Mark 15

Vanten ta Isrrel nyer err fwifwir, err fe, “Tu kte bya ran liye bolbol!,” tebyan ge Iyesu be Mesaya.

1Lon wowobung nga myarin, hae brris nyer krinen elta nyer, te vanten ne wuhuran ne lingsenean, te nyer rrute mōn lon Kaonsel, ete rrwene rral hu, te ete levyalvya Iyesu. Ngate, ete ktu nge, te err vya lngi lon vera Baelat.

2Ngate, Baelat te whu, “Neng ōm be king mwenan Ju nyer rru?” Iyesu te surmōl ge, “Mwe yen ge ōm rrō fe.”

3Rral ge a te rrwene hae brris ge nyer a, err rrō fe sese worhu ge te e konkonan nga ho ne Iyesu.

4Ngate, Baelat te whu mōn ge, “Tebyan ha ōrr rrlō rrō surmōl? Ō lhe, em rrō fe sese be yel ge ma knon e neng nga ge rrō hote neng.”

5Te Iyesu telōn fe sese te hu, ngate Baelat te non metenen.

6Ngate, lon liyal ge le nga, Ju nyer err mang rrō rrwene yenyenan ne Basofa bwe. Lon huwo bonga lon yenyenan ne Basofa, Baelat te rrō rrmane Ju nyer ge err rrō hrene vanten hu e nyer ge err ho lon im ne jenjenan ge te rrō houre.

7Vanten worhu err ho lon im ne jenjenan tebyan ge err toō kakabnu vanten worhu. Bone ge le err bal krine vanten ne balan nyer ne ōrr Rrom. Vanten nan hu nge Barrabas.

8Ngate vanten nyer err me ne Baelat, ete whu nge he eba rrmane vanten te hu eb houre eb yen ge rrō rrwerrwene lon huwo bonga.

9Te Baelat ma whu, “Gimi mim temelole ena rrmane king mwenan ta Isrrel nyer e vya?”

10Nge te whu te yi le, tebyan ge te lhe rru burr ge hae brris nyer ete lngi Iyesu lon veran tebyan bwiriran nga.

11Ngate, hae brris nyer, err rrō kilhi rrinrrinan mwenan vanten lam ge nyer le ge efe fe byane Baelat ge eb lōne rrmane Iyesu te eba rrmane Barrabas nga.

12Ngate Baelat te wuu mōle nyer ge, “Te ena rrwene eb yi be byanen vanten ge a ge mim rrō fe be king mwenan ta Isrrel nyer?”

13Te nyer err fwifwir te hel byanen ge, “Tukte nge ran liye bolbol!”

14Te Baelat te whu nyer ge, “Tebyan ha? Sese hakbe ha nge ma rrwene?” Te nyer err rrō fwifwir bya mre ge bya mre ge, “Tukte ran liye bolbol!”

15Tebyan ge Baelat lon te jeene ge he ne rrwene mwenar temelolean, te te rrmane Barrabas te houre metenen im ne jenjenan. Te te rrwene vanten ge nyer le err taa rongrong. Ngate, te fe byane mwenan vanten ne balan nyer ge efe fnghi Iyesu. Te efe tukte nge ran liye bolbol.

Vanten bonga err rrlōn rrinkete Iyesu, te err tukte ran liye bolbol.

16Ngate, vanten ne balan nyer ete ktu Iyesu te a lon hereere ne im ge rrlam ma Baelat. Te err je vanten ne balan bonga err me.

17Ngate, err rrō feene, te ete rrrerrre mwenan ul metenen. Ete ktu arrlirrli frifri hu te yen ul mwenan king. Ete lngi bya ran. Te ete ktu awa ge te hingiye jenjen, ete rrwene te yen bwer mwenan king. Ngate, ete kro bya ran.

18Ngate, ete mlimling byanen, te yen ge err rrō tengne. Ngate err rrō fe ge, “Neng, ōm be king mwenan ta Isrrel nyer! Gemya myam tengne neng.”

19Ngate, err rrō whe bweten ne li tor. Err rrō kiibine te err rrō singrrur byanen te yen ge err rrō tengne.

20Ngate, bone ge err rereōne te nong, err gurrku arrlirrli frifri ge le ran. Err kor mōle mwenan ul bya ran. Ngate ete ktu nge bya ge efe tukte ran liye bolbol.

21 # Rrom 16:13 To hal ge err rrō vya, vanten ne balan nyer ete lhe vanten ta Saerrin ge san nge Saemon, temyan ge nyerō a, Aleksanta te Rrufas. Nge te rrō yel me Jerrusalem. Te err hutam helhele nge ge te hamne liye bolbol mwena Iyesu.

22Ngate ete ktu Iyesu bya en ōrr hu, san nge Kolkota. Kolkota rrō fe ge ōrr ne barhu ne bweten vanten.

23Te en ōrr ge le, err sene wekonkon ge err byulsine krinen raki hu byane Iyesu. We ge a mwe yekya eba whe tablin ge eb lōn jenjen. Te Iyesu telōne mnu.

24-25 # Sam 22:18 Ngate, en tabungbung lon liyal ge te yaferr, err tukte ran liye bolbol. Te err fifine mwenan ul bon ge err rrō gegerkeya ge si nge eba ktu myarbu ul ge mwi yi be bon koōne taes an.

26Te ete rrhu rral hu ge te surfyaara sese ge yafu ne Ju nyer ge ete rrmelole ge efe toō kabnu nge tebyan. Tuuan ge a te fe, “Ge li be king mwenan ta Isrrel nyer.” Ngate ete lngi tuuan bya mre bon bweten ran liye bolbol.

27-28 # Asa 53:12 Te err tukte vanten te e ru krinen. Vanten ge nyerō a terō e vanten ne laaan. Te sōn te rru ran bamwir, a ge sōn te rru ran bamtō ne veran.

29 # Sam 22:7; 109:25; Mak 14:58; Jon 2:19 Te vanten ge nyer ge err rrō yel to hal, err rrō blibline bweter byanen. Te err rrō surfeene. Err rrō fe ge, “Aa, neng sirr nge a, ōrr fe he ōn toōbaba imkon ge rrlam Jerrusalem, ngate ōn kilkil mōle nga en wobung sul.

30“Ō halku neng hobōm, te ō me fyan metenen liye bolbol ge le!”

31Te hae brris nyer, te vanten ne wuhuran ne lingsenean mōn err rrō myanbi, err rrō fe fe byane nyer ge, “Mwe halku vanten rrute, te telō ngrengre eb halku nge hobōn.

32“Bu ten ne ge Mesaya ge a, king mwenan ta Isrrel nyer, eba me fyan metenen liye bolbol. Te eyi lhe, eve myarrmyarr ne ge be Mesaya. Te eyi nga rrinkete nge sirr.” Te vanten ge nyerō ge te tukte nyerō an krine Iyesu, nyerō mōn terō surfeene Iyesu.

Fetinan ten, Iyesu be Terere Mleng Genti Yafukon!

33Ngate, lon tabliyal, bungbungli te tagno ōrr bonga ne ōrr Isrrel, te a tongve liyal ge te sul en tarariu.

34Lon liyal ge te e sul, Iyesu te fwifwir bya mre ran tolon te fe, “Eloe Eloe? Lama Sabaktani?” Ge te fe,

“Mweneng Yafukon, mweneng Yafukon,

tebyan ha nge ōm lingtōsine ni rru mwi yi a?” Sam 22:1

35Ngate, vanten worhu err fyarr ho en ōrr ge le, err rongtane rral ge le. Ngate err fe ge, “Mi rongtane nge rrō je Elaeja!”

36 # Sam 69:21 Ngate, vanten hu te mku bya te a ktu lumlum tōngtōng, te rrno bya lon wekonkon. Ngate te lngi lumlum ge le ran liye hu ge te breō, te te hune byane Iyesu ge he ne mnu. Ngate te fe, “Mi ho rongrong bwe! Yi lhekya, he Elaeja eba me halku ran liye bolbol.”

37Te Iyesu te fwifwir bya mre, ngate te myarr.

38 # Yel 26:31-33 Bone ge le nga, ul ge te kokorgoro rruim ge te kon ge te kon lon imkon ge rrlam Jerrusalem te mseō mre, te tongve fyan, tahite te e ru.

39Te yafu ne vanten ne balan nyer te fyarr nga rru le en mō ne Iyesu, te te rrō lhe te yi be nge te myarr. Ngate te fe ge, “Fetinan ten, vanten ge a be Terere Mleng Genti Yafukon!”

Joseb ta Arramatia te fo Iyesu.

40 # Luk 8:2-3 Te vehen worhu mōn, err fyarr ho bya hatin rrō, err rrō lhelhe Iyesu. Lon tobol e vehen ge nyer le, Merri Maktela, te Salome, te Merri rahe Jemes kakae te Joses.

41Ge nyesul le, tesu rrō rrutō Iyesu, ge tesu rrō roōne nge bone ge te mang rru Kalili. Yamyarr rrute mōn, ge err me Jerrusalem krine Iyesu, err ho krine nyesul.

42-43Wobung ge le te e Frraete, te e wobung ge err rrō rrwene sese bonga te rrō nangnang tebyan ge borr fyangaren nan, te e Wobungkon. Bone ge te rrō e tarariu ten, vanten hu Joseb ta Arramatia, te yel konon byane Baelat, te a fyarr en mō nan. Te hel ge nge te rrwene te yi le, tebyan ge te e vanten hu rru ne Kaonsel ge vanten nyer err yekya sene nge. Te te e vanten hu rru mōn, ge lon te rrō jeene limhian mwena Yafukon eba me.

44Bone ge Baelat te rongtane ge Iyesu te myarr belbel ten nga te yi le, nge te non metenen. Ngate te je yafu ge rrlam mwenan vanten ne balan nyer, te te whu ne nge ge, “Be fetinan ge Iyesu me myarr burr?”

45Te yafu ge rrlam ne vanten ne balan nyer te fe ge, “Teha, nge me myarr burr.” Ngate, Baelat te rongtane rral ge le, nge te rrmane ge Joseb ta Arramatia ne halku tabli Iyesu.

46Ngate Joseb te a gye ul hu rrwu ten, te te me halku tabli Iyesu ran liye bolbol, te te birrbone tabli Iyesu lon ul ge le. Ngate te a lngi lon tu verr ge err rre rru burr, te te tōrrne verr hu rrlam te kokorgoro bulubul ge le.

47Ran wobung ge le, Merri Maktela te Merri rahe Joses, terō lhe ōrr ge Joseb te lngi Iyesu en.

Currently Selected:

Mark 15: mmg

Highlight

Copy