MARK 15

Pilate Zülo Jisü Sawu

(Mt 27:1-2; 11-14; Lk 23:1-5; Jhn 18:28-38)

1Inaqhe shive kemtsa achinetomi no layemi, Ayezah shikükami ngo hoho mpemi kümtsü sasü kuchughuve. Panongu no Jisü phiau tshüve tsüno sawo Pilate u lo süvetsü. 2Pilate no Jisü vilo ighiju, “No ye Jewmi kükau keshea?” Jisü no khochile, “Nono pivae.” 3Tileno achinetomi no nguku keu tsa jeli pesü pa shou pipuku. 4Pilate no itaghi pa vilo ighiju, “No ye khokichile kiumu küha keo? Panongu no nguku keu tsa khije o shou süghi ani keno ithilo.” 5Ikemu Jisü no kiu tsamu khochile move keu lono Pilate ye akümzave.

Jisü Yedave Penike Tsüve

6Hechekulu ghulhu kümtsü lo Pilate no timiqo no khukeu kiqi lono akughumi lakhi khaqhiphe tsüche. 7Yepeka hebide kelono timi pithi püakemi gholo milakhi Barabbas ipikeu akughuki lo ake. 8Aqokitikhi no ighi no Pilate vilo thosülo toi panoqo lau shitsü lopi khu thuve. 9Pa no timiqo vilo ighiju, “Nongu ye I pelo nongu lau Jewmi Kükau khaqhiphe tsü penishi ani kemo kea?” 10Kughengu achinetomi no anhekushu lono Jisü kügha sawo pa tsükeu pa no ithive. 11Ikemu achinetomi no pa pelo Barabbas khaqhiphe tsü peniye aqokitikhi xukutho. 12Pilate no itaghi ighiju, “Maye ni ye timi hipau nongu no Jewmi Kükau ipi akeu lau kiu shitsü lopi kea?” 13Panongu no ighamku pi, “Pa yedave lo.” 14Pilate no panoqo vilo pi, “Kushiye kea? Pa ye kiu lhoksa shive kea?” Ikemu panongu no alaushi igha, “Pa yedave lo.” 15Ikehu Pilate no aqokitikhi ghapiqi tsüniye Barabbas khaqhiphe pe panoqo tsüve, eno Jisü küghape hetha pinyive no yedave penike ikhiphe tsüve.

Ghüshimi no Jisü Thogha

(Mt 27:27-31; Jhn 19:2-3)

16Tithiu ghüshimi no Jisü sasü kükaki (ti ye anghw oking) alou ilove, eno pano loji lo kütami ghi kukütsü kha. 17Panongu no hughai keu hebephi pesü pa puu, eno asahu ghokünape akütsükuqho shino pa pipe. 18Tishino au peqhepe agigihu pa tsü, “Axüpushu lo, Jewmi Kükau!” 19Panongu no aküsü pesü pa kütsü lo küza puku, eno amiti pesü müsüte no thogha ghi pa zülo qhoqhünhe. 20Kughou panongu no pa süqoqhive keno, panongu no hughai keu hebephi puu püakeu xave tsüno pa phimini pipeve, eno yedave nike pa sünhe saipeve.

Kros lo Yedave

(Mt 27:32-44; Lk 23:26-43; Jhn 19:17-27)

21Tile timi lakhi Simon ipikeu, Cyrene lo küami eno Alexander ngo Rufus papu, aphughi lo ilo niye ala lo cheke lono ghüshimi no Jisüw kros xapu penike anguka lono sünhe luve. 22Ghüshimi no Jisü sasü Golgotha (tipa kiqi ye Aboghe-a) ipikeu lo ighi. 23Panongu no atsaiji lo akukhu zü kite keu pesü Jisü tsü kemu pa no lutsü moe. 24Ghüshimi no pa pesü kros lo yedave no pa phimini süxüpe milakhi khino kiu lukepu keno kimchini ke asaqhi khave. 25Panongu no inaqhe ayi toku kihe qhalono pa yedave. 26Eno Jisü kipimi tsa ishi yepe kros lo datsü, “Jewmi Kükau.” 27Jisü gholo panongu no küpkami kini, lakhino pa u ajeu eno lakhiu no pa u piyiu yedave. 28(Tishikeu lono Kuchoyesü lo yepüa keu shikupuve, “Pa ye alhoksami gholono pithive.”) 29Khunoqo ti kathawu keno panongu no pa thaigha ghi akütsü küngü tsüno pi, “Aha! No achineki kütsave no atsala küthü lono shiqhe kitheni küau, 30no ampi xaluve lo, eno kros lono iqighive lo!” 31Titoi achinetomi gholo Ayezah shikükami ghi pa cheqhi no panoqo dolo pikile, “Pa ye kütami xaluve kemu pa likhi pau ye xamlae. 32Israelmi Kükau, Khristo pelo kros lono iqighive pelo, tishi aye ningu no pülüni.” Jisü gholo yeda keu pama ghi pa thaighae.

Jisü Kithi

(Mt 27:45-56; Lk 23:44-49; Jhn 19:28-30)

33Puchou ayi chighikini kihelo, tipa ghakhu kümtsü ayikihedo küthü kutolo züchiyi ighive. 34Avelau ayi küthü kihelo Jisü no asütsa kuloghi shi ighamku, “Eloi, Eloi, lema sabachthani?” tipa kiqi ye, “I Lhou, I Lhou, No ye kushiye I qhive akea?” 35Aphivilo akeqo no ti chilu kelo pi, “Julo, pa ye Elijah ku ani.” 36Milakhi no aghüshi lono akiqhi ji pütsü no aqhaqhi lo tsada pewo müsü peniye Jisü tsüno pi, “Qele, ningu Elijah no pa ikhiqhi nike ighi nani kemo keno juni.” 37Jisü no asütsa kuloghi shi igha no pa tuthu kishekhave. 38Tileno achineki lo kokütha nhaqhiphi ye akütsü lono abophi kutolo ixü kütüta shive. 39Ghüshimi aqhe zatsüu no Jisü zülo ngono Jisü no hipa gholau no süthauve keu ithulu kelo ishi pi, “Mtsüqheino timi hipau ye Alhou Nue!”

40Tile totimi khami ghi putou no juae, tipaqo gholo Mary Magdalene ngo Mary lakhiu, James ayitiu ngo Joses pama paza, eno Salome ishi ae. 41Jisü no Galilee lo ake ghuloki lo panongu no pa pape no huthu cheke, hinguno alau totimi kütami khunoqo pa gholono Jerusalem lo iqhoghi keno kutomo tile ae.

Jisü Kumo Kuqho

(Mt 27:57-61; Lk 23:50-56; Jhn 19:38-42)

42Sabbath tsala züu, ti ye Akukuto Tsala kehu, kughou avela shive keno, 43Arimatheami lakhi, hoho mpemi agigihu küami khuu ampi no Alhou yekipe ghi laju chekeno, Joseph ipikeu no amlo kuloghi shi püzü Pilate lau wuno Jisü sükumo khu. 44Pilate no Jisü thive aghi keu chilu kelo akümzave. Pa no aqhe zatsüu kuno thebeive nike kighinikile. 45Kughou pa no aqhe zatsüu launo thive keu thebeive keno, pa no Jisü sükumo Joseph tsüni keu za tsüve. 46Joseph no phepheike phi qhüluve, eno kros lono Jisü ikhiqhive no aphi pesü pa küzüve püzü pewo akumoki lakhi atu no chhutha püakeu lo süve. Pa no tithiu atuqu kulu sawo akumoki kichi lakhape qhive. 47Mary Magdalene ngo Joses paza Mary pama no Jisü kumo khile qhipüa keno ithuluve.

Currently Selected:

MARK 15: SUMRVBSI

Highlight

Copy