Pulim 3
3
Lwarem pulim
1Ga-vara balo maama Yuu-tu Baŋa Wɛ déem na mɔɔne to, wolo na jege swa o dwoi ba maama to ye basankwea mo. Dɛ dedwe ka ma zaŋe ka bwei kaane wom ka we, “Wɛ seene o ta de abam we á yé zaŋe á di tio-bia balo maama na wo teeni kara kam wone to na? Ko ye chega na?” 2Kaane wom ma leiri o we, “Aawo. Dé jege chwoŋa se dé di teeni delo maama bia na wo kara kam wone to. 3Ko daare ko ná ye tio kolo na zege kara kam tetare ne to yerane, Wɛ tage o we, dé yé zaŋe dé di ko bia naa dé dwei-ko de. Dé ná ke konto, dé wó te mo.” 4Basankwea kam ma leiri ka we, “Aawo, abam bá seene á te! 5Chega to, Wɛ pɛ abam ni konto dwoŋi kokuri o yei we, abam ná di tio kom konto bia bam dedoa, á wo wó poore dɛ dem konto ne pa se á ta‑á nye de Wɛ tete ye á yei lane de lwarem pɔɔrem daane.”
6Kaane wom ma na we tio kom lamma o yi ne, ye o ta na we ko bia wó taa ywomma se nɔɔno di-ba. O fera ma zo tio-bia bam se o wane o ja yi-poro ba ŋwaane. O na boŋe konto to, o ma gwori tio kom bu o di. O ma daare badwonna o pa o baro wom na wo o takeiri ne to ye o de di. 7Konto nɛ sem ni ne mo ba yia seene ya poore, ye ba lɔre we ba zege da kalambwolo. Ba ma gwoni kaporo vɔɔro ba pane-te ba liŋi se ba ma kwoli ba chaveera.
8Wɛ-zoore maŋa ne, Baŋa Wɛ maa kare teeni kara kam wone o via. Baaro wom de o kaane wom ma ni ko na dɔne to ye ba seigi ba tete teeni dem tetare ne se Wɛ yé zaŋe o na-ba. 9Yuu-tu Baŋa Wɛ ma bwoŋi baaro wom ye o we, “Nmo wo yei ne mo?” 10O ma leiri o we, “A nigi nmo dɔnne mo teeni kara kam ne ye foone jege-ne de a na zege da kalambwolo to ŋwaane. Konto mo pɛ se a duri a seigi.” 11Baŋa Wɛ ma bwei‑o o we, “Nmo ke tɛ mo n lɔre we n ye kalambwolo mo? Wɔ mo tage konto o bere‑m? Nmo ga n dia tio kolo bia amo na we n ba jege chwoŋa se n di-ba to mo na?” 12Baaro wom ma leiri o we, “Ko ye kaane wolo wom nmo na yage‑o amo tei ne to mo pɛ-ne tio kom bu ye a di.”
13Yuu-tu Baŋa Wɛ ma bwei kaane wom o we, “Bɛ mo ye nmo ke konto?” Kaane wom ma leiri o we, “Basankwea kam mo gane amo pa se a gwori tio kom bia a di.”
14Yuu-tu Baŋa Wɛ laam ma ta de basankwea kam o we:
“Nmo na ke konto to ŋwaane, a le nmo vara maama wone ye a sɔɔle lwarem a yage nmo baŋa ne. Nmo laam wó ta‑n fɛɛle n puga baŋa ne ye teero yerane mo wó taa ye nmo ni-wodiu taa wuu, se n ba n te. 15Amo wó pa se nmo de kaane wom taa done daane. Wonto dwi dem dedaane nmo dwi dem wó taa chuli daane. Wonto dwi dem wó popoge n yuu ye nmo de wó done o dwi dem de nakila.”
16 Baŋa Wɛ ma daare o ta de kaane wom o we, “Ko ná ye nmo, amo wó pa se n cham dem puli pu-jare baŋa ne. Nmo wó tiini n yaare mo bu-lore wone. De ko de, nmo fera wó taa wo nmo baro wom wone ye wonto nam wó taa tei‑m.”
17O ma ta de baaro wom o we, “Nmo na sɛ n kaane wom ni ye n de di tio kolo bia a na we n yé zaŋe n di-ba to ŋwaane, amo wó sɔɔle lwarem a yage tega kam baŋa ne nmo ŋwaane. Nmo ŋwea maama wone, nmo wó yaare ko chɛ de tega kam varem mo, se n laam ba n na n ni-wodiu. 18Sabare de ga-cheiŋo dwi dwi wó nwoŋi tega kam baŋa ne te daane‑m. Nmo wó ta‑n kare n beeri gaao wone se n na n ni-wodiu. 19Nmo jege se n chɛ de totoŋa mo, ye n yuu luluŋu ná wo nwoŋi, n bá‑n na n ni-wodiu. Ko wó ke‑m konto mo taa, se n laam ba n te n jwoori teero tem wone. Teero mo ba mɛ ba ke‑m, ye n laam ma‑n wó jwoori n ji teero.”
20Adam#3:20 Adam kuri mo ye nabiinu. ma bwoŋi o kaane wom yere we ‘Awa’,#3:20 Awa kuri mo ye nɔn-ŋweno. kokuri wonto déem mo ye nabiina maama nu. 21Baŋa Wɛ déem ma kwei vara tankwallo o ma o ke gwaaro o pa Adam de o kaane se ba ma kwoli ba tete.
22Yuu-tu Baŋa Wɛ laam ma ta o tete ne o we, “Nabiinu wom dedaane debam maama laam ye bedwe mo, de o na tu o lɔre lane de lwarem o pɔɔre daane to ŋwaane. Konto to, ko maŋe se dé che‑o de tio kolo na pae nɔɔna ŋwea to se o yé gwori ko bia o di. Kokuri to, o ná di banto o woli da, o lage o taa ŋwe mo taa wuu.” 23Ko déem ma pa se Baŋa Wɛ le‑o Eden teeni kara kam wone. O ma zeili‑o se o nwoŋi o vo o taa vare tega kam. Ko ye tega kam wo teero mo Wɛ déem mɛ o ke nabiinu wom. 24O na zeili‑o pa o nwoŋi to, Baŋa Wɛ ma pa se malese sedwonna na ye cherubi to zege Eden teeni kara kam wɛ-puli seeni. O ta ma kwei se-zɔɔ de o ke da, ko na jege mini ye ko pipira de fora jei maama ne to. Tento maama déem chege tio kolo bia na pae nɔɔna ŋwea to, se nɔɔn-nɔɔno daa yé wane o twɛ da.
Currently Selected:
Pulim 3: KBG
Highlight
Share
Copy
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
