Maake 16
16
Yezu bi toone wone
Matiyu 28:1-8; Luka 24:1-12; Jɔn 20:1-10
1Ba siu dɛ dem ma ba de kɛ. Mary Magadala, de Mary wolo na ye Jemsi nu to, de Salomi ma zaŋe ba nwoŋi ba vo ba yeigi terale nuga se ba ma turi Yezu yera yam. 2Wɛ na wora de puli dɛ dem na saŋe siu dɛ dem to,#16:2 Ko kuri mo ye ‘Sunday’ tetete. ba maa wo chwoŋa ne ba maa vei yibeeli dem ni. 3Ba na maa kɛ to, ba ma bwei daane ba we, “Wɔ mo wó bibili kandwɛ-kamunu kom o yage o pa debam?” 4Kandwɛ dem na maŋe de ye kamunu to mo pɛ ba ŋɔɔne konto.
Ba na yi jei sem to, ba ma fɔge ba nii dedaane kandwɛ dem bibili de tigi dáa ne. 5Ba ma vo ba zo bɔɔne dem wo. Ba na zo to, ba ma na nɔn-doŋo na jei da ba jazem seeni. O déem zo gare-pwon-dedɔrɔ mo. Ba na nɛ‑o to, ko ma pa ba yera sɔɔre. 6O ma ta de-ba o we, “Yé ta‑á kɔre-na foone. Abam lage se á na Nazarete tu Yezu wolo ba na jaane ba pa dagara kam yuu ne ba go to mo. O nam tere ywo. Wɛ bi‑o mo. Nii-na ba ya na tiŋi o yera yam mɛ to. 7Nam véi-na á ta de Piita de o kwaga tɔgena bam maama we, o lage o tɔge yiga o vo Galili se á vo á na‑o dáane. Ko wó ke ne o na maŋe o ta o bere abam tei to.”
8Kaana bam na nigi konto to, ba yera maa sae de foone ye ba boboŋa vugimi. Ba ma nwoŋi bɔɔne dem wone ba duri ba kɛ. Foone na jege-ba konto to, ba na maa vei to, ba maa wo tage kolo na ke to ba bere nɔɔn-nɔɔno.
Yezu bere o tete nɔɔna badwonna
Matiyu 28:9-10, 16-20; Luka 24:13-53; Jɔn 20:11-23; Kikia 1:9-11
[9Dɛ dem Yezu na bi tetete to maa ye dɛ delo na saŋe Juu tiina siu dɛ dem to.#16:9-20 wo popone ko tiŋi tɔn-dwonnu tem maama wone. Wɛ na bi‑o to, o ma bobo o bere o tete Mary Magadala tei ne. Wonto maa ye wolo o ya na zeili setaana yarepɛ o tei ne to mo. 10Mary laam ma vo o ta o bere balo ya na me de Yezu to. O tu ba tei de ba wo chɔge dedɛ ye ba keera. 11Ba na nigi we Yezu jwoori o bi toone wone ye Mary na‑o to, ba maa wo sɛ o taane dem.
12Ko kwaga seeni, Yezu ma leiri o yibia ye o bere o tete o nɔɔna bam balei tei ne. Ba déem ya nwoŋi Jerusalem mo ba maa vei te-balaŋa kadwoŋi. 13Ba na nɛ‑o to, ba ma jwoori ba vo Jerusalem ba ta ba bere ba dwonna kwaga tɔgena bam. Banto daa ta wo sɛ we ko ye chega.
14Ko maama na ke to, Yezu laam ma ba o bere o tete o nɔɔna fuga-dedoa bam tei ne, ba na wora ba di wodiu maŋa kalo to. O ma bwɛ-ba de ba boboŋa na muri Wɛ tei ne, kolo ŋwaane ba ve se ba sɛ balo na tage ba bere-ba we wonto jwoori o bi ye ba na‑o to.
15O laam ma ta de-ba o we, “Zaŋe-na á vo logo baŋa jei maama se á tɔɔle Wɛ kwor-ywoŋa kam á bere nabiina maama.#Kikia 1:8 16Wolo maama ná sɛ taane dem ye o daare o jwoŋi sɛɛm Wɛ ŋwaane, Wɛ wó jwoŋi konto tu ŋwea. Ko daare balo maama na ba sɛ to wó ga bora Wɛ yiga ne. 17Balo na sɛ amo to wó wane ba taa ke wo-kenkagela yalo na bere Wɛ dam to. Ba wó tɔge amo yere ŋwaane ba zeili setaana nɔɔna tei ne.#Luka 10:17 Ba wó taa ŋɔɔne ta-gɛ. 18Ba ná jaane basankwe de ba jea, se bá ke-ba kolokolo.#Kikia 28:3 Ba ta ná nyɔge chɔŋɔ kolo na goe nɔɔna to, konto de bá chɔge-ba. Ba wó wane ba daŋe ba jea jaweena baŋa ne pa se ba na yazura.”
19Dé Teiru Yezu na ŋɔɔne o bere-ba konto to, Wɛ laam ma kwei‑o o ja di telaao. O ma vo o jeini Baŋa Wɛ jazem seeni o wora.#Kikia 1:9-11; Hiburu 8:1 20O na diini telaao konto to, o kwaga tɔgena bam ma nwoŋi ba vo ba beeri jei maama ne ba bere nɔɔna Wɛ chega kam. Dé Teiru wom maa wo ba tei ne o toŋa. O ma pa-ba dam se ba taa ke wo-kenkagela se ko bere we o taane delo ba na bere to seene de ye chega.]
Currently Selected:
Maake 16: KBG
Highlight
Share
Copy
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
