LUKA 4

Zisu reipasaona â tyh

(Mat 4.1-11; Mka 1.12-13)

1Zisu cha Thlahpa Pathaihpa ta biepa ta Zawdâh chavah tawhta a lie ta, Thlahpa ta râhchawhpa lâ a chhi ta. 2Cha liata noh sypalih chhôh ahripa ta reipasao ta. Cha nohzy liata khâpa hmah nie leipa ta, a chhâna lâ cha a no vaw di ha ta. 3Ahripa ta a hnohta, “Khazohpa Sawchapawpa na châ khiahta cha, he alô he viahchhâ lâta a lie awpa ta biepie teh,” tah ta. 4#Ryhpa 8.3Zisu ta a chhy ta, “‘Chyhsapa he viahchhâ dei ta hroh aw vei,’ tahpa ropa a châ,” tah ta. 5Ahripa ta tlâh lâ khykhei ta, movi hlâta khizaw khinarâh zydua pahmô ta, 6a hnohta, “He zydua chô liata biehneina cha pie aw na ta, a rônahna chhao ei cha pie aw. He zydua he ei hnohta piepa châ ta, kei ta ei khopa maih ei pie tyh. 7Einâ chhy khiah chi ta cha, he zydua he na eih a châ khai aw,” tah ta. 8#Ryhpa 6.13Zisu ta a chhy ta,

“‘Abeipa na Khazohpa a chhy aw chi ta,

Ano deita na chakao aw,’

Tahpa ropa a châ,” tah ta.

9Ahripa ta Zisu cha Zerusale lâ a chhi ta, Achhyna o laki a sâh chaipa liata soh ta, a hnohta, “Khazohpa Sawchapawpa na châ khiahta cha, he tawhna heta a zaw pathlah teh. 10#Hla 91.11,12Nâma kyh liata cha,

“‘Cha vaih awpa ta,

A vâlyuhchâpazy biepie aw ta,

11Ama ku ta ama cha chalo ha aw.

Chataleipatala na phei alô liata nâ chhuh pathlei aw,’

Tahpa ropa a châ,” tah ta.

12 # Ryhpa 6.16 Zisu ta a chhy ta,“‘Abeipa na Khazohpa na pasia awpa châ vei,’ tahpa a châ,” tah ta. 13Zisu cha ahripa ta reipasaona to ta a reipasao khai tawhta, rypaohna daihti hâ awpa ta siesai ha chy ta.

Kâlili liata chakaona â thao

(Mat 4.12-17; Mka 1.14-15)

14Zisu cha Thlahpa hmotaotheina ta Kâlili râh lâ a lie ta, cha râh chheipâh zydua liata a thâtih pathâh ta. 15Amâ pakhyna ozy liata pachu lymâ ta, chyhsa zydua reithaipa ta y ta.

A khih liata Zisu ama dytha

(Mat 13.53-58; Mka 6.1-6)

16Zisu cha a laiseihna Nâzari khih tlô ta. A tao tyhpa hawhta, Pahânoh ta pakhyna o liata a ngia ta, Khazohpa bie reih awpa ta a duah ta. 17Hrohsopa Isai châbu chatypa vaw pie ei ta. Châbu chatypa cha pathlâ ta, he hawhta rona su hmô ta,

18 # Isai 61.1,2 “Abeipa Thlahpa cha ei chô liata y ta,

Dyhchhiepazy hnohta thâtihpha chho awpa ta sathaw eina thu.

Atâhpazy hnohta puana bie chho ta,

Mochaopazy mopavâsa awpa ta na tuah ta,

Tlybaipazy khotalaina pie ta,

19 Abeipa palôhtlâhna kô phuah awpa ta eina tuah,”

tahpa ta reih ta.

20Châbu cha chaty ta, chakaotuhpa pie pakhua ta, a tyuh ta. Pakhyna o liata chyhsa zydua ta Zisu cha ama mo tawpâ thlâh ha ei ta. 21Ama hnohta, “Tanoh nama theina lia tlai ta Biehrai bie â ki haw,” tah ta. 22Chyhsa zydua ta Zisu cha reithai ei ta, ngiachhiena bie a pakah tawhta a puapazy vâta ama noâh kaw ta, “He chyhsa he Zawsi sawchapawpa kha châ vei ma?” tah ei ta. 23Ano ta ama hnohta, “Nâmo ta la, ‘Dawhty y, nâmasasyh ta a patlâh teh,’ tahpa bieso na rei thlupa ta, ‘Kâpynia liata na taopa eima theipa kha, na khih liata chhao tao hra mah y,’ nama tah thlyu aw,” tah ta. 24#Zhn 4.44Chatawhcha Zisu ta, “Hmeiseihta ta ei cha chho ei, hrohsopa ahy hmahta a khih liata pasô veih ei. 25#1 Abei 17.1Châhrasala biedopa ei cha chho ei. Elaizâh hro nota, kô thôh nata thla charu avâ a khaw ta, râh zydua liata chakâhna thata a tlô nona kha, Izarei liata nôhmei hluhpi ama y. 26#1 Abei 17.8-16Châhrasala ahy hnohta hmah Elaizâh kha tuapa châ leipa ta, Sidaw râh liata Zarephâ khihpa nôhmei pakha lâ deita tuapa a châ. 27#2 Abei 5.1-14Hrohsopa Elaisâh hro no chhao khata, Izarei liata phawhpa hluhpi y ei ta, châhrasala ahy hmah pathaisapa châ leipa ei ta, Suria chyhsa Nâmâ deita pathaisapa a châ,” tah ta. 28Cha biezy cha ama thei nahta, pakhyna o liata chyhsa zydua cha ama hiehâh ngaita ta. 29Thyu ei ta, khih tawhta papua ei ta, ama khih lôkâh khua liata chati pathlah awpa ta a chhi ei ta. 30Châhrasala ama hryhrih ta a zie lymâ ta, a pua haw.

Ahripa a hneipa a patlâh

(Mka 1.21-28)

31Zisu cha Kâlili râh Kâpynia khih lâ zu ta, Pahânoh ta âmo cha pachu ta. 32#Mat 7.28,29Biehnei ngaitapa ta a pachupa vâta, a pachuna cha noâh tah kaw ei ta. 33Pakhyna o liata, ahripa puapa a hneipa chyhsa pakha y ta, ao paro ngaitapa ta, 34“Nâzari Zisu, kheihta tao awpa ma miah na khoh? Miah pahleipadia awpa ta ma nâ vy? Ahy ma na châ tahpa ei cha pahno, Khazohpa Mopathaihpa na châ,” tahpa ta awh ta. 35Zisu ta ano cha ra ta, a hnohta, “A chalih la, a chhôh tawhta pua teh!” tah ta. Cha chyhsa cha ahripa ta ama hry liata papaosa ta, pasasa leipa ta, a chhôh tawhta a vaw pua haw. 36Ama zydua ta noâh tah ngaita ei ta, “He bie he khâpa bie ma a châ tly? Biehneina nata hmotaotheina ta thlahpa puapa biepie ta, ama pua thlâh hapa he,” tah ei ta. 37Chatanachata a thâtih cha, cha râh chheipâh su to liata pathâh ha ta.

Zisu ta Pity pihnô a patlâh

(Mat 8.14-15; Mka 1.29-30)

38Zisu cha thyu ta, pakhyna o tawhta pua ta, Saimaw o liata a ngia ta. Saimaw lapinô nô cha hrisypa ta thata sy ta, patlâh awpa ta Zisu cha a hawpa ei ta. 39A kiapâh liata a kei duah ta, hrisypa cha ra ta, pai ha ta. Pity pihnô cha thlai thyu ta, âmo cha chakao ta.

Zâlâ ta chyhsa hluhpi a patlâh

(Mat 8.16-17; Mka 1.32-34)

40Noh a tla hai nota, pasana hri nanopa a ohpazy cha, ama chhôhkhazy ta Zisu lâ a vaw chhi ei ta, ama zydua chô liata a ku pahniehpa ta patlâh lymâ ta. 41Ahripazy chyhsa hluhpi chhôh tawhta vaw pua ei ta, “Khazohpa Sawchapawpa na châ!” tahpa ta awh ei ta. Châhrasala âmo cha ra ta, Mesia a châ tahpa ama pahnopa vâta, bie ama rei awpa pasaih leipa ta.

Biechho awpa ta a pua

(Mka 1.35-39)

42Khih a deih nahta, Zisu cha pua ta, su dâhthlohpa lâ sie ta. Zawpizy ta tlua ei ta, ano lâ a vy ei ta, âmo siesai lei awpa ta patu a chhuah ei ta. 43Châhrasala Zisu ta ama hnohta, “Khi hro lâzy chhao Khazohpa khinarâh thâtihpha he ei chho hra awpa a châ. Cha châna chata tuapa ei châ,” tah ta. 44Chatanachata Zudia râh pakhyna ozy liata bie chho lymâ ta.

Currently Selected:

LUKA 4: MARVBSI

Highlight

Copy