LUKA 6
6
Zisu Pahânoh Beipa
(Mat 12.1-8; Mka 2.23-28)
1 #
Ryhpa 23.25
Pahânoh ta sâh thih liata a sie hai nota, a pachupazy ta sâh suzy thlie ei ta, ama kupazah ta chanaohpa ta nie ei ta. 2Phârisaih thokhazy ta, “Khazia ryhpa pasai leipa Pahânoh ta nama tao?” tah ei ta. 3Zisu ta a chhy ta, “Dâvi nata a hnohta a ypazy ta ama nodi nota ama hmotaopa kha reih beih veih ei chi ma? 4#Ttn 24.9; 1 Sam 21.1-6Khazohpa o liata a ngia ta, theihthaipazy deita nie pasaipa Ypâna Viahchhâ la ta, nie ta, a hnohta a ypazy chhao a pie hrapa kyh kha reih beih veih ei chi ma?” tah ta. 5Chatawhcha ama hnohta, “Chyhsa Sawchapawpa he Pahânoh Beipa a châ,” tah ta.
Kusypa patlâhna
(Mat 12.9-14; Mka 3.1-6)
6Pahânoh hropa liata, Zisu cha pakhyna o liata a ngiapa ta pachu ta. Cha liata chyhsa pakha a ku chachâh lâ asypa y ta. 7Ryhpa pachutuhpazy nata Phârisaihzy ta ano ama leih thei nawpa ta, Pahânoh ta a patlâh nata patlâh lei mohpathli ei ta. 8Zisu ta ama palôh a pahno nahta, kusypa hnohta. “A vy la, he liata a vaw duah teh,” tah ta. Kusypa cha thyu ta, cha liata a duah ta. 9Zisu ta ama hnohta, “Ei cha hiahri ei, Pahânoh ta khâpa tao awpa ma ryhpa ta a pasaih, hmo pha tao awpa ma, hmo chhie tao awpa maw? Hrona pabohsapa ma, hrona pahleipadiapa maw?” tah ta. 10Ama zydua ta a moh pachâh khai nahta, kusypa hnohta, “Na ku pazawh teh,” tah ta. A reipa hawhta tao ta, a ku cha vaw pha ha ta. 11Ryhpa pachutuhpazy nata Phârisaihzy cha ama pathi ia ngaita ta, Zisu chô liata kheihta tao awpa ma tahpa a chhohia ei ta.
Lyuhchâpa pahrawh hleinozy
(Mat 10.1-4; Mka 3.13-19)
12Cha nohzy liata, Zisu cha thlahchhâ awpa ta tlâh lâ khy ta, azozâkhihdei ta Khazohpa lâ thlahchhâ ta. 13Khih a pavâ nahta, a pachupazy aw ta, ama hry tawhta pahrawh hleino a tlyh ta, ama moh ta lyuhchâpazy bi ta. 14Chazy cha Pity tahpa ta a moh a bipa Saimaw nata a unawhpa Adaru, Zâmie nata Zawhâna, Phili, Bâthawlawmu, 15Mathai, Thawma, Alphu sawchapawpa Zâmie, Zilô py liatapa Saimaw, 16Zâmie sawchapawpa Zudâh nata a patusatuhpa Zudâh Iskari zy ama châ.
Zawpi a chakao
(Mat 4.23-25)
17Ama hnohta zu ta, a bypa liata a duah ta. A pachupazy ano lâ a vy ei ta. Zudia râh zydua tawhta nata Zerusale khih tawhta nata tilaipi kiah Tyre nata Sidaw khihzy tawhta chyhsa hluhpi ano lâ a vy ei ta. 18A bie nathlie awpa nata ama pasanazy patlâh awpa ta a vypa ama châ. Thlahpa chhiepazy ta a patypamâpazy chhao patlâhpa ama châ. 19Zawpi zydua ta Zisu cha hria a chhuah ei ta, ano tawhta hmotaotheina pua ta, chyhsa zydua a patlâh lymâ ei.
Nohlaonazy
(Mat 5.1-12)
20Zisu ta a pachupazy cha moh ta, ama hnohta,
“Nâmo, sipasapazy saih u, nama nohlao na, Khazohpa khinarâh cha nâmo eih a châpa vâta.
21 “Nâmo, tahmâ nota nodipazy saih u, nama nohlao na, nama rih a bie awpa vâta.
“Nâmo, tahmâ nota a chapazy saih u, nama nohlao na, nama pahnei awpa vâta.
22 #
1 Pit 4.14
“Chyhsa Sawchapawpa vâta, chyhsazy ta châ haopa ta, cha pathluapa ta, cha pasipasawhpa ta, nama moh ama cha pachhie tita, nama nohlao na! 23#2 Ttr 36.16; Hmt 7.52Cha noh liata a ly u la, thaphapa ta a thluah teh u. Pachâ teh u, vârâh liata nama lymâ hluhpi a y. Âmo pathlatuhpazy chhao khata, hrohsopazy chô liata, cha hawhta ama vaw tao tyh.
Huponazy
24 “Nâmo, tahmâ ta hneirôhpazy deikua cha, nama hu a po na, nama lymâ nama hmô hapa vâta.
25 “Nâmo, tahmâ nota rihbiepazy saih u, nama hu a po na, nama no a di awpa vâta.
“Nâmo, tahmâ nota a pahneihpazy saih u, nama hu a po na, mâchhiesapa ta nama y awpa vâta.
26 “Chyhsa to ta ama cha reithai tita nama hu a po na, cha hawhna chata ama pathlatuhpazy ta hrohso pakheipazy chô liata ama vaw tao tyh.
Khakhaipa kyhpachâna
(Mat 5.38-48; 7.12)
27 “Ei bie a theituhpa saih u, ei cha chho ei. Nama khakhaipazy kyhpachâ u la, châ haotuhpazy chô liata hmo pha tao teh u. 28Nama chô liata chhie a sapazy byhnâ awpa u la, châ pasipasawhpazy thlahchhâpa teh u. 29Na baih hiakha lâ châ chabaihpa cha, hiakha lâ chhao dao la, na poh châ chhupa chhao, na viahkao pasipa a la awpa thlyu khah y. 30Châ hiahpa maih pie la, na hmo châ lapatuhpa cha hiah khao khah y. 31#Mat 7.12Chyhsa ta nama chô liata ama tao awpa nama khopa hawhta, nâmo chhao chyhsa chô liata tao hra teh u.
32 “Kyh châ pachâtuhpazy deita kyh nama pachâ khiahta cha, khâpa athôhna ma nama hmô aw? Chyhsa moleipazy chhao ta kyh a pachâtuhpa cha kyh ama pachâ thei mâh tâh. 33Nama chô liata hmo pha a taopazy chô lia deita hmo pha nama tao khiahta cha, khâpa athôhna ma nama hmô aw? Chyhsa moleipazy chhao ta, cha hawhpa cha ama tao thei mâh tâh. 34Hmô heih awpa hnabeiseih theipa hnoh deita dyu nama pacheisa khiahta cha, khâpa athôhna ma nama hmô aw? Chyhsa moleipazy chhao ta, a ualua ta hmô heih awpa ta, moleipazy hnohta ama pacheisa thei mâh tâh. 35Nama khakhaipazy kyh pachâ u la, ama phana awpa tao u la, a vaw kua heih awpa hnabeiseih leipa ta dyu pacheisa teh u. Chatanachata nama lymâ hluh aw ta, Chônôchaipa sawzy nama châ aw. Ano cha alyna châh pahno leipazy nata moleipazy chhao a ngiachhie theipa a châ. 36Nama Paw cha zawngiah theipa a châpa hawhta, nâmo chhao zawngiahna hnei teh u.
Seina kyh
(Mat 7.1-5)
37 “Sei khah u, chatanachata seipa ta y aw veih ei chi. Ahy hmah thailei pachâsa khah u, chatanachata thailei pachâsapa ta y aw veih ei chi. A ngiahthai teh u, chatanachata a ngiahthaipa nama châ aw. 38Pie teh u, chatanachata piepa ta nama y aw. Hnaohpa ta nata chalyupa ta nata a khô ngâpa ta panuana phapa cha, nama kalachhôh liata sopa a châ aw.#6.38 “Kalachhôh” he chachôhna nata byhpi likawh reina châ ta, Khazohpa kalachhôh liata ypa cha, abohna su liata ypa reina a châ tyh. He liata “kalachhôh liata sopa” tahpa deikua he, hmo hluhpi khô theina viahkao pasipa byh lai kawpa, byhpi dady liata a ypa reina a châ. Panuana nama hmâpa hawhta ama cha panuapa hra aw,” tah ta.
39 #
Mat 15.14
Ama hnohta pakhona bie reih heih ta, “Mochaopa ta mochaopa a chhihtha thei aw ma? Ama pano ta khaohtlô liata hmaohkha ta tla aw veih ei ma? 40#Mat 10.24,25; Zhn 13.16; 15.20Pachupa cha a pachutuhpa chô liata y beih vei. Châhrasala liahsata ta pachu hapa cha, a pachutuhpa a lyu aw. 41Khazia nâma mo liata pâkô a ypa hmô leipa chi ta, na unawhpa mo liata mobâ na hmô? 42Nâma mo liata pâkô a ypa hmô leipa chi ta, kheihta ma na unawhpa hnohta, ‘Unawh, na mo liata mobâ kha cha vaw lapa ha sah,’ na tah thei? Nâ, phapakheipa, nâma mo liata pâkô kha la ha tua la, chatanachata na unawhpa mo liata mobâ la awpa cha a siapa ta na hmô thei aw.
Tho to ama thei ta pahnopa a châ
(Mat 7.17-20; 12.34-35)
43 “Tho phapa ta thei chhiepa pathei beih leipa ta, tho chhiepa ta thei phapa pathei beih hra vei. 44#Mat 12.33Tho to ama thei ta pahnopa a châ. Ahloh liata theiku lyu beih leipa ei ta, diahsai liata kre thei lyu beih veih ei. 45#Mat 12.34Chyhsa phapa ta a palôh ryubyh phapa tawhta hmo phapa papua tyh ta, chyhsa chhiepa ta a palôh ryubyh chhiepa tawhta hmo chhiepa a papua tyh. Chyhsa ta a palôh liata a bie pakhôpa cha, a pakah ta a papua tyh.
Abôna mianopazy
(Mat 7.24-27)
46 “Ei bie zyh tlôh leipa ei chi ta, khazia, ‘Abeipa, Abeipa,’ eina tah ei chi? 47Kei lâ a vy ta, ei bie thei ta a taopa maih cha, khâpa a lyu tahpa ei cha pahmôsa aw ei. 48Ano cha chyhsa ta o sa ta, â pathupi a lei chao ta, lôpanô chô liata abôna a paryhpa hawhta a châ. Ti a vaw lai nahta, tily chahra ngaitapa ta su ta, a phapa ta sapa a châpa vâta a chalyu vei. 49Thei tlôh ta a tao leipa deikua cha, abôna a i leipa alei chô liata o a sapa chyhsa hawhta a châ. Tily chahrapa ta o cha su ta, thlai a cho haw. Cha o raopa cha a rarôh y ngaita,” tah ta.
Currently Selected:
LUKA 6: MARVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved.
