ZAWHÂNA 7

Zisu unawhzy zo leina

1Cha khai tawhta Zisu cha Kâlili râh chahryh ta. Zuzy ta thie amâ chhuahpa vâta, Zudia râh deikua chahryh a chhuah vei. 2#Ttn 23.34; Ryhpa 16.13Zuzy Byureih Kyhchhi cha a hnia ha ta. 3A unawhzy ta “He tawhta pua la, na pachupazy ta na hmotaopazy ama hmô thei nawpa ta, Zudia râh lâ sie mah y. 4Moh pathâh a khohpa ta arulâta hmo tao beih vei. He hmozy he na tao tlôh khiahta cha, khizawpi hmô awpa ta tlao tao mah y,” tah ei ta. 5A unawhzy chhao ta Zisu cha a ngiapâ leipa ei ta. 6Zisu ta ama hnohta, “Ei daihti tlô mâh vei, nâmo daihti deikua cha khatino rai ta a tlô thlâh haw. 7Khizaw ta nâmo cha châ hao thei vei, kei deikua cha einâ hao, a hmotaopazy a moleizie ei palâhâhpa vâta. 8Kyhchhina lâ cha nâmo khy teh u. Kei deikua la, ei daihti â ki pathlah mâh leipa vâta, kyhchhina lâ cha khy mâh aw va na,” tah ta. 9Cha biezy cha ama hnohta reih ta, ano cha Kâlili liata y ha ta.

Zisu Byureih Kyhchhi a chay

10Châhrasala a unawhzy kyhchhina lâ ama khy khai tawhta, ano chhao vâtlâh pahno leipa ta arulâta khy hra ta. 11Zuzy ta kyhchhina liata ano cha tlua ei ta, “Khataih liata a y haw?” tah ei ta. 12Ano kyh liata zawpi a chiaburâh hôlô ei ta. Thokha ta, “Chyhsa phapa a châ,” tah ei ta, thokha ta, “Châ bao va, zawpi a siekheichheipa a châ,” tah ei ta. 13Châhrasala Zuzy ama chipa vâta, ahy hmahta â lâhâhpa ta a thâtih rei ngâh veih ei.

14Kyhchhi locho nota Zisu cha Achhyna o lâ khy ta, pachu ta. 15Zuzy ta, “He chyhsa he, châ a chu beih tlôh leipa ta, kheihtazieta ma thaina he a hnei tly?” tah ei ta, ama noâh kaw ta. 16Zisu ta âmo cha a chhy ta, “Ei bie pachupa he kei eih châ vei, nâ tuahtuhpa eih a châ. 17Ahy rai Khazohpa khopa a tao khohpa a châ khiahta cha, ei bie pachupa he Khazohpa tawhtapa ma, keima tao chhyhpa a reihpa ma ei châ tahpa a pahno aw. 18Ano tao chhyhpa bie a reihpa cha ano rônahna a tluapa a châ. A tuahtuhpa rônahna a tluapa deikua cha, chyhsa dopa châ ta, ano liata adoleina rai y vei. 19Mawsi ta ryhpa cha pie ha veih ei ma? Châhrasala ryhpa cha ahy hmahta zyh tlôh ei chi va. Khazia thie einâ chhuah ei chi?” tah ta. 20Zawpi ta a chhy ei ta, “Ahripa azopa na châ he! Ahy ma thie châ chhuah?” tah ei ta. 21Zisu ta âmo cha a chhy ta, “Hmo miakha tao na ta, nama zydua ta nama noâh ta. 22#Ttn 12.3; Âtn 17.10Cha vâna chata Mawsi ta chopawtaina kyh kha cha pie ei ta, Pahânoh ta chopaw nama tai tyh. Chopawtaipa he Mawsi tawhta a puapa châ leipa ta, pathlatuhzy tawhta a puapa tlao a châ. 23#Zhn 5.9Mawsi piepa chopawtaina ryhpa cha parao lei nawpa ta, Pahânoh chhao ta chopawtaipa a châ khiahta cha, Pahânoh ta chyhsa ei patlâhpa vâta, khazia ei chô liata nama pathi a ia? 24Chôpho lâ alânazie ta pachia leipa u la, pachiana dopa ta pachia teh u,” tah ta.

He chyhsa he Mesia a châ thei aw ma?

25Zerusale chyhsa thokha ta, “He chyhsa he thie amâ chhuahpa kha châ vei ma? 26Moh tua u, riahpha kawpa ta bie reih ta, a hnohta khâpa hmah reih tlôh ei va! Ano he Mesia cha a châ tlai tahpa biehneituhpazy ta ama pahno pasia hapa ma a châ tly? 27Châhrasala he chyhsa vaw puana cha pahno tlôh pi. Mesia cha â vaw luah tita, a vaw puana ahy hmahta pahno aw veih ei, tahpa châ tlôh,” tah ei ta. 28Cha vâna chata Zisu cha Achhyna o liata a pachu nota, ao paro ngaitapa ta, “Na pahno ei chi ta, ei puana chhao nama pahno? Châhrasala keima rei ta a vypa châ va na. Nâ tuahtuhpa cha adopa châ ta, ano cha pahno veih ei chi. 29Kei deikua ta la ano cha ei pahno. Ano tawhta a vaw puapa châ na ta, ano ta a tuapa ei châ,” tah ta. 30Chatanachata patu a chhuah ei ta, châhrasala a daihti a tlô mâh leipa vâta, ahy hmahta Zisu cha hria thei veih ei. 31Chatanachôta zawpi hluhpi ta Zisu cha a ngiapâ ei ta, “Mesia cha a vaw tlôpa rai châ sala, he chyhsa taopa hlâta hmonoâhpa hluh via a tao aw ma?” tah ei ta.

Zisu patu awpa ta vaituhpazy tuapa a châ

32Zisu kyh liata zawpi a chiaburâhpa cha Phârisaihzy ta thei ei ta, chatanachata theihthai beizy nata Phârisaihzy ta Zisu patu awpa ta vaituhpazy tuah ei ta. 33Zisu ta, “Buakhata nama hnohta y via chy aw na ta, nâ tuahtuhpa lâ ei sie aw. 34Na tlua aw ei chi ta, na hmô aw veih ei chi. Ei yna lâ a vy thei aw veih ei chi,” tah ta. 35Zuzy cha âmo nata âmo ta, “Eima hmô thei lei nawpa ta, he chyhsa he khataih lâ ma a sie aw tly? Krikâh chyhsa paipatlapazy lâ siepa ta, Krikâh mo pachu â chhuahpa ma a châ tly? 36‘Na tlua aw ei chi ta, na hmô aw veih ei chi,’ a tahpa nata, ‘Ei yna lâ a vy thei aw veih ei chi,’ a tahpazy he, khâpa kyh a reihpa ma a châ aw tly?” tah ei ta.

Hrona ti chavahzy

37 # Ttn 23.36 Kyhchhi chhâna noh, noh rônahpa liata, Zisu cha a duah ta, ao paro ngaitapa ta awh ta, “Ahy rai a dâh a phi khiahta cha, kei lâ a vy sala doh mawh sy. 38#Ezk 47.1; Zkr 14.8Ahy rai nâ ngiapâpa cha, Biehrai ta a reipa hawhta, ‘Ti hrohpa chavahzy a chhôh tawhta a vaw loh aw,’” tah ta. 39Cha biezy cha ngiapâtuhpazy ta Thlahpa ama hnei awpa kyh a reina a châ. Zisu cha parônahsapa ta a y mâh leipa vâta, Thlahpa cha piepa châ mâh veih ei.

Zawpi hry liata achhaihna

40Cha biezy cha ama thei nahta, zawpi hry liata thokha ta, “He chyhsa he hrohsopa a châ tlai hih,” tah ei ta. 41Ahropazy ta, “He he Mesia a châ,” tah ei ta. Thokha hropazy deikua ta, “Mesia cha ma Kâlili râh tawhta a vaw pua aw tly? 42#2 Sam 7.12; Mik 5.2Mesia cha Dâvi pathla hry tawhta, Dâvi yna khih Bethlehe tawhta a vaw pua awpa a châ, tahpa ta Biehrai ta reih vei ma?” tah ei ta. 43Chatanachata zawpizy cha Zisu kyh liata py no ta a pachhaih ei ta. 44Thokha ta patu awpa khoh ei ta, châhrasala ahy hmahta Zisu cha hria veih ei.

Biehneituhpazy ngiapâleina

45Vaituhpazy cha theihthai beizy nata Phârisaihzy lâ a vaw lie ei ta, âmo ta vaituhpazy hnohta, “Khazia namâ vaw chhi vei?” tah ei ta. 46Vaituhpazy ta a chhy ei ta, “He chyhsa hawhta ahy hmah bie reih beih veih ei!” tah ei ta. 47Phârisaihzy ta ama hnohta, “Nâmo chhao, a cha dôvei ha hra khiah ei? 48Biehneituhpa nata Phârisaihzy hry tawhta ano a ngiapâpa ama y leipa he pahno veih ei chi ma? 49Ryhpa a pahno leipa zawpizy he chhiesapa ama châ,” tah ei ta. 50#Zhn 3.1,2Nikadima, ama hry liata a hlao hrapa nata Zisu hnohta a sie hrapa ta, ama hnohta, 51“Thaichâna bie pareisa ha tua leipa nata a hmotaopazy pahno ha tua leipa ta, eima ryhpa ta chyhsa thailei a pachâsa thei rai ma?” tah ta. 52Âmo ta a chhy ei ta, “Nâ chhao cha Kâlili chyhsa châ hra khiah chi? Patuapalua la, pachâ tua, Kâlili tawhta hrohsopa pua beih veih ei tahpa pahno châh chi,” tah ei ta. 53Chatanachata ama o chyu lâ a di ha ei ta.#7.53 Zawhâna 7.53 tawhta 8.11 taih he, hlâno kuropa Biehrai thokha liata y vei.

Currently Selected:

ZAWHÂNA 7: MARVBSI

Highlight

Copy