LUKA 18

Nôhmei hnabeidy leipa pakhona bie

1Zisu ta a pachupazy cha hnabeidy leipa ta, khâ thlahchhâ awpa a châzie pakhona bie chho ta. 2“Khih kha liata ryureituhpa pakha y ta, cha chyhsa cha Khazohpa chi leipa ta, chyhsa chhao a papeisa leipa a châ. 3Cha khih liata nôhmei pakha y ta, ano chata, ‘Ei khakhaipa ta ei chô liata a hmotaopa adoleipa he phuh na lapa mah y,’ tahpa ta, ryureituhpa lâ cha vawh ngâ thlâh ha ta. 4Ryureituhpa ta khachâ tlyma cha taopa khoh leipa ta. Châhrasala hnôhlâ ta pachâ heih ta, ‘Khazohpa chi leipa na ta, chyhsa chhao a papeisa vei hraw sah la, 5he nôhmei he na patypamâ ngâ thlâh ha tlôh ta, chavâta phuh ei lapa thlâh ha tua aw, chataleipatala khâ a vy ngâ thlâh ha aw ta, ei rie eina pathei tu pathlei aw na,’ tah ta, a hiapa hawhna chata a taopa haw,” tah ta. 6Abeipa ta, “Ryureituhpa sia leipa bie reipa kha thei teh u. 7Khazohpa chhochhi ta cha, â tlyhpa, chhô nah zâ ta ano a awsaopazy châta hmo dopa taopa leipa ta a y aw ma? A pahawh pasâh aw ma? 8Ei cha chho ei, ama châta hmo dopa thlai a taopa aw ei. Anodeikua cha Chyhsa Sawchapawpa â vy tita, khizaw liana he ngiapâna a vaw hmô aw tly ma?” tah ta.

Phârisaih nata chhiekheituhpa pakhona bie

9Sia â tah kawpa ta, mohropazy a mohnaopa chyhsazy hnohta, he pakhona bie he Zisu ta reih ta: 10“Chyhsa pano Achhyna o liata thlahchhâ awpa ta khy ei ta, pakha cha Phârisaih châ ta, pakha cha chhiekheituhpa a châ. 11Phârisaih cha a duah ta, he hawhta thlah a chhâ: ‘Khazohpa y, mohropazy hawhta avyuhpa, chyhsa doleipa nata apheipa châ leipa na ta, he chhiekheituhpa hawhna chhao heta ei châ leipa vâta alyna bie ei cha hlâ. 12Hâta chareih ta ei no kâhvileipa ta y tyh na ta, ei hmôpa zydua tawhta su hrawh su kha ei pie lymâ,’ tah ta. 13Chhiekheituhpa deikua cha, lâhlapi ta a duah ta, avâ lâ chhao ua ngâh leipa ta, a chachôhna a chô ta, ‘Khazohpa y, kei moleipa he na ngiachhie mah y,’ tah ta. 14#Mat 23.12; Lka 14.11Ei cha chho ei, thaichâpa ta a o lâ a dipa cha, Phârisaih châ leipa ta, chhiekheituhpa tlao a châ. Ahy rai a pasâhsapa maih panawhpa châ aw ei ta, a panawhpa maih palyupalihpa ama châ aw,” tah ta.

Hawtizy byhnâ a awpa

(Mat 19.13-15; Mka 10.13-16)

15Chatawhcha a hria awpa ta hawsaihzy taih ano lâ a vaw chhi ei ta. Cha cha pachupazy ta ama hmô nahta, hawsaih a vaw chhipazy cha ra ei ta. 16Châhrasala Zisu ta âmo cha ano lâ aw ta, “Hawtizy kei lâ pavysa u la, dytha khah u, Khazohpa khinarâh cha he hawhpa chyhsazy eih châ tlôh ta. 17Hmeiseihta ta ei cha chho ei, Khazohpa khinarâh cha, hawti a lypa hawhta a ly leipa maihta a ngia cheita aw veih ei,”#18.17 He châh he, hawtizy cha tao theipa hnei leipa ei ta, ama hro nawpa ta nôpawzy ta ama piepa liata tlokhuh amâ pahniehpa hawhta, Khazohpa khinarâh chhao, siana vâta hmô theipa châ leipa ta, Khazohpa hmosaipiepa châ ta, cha hmosaipiepa cha, a lytuhpa nata a pyhtuhpazy eih a châna kyh reina a châ. tah ta.

Ryureituhpa hneirôhpa

(Mat 19.16-30; Mka 10.17-31)

18Ryureituhpa pakha ta a hnohta, “Pachutuh phapa, chhâzaw hrona ei hnei thei nawpa ta khâpa ei tao aw?” tah ta. 19Zisu ta a hnohta, “Khazia phapa eina tah chi? Khazohpa dei leipa ta ahy hmahta phapa y veih ei. 20#Pua 20.14; Ryhpa 5.18; Pua 20.13; Ryhpa 5.17; Pua 20.15; Ryhpa 5.19; Pua 20.16; Ryhpa 5.20; Pua 20.12; Ryhpa 5.16Biepiepazy na pahno: ‘A phei kha, Liany cheih kha, Paru kha, Haipa ta chyhsa leih kha, Na nô nata na paw palyupalih teh,’ tahpazy na pahno,” tah ta. 21Ano ta, “Cha zydua cha ei thyutlia daihti tawhta ei zyh lymâ tyh,” tah ta. 22Cha cha Zisu ta a thei nahta, a hnohta, “Hmo miakha a phahlapa na hnei. Na hneipa zydua zuah la, dyhchhiepazy rai mah y. Chatanachata vârâh liata ryu na hnei aw. Cha khai tawhta a vy la, na zi mah y,” tah ta. 23Cha biezy cha a thei nahta, sôh hluhpi a hneipa a châpa vâta a pachâ rôh ngaita ta. 24Zisu ta hneirôhpa pachârôhpa cha a hmô nahta, “Hneirôhpazy châta la, Khazohpa khinarâh liata a ngia awpa a ru kaw tlai na! 25Chyhsa hneirôhpa Khazohpa khinarâh liata a ngia awpa hlâta la, râraoseihpa chiephoh khaoh liata a ngia awpa tlao a nao via,” tah ta. 26Cha bie a theipazy ta, “Cha khiahta cha, ahy ma pachha a châ thei aw tly?” tah ei ta. 27Zisu ta, “Chyhsapa tao thei leipa he Khazohpa châta cha tao theipa a châ,” tah ta. 28Pity ta, “Moh teh, eima olyuzy siesai khaipa ta eima cha zi hih,” tah ta. 29Zisu ta ama hnohta, “Hmeiseihta ta ei cha chho ei, Khazohpa khinarâh vâta o tlyma, lapinô tlyma, unawhzy tlyma, nôpaw tlyma, sawzy tlyma a siesaipa cha, 30tahmâ hro chhôh liana tlai heta a lie hluhpi ta hmô aw ta, daihti vaw tlô awpa liata chhâzaw hrona a to aw,” tah ta.

Zisu ta a thi nawpa kyh a chho chhieliena ei thôhna

(Mat 20.17-19; Mka 10.32-34)

31Chatawhcha pahrawh hleinozy anano ta a chhi ta, ama hnohta, “Pachâ teh u, Zerusale lâ eima khy hai hih. Chyhsa Sawchapawpa kyh liata, hrohsopazy bie reipa zydua kha patlôpa a châ aw. 32Zenitaizy hnohta hlâpa châ aw ta, pahneisaisona châta hmâhpa ta, nozachhih ngaitapa ta tao aw ei ta, ama pachih ta ama pachhao aw. 33Ama chhei khai tawhta, thie aw ei ta, a noh thôhna noh ta a thyu heih aw,” tah ta. 34Châhrasala cha biezy cha a pachâna rai pahno veih ei. Cha bie cha âmo tawhta nyupa ta y ta, khâpa bie ma a reih tahpa chhao pahno veih ei.

Zisu ta mochaopa a patlâh

(Mat 20.29-34; Mka 10.46-52)

35Zerikô a tlô chy ta, mochaopa pakha lâpi kiah liata kudaopa ta a tyuh ta. 36Zawpi siepa pyu a thei nahta, khâpa ma a châ tahpa hiahri ta. 37Chyhsazy ta, “Nâzari Zisu a vaw sie hai,” tah ei ta. 38Mochaopa cha awh ta, “Zisu, Dâvi Sawchapawpa, na ngiachhie mah y!” tah ta. 39Hmia a sahpazy ta a chalih awpa ta ra ei ta. Châhrasala, “Dâvi Sawchapawpa, na ngiachhie mah y!” tahpa ta ta awh via rili ta. 40Zisu cha a duah ta, mochaopa cha ano lâ a vaw chhi awpa ta biepie ta. A kiapâh a vaw tlô nahta, 41“Khâpa cha taopa awpa ma na khoh?” tah ta. Ano ta, “Abeipa y, mo pavâ awpa ei khoh,” tah ta. 42Zisu ta a hnohta, “Na mo pavâ mawh sy. Nâ ngiapâna ta a cha patlâh haw,” tah ta. 43A mo thlai vaw pavâ ha ta, Khazohpa reithaina chôta Zisu cha zi ha ta. Cha cha chyhsa zydua ta ama hmô nahta, Khazohpa reithai ei ta.

Currently Selected:

LUKA 18: MARVBSI

Highlight

Copy