LUKA 1
1
Theôphilâ hnohta hlâpa châbu
1Eima hry liata hmo vaw tlôpa thâtihzy kha chyhsa hluhpi ta roh ha ei ta, 2a hmôtuhpazy nata bie chakaotuhpazy ta âthaona tawhta miah hlâ pachhuah hra ei ta. 3Hy zachhih chaipa Theôphilâ y, kei chhao ta, daihti khachâ rakha ma a sie hapa tawhna khata, cha thâtih zydua cha a siapa ta a laichadai na ta, â pazipa ta cha ropa awpa a phapa ta ei pahno. 4Chatanachata bie ama cha pachupazy kha âdopazy tlai a châ tahpa na pahno aw.
Bâtituhpa Zawhâna pina chhochhieliena
5 #
1 Ttr 24.10
Zudia bei Herawda daihti liata, Abizah py liata theihthaipa pakha, a moh Zekaria ama tahpa y ta. Cha chyhsa chata Arawna pathla hry liatapa Elizabe cha lapinô ta hnei ta. 6Ama pano ta Khazohpa hmiakô liata chyhsa siapa châ ei ta, Abeipa biepiepa nata bieraopa zydua liata seina hnei leipa ta a zyh lymâpa ama châ. 7Châhrasala Elizabe cha a choh hapa vâta saw hnei leipa ei ta, ama pano ta machâ kaw bâ ei ta.
8Chatawhcha hetana heta vaw châ ta. Noh kha cha ano py chakao daihti liata, Zekaria chhao Khazohpa hmiakô liata theihthaipa chakaona rai hria hra ta. 9Theihthaipazy taozietyhpa hawhta, Abeipa Achhyna o liata a ngia ta, ropahâhpa rao awpa ta nuby a daopa châ ta, cha cha Zekaria chô liata tlu ta. 10Ropahâhpa raona daihti liata, zawpi zydua cha khôtho liata thlahchhâ ei ta. 11Abeipa vâlyuhchâpa pakha a hnohta a vaw luah ta, ropahâhpa raona maisâh chachâh lâta a vaw duah ta. 12Vâlyuhchâpa cha a hmô nahta, Zekaria cha a nôpopa ta, chi ngaita ta. 13Châhrasala vâlyuhchâpa ta a hnohta, “Zekaria, chi khah y, na thlahchhâna kha theipa a châ haw. Na lapinô Elizabe ta sawchapawpa sa aw ta, a moh Zawhâna na bi aw. 14Thaphana nata alyna hnei aw chi ta, ano vaw pipa cha chyhsa hluhpi ta amâ ly aw. 15#Maluh 6.3Abeipa hmiakô liata chyhsa rônahpa a châ aw. Kresawhti nata sahma a do awpa châ leipa ta, a nô chhi chhôh tawh tlai ta, Thlahpa Pathaihpa ta a bie aw. 16Izarei saw hluhpi Abeipa ama Khazohpa lâta a paheisa heih aw. 17#Mal 4.5,6Elaizâh thlahpa nata hmotaotheina ta Khazohpa hmiakô liata sie aw ta, pawzy palôh cha sawzy lâta paheisapa ta, reingiah leipazy cha mosiapazy sona lâta paheisa aw ta, phopi pachhuahpanohpa cha Abeipa châta a mâ chiehpa ta a tao aw,” tah ta. 18Zekaria ta vâlyuhchâpa hnohta, “Cha cha kheihta ei pahno thei aw? Pawpipa châ na ta, ei lapinô chhao machâ ha ta,” tah ta. 19#Dân 8.16; 9.21Vâlyuhchâpa ta a chhy ta, “Kei he Kabriel ei châ. Khazohpa hmiakô liata a duah tyhpa châ na ta, bie cha chho ta, he thâtih lychhihpa he cha vaw tlôkhei awpa ta tuapa ei châ. 20Pachâ teh, a daihti raopa liata a vaw tlô awpa ei bie reipazy na zo leipa vâta, cha hmozy a vaw tlô hlâlei cha, bie reih thei khao aw va chi, nâ thlih thlâh ha aw,” tah ta. 21Zawpi ta Zekaria cha hâ thlâh ha ei ta, Achhyna o liata a y parei kawpa vâta ama noâh kaw ta. 22A vaw pua nahta, âmo cha bie a chho thei khao leipa ta, Achhyna o liata aluahna a hmô tahpa pahno ei ta. Bie a reih thei khao leipa vâta, ama hnohta a ku ta thliethlâ ta. 23A chakaona daihti a chhâ nahta, Zekaria cha o lâ a di ha ta.
24Cha hnôhlâ ta a lapinô Elizabe cha saw phaoh ta, thla pangawh chhôh a nyu ta, 25“Chyhsazy hry liata ei noza hmiachhiena papai nawpa ta, Abeipa ta na ngiachhie ta, he hmo he eina taopa,” tah ta.
Zisu pina chhochhieliena
26A thla charuna liata, Khazohpa ta vâlyuhchâpa Kabriel cha Kâlili râh liata khihpi miakha, Nâzari ama tahpa liata a ypa, 27#Mat 1.18laihsa kôpa lâ tuah ta. Laihsa kôpa cha Dâvi pathla Zawsi ta hnei awpa ta â pahawhpa châ ta, a moh cha Mâri a châ. 28Vâlyuhchâpa cha ano lâ a vy ta, a hnohta, “Ei châ naoh na, nohlaopa y, Abeipa na hnohta a y! Chanôzy hry liata nohlao chaipa na châ,”#1.28 “Chanôzy hry liata nohlao chaipa na châ,” tahpa he hlâno kuropa Biehrai thokha liata y vei. tah ta. 29Vâlyuhchâpa bie reipa ta Mâri cha a nô papo kaw ta, kheihawhpa anaohna ma a châ tahpa pachâ ta. 30Vâlyuhchâpa ta a hnohta, “Mâri, chi khah y, Khazohpa khokheina na to hih. 31#Mat 1.21Pachâ teh, na chhi liata nawh a choh aw ta, sawchapaw sa aw chi ta, a moh ta Zisu#1.31 “Zisu” tahpa cha, “Khazohpa cha pachhatuhpa a châ, Khazohpa ta a pachha” tahna a châ. na bi aw. 32#2 Sam 7.12,13,16; Isai 9.7Ano cha chyhsa rônahpa châ aw ta, Chônôchaipa Sawchapawpa bipa a châ aw. A pathlatuhpa Dâvi beidyuchhai cha Abeipa Khazohpa ta a hnohta pie aw ta, 33Zakaw pathlazy chô liata chhâzaw ta a bei aw ta, a khinarâh chhao chhâna hnei aw vei,” tah ta. 34Mâri ta vâlyuhchâpa hnohta, “Cha cha kheihta a châ thei aw, laihsa kôpa châ tlôh na ta?” tah ta.
35Vâlyuhchâpa ta a hnohta, “Thlahpa Pathaihpa na chô liata vaw tlô aw ta, Chônôchaipa hmotaotheina ta a cha khu aw. Chavâta hawti pathaihpa a vaw pih awpa cha, Khazohpa Sawchapawpa bipa a châ aw. 36Pachâ teh, na chiheih chanô a choh hapa Elizabe chhao khata, a nôpi tawhta saw phaoh ta, tahmâ he a thla charuna a châ haw. 37#Âtn 18.14Khazohpa châta tao thei leipa hmo y vei,” tah ta. 38Mâri ta, “Moh teh, Abeipa seichanô ei châ. Na bie hawhta ei chô liata tlô mawh sy,” tah ta. Chatawhcha vâlyuhchâpa ta Mâri cha siesai ha ta.
Mâri ta Elizabe â kei hmô
39Cha khaipa nahta, Mâri cha thlai thyu ta, tlâh râh liata a ypa Zudia khihpi miakha lâ sie ta. 40Zekaria o liata a ngia ta, Elizabe cha a naoh ta. 41Elizabe ta Mâri anaohna a thei nahta, a chhi liata hawsaih cha a tlieh ta. Elizabe cha Thlahpa Pathaihpa ta vaw bie ta, 42ao paro ngaitapa ta awh ta, “Chanô zydua hry liata nohlao chaipa châ chi ta, na chhi thei chhao a nohlao na! 43He nohlaona he kheihtazieta a topa ma ei châ tly, ei Beipa nô ta eina vaw tly thlâh hapa chi he? 44Pachâ teh, nâ naohna ao kha ei nakhaoh liata â ngiapa nahta, ei chhi liata hawsaih cha a lypa ta â chotlai ngâ kaw. 45Abeipa ta a hnohta bie a reipa a vaw tlô aw tahpa a zopa chanô cha a nohlao na,” tah ta.
Mâri reithaina hla
46Chatawhcha Mâri ta,
“Ei hro ta Abeipa reithai ta,
47Khazohpa nâ Pachhatuhpa liata ei thlahpa â ly,
48 #
1 Sam 1.11
A seichanô nawhpa he a ngiachhiepa vâta.
Tahmâ tawhta cha,
Chhâ zydua ta nohlaonô eina tah aw ei.
49Atotaotheipa ta hmo rônahpa na taopa ta,
A moh cha pathaihpa a châ.
50A zawngiahna cha ano a chipazy châta châ ta,
Chhâzaw nata tlyzaw ta a y aw.
51A bâh ta a thatlôzie pamosa ta,
Palôh laipazy a papaipatla tyh.
52 #
Zbâ 5.11; 12.19 Thatlôpazy ama beidyuchhai tawhta a daophi ta,
Areisipazy a cheihchalo tyh.
53Nodipa cha hmo phapazy ta pabie ta,
Hneirôhpazy aruapa ta a pasiesa.
54A zawngiahna atheithlâhna châta,
A chakaotuhpa Izarei cha bao ta,
55 #
Âtn 17.7
#
1 Sam 2.1-10
Miah pathlatuhpazy hnohta reih ta,
Abarahâ nata a pathlazy hnohta a reipa hawhta,
A chakaotuhpa Izarei cha a bao haw,”
tah ta.
56Mâri cha Elizabe hnohta thla thôh rachhôh y ta, cha khai tawhta a o lâ a lie ha ta.
Bâtituhpa Zawhâna pina
57Elizabe cha a nawh hnei daihti a vaw daih ta, sawchapaw sa ta. 58Abeipa ta Elizabe chô liata zawngiahna rônah ngaitapa a palâsa haw tahpa a opazy nata a chiheihzy ta ama thei nahta, a lykhei ngaita ei ta. 59#Ttn 12.3A noh chariena noh ta hawsaih chopawtai awpa ta a vy ei ta, a paw moh zipa ta a moh Zekaria bi a chhuah ei ta. 60Châhrasala a nô ta, “Châ vei, Zawhâna bi awpa a châ,” tah ta. 61Âmo ta a hnohta, “Na chiheihzy hry liata, cha moh a phaohpa ahy hmah y veih ei,” tah ei ta. 62A paw cha thliethlâpa ei ta, a moh bi awpa a khopa hiahri ei ta. 63Zekaria ta chârona lôchâ hiah ta, “A moh Zawhâna a châ,” tahpa ta roh ta. Ama zydua ta ama noâh kaw ta. 64Sôkha ta a pakah vaw âpa ta, a paleih a vaw thlâ ta, reih pathliepa ta Khazohpa reithai ta. 65Ama opa zydua ta chi ngaita ei ta. Cha hmo kyh zydua cha Zudia tlâh râh zydua liata pathâh ta. 66A theipa maihta ama palôh liata khô ei ta, “Cha hawti cha kheihawhpa chyhsa ma a vaw châ aw?” tahpa pachâ ei ta. Abeipa ku cha hawti hnohta y ta.
Zekaria chhochhieliena
67A paw Zekaria cha Thlahpa Pathaihpa ta bie ta, hrohsona bie phuah ta,
68“Abeipa Izarei Khazohpa cha,
Reithaipa ta y mawh sy!
A chyhsazy za tly ta,
A pachha haw.
69A chakaotuhpa Dâvi pathla hry tawhta,
Pachhana ki miah a chaluahpa haw.
70Leilô pi tua no tawhta
A hrohso pathaihpazy pakah ta a rei hapa hawhta,
71Eima chariahzy tawhta pachhapa ta y aw pi ta,
Miah a haopazy ku tawhta pachhapa ta eima y aw.
72Miah pathlatuhpazy hnohta
Zawngiahna bietai palâsa ta,
A biehrai pathaihpa â thei thlâh haw.
73Miah pathlatuhpa Abarahâ hnohta
Miah bao awpa ta bie â taihpa hawhta,
74Eima chariahpazy ku tawhta miah a pachha haw.
75Chavâta chi leipa ta ano chakao aw pi ta,
Eima hro chhôh zydua ta,
Pathaihpa nata siapa ta a hmiakô liata eima y thei aw.
76 #
Mal 3.1
Chavâta nâ, hawtipa y,
Chônôchai hrohsopa tahpa na châ aw.
Abeipa lâpizy a chhuahdy awpa ta,
A hmia lâta sie aw chi ta,
77A chyhsazy moleina a ngiahthaipa ta,
Pachhana pahnona pie awpa ta,
78Eima Khazohpa zawngiahna vâta,
Chô lâ tawhta noh chhipa ta miah a za tly aw;
79 #
Isai 9.2
Zohna liata a tyuhpazy khaihna piepa ta,
Thina nohpahli liata a tyuhpazy pakhaihsa awpa ta,
Thlalôhna lâpi liata eima pheizy chakâsa awpa ta,”
tah ta.
80Hawsaih cha laiseih lymâ ta, thlahpa liata a tha vaw tlô via lymâ ta, Izarei hnohta â luah hlâlei cha râhchawhpa liata y thlâh ha ta.
Currently Selected:
LUKA 1: MARVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved.
