Luka 6

Yezu Krista dwoi siu dɛ chullu

Matiyu 12:1-14; Maake 2:23–3:6

1Juu tiina siu dɛ dedwoŋi daa ma yi. Yezu de o kwaga tɔgena bam déem ma tɔge daane ba da kara wo ba maa kɛa. Ba na maa vei to, o kwaga tɔgena bam maa bwori mena ba yu ba dona.#Nia Gulim 23:25 2Farisi tiina de tɔge ba wora. Ba ma bwei we, bɛ mo ye banto ke totoŋe delo na chɔge dé siu dɛ chullu tem to? 3Yezu ma leiri-ba o we, “Abam ta wo fɔge á ga Wɛ tɔnɔ kom na bere Pɛ David taane tei to na? Ko bere we kana déem jege o de o nɔɔna bam. 4Konto ŋwaane o ma vo o zo Wɛ diga kam, ye o kwei bworobworo kolo na tigi da Wɛ ŋwaane to. Bworobworo kom konto chula se nɔɔno di-ko, ko ná dae Wɛ kaanem tiina yerane. David déem di bworobworo kom, ye o daare o pa o nɔɔna bam de tɔge ba di.” 5Yezu daa ta ma ta o we, “Konto to, Nabiin-bu wom jege dam siu dɛ chullu tem baŋa ne.”

6Konto na kɛ to, siu dɛ dedem daa ma yi. Yezu déem ma vo o zo Juu tiina jeerim diga. O maa wora o bere-ba Wɛ taane. Nɔɔno wodwoŋi maa tɔge o wora, o jazem jeŋa kam na tega. 7Wɛ nia zamesem tiina de Farisi tiina de maa wora. Banto maa kwaana ba lage chwoŋa se ba bere we Yezu ke o tusi. Konto ŋwaane ba déem jei ba yere‑o se ba nii, o wó sɛ o yɔɔre nɔɔno siu dɛ dem ne naa o bá sɛ. 8Yezu ma lɔre ba na boŋe tei to. O ma ta de je-tega kam tu o we, “Zaŋe wɛɛne n ba n zege nɔɔna maama tetare ne.” O ma zaŋe o nwoŋi o zege da.

9Yezu ma bwei nɔɔna bam o we, “Chullu bere we bɛ mo? Kɔ mo tɔge chwoŋa, nɔɔno ná ke o dwoŋi lanyerane siu dɛ dem ne, naa o ná ke‑o lwarem? Kɔ mo lana, nɔɔno ná vere o dwoŋi ŋwea siu dɛ dem ne, naa o ná go‑o?”

10O na tage konto to, o ma nii ba maama ye o daare o ŋɔɔne de je-tega kam tu o we, “Twe n jeŋa kam.” O na ke konto to, o jeŋa kam ma jwoori ka ke lanyerane. 11Nɔɔna bam na nɛ konto to, ba ma fole dedaane Yezu, ye ba bane daane se ba nii ba na wó wane ba ke‑o tei to.

Yezu kuri o totoŋa nakwa fuga-balei bam

Matiyu 10:1-4; Maake 3:13-19

12Da yam konto ni ne, Yezu ma vo o di peo kodwoŋi yuu se o ware Wɛ. Dɛ dem konto maama o wora o ware Wɛ taa, se ko ba ko yi te-pora. 13Tega na poore ka ti to, o ma bwoŋi o kwaga tɔgena bam se ba ba o tei. O laam ma le nɔɔna fuga-balei ba wone, ye o tiŋi-ba se ba taa ye o totoŋa nakwa bam. 14Ba yera mo tento:

Simon wolo Yezu na pɛ o yere we Piita to.

Anduru wolo na ye Simon nyaane to.

Jemsi, de Jɔn, de Filipi, de Batoloma, 15de Matiyu, de Tomas.

Jemsi wolo na ye Alafayu bu to, de Simon wolo ba na bwoi‑o we Zɛlota tigisim#6:15 Zɛlota tigisim nyena tiini ba chuli Rom tiina, ba na bɛɛse Juu tiina to ŋwaane. nyem to, 16de Judas wolo na ye Jemsi bu to, dedaane Judas Yisakara wolo déem na wó ba o yeigi Yezu o pa nɔɔna to.

17Yezu ma tu peo kom yuu ne. O dedaane o tontoŋena fuga-balei bam ma vo ba yi tega kalo na mae daane to. O ma zege da, dedaane o kwaga tɔgena dedɛ, de nɔn-kɔgɔ dedɛ maŋe ko gilimi ko su jei sem maama. Banto déem nwoŋi jei dwi dwi mo, Judea teene dem maama wone. Badwonna nwoŋi Jerusalem. Badwonna de ma nwoŋi Tura de Sidon jei selo na wo naneo kom ni ne to. 18Ba déem tu Yezu tei se ba cheigi o taane dem, se ba daare ba na yazura de ba jaweero tem. Nɔɔna badaara wora chichiri na jege-ba se daana. Ko ma gare banto de yera ne. 19Nɔɔna bam maama maa kwaana se ba dwei‑o, kolo ŋwaane o jege dam delo na wó pa ba maama na yazura to.

Wopwolo de lwia taane

Matiyu 5:1-12

20Yezu déem ma nii o tɔgena bam seeni ye o we:

“Yiniga na jege abam balo to mo jege yu-ywoŋo,

á na tɔge á di Wɛ paare dem to ŋwaane.

21Kana na jege abam balo leile to mo jege yu-ywoŋo,

Wɛ na wó pa á bochara peini de á fera yam to ŋwaane.

Abam balo yiga na nyɔne leile to mo jege yu-ywoŋo,

Wɛ na wó pa á ba á di ywoni to ŋwaane.

22Nɔɔna ná chuli abam, ye ba ná vae abam, naa ba twe abam, naa ba ná jege abam ba yaala, á jege yu-ywoŋo mo.#1 Piita 4:14 Ba ná ke abam konto dwoŋi, á na tɔge amo wolo na ye Nabiin-bu wom to ŋwaane, 23se á ta‑á jege wopwolo lanyerane dɛ dem konto ne. Ta‑á yei-na we ba nabaara de déem ke faŋa faŋa Wɛ sampwori sem konto mo. Á faŋe á ta‑á yei ko ni ne, se á wó na nyɔɔre dedɛ Wɛ tei ne.

24Ko daare abam balo na ye naduna to, lɛɛro yi abam,

á na maŋe á na á wo-laaro tem ye á daa bá na to ŋwaane.

25Abam balo na jege wodi-fɔrɔ á di leile to, lɛɛro yi abam,

á na wó ba á yaare de kana to ŋwaane.

Abam balo na di ywoni leile to, lɛɛro yi abam,

á na wó ba á keeri ye á yi-na lu to ŋwaane.

26Nɔɔna maama ná jege abam ba zula, lɛɛro yi abam. Ta‑á yei-na we ba kwoa nakwa de déem zuli balo na pae ba ye Wɛ sampwori ye ba dae to.”

Swono taane

Matiyu 5:38-48; 7:12

27Yezu daa ma ta o we, “Abam balo na cheigi-ne to nam nii-na. Ta‑á swoi á dona. Ta‑á ke balo na chuli abam to lanyerane. 28Ko ná ye balo na sɔɔle ba chɔge abam to, se á swɛ ba swolim. Lwoori-na Wɛ á pa balo na jege abam ba twea to. 29Nɔɔno ná lɔge nmo popɔŋɔ, se n guni kodwoŋi kom se o daa lɔ. Nɔɔno ná vere nmo gare-bwora o ja viiri, se n pa‑o chwoŋa se o kwei n gare-bu o woli da. 30Nɔɔno wolo maama ná lwoori woŋo nmo tei ne, se n pa‑o. Nɔɔno ná kwei nmo woŋo o ja viiri, yé bwei ko bwia se n jwoŋi. 31Nam ta‑á ke-na á dwonna lanyerane, se ko maŋe de á na lage se banto taa ke abam tei to.

32Abam nam ná swoi balo de na swoi abam to yerane, á wó na nyɔɔre na? Nɔn-chechɔgero de maŋe ba swoi ba dwonna konto dwoŋi mo. 33Abam ná ke lanyerane de balo na ke abam lanyerane to yerane, á wó na nyɔɔre na? Nɔn-chechɔgero de maŋe ba ke konto dwoŋi mo. 34Abam ná jene sabu á pa balo yerane na wó wane ba jwoori ba ŋwe to, á wó na nyɔɔre na? Nɔn-chechɔgero de yeini ba jena ba pa ba dwonna se ba jwoori ba jwoŋi ko ni ne. 35Abam nam jege se á ta‑á swoi á dona, ye á ta‑á ke-ba lanyerane. Abam nam ta‑á jene sabu á pa nɔɔna, ye á yage teenem. Yuu-tu Baŋa Wɛ mo yeini o zeini banegero nyena de puseŋ-nyena mo. Á ná yeini á ke konto dwoŋi, á wó na nyɔɔre dedɛ Wɛ tei ne, de á na bere we á ye o bia tei to. 36Ta‑á duri-na nɔɔna ŋwaŋa, ne á Kwo Wɛ na ye tei to.

Zeinim taane

Matiyu 7:1-5, 16-20, 24-27; 12:33-35

37Abam nam yé zaŋe á ŋɔɔne á dwonna taane, se á yé pa Wɛ ŋɔɔne abam de taane. Yé ta‑á jege-na nɔɔna á yaala, se á yé pa Wɛ yaale abam de. Nam yage-na á ma chɛ á dwonna, se Wɛ laam wó yage abam de wɛleera o ma chɛ abam. 38Ta‑á pa-na nɔɔna wolim, se Wɛ wó woli abam de konto. Wɛ wó pa á na wolim lanyerane, ne ba na kwei bɔŋa ba maŋe ba vuuri ka ni ye ka siiri to. Abam na ke á dwonna tei to, Wɛ wó ke abam de konto se ko taa mae daane.”

39Yezu laam ma maŋe memaŋa o bere-ba o we: “Lilwei wó wane o vaŋe o dwoŋi lilwei mo na? Ba ná ke konto, ba maama bá to gwoŋo wone na? 40Zenzamso bá wane o dwoni wolo na bere‑o to. Ko daare zenzamso ná zamese o ti maama, o de wolo na bere‑o to wae ba ye bedwe.

41Abam nye de nɔɔno ná nii o dwoŋi yi ne o na weo balaŋa da, ye o yiga tera de o tete yi na jege da-lɔŋɔ to. Ko maŋe se ko taa ye konto na? 42Nɔɔno wolo ná wo maane we o jege da-lɔŋɔ o yi ne, kotu wó taa jege chwoŋa se o ta de o dwoŋi we, ‘A badwoŋi, pa se a le weo n yi ne’ na? Abam ye pipiri-nyena de á na ke á dwonna tei to. Abam nam jege se á le á tete yi da-lɔŋɔ kom mo, se á laam wane á nii lanyerane se á le á dwoŋi yi weo kom.

43Nɔɔno kikia wó pa á lɔre o na seene o ye tei to. Tei-ŋoŋo tera ko na wó lei bu-kokwaaro. Tei-jawona nam tera ko na wó lei bu-ŋona. 44Abam ná lage se á lɔre tio maama na ye kolo to, á wó ma ko bia mo á lɔre. Nmo bá‑n na mɔɔro sabara yuu ne, naa n na swa kaligwoŋo o kuri ne n twɛ. 45Nɔn-ŋom wó taa jege wo-laaro mo o boboŋa ne pa se o jege-te o ŋɔɔna. Ko daare nɔn-balɔrɔ wó taa jege wo-balwaaro mo o boboŋa ne pa se o jege tento o ŋɔɔna. Nɔɔno na jege kolo maama ko su o boboŋa to mo wó siiri o ni taane wone.

46Bɛŋwaane mo á yeini á zuli-ne ye á bwoi amo we, ‘Dé Teiru, dé Teiru’, ye á ta ba sɛ amo ni?#Matiyu 7:21 47Wolo maama ná tu amo tei o jwoŋi a taane dem ye o daare o tɔge-de, amo wó bere abam konto tu na nye tei to. 48Wonto nye de nɔɔno wolo na lage o lɔ o sɔŋɔ to. O ma ko gwoŋo o yi pelɔrɔ, ye o laam chwi sɔŋɔ kom kuri pelɔrɔ kom baŋa ne. Buga ma su ka wɛɛle ka mage sɔŋɔ kom, ye na bam wo wane ba chwoori-ko, o na lɔge-ko lanyerane ye ko dana to ŋwaane. 49Ko daare wolo maama nam na jwoŋi amo taane dem ye o ba tɔge-de to nye de nɔɔno wolo na pɔpɔ o lɔ o sɔŋɔ kasolo baŋa ne, ye o wo koge gwoŋo se o ma chwi-ko to. Buga ma su ka wɛɛle ka mage sɔŋɔ kom ka gwɛɛne, pa na bam chwooli ko maama.”

Currently Selected:

Luka 6: KBG

Highlight

Copy