Markos 4
4
Lɔga Ɛlɛhɛnnanɛa :Yesusi Lɔga Hira Duginɛna
1Na Yesus koo madhu zugo yirisiyɔ tugɔ sɛgɛn. Na zuga bo mɛra muktiyaa na hoya bhɛa ihɛa nɛa. Na nɔng irrɔgu gonggulde i yirisiyɔ tugɔ ngonu na isikkanɛ ko bhe chinyi yirisiyɔ toye. Na yɔk zugo kumulɔng bere chillɛa yirisiyɔ tugɔ ngonu. 2Na nɔng madhu yɔk lɔga bo mɛra na ɛlɛhɛnɛsɛ lɔgɔ na sɛɛsɛ, 3“Ga shigitɔ! Dha bere hir kona bansana na kɔ guyɔ na kudukkɛyɔ. 4Na hunaa kɔa na duginɛnaye, dugu gena ngɔyɛsɛ ganggu na shɔa hoya na mukta rang na usigiyɛ. 5Na gen ngɔyɛsɛ bhɛa ku guguri na childa shaw hung ke ngaya ba shɛɛ ningginɛnɛye. 6Na hunaa su bhɛllanaye, dhagu na mudhugu ke ngaya baye ibhbhɛ sinda ninggɛye na dhɔrɔgɔya. 7Na gen ngɔyɛsɛ birino toye. Na hunaa birino chillanɛa ke bibiye, gɔyta liwa na gartɛsɛ ngonu na kawarɛ ngani ngaeggissonɛo. 8Na gen ngɔyɛsɛ bhɛa mɔdhɔsa na childa na te bibi na eggi dhogoni. Na kona eggiyo gee ku 30, na kona eggiyo gee ku 60, na kona eggiyo gee ku 100. 9Na mɛa inde lɔ nyabhite sɛɛ kishik shɛɛ.”
10Na Yesus hunaa tɛlda ko zuga kɔbhbhɛa nɔng ku 12 ko zug gena bhichangge, koo ghini nɔng na kudhugunɛsɛ yɔk ngalɔkta wa ɛlɛhɛnɛsɛn zugoye hologun. 11Na nɔng yagɛsɛ na sɛɛsɛ, “Igge bhɛa gayɛo lɔga munnɛna lɔmɛa :Tumu zugo, bere kùdhugundogungɔ. Na yɔk zuga lɔga Tumu ngayɛbhbhɛayo kɛ̀lɛhɛnɛsɛn lɔgɔ, 12na
‘hunde orrɛ lɔga kemesi :anyoye, ngaungusɛɛnɛ,
na hunde shikkɛ lɔga ganyu na ungusɛsɛnɛ hinisiyeye, hologun ngagaɛ.
Na yɔk hunde nganga ngamessɛ na kutunggɛsɛ lɔga ganyu na kataga hologun, anda wokkonɛ gɔra Tumu na lɔga gɛ gɛrsa kùjjuk na kèsenɛsɛn, “Any kagarayɛ.”’
13Na Yesus ghinu yɔk na sɛɛsɛ, “Ngangaye ko igge ngalɔkta kɛlɛhɛnnagung :anyoye hologun ngani tagato? Na ngalɔkta hunde ngani tagatoye, anda gee ale kɛlɛhɛnnagungge kumulɔng, hologun gao ɛnɛng? 14Nɔng ngahirra duginɛye, heo hira madhɛsɛna zugo lɔga Tumu. 15Na zuga shikkɛa ngalɔkta gena heo ko ngaduguya ngɔsɛnɛ gangguye. Yɔk ngazukta ku ngangaye kolea shigɛa lɔga Tumu, nɔng Moldoy kun ke tiri na kɔɛ lɔgaa lɔmmɛa hinisichinne wa ngani kàmadhɛsɛna. 16Na gena hɛt ko ngaduguya ngɔsɛnɛ bhɛa ku guguriye. Yɔk ngazukta ku ngangaye, a gee shikkɛ lɔga Tumu na dhuggumɛsɛnɛ hinisiya bo hɔla shaw hungge. 17Na yɔk ɛllanɛ bhe chinyi ke ngaya sinda shɛɛ ningginɛnɛye. Na hunde chɔllanɛnɛ lɔga Tumu oo kàhangɛ lɔga Tumu na dokkonɛ lɔkte dhandaliye, dhɔttɛ ngalɔkta yɛbhbhɛye shaw hung. 18Na gena hɛt ko ngaduguya ngɔsɛnɛ birino toyeye. Yɔk ngazukta ku ngangaye shikkɛ lɔga Tumu shɛɛ chi, 19na hɛ na dokkonɛ lɔga shurnɛnɛa :zugu bay ngaya na yɛbhbhɛ butomoa aha mɛrtinuny na chirkannɛ aha gena. Na kawarɛ ngaeggissonɛo ke ngaya ngalɔkta messɛ :yɔkkuye iggarisɛɛ lɔga Tumu lɔmmɛa hinisichinneye. 20Na ko yɔk gen hɛt ko ngaduguya ngɔsɛnɛ bhɛa mɔdhɔsaye. Yɔk ngazukta ku ngangaye hunde shikkɛ lɔga Tumuye, lɔmmɛ hinisichinne na eggissonɛ shɛɛ. Na kona eggiyo gee ku 30, na kona eggiyo gee ku 60, na kona eggiyo gee ku 100.”
Lɔga Ɛlɛhɛnnanɛa :Yesusi Lɔga :Goa Kèterinyo
21Na koo sɛɛsɛ zugo, “Ngangaye bhɛa nu inde ibhbhana goa kèterinyo dorigiye na ulub rɛɔ oo ulluguny bhɛa kɔbɔnga ihe? Ninggɛ. Maya oy bhee dharnɛ. 22Na ko yɔk lɔkte kùllugunyde ale dhugunninyayɔ. Na lɔkte kàmagɛ ba na munnɛye ko yɔk ale uhanɛ na kìshiktɔ. 23Na mɛa inde lɔ nyabhite sɛɛ kishik shɛɛ.”
24Na tɔrɛ sɛgɛn na sɛɛsɛ, “Lɔkte chirarroye, chirara na maraga shɛɛ! Nɔng galite mankinɛnɛo :iggeuye, ko igge ale kàmankisogung ngagalitonu na chɔɔ kɔ̀tɔrrɛung na shiha a mɛri.#4.24 Ngalɔkta a bhɛa kèsenɛa hunde zugo bhagayɛ nyabha na chirarrɛ lɔga Yesusi shɛɛye, Tumu ale ajjɛ bhɛa ungusɛsɛnɛa lɔga gɛnyɛ shɛɛ na gaɛyɔ. 25Nɔng inde aha mɛrte, ga gɛnyɛ kɔ̀tɔrɛyɔ. Na nɔng inde lɔ gee muchukte, chɔɔ ngagenu lɔmbe kɛ̀hɛyɛyɔ.#4.25 Tuga Giriki se, “Na nɔng inde ngalɔmmoye, chɔɔ gee lɔmbe kɛ̀hɛyɛyɔ.” Yɔk ngalɔkta a bhɛa kèsenɛa, “Inde ga bho na ungusɛsɛn lɔga hinno :Tumu shɛɛye, nɔng kɔ̀tɔrɛ na ga bho goore. Na nɔng inde lɔga hinno :Tumu shɛɛ ngaungusɛsɛnoye, kàjjɛ sabba dhittinɛn na chɔɔ lɔkte muchug bere gaye, dhinyɛsɛn sabba.
Lɔga Ɛlɛhɛnnanɛa :Yesusi Lɔga Dugua Kùdukko Na Chillɛa Bhichang
26Na koo sɛɛsɛ zugo, “Nɔng bhɛa lɔmɛa :Tumu zugo, heo ko dugua dukko :hiriyɔ guyɔ. 27Na kali kali barɔ ko kaliyɔ ko hunde kutungu oo kabana, yɔk dugua bɔɔ dukko dhumuttanɛ na chillanɛ bhichang. Na yɔk hunde chillanɛ ɛnɛngge, nɔng imaktɔ. 28Na nɔng ba koo messo ahaa gannɛna ko ngaduguonu :ɛna. Na sabbɔ dhumutta bhichang na chili na te bibi na koo ilonggo na eggi goore. 29Na hunaa dhɔrɔgɔsɛaye, nɔng hiri ibha wara na sunɛɛ ke ngaya ba anɛ kolea suniunyde.
Lɔga Ɛlɛhɛnnanɛa :Yesusi Bhogoni Kawari
30Na Yesus tɔrɛ lɔgɔ sɛgɛn na sɛɛsɛ, “Ngangaye bhɛa lɔmɛa :Tumu zugo, maya kɛ̀lɛhɛn ko ɔng? Oo bhɛa kènno kùdhugundoy ngalɔkta na kataga :zugu, maya kɛ̀lɛhɛnɛsɛn ɔng? 31Nɔng hunde kɛ̀lɛhɛnde heo bhogoni kawari bhɛa toyne. Nɔng bhogoni bhɛa ngakɛnda ɛl bay kumulɔngge kawariya nɛnɛ bhɛa toyne a chinyi godhe dhogoni. 32Na nɔng hunde ngɔɛsɛ ba na chila na te buye, kɔ na jorrono lalugɛ kumulɔng na lɔ nyabhaa bo bibiyo lɔmmɛa rijjɔn. Na chɔɔ shɔaa bansɛa tumɔ ko yɔk ayawsɛ rijjɔnne ngonu.”
33Na Yesus ɛlɛhɛnɛsɛ zugo ngalɔkta bu mɛrte na madhɛsɛ damiya ungusɛsɛnɛa na gayɛa bhiy bhiy. 34Na huna taa madhɛsɛna lɔgɔ, taa ɛlɛhɛnɛsɛna lɔk gena. Na nɔng hunde ɛl ko zuga kɔbhbhɛa nɔng bhichang na madhte, taa dhugunɛsɛna lɔgɔ kumulɔng dib dib.
Lɔga Dhiyɛa :Yesusi Huroya Bansana Yirisiyɔ
35Na ngakaldonu hunaa koo bho barsaye, nɔng sɛɛsɛ zuga kɔbhbhɛa nɔng, “Banda kèrre yirisiyɔ tandɔ.” 36Na yɔk dhɔyɔ zugaa bo mɛra na irrɔgɔ gonggulaa ihɛa :Yesusi na dhi ko nɔng kari na ago. Na ko yɔk gonggulo gena bere dhiyɛa ko yɔk kari. 37Na koo huroyte bu ɔnnɛ bana yirisiyɔ toye na chukkiu gonggul gɛrrɛng gɛrrɛng ko bhee gonggul dhabbanɛ ma na se kidhiyɛy. 38Nɔng Yesus bere igingo rum gonggulɔ tana wurtune na unguso luy. Na yɔk zuga kɔbhbhɛa nɔng ibbanisi na seyɛsɛ, “Hira madhdhiye! Inye hunde se kɔ̀gɔytɛoye, ngakòwonyakkinyo?”
39Na nɔng bana na ɛggɛɛsɛ huroy na sɛɛsɛ yirisiyaa chukkinɛna, “Dhiyɛ rib na tɛ laay!” Na ngɔyɔ dhiyɛ rib na ma tɛldi lɛtɛtɛm. 40Na sɛɛsɛ zuga kɔbhbhɛa nɔng, “Bho goore ɛngɛrso kɛ ɔng? Yee, ngangaye ko mɛa bɔɔ ngani yɛbhtanyuo?” 41Na yɔk dɛɛbɛ goore na ghindɛ kɛngɔ na se, “Na dha nganda a hirre kèe nɛng, shik chɔɔ :ngɔ ko :maa yirisinyde?”
Currently Selected:
Markos 4: SUQ
Highlight
Share
Copy
Want to have your highlights saved across all your devices? Sign up or sign in
©2023 Suri Translation Project which is a project of the Ethiopian Evangelical Church Mekane Yesus
