Mark 16

Iyesu myu myur mōl burr, te nge mo totor!

1Bone ge yal te e ror, Wobungkon te nong. Lon liyal ge le nga, Merri ta Maktela, te Salome, te Merri rahe Jemes, tesu a gye raki worhu ge bon te kor, he nesu lngi ran tabli Iyesu.

2Ngate, en tabungbung nga myarin ran wobung ge sōn, bone ge yal te rrō fngi, tesu a bon bulu verr ge te lngi Iyesu an rru en.

3Te to hal bone ge tesu rrō a, tesu rrō fe byane nyesul ge, “Si nge eb roōne kesul ge eb tōrrne verr ge mo kokorgoro bulubul?”

4Tesu rrō fe te yi le tebyan ge verr ge le te lam ten, te bone ge tesu ter bya bon bulu verr, tesu lhe verr ge rrlam a te tōrrne an rru burr. Te tesu rrlōn yekya ge Yafukon nge te rrwene.

5Ngate, bone ge tesu hil bya lon bulu verr ge le, tesu lhe vanten vivi hu ge mwenan ul te fyō ge te fyō. Nge te taa rru ran metō ne bulu verr. Ngate tesu non metenen.

6Vanten ge le te fe, “Lumsul eb lōn myorr. Nam yekya ge musum rrō teene Iyesu, vanten ta Nasarret ge err tukte ran liye bolbol. Nge tōlō nga rru li. Nge myu myur mōl burr, te nge mo totor! Musu lhe! Tōlō nga rru en ōrr ge ete lngi rru en!

7 # Mat 26:32; Mak 14:28 ”Emsu a, te vya fe byane Bita te vanten rrute mwena Iyesu nyer ge nge mu rrumō ne gimi rru burr bya Kalili. En ōrr ge le emi nga lhe nge en, te yen ge te fe rru burr byane gimi.”

8Ngate, lusul te myorr ge te myorr, te tesu rrō rurur metenen. Te rrwene ge tesu mku metenen bulu verr. Te tesu rrlōn fe sese ge le byanen vanten te hu tebyan ge lusul te myorr te lam ten. #16:8 Lon Tuuankon Metō ge be yel ho lon Tuuankon Vivi ran rral mwena ta Krris myarin, jabta 16 mo nong nga lon giri fas 8. Lon rral ge nyer, fas 9 bya tongve fas 20, err rrlō ho.

Eyi rrinkete Iyesu, te eyi vya en ōrr bonga ran tan ge fyan, te eyi suuto rral ge rrwu ne nge byanen vanten bonga.

[[ 9Ngate, Iyesu te totor mōl tabungbung nga myarin ran Sante, wobung ge le nga nge tesu lhe bulu verr ge Iyesu te rru en. Ngate, Iyesu te furrne Merri ta Maktela ge te korku sōnhal te liuru te ho ran.

10Ngate, vehen ge a te a lhe vanten ge err rrō rrutō Iyesu myarin. Bone ge le ge nyer le, err rongtane te hakbe, te err rrō rreng, Merri ta Maktela te fe rral ge a byane nyer.

11Te bone ge err rongtane rral ge a, ge Iyesu mo totor mōl mōn, te ge Merri te lhe nge, nyer err rrlōn rrinkete rral ge a.

12Ngate, Iyesu te furrne vanten te e ru bone ge terō rrō yel metenen ōrr Jerrusalem. Te bone ge le, tablin te haryelyel. Telōn yen ge terō rrō rrutōn teemō, bone ge Iyesu telōn myarr bwe.

13Ngate, terō la mōl bya Jerrusalem. Te terō a saarōne sese ge terō lhe to hal byane nyer rrute, te nyer err rrlōn rrinkete nyerō.

14Mōl mōn, bone ge vanten mwena Iyesu ge err ve 12 err rrō yen, Iyesu te furrne nyer. Ngate te sur te hel byane nyer tebyan ge lolor te hel ten. Nge te sur te hel te yi le, tebyan err rrlōn rrō rrinkete sarōan ge nyer a ge Merri terō rrō fe tebyan totor mōl an mwena Iyesu.

15 # Ōman 1:8 Ngate, Iyesu te fe byane mwenan vanten nyer ge, “Gimi mi vya en ōrr bonga ran tan ge fyan, gimi mi a suuto rral ge rrwu ne ni byanen vanten nyer.

16 “Vanten ge eb rrinkete rral ge rrwu a, te eba rrno an, Yafukon eb halku nge. Te vanten ge tōlō rrinkete, Yafukon eb sene wulun ge be jenjenan byanen.

17 “Te ge nyer ge em rrinkete, bagō efe ho krinen. Bagō ge nyer le mwi yi a: ma kya efe korku sōnhal fyan sang, te ma kya efe sur ran tolon vanten ge te mnii.

18 “Te ma kya efe ktu talsil hanglam te talsil ge le tōlō ngrengre eb toō nyer. Te ge he efe mnu abyeō, tōlō ngrengre efe myarr. Efe lngi verar ran ge nyer ge ema mse ho, te nyer efe rongtane efe wu.”

19 # Ōman 1:9-11 Te bone ge Iyesu te sasaarō byane nyer te nong, Yafukon te gurr mōle bya mre lon tōngtōng, te bya rrō taa ran bamtō ne Yafukon.

20Ngate, mwenan vanten nyer err vya. Err vya suuto en ōrr bonga. Te Yafukon te rrō ōm krine nyer, te te rrō rrwene myarrmyarr te e lol, te rrō hubsine ge tolor te e fetinan.]]

Currently Selected:

Mark 16: mmg

Highlight

Copy