LUKA 15
15
Mietaku aleipa pakhona
(Mat 18.10-14)
1 #
Lka 5.29,30 Chhiekheituhpazy nata moleipazy ta a bie thei awpa ta a kiapâh lâ vaw pangai ei ta. 2Phârisaihzy nata ryhpa pachutuhpazy ta, “He chyhsa heta moleipazy a pahlao ta, ama hnohta pati a nie tyh,” tahpa ta paphôh ei ta. 3Chavâta he pakhona bie he ama hnohta reih ta: 4“Nama hry liata ahy ma mietaku za kha hnei ta, pô kha pahlei ha sala, lyurâhpa liata sychaki nata pô chaki cha siesaipa ta, aleipa cha a hmô hlâlei tlua leipa ta y aw ei chi? 5A hmô heih nahta, a ly ngaitapa ta a ngiatlâh liata a khaih aw. 6O a tlô nahta, a viasazy nata a opazy awpakhy aw ta, ama hnohta, ‘Nâ lykhei teh u, ei mietaku a leipa kha ei hmô haw,’ a tah aw. 7Ei cha chho ei, cha hawhna hra chata vârâh liata cha, ro awpa a hnei leipa chyhsa siapa sychaki nata pachaki chô liata alyna hlâta, molei ropa pakha chô liata alyna a hluh via aw.
Phusâ a leipa pakhona bie
8 “Cha leipa chhao ta, ahy chanô ma tâkâ tlaw hrawh hnei ta, tlaw kha pahlei ha sala, meiôh raopa ta o phi aw ta, a hmô hlâlei pakhâta ta tlua leipa ta a y aw? 9A hmô nahta, a viasazy nata a opazy awpakhy aw ta, ‘Nâ lykhei teh u, tâkâ ei pahleipa kha ei hmô haw,’ a tah aw. 10Ei cha chho ei, cha hawhna hra chata, Khazohpa vâlyuhchâpazy hmiakô liata cha, molei ropa pakha chô liata alyna a y tyh?” tah ta.
Sawchapaw aleipa pakhona bie
11Zisu ta reih lymâ ta, “Chyhsa pakha cha sawchapaw pano hnei ta. 12A seihnai viapa ta a paw hnohta, ‘Ei pâ, ryu ei to awpa na pie bâ teh,’ tah ta. Chatanachata ama paw ta a sôh cha a sawchapaw panozy pachhaih ta. 13Bohpi leipa liata, a sawchapaw seihnaipa cha a tovyuh zydua pakhy ta, râh hlapi lâ sie ta. Cha liata phasa ngaitapa ta y ta, a sôh cha pahryuh thlâhthli ta. 14A hneipa zydua a hmâ khai nahta, cha râh liata chakâh mozoh vaw tlô ta, nie awpa a phahla ha ta. 15Chatanachata sie ta, cha râh chyhsa pakha hnohta hria hlao ta. Cha chyhsa chata vaolao pie awpa ta a lyu lâ tuah ta. 16Nie awpa a piepa ama y leipa vâta a nodi ngaita ta, vaolao nie khohna taihta parôpachaw ta. 17Â vaw pahno pasia nahta, ‘Ei paw o liata hria hlaopa hluhpi y ei ta, nie tiah lei ama hnei thlâh bao na ta, kei deikua cha nodipa ta he liata ei thi aw hih! 18Thyu aw na ta, ei paw o lâ sie aw na ta, a hnohta, “Ei pâ y, Khazohpa chô liata nata nâma hmiakô liata hmo ei parao haw. 19Na sawchapawpa ta bi tlâh chhao châ khao va na. Na hnohta hria hlaopa pakha hawhta rie na tao hra mah y,” ei tah aw,’ tah ta. 20Chatanachata thyu ta, a paw lâ sie ta. Lâhlapi ta a y nota a paw ta vaw hmô ta, ngiachhie ngaita ta, a kei râ ta, a sawchapawpa cha a pyhpahly ta, a pahnâ ta. 21A sawchapawpa ta a paw hnohta, ‘Ei pâ y, Khazohpa chô liata nata na hmiakô liata hmo ei parao haw. Na sawchapawpa ta bi tlâh chhao châ khao va na. Na hnohta hria hlaopa pakha hawhta rie na tao hra mah y,’ tah ta. 22Châhrasala a paw ta a chakaotuhpazy hnohta, ‘Poh pha chaipa kha vaw cheih para u la, vaw pabu teh u. A ku liata kusadi paky u la, a phei liata pheiky paky teh u. 23Viahchao taw thawhpa kha kei la u la, thie teh u. Thapha ngaitapa ta nie suh u. 24He ei sawchapawpa he thi ha ta, a vaw hroh ha heih hih. Lei ha ta, eima hmô ha heih hih,’ tah ta. Chatanachata a lypa ta kyhchhi cha tao ei ta.
25 “A sawchapaw uhtheipa cha lyu tawhta o lâ vaw sie ta. O a vaw tlô chy ta pyungiapa tôpa pyu nata lâpa pyu thei ta. 26Chakaotuhpa pakha aw ta, ‘Cha cha khâpa pyu maw?’ tah ta. 27Chakaotuhpa ta, ‘Na nawhta vaw tlô ta, a tlâhpa nata â bohpa ta a hmô heihpa vâta, na paw ta viahchao taw thawhpa a thie,’ tah ta. 28Sawchapaw uhtheipa cha a hiehâh ngaita ta, a ngia khoh leipa ta. A paw vaw pua ta, reipasao ta, 29châhrasala a paw cha a chhy ta, ‘Pachâ tua, chatikôsy cha chakao na ta, na rei a ngiah leipa ta y beih va na. Chatanachôta ei viasazy nata alyna ei tao nawpa ta mietaw pô kha dâhdei chhao na pie beih va chi. 30Châhrasala he na sawchapawpa, âzuahnôzy liata na sôh a hmâh khai hapa hmâchhâh he a vaw tlôpa nahta, viahchao taw thawhpa zua na thiepa bao!’ tah ta. 31A paw ta a hnohta, ‘Ei sawchapawpa y, nâ cha ei hnohta a y kôzawpa châ chi ta, ei hneipa zydua he nâma eih mah a châ tâh. 32Kyhchhi tao ta thapha ngaitapa ta y awpa cha â phuhpa rai a châ. He na nawhta he cha thi ha ta, a vaw hroh ha heih hih. Lei ha ta, eima hmô ha heih hih,’ a tah aw,” tah ta.
Currently Selected:
LUKA 15: MARVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved.
