MÂKA 9
9
Hmia nanona
(Mat 17.1-13; Lka 9.28-36)
1Zisu ta ama hnohta, “Hmeiseihta ta ei cha chho ei, he a duahpa sahlaozy hry liata, Khazohpa khinarâh hmotaotheina chhaota a vaw tlôpa ama hmô hlâlei cha, thina a padi lei awpa ama y,” tah ta.
2 #
2 Pit 1.17,18 Noh charu khai tawhta Zisu ta Pity, Zâmie nata Zawhâna zy a chhi ta, âmo dei ta tlâh sâhpa lâ khykhei ta. A hmiaphao cha ama hmiakô liata a vaw nano ha ta. 3A chysiazy cha a thlaraw vaw sie ta, alei chô liata chysia pasutuhpazy ta ama padiehsa theipa hlâ syulyu ta vaw dieh via ha ta. 4Elaizâh nata Mawsi ama hnohta a vaw luah ei ta, Zisu cha bie a chho ei ta. 5Pity ta Zisu hnohta, “Pachutuhpa, he liata ypa he eima châta a pha na. Byureih miathôh, nâma châta miakha, Mawsi châta miakha, Elaizâh châta miakha tu ei suh u,” tah ta. 6Chi kaw ei ta, Pity cha bie hropa rei awpa pahno leipa ta. 7#Mat 3.17; Mka 1.11; Lka 3.22Chatawhcha meihdo ta âmo cha vaw khu ta, meihdo tawhta ao vaw pua ta, “He he ei Sawchapaw, kyh ei pachâpa a châ. A bie nathlie teh u,” tah ta. 8Thlai mohmia pasaih ei ta, Zisu dei leipa cha, ama hnohta ahy hmah hmô khao leipa ei ta.
9Tlâh tawhta ama za chô nota, athihpa hry tawhta Chyhsa Sawchapawpa a thyu heih hlâlei cha, hmo ama hmôpazy ahy hmah chho lei awpa ta âmo cha biepie ta. 10A bie reipa cha a vao thlâh ha ei ta, athihpa hry tawhta thyuheihpa cha khâpa tahna ma a châ tly, tahpa ta a hiahri raihrie ei ta. 11#Mal 4.5; Mat 11.14Pachupazy ta a hnohta, “Khazia ryhpa pachutuhpazy ta Elaizâh â vy tua awpa a châ ama tah tly?” tahpa ta hiahri ei ta. 12Zisu ta ama hnohta, “Hmo to zydua tao pathi awpa ta Elaizâh cha â vy tuapa tlai a châ. Cha khiahta la, Chyhsa Sawchapawpa cha pasana hluhpi tao aw ta, mohnaopa ta a y awpa kyh cha, khâpa vâta ropa ma a châ? 13Châhrasala ei cha chho ei, Elaizâh cha a thâtih ropa hawh tlai ta a vy ha ta, ama khozie hawhta a chô liata ama taopa kha a châ,” tah ta.
Zisu ta thlahpa puapa a hneipa hawti a patlâh
(Mat 17.14-21; Lka 9.37-43)
14A pachupa hropazy yna ama za tlô nahta, ama kiapâh liata zawpi hluhpi hmô ei ta. Ryhpa pachutuhpazy nata pachupazy cha bie a ei ngâ kaw ei ta. 15Zawpi zydua ta Zisu ama hmôpa nahta, noâh tah kaw ei ta. Ano lâ thlai a râpa ta, a naoh ei ta. 16Zisu ta ama hnohta, “Ryhpa pachutuhpazy nata khâpa bie ma namâ ei?” tah ta. 17Zawpi hry liata pakha ta, “Pachutuhpa, ei sawchapawpa nâ lâ ei vaw chhi. Ei sawchapawpa he thlahpa hnei ta, cha thlahpa chata reih pathlie thei leipa ta a tao haw. 18Thlahpa ta a patuna maihta, taikhy ta, a pakah buchaphy tla ta, a hâhzy charieh ta, a pôhpa a vaw pala khai ha tyh. Thlahpa puapa cha papua awpa ta, na pachupazy a haw ei na ta, châhrasala papua thei veih ei,” tah ta. 19Zisu ta âmo cha a chhy ta, “Hy ngiapâleipa chhâ saih u, khachâ ma nama hnohta ei y aw? Khachâ ma ei cha pachâ thai aw ei? Kei lâ a vaw chhi teh u,” tah ta. 20Hawtipa cha ano lâ a vaw chhi ei ta. Zisu a hmôpa nahta, thlahpa ta hawtipa cha a rie thlai patheisa ta, alei liata pao ta, a hluah ta, a pakah buchaphy tla ngâ kaw ta. 21Zisu ta a paw hnohta, “He hawhta a vaw y pathaona he khachâ a châ haw?” tah ta. A paw ta, “A hawtita tawhta a châ. 22Pahleipadia awpa ta ei hluhpi mei liata zy, ti liata zy a papaosa tyh. Khâpa chhâ na tao thei khiahta la, miah ngiachhie la, miah bao mah y,” tah ta. 23Zisu ta a hnohta, “‘Na tao thei khiahta la,’ na tah ma! Ngiapâtuhpa châta cha, ato tao theipa a châ,” tah ta. 24Hawtipa paw cha thlai awh ta, “Ei ngiâpâ na, ei ngiapâleina liata na bao mah y,” tah ta. 25Zawpi amâ vaw râpakhy haipa Zisu ta a hmô nahta, thlahpa puapa cha ra ta, a hnohta, “Nâ, reih pathlie thei leina nata nahpâna thlahpa, bie ei cha pie, a chhôh tawhta vaw pua la, a ngia heih khao khah y,” tah ta. 26Thlahpa puapa cha awsâh ta, hawtipa cha thata a taochhie khai tawhta pua ha ta. Hawtipa cha athipa hawhta vaw y ta, chyhsa hluhpi ta, “A thi hapa he,” tah ei ta. 27Zisu ta a ku patu ta, pathyu ta, a vaw duah ha ta. 28O chhôh lâ â ngia nahta, a pachupazy ta, “Khazia keimo ta thlahpa puapa eima papua thei vei?” tahpa ta arulâta hiahri ei ta. 29Zisu ta ama hnohta, “He hawhpa he cha thlahchhâna nata kâhvileina#9.29 Hlâno kuropa Biehrai thokha liata cha, “kâhvileina” tahpa he y vei. dei leipa ta cha, khâpa ta hmahta papua thei vei,” tah ta.
Zisu ta a thina nata a thyuheihna kyh a reih chhielie heih
(Mat 17.22-23; Lka 9.43-45)
30Cha su tawhta pua ei ta, Kâlili râh chapiapa ta sie ei ta. Ahy hmahta a sievawna ama pahno awpa khoh leipa ta. 31A pachupazy cha pachu ta, ama hnohta, “Chyhsa Sawchapawpa he chyhsazy ku liata hlâpa châ aw ta, thie aw ei ta, ama thie tawhta noh thôh noh ta a thyu heih aw,” tah ta. 32Châhrasala a bie reipa cha a pachâ nawpa rai pahno veih ei. Ano hra cha hiahri ngâh tlôh leipa ei ta.
Ahy ma rônah chai aw?
(Mat 18.1-5; Lka 9.46-48)
33Kâpynia khih tlô ei ta. O chhôh liata a y nota ama hnohta, “Lâpi liana kha khâpa bie ma namâ ei tly?” tah ta. 34#Lka 22.24Ahy ma a rônah chai aw tahpa lâpi liata amâ vaw ei laihpa vâta, phie a chalih khai ha ei ta. 35#Mat 20.26,27; 23.11; Mka 10.43,44; Lka 22.26A tyuh ta, pahrawh hleinozy cha aw ta, ama hnohta, “Ahy rai a hmiatua chaipa a châ khoh khiahta cha, chyhsa zydua hlâta hnôh chaipa ta a y awpa châ ta, chyhsa zydua chakaotuhpa ta a y awpa a châ,” tah ta. 36Hawtipa pakha la ta, ama hry liata paduasa ta, a bâh liata a pyh ta, ama hnohta, 37#Mat 10.40; Lka 10.16; Zhn 13.20“Ahy rai ei moh ta he hawhpa hawti pakha chhao a lypa cha, keima nâ lypa a châ. Keima nâ lypa cha, keima nâ lypa châ leipa ta, nâ tuahtuhpa a lypa tlao a châ,” tah ta.
Miah a dyuh leipa cha keimo chhâh â châ
(Lka 9.49-50)
38Zawhâna ta a hnohta, “Pachutuhpa, chyhsa pakha na moh ta ahripa a papuapa hmô pi ta, miah a pazi leipa vâta eima pakhâ haw,” tah ta. 39Zisu ta, “Pakhâ khuh vy. Chyhsa ahy rai ei moh ta hmonoâhpa a taopa cha, hnôhlâ ta thlai na reipachhie pazi aw vei. 40#Mat 12.30; Lka 11.23Ahy rai miah a dyuh leipa cha eima chhâh a châpa a châ. 41#Mat 10.42Hmeiseihta ta ei cha chho ei, ahy rai Krista moh vâta ti nyu kha châ padopa cha, a lymâ pahlei cheita aw vei.
Molei awpa ta reipasaonazy
(Mat 18.6-9; Lka 17.1-2)
42 “Ahy rai, he nâ ngiapâtuhpa hawtizy hry liata pakha chhao a pahluasapa cha, a rao liata charona lô laipa paaopa ta tilaipi liata thypa châ sala ano châta a pha via aw. 43#Mat 5.30Na ku ta a cha pamoleisa khiahta cha, tai ha mah y. Ku miano ta Kehenâ#9.43 Kehenâ he hriena su a châ. lâ sie awpa hlâta cha, ku miakha chôpa ta hrona liata a ngiapa na châta a pha via. 44Kehenâ liata cha ama lôpa thi beih leipa ta, mei chhao pachhaipa ta y beih vei.#9.44 Châh 44-na nata châh 46-na zy he châh 48-na nata a lyu ei ta, hlâno kuropa Biehrai thokha liata châh 44-na nata 46-na zy he pahlao veih ei. 45Na phei ta a cha pamoleisa khiahta cha, tai ha mah y. Phei no hneipa ta Kehenâ lâ thypa châ awpa hlâta cha, pheisypa ta hrona lâ a ngiapa na châta a pha via. 46Kehenâ liata cha ama lôpa thi beih leipa ta, mei chhao pachhaipa ta y beih vei. 47#Mat 5.29Na mo ta a cha pamoleisa khiahta cha, thaoh ha mah y. Mo no hneipa ta Kehenâ liata thypa châ awpa hlâta cha, mo kha hneipa ta Khazohpa khinarâh lâ a ngiapa na châta a pha via. 48#Isai 66.24Kehenâ liata cha, ama lôpa thi beih leipa ta, mei chhao pachhaipa ta y beih vei. 49Chyhsa to mei ta pasiapa châ aw ei ta, atheihna to alôh ta pa-iahpa a châ aw.#9.49 He bie he Kehenâ lâ a ngiapa châta mei kâpa hriena a tao nawpa kyh reina châ thei ta, ngiapâtuhpazy mei ta pathaisapa ta riethei ama tao nawpa kyh a chakhi thei hra. 50#Mat 5.13; Lka 14.34,35Alôh cha a pha, châhrasala alôh cha a padâh ha khiahta cha, kheihta ma nama pa-iahsa heih thei aw? Alôh hawhta iah u la, a dyryh kawpa ta y muh vy,” tah ta.
Currently Selected:
MÂKA 9: MARVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved.
