LUKA 10
10
Sysari nata pano tuana
1Cha khai tawhta Abeipa ta chyhsa hropa sysari nata pano rao ta, a sie nawpa khih to nata su to liata a hmia lâta pano lymâ ta pasiesa chhielie ta. 2#Mat 9.37,38Ama hnohta, “Sâh hria awpa hluhpi y ta, hriatuhpazy deikua ama chyh. Chavâta a sâh hria awpa ta hriatuhpazy a vaw tuah thei nawpa ta, sâh hria Beipa lâ hiah teh u. 3#Mat 10.16Sie teh u; changiezy hry liata mietakutawzy hawhta ei cha tuah ei hih. 4Tâkâ sykhao, sahria nata pheiky zy a phao leipa u la, lâpi liata chyhsa bie a chho khuh vy. 5O namâ ngiapa maih liata, a hmiatua chai ta, ‘He o liata thlalôhna vaw tlô mawh sy!’ nama tah lymâ aw. 6Cha o liata thlalôhna chyhsa#10.6 He liata “Thlalôhna chyhsa” tahpa he, thlalôhna a pasôpa chyhsa reina a châ. a y khiahta cha, nama thlalôhna a chô liata y aw ta, thlalôhna chyhsa a y vei khiah deikua cha, nama thlalôhna cha nâmo lâ a vaw kua heih aw. 7#1 Kaw 9.14; 1 Tim 5.18Cha o liata y u la, ama cha piepa maih niepa ta doh muh vy. Raihriatuhpa cha hlao hmô tlâh a châ. O kha tawhta o hro lâ namâ pasie awpa châ vei. 8Khih namâ ngiana maihta, ama châ ly khiahta cha, ama cha piepa maih nie muh vy. 9Cha liata tlâhleipazy patlâh u la, ama hnohta, ‘Khazohpa khinarâh ta a châ hnia ei,’ tah muh vy. 10#Hmt 13.51Khih namâ ngiapa liata ama châ ly vei khiahta cha, ama lâlaizy liata sie u la, ama hnohta, 11#Mat 10.7-14; Mka 6.8-11; Lka 9.3-5‘Nama khih buchadoh eima phei liata â baipazy taihta eima cha chatho thlu hih. Châhrasala Khazohpa khinarâh cha â hnia haw tahpa pahno muh vy,’ nama tah aw. 12#Âtn 19.24-28; Mat 11.24; Mat 10.15Ei cha chho ei, cha noh liata, cha khih pasa tao awpa hlâta Sawdawmâ khih pasa tao awpa a zie a y via aw.
Khihpi ro leipazy hupona
(Mat 11.20-24)
13 #
Isai 23.1-18; Ezk 26.1—28.26; Zôe 3.4-8; Ams 1.9,10; Zkr 9.2-4 “Kôrâzi, na hu a po na! Besaidâ, na hu a po na! Nâmo liata hmonoâhpa taopazy kha Tyre nata Sidaw liata taopa châ sala, latho poh a bupa ta buchâh hry liata a tyuh aw ei ta, ama ro ha awpa tlai. 14Pachiana noh liata, nâma pasa tao awpa hlâta Tyre nata Sidaw pasa tao awpa a zie a y via aw. 15#Isai 14.13-15Hy Kâpynia, nâ chhao avâ taihta cheihchalopa ta y hra la, Athihkhih lâ chati pathlahpa na châ aw.
16 #
Mat 10.40; Mka 9.37; Lka 9.48; Zhn 13.20 “Nama bie a theipa cha, ei bie a theipa a châ. Nâmo châ khoh leipa cha, kei nâ khoh leipa châ ta, kei nâ khoh leipa cha, nâ tuahtuhpa a khoh leipa a châ,” tah ta.
Sysari nata pano amâ vaw lie
17Sysari nata panozy cha a ly ngaitapa ta a vaw lie ei ta, “Abeipa, na moh vâta ahripazy eima rei sai ta ama y!” tah ei ta. 18Zisu ta ama hnohta, “Dôhla pathliepa hawhta Sâtâ avâ tawhta a za tlapa ei hmô. 19#Hla 91.13Pachâ teh u, parihzy nata râh cha-iazy tlybai theina nata khakhaipa hmotaotheina zydua chô liata biehneina ei cha pie ei. Khâpa ta hmah cha pasasa aw veih ei. 20Châhrasala thlahpazy nama rei sai ta ama ypa vâta a ly leipa u la, vârâh liata nama moh ropa a châpa vâta tlao a ly teh u,” tah ta.
Paw khopa taona liata alyna
(Mat 11.25-27; 13.16-17)
21Cha dawh liata Zisu cha Thlahpa Pathaihpa liata a ly ngaita ta, “Hy ei Paw, alei nata avâ Beipa, ei châ ly ngaita na. He hmozy he chyhsa sopa nata novâhpazy liata nyu chi ta, hawtizy hnohta tlao na phualuah. A châ na, ei Paw, cha hawhta tao awpa cha, nâ lyna châ tlôh ta. 22#Zhn 3.35; Zhn 10.15Ei Paw ta ato zydua eina hlâ haw. Paw dei leipa ta cha, Sawchapawpa he ahy ma a châ tahpa ahy hmahta pahno veih ei. Paw he ahy ma a châ tahpa chhao, Sawchapawpa nata Sawchapawpa ta ama hnohta phuah awpa ta â tlyhpazy dei leipa ta cha, ahy hmahta pahno veih ei,” tah ta.
23Chatawhcha pachupazy lâ a heih ta, arulâta ama hnohta, “Nama hmôpazy a hmô hrapa mozy cha ama nohlao kaw dia! 24Ei cha chho ei, hrohsopa hluhpi nata abei hluhpi chhao ta nama hmôpazy he hmô khoh kaw tyh ei ta, châhrasala hmô veih ei. Nama theipazy he thei khoh kaw tyh ei ta, châhrasala thei veih ei,” tah ta.
Samâri chyhsa phapa
25 #
Mat 22.35-40; Mka 12.28-34 Dâhthaipa#10.25 Luka liata “Dâhthaipa” (lawyer) he Mathai nata Mâka liata “Ryhpa pachutuhpa” (scribe) nata miakhapa châ ta, Luka heta dâh lâ chhâh a thai patluapazy â nuapa vâta, Luka hmâzie hawhta, “Dâhthaipa” tahpa ta sopa a châ. pakha a kaw duah ta, Zisu cha pasia a chhuahpa ta a hnohta, “Pachutuhpa, chhâzaw hrona ei hnei nawpa ta khâpa ei tao aw?” tah ta. 26Zisu ta a hnohta, “Ryhpa châbu liata khâpa â roh? Kheihta ma cha cha na rei tyh?” tah ta. 27#Ryhpa 6.5; Ttn 19.18Ano ta, “Abeipa na Khazohpa cha na pathipalôh tlokhuh ta, na thlahpa tlokhuh ta, na thatlôna tlokhuh ta nata na pachâna tlokhuh ta kyh nama pachâ awpa a châ. Nâma kyh nâ pachâpa hawhta na vaih kyh na pachâ awpa a châ, tahpa ta ropa a châ,” tah ta. 28#Ttn 18.5Zisu ta a hnohta, “Nâ chhy pado na. Cha hawhta tao la, na hroh aw,” tah ta.
29Dâhthaipa cha thaichâ a chhuahpa ta, Zisu hnohta, “Cha khiahta la ei vaih cha ahy maw?” tah ta. 30Zisu ta a chhy ta, “Chyhsa pakha Zerusale tawhta Zerikô lâ zu ta, hraotuhpazy a tyh ta, cha chyhsazy chata a chysiazy pahluhpa ei ta, thata tu ei ta, thi daihmâpa ta siesai ei ta. 31Theihthaipa pakha, cha lâpi lâta zu chho ta, chyhsa cha a hmô nahta, lâkiah hiakha lâta chahrih ha ta. 32Cha hawhna hra chata Livai chyhsa chhao, cha su cha za tlô ta, a hmô nahta, lâkiah hiakha lâta chahrih ha hra ta. 33#2 Ttr 28.15Samâri chyhsa deikua cha, a khitlyna liata, cha chyhsa yna cha za tlô ta, a hmô nahta, a thapasa ngaita ta. 34Kei pangai ta, a hmahzy cha sathaw nata kresawhti bao ta, chahrypa ta. Ano sahroh chô liata pakiasa ta, khichhai riebu lâ pangaikheipa ta mohôh ta. 35A mylâ ta dinâri miano pachhi ta, khichhai riebu vaituhpa hnohta pie ta, a hnohta, ‘Vaw mohôh la, he hleikhô ta na hryuhnazy cha, ei vy heih tita ei cha thô aw,’ tah ta. 36Cha chyhsa pathôh hry liata, hraotuhpazy ta ama hraopa chyhsa châta ahy cha ma a vaih châ sala na pangiasa?” tah ta. 37Ano ta, “A ngiachhietuhpa chuh,” tah ta. Zisu ta a hnohta, “Nâ chhao sie la, cha hawhta tao hra mah y,” tah ta.
Zisu ta Mâri nata Marthâ a tly ei
38 #
Zhn 11.1
Ama khitlyna liata, Zisu cha khih miakha liata a ngia ta. Chanô pakha a moh Marthâ ama tahpa ta a vaw ly ta, a o liata patlôsa ta. 39Marthâ cha narô pakha, a moh Mâri ama tahpa hnei ta. Mâri cha Abeipa phei thaby liata a tyuh ta, a bie nathlie ta. 40Marthâ deikua cha a chakaona#10.40 He liata chakaona he, beih chho chakaona châ ta, a kawh viapa ta Abeipa Zisu chakaona raihria a chakhi. Chakaona raihria liata thata a tymâpa vâta Zisu nata akaona daihti phapa chhao hnei thei khao leina a chakhi hra. raihria vâta, tymâ kawpa ta y ta. Zisu lâ vawh ta, a hnohta, “Abeipa, ei narônô ta kei dei ta eina chakaosapa he pha na tah thlâh ha ma? Na bao awpa ta chho teh,” tah ta. 41Abeipa ta a chhy ta, “Marthâ, Marthâ, hmo hluhpi pachâ chi ta, nâ tymâ kaw. 42Hmo miakha deita a byuh. Mâri ta tovyuh phapa a tlyh ta, cha cha lapa awpa châ vei,” tah ta.
Currently Selected:
LUKA 10: MARVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved.
