LUKA 22

Thie awpa ta Zisu ama tei

(Mat 26.1-5,14-16; Mka 14.1-2,10-11; Zhn 11.45-53)

1 # Pua 12.1-27 Viahchhâ thinô pahlao leipa kyhchhi, Zawpakhô ama tahpa a hnia ha ta. 2Zawpi ama chipa vâta, theihthai beizy nata ryhpa pachutuhpazy ta arulâta Zisu cha tei ta, thie thei nawpa lâpi tlua ei ta.

Zudâh ta Zisu a patusa

(Mat 26.14-16; Mka 14.10-11)

3Pahrawh hleinozy hry liata a hlaopa Zudâh Iskari ama tahpa chhôh liata Sâtâ a ngia ta. 4Theihthai beizy nata hyutuhpazy lâ vawh ta, Zisu a patusa thei awpa kyh âmo cha kei chho ta. 5A ly kaw ei ta, tâkâ pie awpa bie a taih ei ta. 6Zudâh ta paryhsa ta, zawpi y lei nota patusa awpa ta rypaohna tlua ta.

Pachupazy chhaota Zawpakhô pati a dôh

(Mat 26.17-25; Mka 14.12-21; Zhn 13.21-30)

7Viahchhâ thinô pahlao leipa kyhchhi, Zawpakhô mietakutaw thiena noh vaw tlô ta. 8Zisu ta Pity nata Zawhâna cha, “Zawpakhô kyhchhi eima nie awpa a kei chhuanoh teh u,” tahpa ta tuah ta. 9Âmo ta a hnohta, “Khataih liata pachhuahpanoh sih la na khoh?” tah ei ta. 10Zisu ta ama hnohta, “Khihpi namâ ngia nahta, chyhsa pakha tibeih chabapa ta châ vaw tyh aw ei ta, â ngiana lâ zi u la, 11o hneituhpa hnohta, ‘Pachutuhpa ta, ei pachupazy chhaota zawpakhô pati eima nie nawpa khichhai chhôhpadâhpa khataih liata a y, a cha tah,’ nama tah aw. 12O chô lâta chhôhpadâh kawhpa, atyuna nata tlâhkhaizy a y khaipa cha pahmô aw ei ta, cha liata nama pachhuahpanoh aw,” tah ta. 13Vawh ei ta, ama hnohta a reipa hawh tlai ta kei hmô ei ta, zawpakhô pati cha pachhuahpanoh ei ta.

Abeipa tlâhkhai paysana

(Mat 26.26-30; Mka 14.22-26; 1 Kaw 11.23-26)

14A daihti a vaw tlô nahta, Zisu cha lyuhchâpazy chhaota tlâhkhai liata pati dôh ta. 15Ama hnohta, “Riethei ei tao hlâta, he zawpakhô pati he cha dôhlâh awpa ei, ei khoh ngaita. 16Ei cha chho ei, Khazohpa khinarâh liata a hmeiseihpa ta â ki hlâlei cha, he pati he nie heih khao aw va na,” tah ta. 17Chatawhcha nyu la ta, alyna bie a rei khai nahta, “He nyu he la u la, a rai teh u. 18Ei cha chho ei, Khazohpa khinarâh a vaw tlô hlâlei cha, kre zôh thei ti he doh heih khao aw va na,” tah ta. 19Viahchhâ la ta, alyna bie a rei khai nahta, eichheih ta, ama hnohta pie ta, “He he ei sapa, nama châta piepa a châ, einâ thei thlâh nawpa ei chi ta, he he tao tyh muh vy,” tah ta. 20#Zer 31.31-34Cha hawhna hra chata, zâ pati ama nie khai nahta, nyu cha la ta, “He nyu, nama châta patlaipa he ei thisaih liata biehrai thiehpa, nama châta a lohpa a châ. 21#Hla 41.9Châhrasala moh teh u, nâ patusa awpa ku cha, ei hnohta tlâhkhai chô liata a y. 22Chyhsa Sawchapawpa he rao chhieliepa hawhta a sie aw, châhrasala a patusatuhpa chyhsa cha a hu a po kaw dia!” tah ta. 23Cha hmo a tao awpa cha ahy ma a châ aw tahpa ta a hiahri chyu ei ta.

Rônah chai awpa achhuna

24 # Mat 18.1; Mka 9.34; Lka 9.46 Ama hry liata ahy ma rônah chaipa ta pachâ awpa a châ tahpa kyh liata, pachupazy hry liata a eichhiana vaw pua ta. 25Zisu ta ama hnohta, “Zenitai beizy cha ama sahlaozy chô liata a pabeisa ngaita ei ta, zawpi chô liata biehneituhpazy ta âmosasyh ta zawpi chyhtuhpa amâ tah tyh. 26#Mat 20.25-27; Mat 23.11; Mka 9.35; Mka 10.42-44Nâmo deikua la cha hawhta châ veih ei chi. Nama hry liata a rônah chaipa cha seihnai chaipa hawhta y sala, hyutuh chaipa cha chakaotuhpa hawhta y mawh sy. 27#Zhn 13.12-15Ahy a rônah via, tlâhkhai liata pati a dôhpa ma, a chakaopa maw? Tlâhkhai liata pati a dôhpa châ vei ma? Kei deikua cha nama hry liata chakaotuhpa hawhta ei y hih.

28 “Nâmo cha rairuna ei tyh nota nâ ypâpazy châ ei chi ta, 29ei Paw ta khinarâh eina piepa hawhta, nâmo chhao khinarâh ei cha pie ei. 30#Mat 19.28Chatanachata ei khinarâh liata ei tlâhkhai liata niepa ta doh hra aw ei chi ta, beidyuchhai liata a tyuhpa ta Izarei pho hrawh hleinozy chô liata ryu nama reih aw.

Pity ta â paphasai awpa chhochhieliena

(Mat 26.31-35; Mka 14.27-31; Zhn 13.36-38)

31 “Saimaw, Saimaw, pachâ teh, Sâtâ ta sâh chanei ta a cha chanei thei nawpa ta, cha hnei awpa a khoh. 32Châhrasala nâ ngiapâna a lei lei nawpa ta thlah ei cha chhâpa. Na vaw kua heih tita, na unawhzy thapatlô mah y,” tah ta. 33Pity ta a hnohta, “Abeipa, na hnohta patâhna o lâ nata thina lâ sie awpa ta ei mâ thlâh haw,” tah ta. 34Zisu ta, “Pity, ei cha chho, ‘Ano cha pahno va na,’ tahpa ta ei thôh einâ paphasai hlâ via chi cha, tanoh he awh khoh aw vei,” tah ta.

Tâkâ byh, sahria, zaozi

35 # Mat 10.9,10; Mka 6.8,9; Lka 9.3; 10.4 Zisu ta a pachupazy hnohta, “Tâkâ byh nata sahria nata pheiky leipa ta ei cha tua no ei kha, a phahlapa nama hnei rai ma?” tah ta. Âmo ta, “Hnei ma pi?” tah ei ta. 36Zisu ta ama hnohta, “Tahmâ la tâkâ byh a hneipa ta a phao sala, sahria a hneipa ta a phao mawh sy. Zaozi a hnei leipa ta a poh zuah sala, chalei mawh sy. 37#Isai 53.12Ei cha chho ei, ‘Ano cha moleipa hry liata rei pâpa a châ,’ tahpa ropa hawhna khata, ei chô liata a vaw tlô tlai awpa a châ. Ei thâtih ama ropa kha a tlô paki haw,” tah ta. 38Âmo ta, “Abeipa, moh tua, zaozi miano a y,” tah ei ta. Ano ta ama hnohta, “Â daih na,” tah ta.

Ôli tlâh liata thlah a chhâ

(Mat 26.36-46; Mka 14.32-42)

39Zisu cha pua ta, a tao tyhpa hawhta Ôli Tlâh lâ sie ta, pachupazy ta ano cha zi ei ta. 40A su a tlô nahta, ama hnohta, “Reipasaona liata namâ ngia lei nawpa ta thlahchhâ teh u,” tah ta. 41Alô vaw phana rakha lâ ânano ta sie ta, a pakhu paneih ta, thlahchhâ ta, 42“Ei Paw y, â ryh na tah khiahta la, he nyu he keima tawhta pasie mah y. Châhrasala keima rei châ leipa sala, nâma rei sai châ mawh sy,” tah ta. 43Vârâh tawhta vâlyuhchâpa pakha a vaw luah ta, Zisu cha tha vaw patlô ta. 44A pachârôh ngaita ta, phahnai a ngiah via heihpa ta thlahchhâ ta. A mathlai di thisaih hawhta alei liata tla ta. 45Thlah a chhâ khai tawhta thyu ta, pachupazy lâ a vy ta, pachârôhpa vâta amâ mô thlâhpa hmô ta. 46Ama hnohta, “Khazia namâ mô thlâh haw? Reipasaona liata namâ ngia lei nawpa ta, thyu u la, thlahchhâ teh u,” tah ta.

Zisu apaphasaina nata patuna

(Mat 26.47-56; Mka 14.43-50; Zhn 18.2-11)

47Bie a rei hai nota, zawpi a vy ei ta, pahrawh hleinozy hry liata a hlaopa Zudâh ama tahpa cha hmia a vaw sah ta. A pahnâ a chhuahpa ta Zisu cha pangai ta. 48Châhrasala Zisu ta a hnohta, “Zudâh, Chyhsa Sawchapawpa he a pahnâpa ta ma na patusa aw?” tah ta. 49A kiapâh liata chyhsazy ta hmo a vaw tlô awpa ama hmô nahta, “Abeipa, zaozi ta eima chhawh aw ma?” tah ei ta. 50Ama hry liata pakha ta theihthai beichaipa chakaotuhpa cha chhawh ta, a nakao chachâh lâ pathai ta. 51Zisu ta, “Â daih,” tah ta. A nakao cha hria ta, patlâh ta. 52Zisu ta ano patu awpa ta â vypa theihthai beizy, Achhyna o hyutuhpazy nata machâzy hnohta, “Hraotuhpa patu awpa hawhta ma, zaozizy, byuhthôzy chhaota nama vaw pua? 53#Lka 19.47; 21.37Achhyna o liata nama hnohta noh chareih y na ta, na hria tlôh ei chi va. Châhrasala tahmâ he nâmo daihti châ ta, zohna biehneina daihti a châ,” tah ta.

Pity ta Zisu â paphasai

(Mat 26.57-58,69-75; Mka 14.53-54,66-72; Zhn 18.12-18,25-27)

54Chatawhcha Zisu cha patu ei ta, puakheipa ta, theihthai beichaipa o lâ a chhi ei ta. Pity cha lâhlapi ta pazi laih ta. 55Dôhpachhôh tlyhmia liah liata mei patih ei ta, chyhsazy a tyuh ei ta. Pity chhao ama hry liata a kei tyuh hra ta. 56Mei khaihpa liata â tyupa cha chakaotuhnô pakha ta hmô ta, moh pasia ta, “He chyhsa chhao he a hnohta a ypa a châ hra,” tah ta. 57Pity ta, “Chanô, ano cha pahno va na,” tah ta, a papha ha ta. 58Taviapa ta mohropa ta vaw hmô heih ta, “Nâ chhao he ama hry liata a hlaopa na châ hra,” tah ta. Pity ta, “Chyhsa, châ va na,” tah ta. 59Dawh kha rachhôh a khô tawhta, mohropa ta, “He chyhsa chhao he a hnohta a ypa kha a châ tlai hra, Kâlili chyhsa châ hra tlôh ta,” tahpa ta khâchâ bai ta. 60Pity ta, “Chyhsa, na bie reipa cha pahno va na,” tah ta. A rei hai nota, awh khoh pâ ha ta. 61Abeipa cha a vaw heih ta, Pity cha vaw moh ta. Pity cha Abeipa ta a hnohta, “Tanoh he awh a kho hlâta ei thôh einâ papha aw chi,” a tahpa bie kha a kaw thei ta. 62Pua ta, aoh tlili ta cha ta.

Zisu taolana nata pasipasawhna

(Mat 26.67-68; Mka 14.66)

63Patâhna o liata Zisu vaituhpazy ta Zisu cha pasipasawhpa ta, tu ei ta. 64A mo chahry ei ta, “Hrohsona bie phuah teh! Ahy châ tu?” tah ei ta. 65Zisu cha reipachhie ei ta, bie pha leipa hluhpi rei thlu ei ta.

Zisu ryureina hmiakô liata

(Mat 26.59-66; Mka 14.55-64; Zhn 18.19-24)

66Khih a pavâpa nahta, phopi machâzy a hmaohpakhy ei ta, theihthai beizy nata ryhpa pachutuhpazy chhao y hra ei ta. Zisu cha ama ryureina lâ a chhi ei ta, a hnohta, 67“Mesia na châ tlai khiahta cha, miah chho teh,” tah ei ta. Zisu ta ama hnohta, “Cha chho hraw ei sah la, zo aw veih ei chi. 68Cha hiahri hra aw ei sah la, a chhy aw veih ei chi. 69Châhrasala tahmâ tawhta la Chyhsa Sawchapawpa he Khazohpa hmotaotheina chachâh lâta â tyuh ha aw,” tah ta. 70Ama zydua ta, “Cha khiah, Khazohpa Sawchapawpa ma na châ?” tah ei ta. Zisu ta ama hnohta, “Nâmo ta Khazohpa Sawchapawpa ei châpa nama reih cha zaw,” tah ta. 71Chatawhcha âmo ta, “Khâpa pahnona hropa ma eimâ ngiah khao aw? Keimo tlai ta ano hmao tawhta eima thei ha cha zaw,” tah ei ta.

Currently Selected:

LUKA 22: MARVBSI

Highlight

Copy