PAIKHIATNA 34
34
A Nihveina Suangpeekte
(Thkna 10:1-5)
1 Topa in Moses kiangah, “A masa tawh a kibangin suangpek nih sui in. Na sukkhap a masa suangpeekte sunga om thute tuate tungah ka gelh kik ding hi. 2Kithawi-in Sinai Mual tungah zingsangin hong paito inla, mual dawn tua munah keima kiangah hong kilak in. 3Nang tawh kuamah hong paito khawmsak kei inla, mualtung tengah kuamah omsak kei in. Tua mual mai-ah tuuhon ahi a, bawnghon ahi zongin gamtasak kei in,” a ci hi. 4Tua ahih ciangin Moses in a masa bangin suangpek nih a sui hi. Zingsang ciangin amah tho baihin, Topa in amah a thupiaksa bangin Sinai Mual tungah paito a, a khut sungah suangpek nih a tawi hi.
5Meii sungah Topa kum sukin tua lai-ah Moses tawh ding a, Topa in ama min a pulak hi. 6Ama mai-ah Topa pai-in, “Topa, Topa, hehpihna nei-in a dik Pasian; lungduai-in itna kip le thutakna tawh a dim; 7mi tul tampite a dingin itna kip a nei; mawhna, thu palsatna le khialhna maisakin; ahih hangin bangbang hitaleh mawhna a khahkhong ngei lo; pate’ mawhna tate’ tung le tute’ tung, khang thum khang lina dongin a thukpa,” ci-in a pulak hi.#Pai 20:5-6; Gam 14:18; Thkna 5:9-10; 7:9-10.
8Moses in leilak lamah a lu kunin a bia hi. 9Amah in, “Tu-in na muhna-ah maipha ka muh leh, Topa aw, kong thum hi; lungkhauh mite ka hita uh zongin kote’ kiangah Topa hong pai in. Kote’ mawhna le kote’ khialhna hong maisak inla, nangma mi dingin kote hong sang in,” a ci hi.
Thuciamna Kibawlthakkik
(Pai 23:14-19; Thkna 7:1-5; 16:1-17)
10 Topa in Moses kiangah, “En in, keimah in thuciamna khat ka bawl hi. Nangma mi khempeuh’ muhna-ah, leitung khempeuh hitaleh minam khatpeuh sungah hitaleh cikmahin tua bang a kibawl ngei lo na lamdangte ka bawl ding a, note’ lakah a om mite khempeuh in Topa’ nasepna mu ding uh hi. Bang hang hiam cih leh note’ tungah kong bawl ding na pen a kihtakhuai thu ahi hi.
11“Tuni-a kong thupiak zui in. En in, na mai-ah Amor mite, Kanaan mite, Hit mite, Perez mite, Hiv mite, le Jebus mite ka hawlkhia ding hi. 12Na paina leitangah a teng mite tawh thuciamna bawlkha kei inla, tua pen note a dingin thangzak a suahkhak loh nadingin nangmahmah kidawm in. 13Nangmah in amau’ biakna taute phelin, amau’ biakna khuamte kuaitanin, amau’ Asherah milimte na phukpai ding hi.#Thkna 16:21.
14”(Pasian dang na bia kei ding hi. Bang hang hiam cih leh Topa, ama min Aam a hi pa pen a aam Pasian ahi hi.) 15Nangmah in tua leitangah a teng mite tawh thuciamna bawlkha kei in. Amaute in amau’ pasian-te tawh paktatna bawlin amau’ pasian-te’ tungah biakna pia-in, khatpeuh in note hong sap ciangin, note in ama biakpiakna na ne kha ding uh a, 16note in amau’ tanute na tapate uh a dingin la-in, amau’ pasian-te tawh paktatna a bawl a tanute in amau’ pasian-te tawh na tapate uh paktatsak kha ding uh hi.
17“A kisung pasian-te note a dingin bawlin na bia kei ding uh hi.#Pai 20:4; Siam 19:4; Thkna 5:8; 27:15.
18“Silngo sawh loh anlum pawi na bawl ding uh hi. Abib kha, a kisehsa hun sungteng, nang kong thupiak mah bangin ni sagih sung silngo sawh loh anlum na ne ding uh hi. Bang hang hiam cih leh Abib kha sungin Egypt panin note na paikhia uh hi.#Pai 12:14-20; Siam 23:6-8; Gam 28:16-25.
19“Mihing le ganhing tacil a pa khempeuh keima-a’ ahi hi.#Pai 13:2. 20La a tacilte tuuno khat tawh na tanh ding uh hi. Na tat kei uhleh a ngawng na kuaitan ding uh hi. Na tapa cilte khempeuh uh na tanh ding uh hi. Keima mai-ah a guakin kuamah hong kilak lo ding hi.#Pai 13:13.
21“Ni guk sung na na sem ding uh a, ahi zongin a ni sagih ni-in na tawlnga ding uh hi. Lokhawh hun le anlak hun sungin zong na tawlnga ding uh hi.#Pai 20:9-10; 23:12; 31:15; 35:2; Siam 23:3; Thkna 5:13-14.
22“Nipikalte’ pawi, mangbuh a tung masa pawi, le kum bei ciangin an kaihkhop pawi na bawl ding uh hi.#Siam 23:15-21,39-43; Gam 28:26-31.
23“Pasal khempeuh Israel Pasian, Topa Pasian’ mai-ah kum khatin thumvei kilak ding uh hi. 24Bang hang hiam cih leh note’ mai-ah minam dangte ka hawlkhia ding a, na gamgite uh nomau a dingin ka keek ding hi. Topa na Pasian uh’ mai-ah kum khatin thumvei a kilak dingin na paitoh sungun na leitang uh mi khat peuhpeuh in a hong deihgawh khak ding lunghihmawhna om lo ding hi.
25“Note in silngo tawh keimah biakpiakna si na pia khawm kei ding uh a, Paisan Pawi biakpiakna zong zingsang dong na omsak kei ding uh hi.#Pai 12:10.
26“Note in na anpalte uh lakah a tung masa pen Topa na Pasian uh’ inn-ah na paipih ding uh hi.
“Note in keelno a pi’ nawizu tawh na huan kei ding uh hi,” a ci hi.#Thkna 26:2. #Thkna 14:21.
27 Topa in Moses kiangah, “Hih thute gelh in. Hih thute tawh kizui-in nang le Israel tawh thuciamna khat ka bawlzo hi,” a ci hi. 28Tua lai-ah sun sawmli le zan sawmli sung Topa tawh Moses om a, tua hun sungteng anletui a ne kei hi. Amah in suangpek tungah thuciamna kammalte ahi thupiak sawmte a gelh hi.
Mualtung pan Moses Kumsuk
29A khut sungah thuciamna suangpek nih tawh Sinai Mual tung panin Moses hong paisuk ciangin, Pasian tawh amah kiho khin ahih manin a maitang vun a taan lamtak Moses in thei lo hi. 30Aaron le Israel mite khempeuh in Moses a muh ciangin, a maitang vun na taang a, ama mai-ah a pai ding uh amaute lau uh hi. 31Ahih hangin amaute kiangah Moses pai hi. Aaron le mihon makaite khempeuh ama kiangah hong paikik uh a, Moses in amaute hopih hi. 32Tua khit ciangin Israel mi khempeuh a nai-ah hong pai uh a, Topa in Sinai Mual-ah ama tunga a gen khempeuh thupiakna-in amaute tungah a pia hi. 33Moses in amaute tawh thugen a man khit ciangin, amah in a maitangah kiliahna puan khat a koih hi. 34Ahih hangin Topa tawh a kiho dingin ama mai-ah Moses a tum peuhpeuh ciangin, amah a pusuah kik mateng a kiliahna puan la khia hi. Amah hong paikhia-in ama tungah a kipia thute Israel mite kiangah a gen ciangin, 35Israel mite in Moses’ maitang vun a taang mu uh hi. Amah tawh a kiho dingin a pai matengin Moses in kiliahna puan tawh a maitang a khuh kik hi.#2Kor 3:7-16.
Currently Selected:
PAIKHIATNA 34: TDB
Highlight
Copy
Compare
Share
Want to have your highlights saved across all your devices? Sign up or sign in
Tedim (Chin) Bible © Bible Society of Myanmar, 2011.
