Luka 12

Dé na wó taa jege dé tete tei to

Matiyu 10:26-33

1Maŋa kam konto ne, kɔ-fɔrɔ dedɛ ya lage daane Yezu tei ne. Ba déem yi nenɛɛne morro dedɛ ye ba peene daane pa se ba wora ba nɔne daane. Yezu ma bobo o ta de o kwaga tɔgena bam o we, “Fɔge-na á che á tete se á yé pa Farisi tiina bam de abam sabɔle, de ba na ye pipiri-nyena ye ba seigi ba ke wo-lwanno tei to. 2Woŋo kolo maama na seigi nɔɔna tei ne to laam wó ba ko lɔre jaja. 3Konto to, abam na seigi á ta kolo maama to jege se ko nwoŋi pwooni mo, se nɔɔna di nayuu ba tɔɔle-ko.

4A badwonna bam, a tɛ abam se á yé ta‑á kɔre foone de nabiina. Ba wae ba goe á yera yam ye ko kwaga seeni ba daa ware ba ke abam kolokolo. 5Amo nam wó bere abam á na wó ta‑á kɔre wolo to. Á jege se á ta‑á kɔre Wɛ mo. Kokuri, ba ná go abam ba daare, wonto jege dam se o dole abam o yage te-seŋa jei ne. A tɛ abam we, á jege se á ta‑á kɔre foone de wonto mo.

6Ko ná ye zun-kabeili, ba yeini ba yeigi sento mɔle mo. Wɛ nam ba swei se maama ni ne, de se dedoa de. 7Wɛ maŋe o yei abam tete yu-ywei sem ni na mae tei to. Á yé ta‑á kɔre foone, se abam dedoa dedoa tiini á jege fera á dwoi zun-kabeili dedɛ.

8A tɛ abam we, nɔɔno wolo maama ná zege nabiina yiga ne o bere jaja we o ye amo nyem, amo Nabiin-bu wom de wó zege konto tu kwaga ne a bere we o ye a nyem Wɛ malese sem yiga ne. 9Ko daare wolo maama ná ve amo nabiina yiga ne, amo de wó ve konto tu Wɛ malese sem yiga ne. 10Wolo maama ná ŋɔɔne wo-balwaaro o pa Nabiin-bu wom, Wɛ wó sɛ se o yage o ma chɛ konto tu. Wolo nam ná ŋɔɔne o yaale Wɛ Sin-laao kom, Wɛ bá sɛ se o ma chɛ konto tu.

11Nɔɔna wó ja abam ba vo ba saŋe Juu tiina nakwa tei ne, de teo kom yiga tiina de dedɛɛra tei ne. Ba ná ke abam konto, se á yé ta‑á jege lwia de á na wó ŋɔɔne kolo se á ma á jwoŋi á tete, de á na wó tole taane dem tei to. 12Kanto maŋa kam ne Wɛ Sin-laao kom wó pa á lɔre á na jege se á ta kolo to.”#Luka 21:14-15

Jejegero memaŋe

13Nɔɔno dedoa na tɔge o wo kɔgɔ kom wone to ma ta de Yezu o we, “Berem tu, popo se n ta a zembaaro wom se o kwei wonnu telo debam kwo na tege o daare to o pɔɔre amo nyem o pa-ne.” 14Yezu ma leiri‑o o we, “A nɔɔno, amo jege chwoŋa se a bore abam taane na?”

15O laam ma ta de ba maama o we, “Ta‑á yei-na á tete se á yé pa á yi taa sui wonnu dedɛ. Nɔɔno jejegero tem ná daga tei, te bá wane o ŋwea te ke, o ná maŋe o ye nadum tei maama.”#1 Tim 6:6-10

16Yezu laam ma maŋe memaŋe o bere-ba o we: “Nadum mo wora. O kare sem ma ke wodiiru dedɛ se pa‑o. 17O ma boŋe o we, ‘Amo nam wó ke tɛ mo? Jei daa tera se a ke a wodiiru tem maama da. 18A wó yigi a tuli sem maama mo a de tega ne, se a daare a lɔ tuli-zɛ se a wane a pɛ a wodiiru tem de a wonnu maama a ke da. 19A laam wó ta de a tete we, a ye yu-ywoŋo tu mo. A jege wonnu telo maama a na lage to se ko maŋe de bena kɔgɔ kɔgɔ. Lwia daa bá ja-ne. Amo wó taa ke a boboŋa na lage tei, ye a di a ni ye a kwɛɛra.’#Kwor-tɛɛno 2:1 20Wɛ ma ta ded‑o o we, ‘Nmo ye nɔn-jworo mo. Tete dento wone n ŋwea jege se ka ti. Konto to, nmo tete wó wane n di wonnu tento maama n na ke n pa n tete to na?’#Jeremia 17:11 21Tɔ. Wolo maama ná tiŋi jejegero dedɛ o tete tei ne ye o ba jege kolokolo Wɛ tei ne, ko wó ke kotu konto dwoŋi mo.”#Matiyu 6:19-21

Wɛ na wó taa jege de teena tei to

Matiyu 6:25-34

22Yezu daa ta ma ta de o kwaga tɔgena bam o we: “Konto ŋwaane mo a tɛ abam se á yé ta‑á jege-na lwia de logo baŋa kolokolo, ko ná ye á ni-wodiu, naa á na wó zo gwaaro telo to de. 23Kokuri á ŋwea gare wodiiru. Yera yalo Wɛ na pɛ abam to de ma gare gwaaro. 24Nam maane-na á nii bachangaaro na ye tei to. Te ba dua, ye te ta ba zage mena. Te ba jege tuli de tikeiri se te ke wodiiru da. Ko nam ye Wɛ mo nii te baŋa ne de te ni-wodiu. Abam nam tiini á jege kuri á dwoi zuna bam. 25Abam wolowolo bá wane o twoŋi o ŋwea de fenfee de, o na maŋe o jege ka lwia tei de. 26Abam na ware konto fenfee á ke to, bɛ mo ye á jege lwia de wonnu telo maama na daare to?

27Maane-na á nii gaao punnu tem na ye tei to. Tento nam ba ke totoŋa ye te ba sɔ gwaaro. Nam ta‑á yei-na we, tento jege lam te dwoi Pɛ Solomon déem na maŋe o zoore gare-nyenno telo to. 28Ko nam ná ye gaaro tem konto, tento ba jege dɛ ye nɔɔna yeini ba zwɛ-te. De konto de Wɛ ta mo pae te jege lam konto dwoŋi. Konto ŋwaane ko ná ye abam, Wɛ wó tiini o nii abam baŋa ne. Abam boboŋa muri de Wɛ.

29Yé ta‑á jege-na boboŋ-fara de á na wó ke tei se á na wodiu á di to. Á yé ta‑á jege lwia konto seeni. 30Logo baŋa dwi tiina balo na yeiri Wɛ to mo tiini ba boŋe wonnu tem konto maama boboŋa. Abam Kwo Wɛ nam maŋe o yei á na lage-te tei to. 31Abam jege se á pa á boboŋa taa tɔge Wɛ paare dem mo. Á ná ke konto, Wɛ laam wó woli abam de á logo baŋa wonnu tem.

32Amo kɔgɔ fenfee, yé pa-na foone taa jege abam. Abam Kwo Wɛ boboŋa mo lage se o pa abam tɔge á di o paare dem. 33Kwei-na á jejegero tem á yeigi se á daare á maŋe te sabu kom á ma á woli yiniga tiina. Konto mo á wó kwei á jejegero á tiŋi Wɛ telaao ne, sabia ganlɔgera na bá chɔge mɛ to. Á ná tiŋi wo-laaro Wɛ tei ne, te daa bá ba te muri. Ŋweena daa bá wane ba ŋɔ-te. Kolokolo bá wane ko mu-te ko chɔge. 34Ta‑á ke-na konto bɛŋwaane á wonnu tem na wo mɛ maama, á boboŋa wó tiini ya taa tigi dáane mo.”

Dé Teiru wom tutuuri dem memaŋa

Matiyu 24:42-51; 10:34-36; 16:2-3

35-36Yezu ta ma ta o we, “Ta‑á fɔge-na á cho á tete, ne nɔɔna balo tu wom na nwoŋi o vo se o di kadiri ye ba jege o teena se o jwoori o ba to. Ba ma fɔge ba vɔ ba gwaaro lanyerane, ye ba tɔre ba min-zwonnu ba zege ba tei ne. Ba tu wom ná tu o yi manchwo-peena, ba laam wó wane ba zaŋe lela ba pore ba pa‑o.#Maake 13:34-35 37Sɔŋɔ tu wom ná jwoori o ba, ye o tontoŋena ta ná jege ba tete ba nia, wopwolo wó taa wo ba tei ne. A tɛ abam chega ŋwaane to, sɔŋɔ tu wom laam wó pa ba jeini se ba di wodiu. O maa wó kwɛ o tete se o kwei wodiu kom o vo o tiŋi pa ba di. 38O nam ná jwoori o ba tete kokoro ne de, ye o sɔŋɔ tontoŋena bam ta ná jege ba tete ye ba ba dɔa, wopwolo wó taa wo ba tei ne.

39Ta‑á yei-na we, sɔŋɔ tu wom ya ná lɔre maŋa kalo ŋweeno na lage o ba to, o ya bá pa ŋweeno wom na chwoŋa o zo o ŋɔ. 40Konto ŋwaane abam jege se á che á tete mo, se Nabiin-bu wom lage o ba maŋa kam á na ba jege o teena to mo.”

41Piita ma bwei Yezu o we, “Dé Teiru, nmo na maŋe memaŋe dem to, ko ye debam ŋwaane mo naa nɔɔna maama ŋwaane mo?”

42Dé Teiru Yezu ma leiri o we, “Abam jege se á ta‑á tɔge chega de á boboŋ-dɛɛra, nenɛɛne sɔŋɔ tontoŋeno wolo yuu tu na yage o totoŋa o pa‑o, ye o daare o nwoŋi se o beeri to. O tu wom ma le‑o se o taa nii o dwonna tontoŋena bam baŋa ne se o daare o taa pa-ba ba ni-wodiu dɛ maama wone. 43O sɔŋɔ tu wom ná jwoori o ba, ye o ke kolo maama o na pɛ‑o se o ke to, wopwolo laam wó taa wo tontoŋeno wom konto tei ne. 44A tɛ abam chega ŋwaane to, o tu wom laam wó pa se o taa nii o jejegero maama baŋa ne mo.

45Tontoŋeno wom nam ná boŋe we, omo tu wom dáane dedɛ ye o ta wo tu, ko wó ke‑o tɛ mo? O maa wó taa jege o dwonna tontoŋena bam mo o maga, baara bam de kaana bam de. O maa di wodiiru o chɔga, ye o nyɔ sana o sui. 46Tontoŋeno wom konto tu wom laam wó jwoori o ba dɛ dem tontoŋeno wom na ba jege o teena de maŋa kalo o na wó ba o zo to. O tu wom nam ná tu o peere‑o konto, o laam wó zeili‑o o sɔŋɔ kom wone, ye o daare o pa se kotu tɔge de balo na ve Wɛ chega kam to o na waarem.

47Tontoŋeno wolo maama ná lɔre o tu wom boboŋa na lage se o ke kolo to, ye o ná wo sɛ se o ja o tete o ke konto, konto tu wó na waarem dedɛ. 48Ko daare wolo ná yeiri o tu wom na lage se o ke kolo to, ye o ná ke kolo na maŋe se o na waarem to, konto tu wó na waarem fenfee yerane mo. Wolo maama ná jege Wɛ yeino dedɛ, Wɛ wó jeeli se o na wo-laaro dedɛ konto tu tei ne. Nɔɔno wolo ná jwoŋi wonnu dedɛ se o taa nii te baŋa ne, Wɛ wó jeeli se o jwoŋi dedɛ wonto tei ne ko ja gaale.”

49Yezu daa ta ma ta o we, “Amo na tu logo baŋa to, ko ye se a tɔre mini a ma zwɛ-ko mo. Mini dem ya ná maŋe de tɔre, ko ya jege a wopwolo mo. 50Amo nam jege se a zo yaara wo. Ko maa pae se a boboŋa chɔge se ko taa nii maŋa kam ko na wó ke ko kɛ to.#Luka 22:42 51Amo na tu logo baŋa to, á boŋe we ko ye se a pa nɔɔna fɔge daane mo na? Aawo. A tu se a pa nɔɔna pɔɔre daane mo. 52Ko zege zem ko taa via, sɔŋɔ dedoa wone nɔɔna banu wó pɔɔre mo, batɔ de balei. 53Kwo de o bu wó chɔge daane. Nu de o bukɔ de wó chɔge daane. Kaane de o baro nu de maa wó chɔge daane.”#Mika 7:6

54Yezu laam ma ta de nɔn-kɔgɔ kom o we, “Abam yeini á wae á nii wɛyuu de tega baŋa á ma lɔre tega kam yibia na wó taa ye tei to. Á ná nɛ kunkwonnu na wora te zaŋa mɛ seeni doa na zege da ka nene to, á yeini á ta lela we, doa lage ka ne, ye ka wó seene ka ne. 55Ko daare gungun-koro vio ná wora ko maga, á yeini á we, lon-wea maa beena, ye ko seene ko ke konto. 56Abam ye pipiri-nyena mo! Abam wae á nii wɛyuu de tega baŋa ye á lɔre te na bere tei to chekke. Bɛ nam mo ye á ware á lɔre wonnu telo na wora te ke leile to kuri?

57Bɛŋwaane mo abam ba sɛ se á pɔɔre kolo na lana se á ta‑á ke to? 58Ko nye de nɔɔno ná jaane‑m o vo o saŋe kɔɔte ne. Abam ta ná wo chwoŋa ne á via, se n kwaane n pa á fɔge daane. Ko ná dae konto, o laam wó ja nmo o ke dedɛɛro wom jeŋa ne se o waare‑m. Wonto de laam maa wó ke nmo o tontoŋeno jeŋa ne, se o ke nmo peena diga ne. 59A tɛ nmo, nmo wó ta‑n wora taa. Nmo ná wo ŋwe jene dem maama ye bi wo daare, ba bá yage‑m.”

Currently Selected:

Luka 12: KBG

Highlight

Copy