhinɛ ngorronɛ :zukte ku wush na kayɛsɛ Yesus na kibbaysiyɔ. 4Na koo ngazuktonu bhee honynyɛ hiri na ajjɛsɛnɛ Yesus garu ke ngaya bere zugo anɛ mɛriye. Na irrɔgɔ dori kura na bolkiyo tana ihɛa :Yesusi na ɔsɔnisiyo hiri ba galiyaa kòngorronɛa.#2.4 Ngadoriya bere ihɛ Yesusiye a doraa bo rammaya tundɔ lɔmma bhɛa hɛtta ko balanggi na iho rash. Na aynde zugo irrɔkkɛ na boliyonɛ tana ihɛa :Yesusi na ɔsɔniseonɛ hiriye. 5Na Yesus hunaa orro yɛbhaa ngazukta ngorronɛ hiriye, sɛɛsɛ hiraa chudhinɛna, “Ngahirrae, lɔga gɛrsa bere ɛddɛi wa kùjjukta na garta.”
6Na yɔk zuga madhdhɛa zugo Damiya Tumu bere kàjjɛa Muse gena bere ɛlla bay ngonu. Na ɛsɛdhɛ lɔgɔ hinisichinne na se, 7“Ngahirra mɛzzi nganga na dhɔm Tumu kɛ ɔng? Inde ujjuk lɔga gɛrsa bay ngaya kona ihe? Ngaujjukko :Tumu sɔng?”
8Na Yesus tagu ngalɔkta ɛsɛdhdhɛ ꞉yɔkku hinisichinneye kuloyɔ shaw hung na sɛɛsɛ, “Lɔgɔ hinisichinne nganga ɛsɛdhdho kɛ ɔng? 9Mɛa bhasen hunde kèsenɛsɛn hiri, ‘Lɔga gɛrsa bere ɛddɛi wa kùjjukta na gartaye,’ oo bhasen hunde kèsenɛsɛn, ‘Bana ibha galiyaa kòngorronɛinyi na ogoye?’ 10Yee, mɛa ga kɔ̀dhɔlagung bhɛa lɔmɛa :Hiri Hoynɛ#2.10 Ngahirra kèe “Hiri Hoynɛye” lɔga gɛnyɛ dha bere kɔdhdhɛsɛn :hira yogɛsɛna zugo lɔga yokkono :Tumu kèe Daniyel dadab. Na ɛl Dadaba nɛnɛ 7:13-14ɔ. Yɔk ngalɔktonu dha bere sennɛ, “... na karra hirre hɛt ko Hiri Hoynɛ hunde woono idhogiye.... na bo lɔmmana buyn ko diram ko barartin, na kɔdhdhɛsɛnɛ :bhorinya kumulɔng kɔmmaye...” Na ngalɔkta yokkono :Yesusi Markosɔ ngayaye ɛlɛhɛnnɛ ngalɔktonu hunde Yesus a ngahirronu ku Hiri Hoynɛ lɔga gɛnyɛ bere kɔdhdhɛsɛn :Daniyeli dadabte. buyna ujjugɛa lɔga gɛrsa bay ngaya na tagatɔ ni go!” Na sɛɛsɛ hiraa chudhinɛna, 11“Kesennaginy, ‘Bana ibha galiyaa ungusɛi na ok doraa nunu!’” 12Na hiri bana kɛhɛy na ibha galiyaa nɛnɛ ungusɛa na bhonu na ogo. Na zugaa ɛlla ngonu kumulɔng argi ngalɔkta kèmesɛsɛn hiriye na iwachiyɛ na eterrisana Tumu na se, “Agge lɔkte ku nganga bere sabbɔ ngani kàrtoyo dhul.”
Lɔga Bɛrranɛa :Yesusi Lewi Na Keteɛ Hira Kɔbhbha Nɔng
13Na Yesus koo wagu chɔɔ yirisiya Gelila dhey sɛgɛn. Na zuga bo mɛra muktiyaa na hoya bhɛa nɛnɛ na madhu :nɛa. 14Na hunaa dhoo ngonuye, aru eriya Ilbiyosi kènno Lewiy#2.14 Ngahirra kèe Lewiyte, sara gɛnyɛ gena keli, “Matiyos.” hunde i bay bhɛa mugɛa gharataye, na sɛɛsɛ, “Ga kɔbhaanydɔ!” Na nɔng bana na kɔbhu.
15Na Yesus koo ogo doraa Lewiy na usigi ko zugo tila kari. Na huna bere aminɛna ngonu, bere mulnɛna ko zuga kɔbhbhɛa nɔng ko ga mukkɛa gharata#2.15 ga mukkɛa gharata Zuga Ayhudhi dha bere marrɛ zuga gɛ mukkɛa gharata goore ke ngaya tɔrnɛnɛ ko manggisiya Rome na mukkanɛ birinyaa zuga Ayhudhi gidhdhingɔye. ko “ga lɔmmɛa ridhing.”#2.15 “ga lɔmmɛa ridhing” Zuga kɔbhbhɛa damiya Bhɛrɛsi a zukte marrɛ bhɛa aminɛnɛa ko zuga Ayhudhi Damiya Tumu ngabhɛkkɛayo. Yɔk bhee messɛ ngangaye a ngaya se hunde zugo Damiya Tumu ngabhɛkkɛoye, a zuga lɔmmɛa ridhing na dikkɛ zuga ridhing ningginɛna. Yɔk dha bere zuga mukkɛa gharata ko ga messɛa lɔga gɛrsa na senno kishigi lɔga gɛnyɛ a mɛri. 16Na yɔk zuga kɔbhbhɛa damiya Bhɛrɛsi madhdhɛa zugo Damiya Tumu bere kàjjɛa Muse hunaa orrɛa Yesus hunde mulnɛ ko zuga mukkɛa gharata ko “zuga gɛrsa lɔmmɛa ridhing” kariye, ghini zuga kɔbhbhɛa nɔng na seyɛsɛ, “Ngangaye nɔng ko zuga mukkɛa gharata ko “zuga gɛrsa lɔmmɛa ridhing” kari mulnɛ kɛ ɔng?”
17Na Yesus hunaa shikko ngalɔktaye, sɛɛsɛ ngazuktonu, “Yɔk zuga ngailagassɛayo bhee hinɛ akim ninggɛ. Gee hinnɛ akimbe a zuga ilagassɛa sɔng. Nɔng anye huna bere kuguni, bere kuguni na kàlamma zuga lɔmmɛa ridhing. Bhee bere kugunɛ na kàlammay zuga ridhing ningginɛna ngayo.”
Lɔga Kìghinɛa :Yesus Bhɛa Kìchibɛa Rɛhi Hunynɛn
18Na kali kona zuga kɔbhbhɛa Yohanis ko ga kɔbhbhɛa damiya Bhɛrɛsi chɛbɛ rɛhi hunynɛn na alliyɛ ko Tumu. Na koo zug gena hoya na assa Yesus na ghini na seyɛsɛ, “Yɔk zuga kɔbhbhɛa Yohanis ko ga kɔbhbhɛa damiya Bhɛrɛsi chibbɛ rɛhi hunynɛn na allinɛ ko Tumu. Na ngagiya kɔbhbhinyɛ inyeye yɔk aminɛ na maynɛ hung kɛ ɔng?”
19Na yagɛsɛ :Yesusi na sɛɛsɛ, “Ngangaye karuy hunde duriye, anda rɔra ɛlla kari rɛhi hunynɛn chibbɛyɔ? Ngachibbɛo. Yɔk bhee rɛhi hunynɛn ngachibbɛoye a ngaya ɛlɛ ko karuy kariye. 20Na nɔng kolea kɛ̀hɛyɛa karuy na ko yɔk kari ngaɛlɛayo, ale andanayɔ. Na ngakoleonu yɔk aynde ale chibɛ rɛhi hunynɛnde.
21“Nɔng inde ibhbhana ruma ngani chaga bhokkona na dhagɛsɛn na nyagasa ninggɛ. Chɔɔ ko hunde kadhagɛsɛ, nganda chakte ale rudh nganda nyagasse na aminɛ na ɛrrɛynɛ na hologun ɔginɛ ke bu na jorrono hologuna bɔɔ sabbune. 22Na ko nɔng hirre ibhbhana gimaya woynuny ngani kùchudhdhana na oy kammayiya nyagasa ninggɛ. Chɔɔ ko hunde koy, gimay bhɛsi ngakammayiya nyagasse na udhuynɛ na gara rang na woyn ko kammayi ɛddɛnɛ na hologunde nɛ ninggɛ. Na gimaya woynuny ngani kùchudhdhana maya kòy kammaa ngani chaga.
Lɔga Kìghinɛa Yesus Lɔga Kala Ayawsuny
23Na kali kona Kala Ayawsuny Yesus ko zuga kɔbhbhɛa nɔng dha gu kona toye. Na hunaa dhoyɛa gu toyeye, yɔk zuga kɔbhbhɛa nɔng bere targuyɛsɛnɛa liwa gɔrɔ gɔrɔ. 24Na zuga kɔbhbhɛa damiya Bhɛrɛsi ghini Yesus na seyɛsɛ, “Ga gɔny zuga kɔbhbhinyɛa inye! Ngangaye yɔk messɛ lɔga imaginɛna ko Damiya Kala Ayawsuny kɛ ɔng?”#2.24 Damiya bere ajjɛa Muse zugo se Kala Ayawsuny maya zinggo ngamessɛ. Na zuga kɔbhbhɛa Yesus huna bere targuyɛsɛnɛa liwa gɔrɔ gɔrɔ na ammɛa Kala Ayawsuny, yɔk zuga kɔbhbhɛa damiya Bhɛrɛsi bere ɛlɛhɛnnɛa huna zinggoiny na aynde dɛmnyɛsɛnɛ na sennɛ a kullɛye.
25Na nɔng Yesus yagɛsɛ na sɛɛsɛ, “Nɔng Dawiy ko zuga bere ɛlla kari annaa bere dhakka :hozzo goore na chɔɔ ahaa ammɛa ningginɛnayɔ. Na ngakaldonu hunde bere Dawiy me ɔngge lɔga gɛnyɛ bere ngani toyito? 26Nɔng bɛrgua bere anɛa Abatari gɔldanga bo doraa Tumu barara, Dawiy annaa bere tunnukko doraa Tumu toye na ibhbhana tilaa kullɛna kɛ̀ɛnga ammɛa :gɔldangɛa doraa Tumu sɔng na amma na bhokkona ajjɛsɛnɛna chɔɔ zuga bere ɛlla ko nɔng kari. 27Na tɔrɛ sɛgɛn na sɛɛsɛ, “Nɔng Tumu huna bere ɛsɛdhdhana Kala Ayawsuny, bere ɛsɛdhdhana na kayawsɛ :hiriyɔ bay. Bhee bere ghendonɛ hiri na kɛbhɛgɛ Kala Ayawsuny ngayo. 28Na ko nɔng Hiri Hoynɛ a Komoruya Kala Ayawsuny.”
Currently Selected:
Markos 2: SUQ
Highlight
Share
Copy
Want to have your highlights saved across all your devices? Sign up or sign in
©2023 Suri Translation Project which is a project of the Ethiopian Evangelical Church Mekane Yesus
