HMOTAOPAZY 6
6
Machâ pasari raopazy
1Cha nohzy liata, pachupazy ama pôh via lymâ nahta, noh chareih ama hmo raipa liata ama nôhmeizy ama pachâ tyh leipa vâta, Krikâh Zuzy cha Hebraizy chô liata paphôh ei ta. 2Pahrawh hleinozy ta pachupa zydua awpakhy ei ta, “Tlâhkhai liata chakaona peimawhpazy vâta, Khazohpa bie chho bâhsaipa pha aw vei. 3Chavâta unawh saih u, nama hry liata Thlahpa nata sona ta a biepa, chyhsa moh phapa pasari a tlyh teh u, cha hmozy a pachâtuhpa châta âmo cha eima rao aw. 4Keimo deikua cha thlahchhâna nata bie chho chakaona liata eima daihti eima hmâh aw,” tah ei ta. 5Cha bie chata zawpi zydua palysa ta, ngiapâna nata Thlahpa Pathaihpa ta a biepa Stiphana nata Phili, Prôkôrâ, Nikanaw, Timô, Pâmenâ nata Zuzy phohlypa Antiôkâ khihpa Nikôla zy a tlyh ei ta. 6Cha chyhsazy cha lyuhchâpazy hmiakô liata paduasa ei ta, ama chô liata ku pahniehpa ta, thlahchhâpa ei ta.
7Chatawhcha Khazohpa bie cha pôh lymâ ta, pachupazy maluh cha Zerusale liata thata pôh ta, theihthaipa hluhpi chhao ta zo ei ta, amâ ngiapâ haw.
Stiphana patuna
8Stiphana cha ngiachhiena nata hmotaotheina ta bie ta, chyhsazy hry liata ngiana nata hmonoâhpa rônah ngaitapazy tao lymâ ta. 9Sei Puapa sahlao pakhyna o ama tahpa tawhta chyhsa thokha, Kurini, Alezandria, Silisia nata Asia râhzy tawhta Zu chyhsazy vaw thyu ei ta, Stiphana bie cha vaw chakhia ei ta. 10Châhrasala sona nata Thlahpa ta bie a reipazy cha ei thei leipa ei ta. 11Arulâta chyhsazy pasyu ei ta, cha chyhsazy chata, “Mawsi nata Khazohpa a reipachhiena biezy eima thei,” tah ei ta. 12Zawpizy, machâzy nata ryhpa pachutuhpazy pasyu ei ta, Stiphana cha tei ei ta, patupa ta, ryureina hmiakô liata a vaw chhi ei ta. 13Pahnokheituh pakheipazy rao ei ta, âmo chata, “He chyhsa heta, bâh leipa ta he su pathaihpa nata ryhpa a reipachhie lymâ. 14‘Nâzari Zisu ta, he su he parao aw ta, Mawsi ta ryhpa miah a piepazy a panano aw,’ tahpa a reipa eima thei,” tah ei ta. 15Ryureina liata a tyuhpa zydua ta Stiphana cha moh ei ta, a hmia cha vâlyuhchâpa hmia hawhta hmô ei ta.
Currently Selected:
HMOTAOPAZY 6: MARVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved.
