Luka 16
16
Tontoŋeno de o jene memaŋe
1Yezu daa ta ma ta de o kwaga tɔgena bam o we: “Nadum mo wora o na jege o tontoŋeno. O tontoŋeno wom mo nii o wonnu maama baŋa ne. Nɔɔna badwonna ma vo ba ta de nadum wom ba we, o tontoŋeno wom jege o wonnu tem o chɔga. 2O ma bwoŋi o tontoŋeno wom ye o ta ded‑o o we, ‘Amo nigi nmo na ke tei to. Nmo nam wó ta bɛ mo? Nam véi n jeeli nmo na ke tei de a wonnu tem se n laam ba n bere-ne. Nmo daa‑n bá‑n wane n ta‑n ye amo tontoŋeno.’
3Tontoŋeno wom ma bwɛ o tete ne o we, ‘Amo nam wó ke tɛ mo? Amo tu wom lage o le-ne o totoŋa yam ne. Amo ba dana se a wane a va. Chaveera maa jege-ne se a taa kare a lwoora. 4Amo nam yei a na wó ke tei se, o ná le-ne a totoŋe dem ne, se nɔɔna taa jeeri-ne lanyerane ba sam ne to.’
5O na boŋe konto to, o ma bwoŋi balo na jege o tu wom jene to dedoa dedoa pa se ba ba o tei. O ma bwei boboa nɔɔno wom o we, ‘Nmo jege amo tu wom jene ko maŋe tɛ ta mo?’ 6Nɔɔno wom ma leiri o we, ‘Ko ye nuga garewɛ bi (100) mo.’ Tontoŋeno wom ma ta‑o we, ‘Nii tɔnɔ kolo nmo jene dem na popone da to. Nam kwei n ja n vo n jeini n popone we, garewɛ finnu (50).’
7O daa ta ma bwei nɔɔno wodwoŋi o we, ‘Nmo jege amo tu wom jene ko maŋe tɛ ta mo?’ O ma leiri o we, ‘Ko ye mena ywollu bi (100) mo.’ Tontoŋeno wom ma ta‑o we, ‘Kwei tɔnɔ kom n popone we, ywollu funɔnɔ (80).’
8Nadum wom na lɔre o tontoŋeno-balɔrɔ kom na ke tei to, o maa we o tiini o kwaane dedɛ de o na mɛ o swa o lɔre o na wó ke tei to. Kokuri mo, balo na jege kugu jei logo baŋa ne to yeini ba ma swa mo de ba na ke ba dwonna tei to, se ko dwoni balo na ye Wɛ pwooni dem nyem to na ke tei.
9Amo nam tɛ abam we, á jege se á kwei logo baŋa sabu á ma á woli nɔɔna se ko pa á di badwoŋo daane. Á ná ke konto, ye á sabu kom ta ná ba jege kuri ko pa abam, ba laam wó jeeri abam lanyerane Wɛ sɔŋɔ ne se á ta‑á wora taa wuu. 10Nɔɔno wolo na tɔge chega de woŋo fenfee to wó taa tɔge chega de wo-kamunnu mo. Ko daare wolo na ba tɔge chega de woŋo fenfee to bá taa tɔge chega de wo-kamunnu.#Matiyu 25:21 11Konto to, abam ná ware á tɔge chega de logo baŋa sabu, Wɛ bá sɛ se o kwei jejegero telo na ye chekke to o ke abam jeŋa ne. 12Abam ná ware á tɔge chega de wonnu telo ba na kwei ba ke abam jeŋa ne se á nii te baŋa ne to, Wɛ bá sɛ se o pa abam wonnu telo na wó taa ye abam tete nyem to.
13Sɔŋɔ tontoŋeno bá wane o kwei boboŋe dedwe se o ma toŋe o pa o yuu tiina balei. O wó taa chuli dedoa kam ye o daare o swoi wodwoŋi wom, naa o wó taa nege dedoa kam ye o daare o gwooni wodwoŋi wom. Konto ŋwaane, abam bá wane á pa se Wɛ taa ye á tu, ye á daare á tɔge sabu-laga de.”
14 Farisi tiina na wora to ma ni Yezu na tage kolo maama to. Ba na ye sabu-lagena to, ba maa jege‑o ba mɔna. 15O ma ta de-ba o we, “Abam mo lage se á bere á tete nɔɔna yiga ne we á jege chega. Wɛ nam yei á bochara na ye tei to. Woŋo kolo nɔɔna na pae ko ye wo-kamunu to mo ye wo-zɔɔne Wɛ tei ne.#Memaŋa 16:5
16Wɛ sɛɛm tu Jɔn ta na wo tu to, nɔɔna déem jege Moses nia yam de faŋa faŋa Wɛ sampwori sem na bere kolo to mo ba tɔga. Ko zege maŋa kalo Jɔn na tu to, ko ye Wɛ paare dem kwor-ywoŋa kam mo wora se nɔɔna sɛ-ka. Nɔɔna maama tiini ba kwaane se ba tɔge ba zo Wɛ woro kom wo.
17Wɛyuu de tega baŋa ná lage te jei, konto wó taa ye mɔle ko dwoi woŋo fenfee ná lage ko le Wɛ nia yam wone.
18Nɔɔno wolo ná yage o kaane ye o daare o di kaane wodwoŋi, konto tu keim dem de kabwoŋa ye bedwe mo. Nɔɔno wolo ná zaŋe o di kaane wolo o tete baro na yage‑o to, konto tu keim dem de bwoŋa de ye bedwe mo.”
Nadum de yiniga tu memaŋe
19Yezu ta ma ta o we, “Nadum mo wora. O ma yeini o zo gare-nyenno telo na tiini te lana to. Dɛ maama mo o nae ywoni ye o di o ni. 20Yiniga tu de maa wora, o yere mo Lazaru. O yera yam maama jege ŋɔna. Nɔɔna ma yeini ba ja‑o ba vo ba tiŋi nadum wom sɔŋɔ woro ne se o taa lwoora. 21O maa lage se o taa di wodiu kolo nadum wom na di ye ko siiri tega ne to mo. Kukuri de maa tui se deilimi o ŋɔna yam.
22Yiniga tu wom laam ma ba o te. Wɛ malese ma ba se kwei‑o se ja vo telaao pa se o jeini Abaraham takeiri ne. Nadum wom de ma te. Ba ma kwei‑o ba suli. 23O ma vo o zo churu mini dem jeiga. O maa wora o yaare dedɛ. O ma kwoni o yuu wɛɛne o na Abaraham na wo yiga yiga ye Lazaru jei o takeiri ne. 24O ma laare o ta ded‑o o we, ‘Amo kwo Abaraham, popo duri amo ŋwaŋa. Mini dem mo pae se amo yera chɛ de yaara. Konto ŋwaane a lwoori‑m se n pa Lazaru vo o ma o noa o laŋe na o ba o ma bugi amo dindeilimi.’
25Abaraham ma leiri‑o o we, ‘Amo bu, nam guli nmo déem na ŋwe ye n jege wo-laaro telo maama n na lage to. Lazaru maa yeini o nae yaara yerane. Ko daare leile konto, wonto bochare laam peini ye nmo tete yera chɛ de yaara. 26Ko woli da, gwoŋ-chanluŋu mo tigi debam tetare laŋa ne ko che. Nɔɔn-nɔɔno bá wane o zege ywo o vo o bɛ o yi abam tei. Nɔɔn-nɔɔno de bá wane o zege abam seeni o bɛ o yi debam tei.’ 27Nadum wom ma ta o we, ‘Amo kwo, ko na ye konto to, a lwoori‑m se n toŋe Lazaru se o vo amo kwo sɔŋɔ. 28A jege nyaana banu mo ye a ba lage se ba tɔge ba ba yaara jei sento. Nam toŋe‑o se o vo o kaane-ba.’
29Abaraham ma ta ded‑o o we, ‘Ba maŋe ba jege twanno telo Moses de Wɛ sampwori sem na popone to se ba taa tɔga. Ba nam jege se ba sɛ berem dento mo.’ 30O ma leiri o we, ‘Amo kwo Abaraham, ba bá sɛ konto. Nɔɔno nam ná bi toone wone ye o vo ba tei o bere-ba, ba laam wó leiri ba wo Wɛ ŋwaane.’ 31Abaraham ma leiri nadum wom o we, ‘Ba ná wo sɛ Moses de Wɛ sampwori sem maama berem dem, nɔɔno ná maŋe o bi toone wone, ba ta bá sɛ we o taane dem ye chega.’ ”
Currently Selected:
Luka 16: KBG
Highlight
Share
Copy
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
