BOTHUBO 25
25
Abraham Kithi eno Pa Kughuko
1Abraham no anipu kütau luve, li je ye Keturah. 2Li no Zimran, Jokshan, Medan, Midian, Ishbak eno Shuah punue. 3Jokshan no Sheba ngo Dedan pama papu. Dedan nuli no Asshurim, Letushim eno Leummim. 4Midian nuli no Ephah, Epher, Hanoch, Abida, eno Eldaah. Hipaqo kümtsü Keturah nuliqo ke. 5Abraham no pa no pighi akeu kümtsü Isaac tsüve. 6Ikemu pa nipu amishiu nuliqo lau ye Abraham no agho jeli tsü, eno pa no xüaphi lono panoqo pesü pa nu Isaac launo putosüu kipela ghakhu küdau puwuve.
7Abraham küxü mpe ye hike, ampe 175. 8Abraham ye akivishi kitemi shino atuthu kishekhave. 9Pa nu Isaac ngo Ishmael pama no Hittimi Zoar nu Ephron luza, Mamre kipelau Machpelah tuki lo pa shiqhove, 10ti ye Abraham no Hittimi launo qhüluve keu luzake. Abraham ye tile pa nipu Sarah kumo phivilo shiqhove. 11Abraham no thive kethiu Alhou no pa nu Isaac kümghatsüe. Eno Isaac ye Beer-lahai-roi lo xüsüve.
12Abraham nu Ishmael, khuu Egyptmi Hagar, Sarah qeliu no Abraham lau punu tsü keno, pa tikughuko ye hipaqo ke. 13Hipaqo no Ishmael nuli jeqo, panongu punu keu pasü lono aje: Nebaioth, Ishmael nu anoghiu; eno Kedar, Adbeel, Mibsam, 14Mishma, Dumah, Massa, 15Hadad, Tema, Jetur, Naphish eno Kedemah. 16Hipaqo no Ishmael nuli eno panoqo je, ti ye pano phu eno aghüna, kükapumi chighikini pano shiaye kiqi lono ke. 17(Ishmael küxü mpe ye hike: ampe 137.) 18Panongu ye Havilah lono Shur, khikhi Egypt ghüngü lo Assyria küdau ani keno, tipa kutolo küghünauve. Pa ye pa sholokumi kümtsü mjochile ghi küghünauve.
Esau ngo Jacob Punu
19Isaac tikughukomi no hipaqo: Abraham no Isaac papu, 20eno Isaac no ampe lhobidi shi akelono Arameami Laban pafo, Rebekah, Paddan-aram lo Arameami Bethuel nonga, pa nipu shinike luve. 21Isaac no pa nipu ghenguno Ampeu vilo inikhu, kughengu li ye anuhami ke. Eno Ampeu no pa kighini khochile tsüno pa nipu Rebekah ye mishive. 22Anu pama ye li po lono kumgho kile thuve, eno li no pi, “Tsala hi no ishi kepu shi aghi aye, kushiye I lau hipau shi ani kea?” Ikehu li no Ampeu lau ighiju niye wu. 23Ampeu no li vilo pi,
“Shiye kini o polo ani, eno
ashiaye kini o lolo akeu ye kijethave nani;
lakhi no lakhiu nguno akumtou shive nani,
akichiu no ayitiu qe nani.”
24Kughou pununi keu tsala kupuve keno, julo, li polo kinikishe aghive. 25Atüghüu no huchuyi ipeghi, pa phiau kümtsü amhi hebephi lakhi toi, ikehu panongu no pa je Esau kuvetsü. 26Tithiu pa thiküzüu no pamu phitsü tsüqüpe ipeghi, ikehu pa je Jacob kuvetsü. Kughou Ii no pama punu keno, Isaac ye ampe lhotsügho shiae.
27Kughou anu pama no thuwuve keno, Esau ye ashiküha lo shitsa shi ipeghive, eno Jacob ye iqünhei kemi lakhi, aphiki lo ngo ache. 28Isaac no Esau kimiye che kughengu pa ye Esau no ashi yipughi keu chuche, ikemu Rebekah no Jacob kimiye ache.
Esau no Apunuchipiu Jechuve
29Ghulo lakhi Jacob no ayekulho lho akelo, Esau ye aluza lono ighi eno pa ye amzü no thiqhivae. 30Esau no Jacob vilo pi, “I pelo huchuyi keu yekulho hipau chulu pelo, kughengu ni ye amzü no thiqhivae!” (Tighenguno pa je ye Edom kuve tsüe.) 31Jacob no pi, “Itehi o punuchipiu I vilo jevelo.” 32Esau no pi, “Ni ye thivenike shivae; apunuchipiu ye I ghenguno kiu ala ani kea?” 33Jacob no pi, “Itehi I vilo ashoqhi shilo.” Ikehu pa no pa vilo ashoqhi shive no pa punuchipiu Jacob vilo jesüve. 34Tithiu Jacob no asho eno ayetsüni yekulho Esau tsüve, eno pa no chushove no ithu pa la lo wuve. Ikehu Esau ye pa punuchipiu thaighave.
Currently Selected:
BOTHUBO 25: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
