लुका 5
5
येसुङाना उटुम्ङिगा ओचेलाचि
(मात्ति ४:१८-२२; मारकुस १:१६-२०; युहान्ना १:४०-४२)
1ठिक् लेम्बा येसु गानेसारेत ताल#५:१ आथाबा गालिल ताल ओछेउङि येबाइसाना॥ जोम् याप्मिचि उन् इन्गा इन् चाट्सा माङ्हाङ्ङाना रिङ् खेम्सिङा ओटाए॥ 2येसुङा ताल ओछेउङि इप्पोक् नाउ निसुए॥ ङासा कालाप्बाचिङा नाउ ओनाडुङ् उन्चि चेल्ले ओवासिडुएट्टुगा॥ 3ठिक् नाउम्बाक् सिमोनङाना डाना॥ येसु हिट्ना नाउङि ठाङाउङ् सिमोन लोडुए, “ना नाउ चिपा याम्बा खाट्टु” हिट्नुङ् हिट्नि डोक् युङाउङ् उन्ङा याप्मिचि हिसिक्टुचे॥#मात्ति १३:१-२; मारकुस ३:९-१०; ४:१
4हिट्नुङ् हिसिक्मा हिडुचिउङ् उन्ङा सिमोन लोडुए, “ना नाउ गाइरो डेन्लेङ् खाट्टुङ् ङासा लाप्सिङा खान्ङाना चेल्ले लेप्टु॥” 5ना रिङ् खेम्सुङ् सिमोनङा येसु लोडुए, “आडाङ्बा, आन्याँउम्टे युसाटेप् मिहिनेत चोगुमाउङ् चा ठिक् चा ङासा ठानेयाट्नि॥ हिड्डेलिचा खान्ङा आमाट्टुनाँ आङा चेल्ले लेप्टुङ्टुङ्॥”#युहान्ना २१:३ 6हिट्नुङ् उन्ङा लोडु गाड्डे चेल्ले लेप्टुनाँ माङ्जोम् ङासाचि ओलाबुचे, हिट्ना बेला उन्चि चेल्ले सेङ्मा ठालाँ लिसे॥#युहान्ना २१:६ 7हिट्नाडे लिसानाँ हिट्नागाँ आरको नाउङि ओवासागा उन्चि साइबाचि घुवार फासिङा उन्चि मुक् वान्सा ओछेम्डुचे॥ हिट्नागा ओआबाउङ् ङासा होप्मा ठालाँ ओचोगुए॥ ङासाङा इप्पोक् नाउचि डोक् इप्टाचिउङ् चुवाङि लुम्मा ठालाँ लिसे॥
8हिट्नुङ् ना रिङ् निसुङ् येसुङा ओटाकानाङि गुङ् चोगाउङ् सिमोन पाटरुसङा लोडुए, “आडाङ्बा, आङा ओचाफेन्ना टोॽवा काचोक् याप्मि, आङालाम्मा खाडायेट्टा॥” 9पोङ्भोने आड्डिक् जोम् ङासाचि चेल्लेङि ओठायागा उनिसुचिनाँ सिमोन हिट्नुङ् ओसाइबाचि डोङ् ओठोङ्डे॥ 10हिट्नुङ् सिमोनलोक् एक्केउ टोॽवा काचोक् जाब्दियाङा उइछाचि याकुब हिट्नुङ् युहान्ना चा डोङ् ठोङ्डैसाचिगा॥ येसुङा सिमोन पाटरुस लोडुए, “खान् किट्नेन्, हाट्लेउङ् खान्ङा ङासा माखाक्, याप्मिचि आलाबुचिउङ् आङा सोरि आटाडुचिचि॥” 11हिट्नुङ् हिट्नागाँ उन्चि नाउ पाखाङि ओहोट्टुचे, हिट्नुङ् सोब्बे थोक्चि ओनाडुङ् येसु रोक् उरिक्टुए॥
येसुङा कोर रोगि नुमानिङ् चोगुना
(मात्ति ८:१-४; मारकुस १:४०-४५)
12ठिक् लेम्बा येसु ठिक् खालाङ्गाङि वासाना बेला कोर लाहाब् लिसाना ठिबाङ् याप्मि हिट्नि टाए॥ हिट्ना याप्मिङा येसु निसुङ् ओटोकानाङि गुङ् चोगुङ् नाड्डे पारिक् बिन्टि चोगुए, “आडाङ्बा, खान्ङा निङ्ग्वा आचोगुए भोने आङा नुमानिङ् चोक्मा आहिङा॥” 13येसुङा हिट्ना याप्मि उठुङ्ङि उमुक् युङ्सुङ् लोडुए, “आङा निङ्ग्वा चोगुङ्टुङ्, खान् नुमानिङ् लिसाडा॥” हिट्ना बेला डोक् हिट्नाङाना कोर रोग नुमानिङ् लिसाडे॥ 14येसुङा हिट्ना याप्मि लोडुए, “ना रिङ् साक्चा लोडुन्चिन्, टरो पुजारिङि खाडाउङ् निमेट्टु हिट्नुङ् मोसाङा मालोडि गाड्डे आङा नुयाङे ए नुङ् याप्मिचि निमेट्सिङा माङ्हाङ्ङि भेटि ठाङ्सु॥”#लेबि १४:१-३२
15हिट्ना लेम्बालाम्मा येसुङाना बारेङि टुक्लोक् सोब्बेलेङ् छिन्सा खाडे हिट्नुङ् जोम् याप्मिचि उरिङ् खेम्सिङा हिट्नुङ् नुसिङा ओटाए॥ 16टरो येसुम्बाक् खुसुना डेन्ङि खाडाउङ् बिन्टि चोगुगा डागा॥
येसुलाम्मा लोङ्लेन् याप्मि नुयाना
(मात्ति ९:१-८; मारकुस २:१-१२)
17ठिक् लेम्बा येसुङा माङ्हाङ्ङाना रिङ् याप्मिचि हिसिक्टुचिना बेला धारमाबिधि काहिसिक्बाचि हिट्नुङ् फारिसि याप्मिचि चा उन् सोरि उयुङासागा॥ हिट्नागाम्बाक् गालिल हिट्नुङ् याहुदिया छेट्राङिगा सोब्बे युक्ताम्लाम्मा हिट्नुङ् यरुसलेम खालाङ्गालाम्मा चा ओटाइसागा॥ येसुलोक् उटुगागा याप्मिचि नुमानिङ् चोक्माना माङ्हाङ् डाङ्बाङाना ओबोल् उन्लोक् डाना॥ 18याप्मिचिङा लोङ्लेन् लिसाउङ् टुगाना याप्मि ओडोलेन्चालोक् उखुयुङ् ओआप्टुए॥ हिट्नागाँ पाङ् भिट्रा येसु ओटोकानाइ खाप्मा ओकोलोए, 19टरो जोम् याप्मिचिङा ओचोगुनाँ येसुङि खाप्माना लाम्बो ओटोग्वाट्टुन्॥ हिड्डे लिसाउङ् हिट्नागाँ हिट्ना टुगाना याप्मि पाङ्ढुङ्माङि ओखाट्टुए हिट्नुङ् पाङ्ढुङ्मा ओफाडुङ् हिट्नालाम्मा लोङ्लेन् याप्मि ओडोलेन्चालोक् योग्-योग् येसु ओटोकानाङि ओठेन्डुए॥ 20हिट्नागा याप्मिचिगा बिस्वास निसुङ् येसुङा हिट्ना लोङ्लेन् याप्मि लोडुए, “हाउ साइबा, कापापचि छेमा उलिसे॥”
21येसुङा हिड्डेना रिङ् माट्टुना ओखेम्सुङ् फारिसि याप्मिचि हिट्नुङ् धारमाबिधि काहिसिक्बाचिङा उन्चि निङ्ग्वाङि मिट्मा ठालाँ ओचोगुए, “माङ्हाङ् खिसि चोगुएट्टुना ना याप्मि साइना? माङ्हाङ्ङा एडोक् याप्मिचिगा पाप छेमा चोक्मा हिडुटु टे॥”
22हिट्नागा याप्मिचिगा निङ्ग्वाइना रिङ् ठाहा टोगुङ् येसुङा लोडुचे, “पोङ् खानि निङ्ग्वाङि नाड्डेगा रिङ् आमिट्टुम्टुम्ना? 23ना लोङ्लेन् याप्मि ‘कापाप छेमा लिसे’ लोमा आथाबा ‘कोबाउङ् लाम्टिया’ लोमा खोनाम्बाक् साजिलो लियुक्ना? लु माट्टानुम् टे? 24टरो नाहि पुयानुम्, ना नाराङि याप्मि छा लोङ्सा याप्मिचिगा पाप छेमा चोग्माना आधिकार युङ्ग्वा नुङ् पारमान् खानि पिनाँनि॥” हिट्नुङ् येसुङा हिट्ना लोङ्लेन् याप्मि लोडुए, “आङा खान् लोनाँ, हाट्ले कोबा हिट्नुङ् काडोलेन्चा खुयुङ् कापाङ्ङि खाडा॥” 25हिट्नापाका डोक् हिट्ना याप्मि हिट्नागा टोकानाङि डोक् कोबे हिट्नुङ् ओडोलेन्चा खुयुङ् माङ्हाङ्ङाना उनिङ् चोन्सा ओपाङ्लेङ् खाडे॥ 26हिट्नुङ् हिट्नि सोब्बे याप्मिचि डोङ् ओठोङ्डे हिट्नुङ् माङ्हाङ्ङाना ठेना ओबोल् उनिसुङ् उकिट्टे॥ हिट्नुङ् हिट्नागाँ माङ्हाङ्ङाना उनिङ् चोन्सा ओमाट्टुए, “हाट्ले आन्याँ डोङ् ठोङ्डिना टोॽवा निसुम्मे॥”
लेबि ओलोडुना याप्मि येसुङा छेम्डुना
(मात्ति ९:९-१३; मारकुस २:१३-१७)
27हिट्नुङ्ना येसु हिट्नालाम्मा भारा खाडे॥ हिट्नुङ् लेबि#५:२७ लेबि : येसुङा बारो जाना ओचेलाचि माड्डे ठिबाङ् लेबि ओलोडुना चा डाना॥ एक् बेला उन् मात्ति चा ओलोडुए॥ ना याप्मिङा डोक् मात्तिङाना नुना खाबोरङाना छाप्ला छेप्टुए॥ मात्ति ९:९; मारकुस २:१४ उनिङ् लिसाना ठिबाङ् तिरो काफोक्बा याप्मि तिरो आड्डाङि युङासाना निसुए॥ येसुङा हिट्ना याप्मि लोडुए, “आङा रोक् याङ्रिक्टा हिट्नुङ् आचेला लिसा॥” 28हिट्नुङ् हिट्ना लेबि कोबे हिट्नुङ् ख्वाप्पा थोक्चि पोक्टुङ् येसु ओएङ्-ओएङ् खाडे॥
29हिट्नुङ्ना लेबिङा येसुलोङ्सा ओपाङ्ङि भातेर चासिङा छेम्डुए॥ हिट्ना भातेरङि तिरो काफोक्बाचि हिट्नुङ् आरु जोम् याप्मिचि चा उन्लोक् भातेरङि उयुङासागा॥ 30फारिसि याप्मिचि हिट्नुङ् हिट्नागाँगा धारमाबिधि काहिसिक्बाचि गुनुङ् गुनुङ् चोक्सा येसुङा ओचेलाचि ओलोडुचे, “पोङ् खानि नागा तिरो काफोक्बाचि हिट्नुङ् आरु कायाङ्छाबा याप्मिचिलोक् एक्केउ आयुङिउङ् आचाम्टुम्गा?”#लुका १५:१-२ 31येसुङा हिट्नागा नाड्डे लोडुचे, “सिडापाङ्डा काचोक्बा टे नुमानिङ् याप्मिचि लोङ्सा माखाक्, उटुग्गा याप्मिचि लोङ्सा गोलो चाहाब् लियुक्॥ 32हिट्नाडेडोक्, आङा निङ्ग्वा नुगा याप्मिचि लोङ्सा माखाक्, टरो पापि याप्मिचि लोङ्सा काएल्-काबु लिसानि नुङ् लोसिङा टायाङ्ना॥”
येसुङा उपासा बारेङि हिसिक्टुचिगा
(मात्ति ९:१४-१७; मारकुस २:१८-२२)
33ठिक् लेम्बा जोम् याप्मिचिङा येसु ओलोडुए, “युहान्ना ओचेलाचि याप्मा टेप्मा उपासा उयुङ्गा हिट्नुङ् बिन्टि ओचोगुगा॥ फारिसि याप्मिचिगा चेलाचि चा हिट्नागा गाड्डे डोक् ओचोग्गा टरो काचेलाचिम्बाक् चाम्ठुम् एडोक् ओचोग्गा॥” 34येसुङा हिट्नागा लोडुचे, “पाक् खानिङा बेउला युङ्लोक् भ्या भातेरङि ओटायागा जान्तिचि उपासा युङ्मा आमेट्टुम्चिम्गै टे? 35टरो हिड्डेना बेला टायुक्, हिट्ना बेला बेउला हिट्नागालाम्मा ओलाबुङ् ओखाट्टुए भोने उपासा युङ्माना बेला टायुक्॥”
36येसुङा फेरि आरको मुन्डुम् लोडुचे, “साङा चा ओछोङ्ग्वाट् लोट्लिङ्ङाना झुम्रोङा यामाना लोट्लिङ्ङि ओलेम्डुन्ना, टरो ओलेम्डुए भोने चा ओछोङ्ग्वाट् लोट्लिङ् ओचाफेन्लोक् चोगुटु, हिट्नाड्डे डोक् ओछोङ्ग्वाट् झुम्रो यामाना झुम्रोलोक् टोङ्निना॥
37“हिट्नुङ् खोनाङा चा आङ्गुर ओवाङाना ओफोगे इङा यामाना ओहोॽवाङाना जाप्रामाङि उयुङ्सुन्गा॥ हिट्नाडे ओचोगुए भोने जाप्रामा हेट्युक् हिट्नुङ् सोब्बे इङा वेयुक् हिट्नुङ् जाप्रामा चा जाखाम् लियुक्॥ 38हिट्नुङ् आङ्गुर ओवाङाना इङा ओछोङ्ग्वाट् जाप्रामाङि डोक् युङ्मा कोन्युक्॥ 39हिड्डेउङ् साङा चा टुम्साना इङा ठुङ्मा नासा नासा ओफोगे इङा उठुङुन्गा, पोङ्भोने हिट्नाँ माट्टुटु, टुम्साना इङाना ओराप् डोक् निम्ना लियुक्॥”
Currently Selected:
लुका 5: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
