Luka 18

Wɛ-lworo memaŋe

1Yezu déem ma maŋe memaŋe o bere o kwaga tɔgena bam we, ba jege se ba taa lwoori Wɛ taa, se ba yé yage teenem. 2O ma maŋe o bere-ba o we: “Teo kodwoŋi ne mo pɛ wodwoŋi ya wora ye o ba kɔre Wɛ. O maa ba jege nɔɔna ŋwaŋa. 3Kadeim wodwoŋi de maa wora teo kom konto ne. O maa yeini o vei pɛ wom tei maŋa maama ye o lwoori wolim o tei ne o we, ‘Nam pa se a di bora a dono wom tei ne.’

4Pɛ wom maa ba sɛ o taane dem. Ko maa wora ko wora ye o laam boŋe o tete ne o we, ‘Amo ba kɔre Wɛ, ye a ba jege nɔɔna ŋwaŋa. 5Ko daare kadeim wonto nam jege-ne o daana. Konto ŋwaane mo a jege se a bore bora a pa‑o. Ko ná dae konto, o wó taa tui a tei mo taa se ko taa nii a toone.’ ”

6Dé Teiru wom laam ma ta o we, “Nii-na pɛ-balɔrɔ kom na boŋe se o sɛ o ke kadeim wom na lwoori‑o kolo to. 7Ko daare ko ná ye Wɛ, o bá sɛ se o woli o tete nɔɔna balo o na kuri to pa se ba di bora na? Ba ná tiini ba lwoori‑o maŋa maama wea de tete, o bá ke lela o woli-ba na? 8A tɛ abam we, o wó pa se ba di bora ye o bá dáane. Ko daare Nabiin-bu wom ná jwoori o ba logo baŋa, nɔɔna ta wó taa jege wo-dedoa ded‑o na?”

Farisi tu de lampwoo laro memaŋe

9Yezu daa ma maŋe memaŋe dedwoŋi se o bere balo na boŋe ba pa ba tete we ba jege chega Wɛ tei ne ye ba gwooni ba dwonna to. 10O ma maŋe o bere-ba o we, “Nɔɔna balei mo wora. Ba dedoa ye Farisi tu mo. Wodwoŋi wom maa ye lampwoo laro. Ba ma zaŋe ba vo Wɛ diga kam se ba ware Wɛ. 11Ba na zo to, Farisi tu wom ma zege o ware Wɛ o tete ne ye o we, ‘Wɛ, a ke nmo lei de amo na dae nɔn-balɔrɔ ne nɔɔna badwonna na ye tei to. Banto ye ŋweena, de wo-lwan-keira, de ka-lagena. A ke nmo lei de a na dae nenɛɛne lampwoo laro wonto. 12Da yalei bakwɛ maama wone amo yeini a vɔ ni mo Wɛ ŋwaane. Wonnu telo maama a na nɛ to, a yeini a le Wɛ-teiri pɛɛra te wone a pa nmo.’#Memaŋa 20:6

13Ko daare lampwoo laro wom maa zege dáa ne o ware Wɛ. O maa ba lage se o kwoni o yuu wɛɛne, ye o mage o takeiri o we, ‘Wɛ, amo ye nɔn-chechɔgɔ. Nam duri amo ŋwaŋa.’

14Tɔ. Nɔɔna banto balei na ware Wɛ ba ti ye ba laam jwoori sɔŋɔ to, ko ye lampwoo laro wom mo nɛ chega Wɛ tei ne, ye ko dae Farisi tu wom. Kolo ŋwaane wolo ná bere o tete kamunim, konto tu wó ba o ji nɔn-balaŋa mo. Wolo nam ná gwooni o tete, Wɛ wó zeiŋi konto tu nɔɔna yiga ne.”

Bu-balwa maŋe de Wɛ paare dem

Matiyu 19:13-15; Maake 10:13-16

15Nɔɔna badwonna maa jaane ba bu-balwa ba tui Yezu tei se o daŋe o jea ba baŋa ne. O kwaga tɔgena bam na nɛ ba na ke tei to, ba ma zaŋe ba bwɛ-ba se ba yé taa ke konto. 16Yezu laam ma bwoŋi bia bam pa se ba ba o tei, ye o we, “Yage-na se bia bam taa tui a tei, se á yé zaŋe á che-ba. Kokuri Wɛ paare dem ye banto dwi nyem mo. 17Chega ŋwaane to, nɔɔno ná wo sɛ se Wɛ taa tei‑o ne bu-balaŋa tei, o bá na chwoŋa se o zo Wɛ woro kom wone.”

Naduna wó wane ba na ŋwea Wɛ tei ne na?

Matiyu 19:16-30; Maake 10:17-31

18Juu tiina yiga tu wodwoŋi déem ma bwei Yezu o we, “Berem tu, n ye nɔn-ŋom. Nam bere-ne kolo amo na wó ke se a wane a na ŋwea kalo na ba jege kweelim Wɛ tei ne to.” 19Yezu ma ta ded‑o o we, “Bɛŋwaane mo n ta n we, a ye nɔn-ŋom? Nɔɔn-nɔɔno tera o na ye nɔn-ŋom, ko ná dae Wɛ yerane. 20Nmo maŋe n yei Wɛ nia yam na bere kolo to. Yé zaŋe n ke kabwoŋa. Yé go nɔɔn-nɔɔno. Yé zaŋe n ŋɔ. Yé fɔ vwa n pa n dwoŋi. Ta‑n zuli n kwo de n nu.”#Nwoŋim 20:12; Nia Gulim 5:16-20

21Nɔɔno wom ma ta o we, “Ko zege amo biini ne mo amo maŋe a tɔge nia yanto maama.” 22Yezu na nigi o na tage kolo to, o ma ta ded‑o o we, “Ko nam ta gɛ ŋo dedoa se n ke. Kwei wonnu telo maama n na jege to n yeigi, se n laam maŋe te sabu kom n pa yiniga tiina. Konto wó pa se n wo-laaro tiini te puli Wɛ telaao ne. Nmo ná ke konto, se n laam ba n ta n tɔge-ne.” 23Nɔɔno wom na nigi konto to, o wo ma chɔge dedɛ, o na ye jejegero dedɛ tu to ŋwaane.

24Yezu ma lɔre ko na ke‑o tei to. O ma ta o we, “Naduna ná lage ba zo Wɛ paare dem wone, ko wó taa tiini ko chana ko pa-ba. 25Ko wó taa chana ko pa-ba ko dwoi kone ná lage se de da gare-lwei bɔɔne de kɛ tei to.”

26Nɔɔna balo na nigi kolo Yezu na tage to ma bwei‑o ba we, “Ko nam ná ye konto, wɔ mo wó wane o na ŋwea Wɛ tei ne?” 27O ma leiri-ba o we, “Kikia yalo nabiina na bá wane ba ke to mo Wɛ wae o ke-ya.”

28Piita laam ma ta o we, “Nii mo. Debam yage dé tete wonnu mo ye dé daare dé tɔge nmo.” 29Yezu ma ta de-ba o we, “A tɛ abam chega ŋwaane to, nɔɔno wolo maama ná tɔge Wɛ paare dem ŋwaane ye o yage o sɔŋɔ, de o kaane, de o nu-bia, de o kwo, de o nu, de o bia, 30konto tu wó seene o jwoŋi kolo maama o na yage to se ko maŋe de kuni dedɛ dedɛ mo Wɛ tei ne. Zem da yam ne mo o wó jwoŋi konto. Ko daare maŋa kalo na wó ba to, konto tu wó na ŋwea kalo na ba jege kweelim Wɛ tei ne to.”

Yezu daa ŋɔɔne o toone taane

Matiyu 20:17-19; Maake 10:32-34

31Yezu déem ma pwɛ o nɔɔna fuga-balei bam kɔgɔ kom wone, ye o ta de-ba o we, “Ta‑á yei-na we, dé na maa vei Jerusalem to, wonnu telo maama faŋa faŋa Wɛ sampwori sem na popone Nabiin-bu wom ŋwaane to jege se te ji chega mo. 32Ba wó ja amo ba ke dwi-gɛ tiina bam jeŋa ne. Ba wó ke amo ba mɔne, ye ba twe-ne. Ba maa wó twe lileeru ba yage a yera ne, 33ye ba kwei kaasa ba ma fere-ne, ye ba laam daare ba go-ne. Da yatɔ dɛ ne a maa wó jwoori a bi toone wone.”

34Yezu na tage konto to, ba wo nigi o taane dem kuri. Ba maa yeiri o na jege kolo o ŋɔɔne to, de kuri na seigi ba tei ne to ŋwaane.

Yezu yɔɔre lilwei

Matiyu 20:29-34; Maake 10:46-52

35Yezu déem ma vo o twɛ teo kodwoŋi, ko yere mo Jeriko. Lilwei maa jei chwoŋa kam ni ne ye o lwoora. 36O ma ni nɔn-kɔgɔ na tɔge da ko maa kɛa. O ma bwei se o lɔre kolo na ke to. 37Ba ma ta ba bere‑o we, ko ye Nazarete tu Yezu mo tɔge dáane o maa kɛa. 38O ma laare baŋa baŋa o we, “Yezu, Pɛ David dwi tu, duri amo yiniga!” 39Nɔɔna balo na wo kɔgɔ kom yiga ne ba maa vei to ma bwɛ‑o se o pu o ni. O laam ma tiini o laare dedɛ ye o we, “Pɛ David dwi tu, duri amo yiniga!”

40Yezu ma zege ye o pa se ba vaŋe lilwei wom ba ja ba o tei. O na yi o tei to, Yezu ma bwei‑o o we, 41“Nmo lage se a ke bɛ mo a pa nmo?” O ma leiri o we, “Amo tu, amo lage se a jwoori a taa nae mo.” 42Yezu ma ta ded‑o o we, “Ta‑n nae. Nmo na ke n wo-dedoa de amo tei to mo pɛ se n na yazura.” 43Yezu na tage konto bedwe baŋa ne to mo lilwei wom yia jwoori ya nae. O ma zaŋe o tɔge Yezu ye o tei Wɛ lanyerane. Nɔɔna bam maama na nɛ kolo na ke to, ba de maa tei Wɛ.

Currently Selected:

Luka 18: KBG

Highlight

Copy