MATIYO 11

1Wakati Insa amalidza ueledza maswihaɓa kumi na maili yahe, alawa v̄ale, akwendra asomedze na uĩdhia hari mwa malago ya mukaɓala ule.

Yahaya Muɓaĩshizi asuruma watru ha Insa

(Luk 7:18-25)

2 Yahaya Muɓaĩshizi, ukia yahe shiv̄ani aka v̄wakolagulwa zitrendrwa za Kristi#11:2 Kristi: Yaãni, ɗe uMutsahuliwa wa Mungu., av̄eleha maswihaɓa yahe wamudzise zini: 3«Hali wawe ɗe mutru alazimu aje, au irilazimu rilindre wangina?»

4Insa awadjiɓu: «Namwendre mwamuambiye Yahaya izo muzikiao na muzionao: 5wafa-matso wasuona, magoɓo yasurengelea uendra, waenefu wasutwaharishiha, wafa-makio wasukia, wafu wasuregezewa hayi, na iHaɓari Ndjema isujudziwa zimasikini. 6Aɓarikishiha uwo tsarendresheha siɓaɓu ya taradudu na uaminifu wahe.»

7Wakati wakwendra dzawo, Insa aambia idunia yaka v̄ale yahusu Yahaya: «Mwakondroangalia trini padzaju? Sandze liv̄ungiwao na pev̄o? 8Ɓasi trini ɗe mwakondroiangalia? Mutru apindra vao dzuzuri? Nisumujudzani, watru wapindrao vao dzuzuri, wao wa moni na nyumba za wafalume. 9Ɓasi trini ɗe mwakondroiangalia? Mutrume? Ewa, tsena nisumuambiani, zaidi rahana mutrume. 10Mana waye ɗe umutru v̄uangihwa ju lahe:

‹Tsami, nisuv̄eleha murumizi wangu ahutranguliye,

pare arengeledze ndzia yaho mbeli zaho.›

11Nisumuambiani ha kweli, hari mwa wao wadzalwa na mayawo, kav̄waparov̄enuha muɓole rahana Yahaya Muɓaĩshizi; ne umutiti hari mwa Utawalizi wa Monyewe ziMbingu, muɓole rahana waye. 12Rangu wakati wa Yahaya ata upara av̄asav̄anu, Utawalizi wa Monyewe ziMbingu usungiliwa ha nguvu, na watru wahali ɗe wadjereɓuo uurav̄a. 13Mana piya yimitrume na iSharia yakojudza marongozi yashukidziwa, ata upara Yahaya. 14Na neka musutsaha mukuɓali, waye ɗe Eliya aka alazimu aje. 15Mutru aliona makio, nakiye.

16Watru wa lidunia la leo lini, nitsowafanisa na mbani? Wao wasufana na wanatsa waketsi hari mwa zilindro, washelemedzeao wanyawo amba:

17‹Rimuvudziani ndzumari, ne kamwazina;

rihedza madjimbo ya usikitifu, ne kamwalila.›

18Mana Yahaya aja, waye kakoɗya wala kakonwa, na watru wakorongoa amba ana shetwani. 19uMwana wa Mwanadamu|Mwana wa Mwanadamu aja, asuɗya na unwa, na watru wasurongoa: ‹Unu muv̄endzoɗya na unwa, mwandzani wa maliv̄isa-latete|muliv̄isa-latete na maãswifu!› Ɓadi ihikima ihakikishiha ha zitrendro zahe.»

Malago yaharao uamini

(Luk 10:13-15)

20Amwesa Insa aandrisa ulaumu malago aka atsimidza midjuza nyengi, wala kayandra toɓa, amba: 21«Maondo hahoju, Korazinu! Maondo hahoju Ɓaitisaida! Mana na djeli zimidjuza zafanyishiha hari mwanyu zika zifanyishiha Tiro na Sidoni, rangu hale itsoka amba waonesa amba wandre toɓa ha upindra maguni na udziv̄aha vu. 22Iyo ɗe imana nimuambiaoni amba isuku ya hukuma, mahukuma ya Tiro na Sidoni yatsostahamilishiha rahana yanyu! 23Ẽhẽ wawe Kafarnaumu, hali utsohedzewa ata mbinguni? Ata hata! Utsoshukidziwa ata uzimu ha uwafu. Mana na djeli zimidjuza zafanyishiha hahoju zika zifanyishiha ɗagoni Suduma, latsoẽshi ata ileo ini. 24Iyo ɗe imana nimuambiaoni, isuku ya hukuma, mahukuma ya Suduma yatsostahamilishiha rahana yaho!»

Ha Insa ɗe v̄ulio uv̄umuzi wa ziroho

(Luk 10:21-22)

25Wakati ule Insa arenge umurongo arongoa: «Nisuhuhimidia Ɓaɓa, Mola wa uwingu na ishiv̄andre ya tsi, iv̄o wadzamisia trongo zini uwendza ãkili na wendza ĩlimu, waziv̄enulia uwatiti. 26Naam Ɓaɓa, mana iyo ɗe inamuna waka wav̄endza.

27Piya trongo tsiv̄olwazo na Ɓaɓangu, na kav̄u ajuao uMwana neka tsi ɗe Ɓaɓa, wala kav̄u ajuao Ɓaɓa neka tsi ɗe uMwana, na uwo uMwana atsahao amuv̄enuliye.

28Namunijiliye wanyu piya mwalemewa na mudzo mudziro, na wami nitsomuv̄ani uv̄umuzi. 29Namutrihe mulandza wangu, mufundrihe hangu, mana wami mutrulivu, tsena muekevu wa roho; na v̄av̄o wanyu mutsopara uv̄umuzi wa roho zanyu. 30Mana mulandza wangu tsi mudziro, na mudzo wangu mwangu.»

Currently Selected:

MATIYO 11: swb

Highlight

Copy