LUK 2
2
Yisu Asoba
(Mat. 1.18-25)
1Item anogo nungji alima ajak nung tenüng zülutsüla ta Kaisar Augusta nungi ozüng ka sangdong. 2Aji Kurini Siria lima nung governor alidang mezüng nütsüng yongsük zülutenba liasü. 3Aser nisung ajak pei tenüng zülutsü pei yimti-i ao. 4Yosefa Galil nung aliba Nazaret yimti nungi Yihuda nung aliba Bethlehem ta ajaba Dawid yimti-i ao, kechiaser pa Dawid kidong nungi liasü. 5Pai aniasünga aliba Mari, shiba temang mazüngi liasü, la den tenüng zülutsü asoshi ao. 6Parnok yangji alidang, la nu amungtsü mapang tonga aru. 7Lai pei mezüng jabaso aso aser kinü sü agi meia tsük mejakdak su ka nung ayu. Kechiaser parnok asoshi tanendakji taktang mali asü.
Sannüker aser Kotak Tenyar
8Aser iba linük nungji sannükertem moapu nung aonung pei san telok nükya liasü. 9Kibuba kotak tenyar ka parnok dangi jungkai adok; aser Kibuba sentsüwangshi parnok meketa yalok. Aser parnok tetsübu agi asüng. 10Aser tenyar jagi parnok dang ashi, “Tetsübu kechiaser ajiang, ni nenok dangi tepelatsü osangtajung tulu bener arutsür. 11Kechiaser tanü nenok nem Dawid yimti nung Kümtetdakba ka soja lir, paji Kibuba Khrista lir. 12Aser nenok dang temaitsüji ya alitsü: nenoki tanur ka kinü sü agi meir tsük mejakdak su nung mejanga angutsü.” 13Aser aoksa tenyar denji kotaker telok nungi jenti adoka Tsüngrem tenüng sanga ashi, 14“Tematiba nung aliba Tsüngrem dang sentsüwangshi, aser alima nung pa temulung achiba nisungtem rongnung tesünep.”
15Kodang tenyartemji parnok nungi pila-a kotaki atu, sannükertemi kati ka den jembitepa ashi, “Kechi Kibubai asenok dang metetdaktsü aser kechi atalok, tang asenoki Bethlehemi oa aji reprangdangdi.” 16Aser parnoki ilunga ao, aser Mari o Yosef na den kinü tanurji tsük mejakdak su nung mejanga angu. 17Kodang parnoki aji angu, iba tanur indang parnok dang ashibaji metetdaktsü. 18Aji angashir ajaki parnok dang sannükertemi ashiba indang süngmang. 19Saka Maribo item tatalokbatem ajakji pei mulung nung rizünga yua item indang shisadanga liasü. 20Aser parnok dang ashiba amato sannükertem jagi angashiba aser anguba ajak asoshi parnoki Tsüngrem tenüng sanga aser pa sentsüwangshidakja meyipa aru.
21 #
Lev. 12.3; Luk. 1.31. Aser tinü buba nung kodang pa mejeptoktsü; la nu menden nung pa metanglok dang tenyari tenüng agütsüba ama, pa tenüng Yisu ta aja.
Yirusalem Nung Yisu Lanuwa
22Mosa Ozüng amato parnok meshitettsü anogo abensadang, Kibuba nem bendanga agütsütsü asoshi parnoki Yisu Yirusalemi anir aru. 23Kechiaser Kibuba ozüng nung zülua aliba amato, “Mezüng asoba jabaso shiaji Kibuba madang temeshi ta ajatsü.” 24Tenlatsü asoshi Kibuba ozüng nung aliba amato, guduru chanu ana parnoki tenla. 25Tang Yirusalem nung Simon ta ajaba temeshi aser bendanga agütsüba nisung ka liasü. Aser Israel süneptsüba asoshi pai ata-a liasü; Tanela Temeshi pa madak liasü. 26Pai Kibuba meyong Khristaji mangu tashi tasüba mangutsüla ta Tanela Temeshi agi pa dang jungkai adoka liasü. 27Tanela nung pai tenla kidangi atu. Kodang tsüraburi ozüng nung aliba ama benshitsü Yisu anir aru, 28Simoni paji ajungzük aser Tsüngrem dang moaja ashi;
29“Tang, Kibuba, ne o amato nai ne tenzüker tesünep nung piladakjangma.
30Kechiaser kü tenüki ne tekümtet nguogo;
31Koba nai nüburtem ajak asoshi renemogo.”
32 #
Isa. 42.6; 49.6; 52.10. Oda Bendangertem dangi tesangwa ka jungkai adokba aser ne nübur Israel dangi sentsüwangshi asoshi.
33Aser pa tebu aser pa tetsü pa indang jembiba nung süngmanga liasü. 34Idangji Simoni parnok moatsü aser tetsü Mari dang ashi, “Ajiang, temulung aika nungi tebilemba jungkai adoktsü asoshi, Israel pur rongnung aika laoba mesotsü asoshi aser temaitsü koba anema o jembitsü, aji asoshi iba tanur shimteta lir. 35Aser nok ka agi ne tanela ateta atsüngtsü.” 36Asher kin nungi Fanuel jala rongnung ka ainkarla tenüng agi Ana ta ajaba ka liasü. La kanga tantsür liasü aser la aiwa mapang nungi tenzüka pei kinungpu den küm tenet lir külen; 37aser la küm tir-pezü tashi amia liasü. Lai lumia mepishiba agi anüngdang aser aonung oda anogoshia külema tenla kidang nungi mepila. 38Iba mapang nungjisa tua lai Tsüngrem nem tenüngsang agütsü, aser Yirusalem tekümtet asoshi atartem ajak dang pa indang jembi.
39Kodang Kibuba ozüng amato parnoki ajak renem, parnoki Galil nung aliba pei yimti Nazareti meyipa shilang. 40Aser tanurji ain aser tashi ita aküm, aser pa shisatsü agi sünga, aser Tsüngrem taochi pa madak liasü.
Tanur Yisu Tenla Kidang
41Pa Tsüraburi küm shia Kümtettsü Benjong nung adentsü parnoki Yirusalemi atu. 42Kodang pa küm terana tain liasü, Benjong yimsü amato parnoki Yirusalemi atu; 43aser kodang Benjongji atem, parnok meyipa shilangdang, tanur Yisuji Yirusalem nung ata-a liasü, aser pa tsüraburi aji memeteti liasü. 44Saka par medemer den alitsü ta bilema, parnoki kenü anogo lenmang oadok. Idangji parnoki paji parnok kinungertem aser medemertem rongnung bushi. 45Saka kodang parnoki pa mangu, parnoki pa bushia Yirusalemi aru. 46Anogo asem süir külen, parnoki pa tenla kidang tesayurtem rongnung o anga-a aser tasüngdangbatem asüngdanga mena angu; 47aser pa o angashir ajaki pa tangatetba aser telangzübatemji ngua süngmang. 48Kodang parnoki pa angu, parnoki süngmang, aser tetsüi pa dang ashi, “Tebusang, kechiba nai onok dang yamai benshir? Ajiang, nebu künabo temulung makai na bushir?” 49Pai parnok dang ashi, “Nenoki kechiba ni bushia liasü? Ni kü Bu kidang alitsüla ta nenoki memetet no?” 50Saka pai parnok dang ashibaji parnoki mangatet. 51Aser pai parnok den Nazareti aru, aser idakji pai parnok dang tashi anga-a liasü, aser item ajak tetsüi pei mulung nung yua liasü. 52Aser Yisu shisatsü nung, temang nung, Tsüngrem aser nisung matsüngdang taochi nung ain.
Currently Selected:
LUK 2: ANSEBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
