LUK 17
17
Temetsüdaktsü
(Mat. 18.6-7,21-22; Mar. 9.42-49)
1Pai pei nütsüngtem dang ashi, “Temetsüdaktsü adokdaktsütsüsa tatitangtem arulanglang; saka shiba ajanga itemji arudir pa asoshi aiatai! 2Item tilatem rongnung ka danga shibai metsüdaktsüdir, pa asoshi temenüngba lungpak ka tekong nung iloker tzüyim nung pungok ang jungla. 3Nenoki nenok sasa kümdangang; ne adianui tai menara, arüjang, aser pai temulung meyipra, pa nem tatok agüjang. 4Pai anogo ka nung tenetben na anema tai menara aser tenetben ni temulung meyiper ta meyipa shira nai pa dang tai adoktsüla.”
5Aser tenyartem terana jagi Kibuba dang ashi, “Onok tamang züindakjang.” 6Aser Kibubai ashi. “Nenok dak tamang jibijang taka lira, nenoki iba korishi dong dang ashitsü, ‘atsütetang aser tzüyim nungji ajungokjang’ aser yagi nenok o angatsü.
7“Saka nenok rongnung shiba kilir ka aka aser pai alu alar aser santem anüker pa alu nungi adokdang shibai shitet, ‘Yakta arung aser chiyungtsü menang!’ 8Saka pai pa dangji yamai ang mashir ama, ‘Ni asoshi chiyungtsüji renemang aser nangri kanger ni chiyunga majem tashi ni anganüang aser aji sür külen na chiyunga ajemtsü’ ta pai mashir ama? 9Kilir jagi pai ashiba inyak nung pai pa tenüng asangtsü ama? 10Yamaji nenokia nenok dang ashiba inyakmar külen shiang, ‘Onok tagidak makaba lartem kechi teinyaktsü lir aji dang onoki inyak.’ ”
Zütsüra Aketer Nisung Ter Anebtsüba
11Pai Yirusalemi aoba lenmang nung Samaria aser Galil tsüngda ajanga süi. 12Aser pa yim kati aidang zütsüra aketba nisung ter-i pa ajuru, 13aser parnoki ola adoka ayimtena ashi, “Yisu, Tesayur, onok dang aochiangma!” 14Kodang pai parnok angu, pai parnok dang ashi, “Oang, aser putirtem dang nenok sasa sayuang.” Aser parnok taodangji parnok meshiteta aküm. 15Parnok rongnung kati pa anebogo ta meteta ola tulu agi Tsüngrem nem sentsüwangshi agüja pai meyipa aru, 16aser pai Yisu tsüngdang apudaka pa nem tenüngsang agütsü, aser paji Samaria nunger ka liasü. 17Yisui langzü, “Nisung ter meshitet masü no? Tukubo kong ali? 18Iba bendanger nisung ka dak alaka Tsüngrem tenüng asangtsü meyipa aruba shinga mali asü no?” 19Aser pai pa dang ashi, “Shishiang aser oang, ne tamang agi na junga kümogo.”
Tsüngrem Yimli Aruba
(Mat. 24.23-28,37-41)
20Tsüngrem Yimli kodang arutsü ta Farisitemi asüngdang, aser pai parnok dang langzü, “Tsüngrem Yimliji penzütsüsa temaitsütem agi marur; 21mesüra shingaia yamai mashir, ‘yangi ajiang mesüra oagi ajiang;’ kechiaser ajiang, Tsüngrem Yimli nenok rongnung lir!” 22Aser pai nütsüngtem dang ashi, “Mapang ka arutsü kodang nenoki Nisung Chir anogotem ngunütsü, saka nenoki ya mangutsü. 23Parnoki nenok dang ashitsü, ‘Oagiji ajiang! mesüra yangi ajiang!’ Saka aji reprangtsü parnok sülen tanitak. 24Kechiaser kechi koda tsüngpret anüng tip külen pret nung anüng tip külen tashi sangwar, yamaji Nisung Chir pa anogo nunga alitsü. 25Saka tamasa pa kanga tuo ashitsüla aser iba putui pa jentoktsü. 26Aser Noa anogo nung aliba ama yamaji Nisung Chir anogo nunga alitsü. 27Noai rongi matuba anogo tashi aser tzümetsüng arua parnok ajak mesamatsü tashi parnok chia jema, anioka aser kiba kiyi yoka liasü. Aser tzümetsüngji aru aser parnok ajak okshia samatsü. 28Ibai Lot mapang nung koma liasü yamaji alitsü. Parnoki achi, parnoki ajem, parnoki ali, parnoki ayok; parnoki tsünü aser parnoki yanglu. 29Saka Loti Sodom nungi oadokba anogo nungji mi aser tarongba lung anüng nungi tzünglu ama alu, aser parnok ajak samadaktsü. 30Yamajisa Nisung Chir jungkai adokba anogojia alitsü. 31Iba anogo nungji shiba kilem nung lidir, pa par kidang aliba rongsen abentsü teluma aser shiba alu nung lidir, pa-a meyipa tetuguma. 32Saka Lot kinungtsü bilemtetang! 33Shibai pei taküm ajangzüktsü merangdir aji samatsü. Saka shibai pei taküm samadir pai aji kümzüktsü. 34Ni nenok dang shidi, paonungji yipten ka nung nisung ana alitsü, ka anitsü aser tangarji toktsütsü. 35Tetsür ana semki ka nung külemi tsük senya alitsü, ka anitsü aser tangarji toktsütsü. 36Nisung ana alu nung alitsü, ka anitsü aser ka toktsütsü.” 37Aser parnoki pa dang ashi, “Kong, Kibuba?” Pai parnok dang ashi, “Kong tasü mang lidir, yangji hogontem külemi senteptsü.”
Currently Selected:
LUK 17: ANSEBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
