Yowana 21

Yeesu keeyeresha ku-bheeyigira bhaaye Gariraaya

1Bhunu gayo ꞉gaawooye, Yeesu ˆneeyeresha kweki ku-bheeyigira bhaaye ku-ngego ya omwaro gwa Tibheeriya. 2Ku-mwaro ayo, ꞉aariga ariwo Simooni Peetero, Tomaaso unu ꞉aabhirikirwaga ati Masara, Naataniyeri unu ꞉aariga asookereeye Kana ya Gariraaya, abhaana abhabhiri abha Jebhedaayo,#21:2 Abhaana abhabhiri abha Jebhedaayo. Amasiina geebhwe ni Yakobho na Yowana. Ringira Mataayo 10:2. na abheeyigira abhandi bhabhiri. 3Simooni Peetero ˆnaabhwira abheejaabho ati, “Naagenda okutega ginswi.” Abheene mbamusubhya ati, “Eswe kyone ekigenda amwi na awe.” Mmbe mbeemuka, mbariinya mu-bhwato, mbagenda ebhusibha. ꞉Bhaategere bhwire bhwone kutyo, nawe ꞉bhataanyoorere kiinu.

4Anu ꞉bhwakyeye, Yeesu ˆnaayambaara ku-ngego ya omwaro, nawe abheeyigira bhaaye bhayo, ꞉bhataamenyere ati ni Yeesu. 5Mmbe, Yeesu ˆnaabhabhwira ati, “Emwe bhasaani bhaani, mwanyoora ekiriiro?” Abheene mbamusubhya ati, “Wuri.” 6Yeesu ˆnaabhabhwira ati, “Mwese riikokooro orubharika rwa ebhuryo orwa obhwato, omuuja okunyoora ginswi.”

Mmbe, mbeesa riikokooro kutyo ꞉aabhabhwiriiye, riikokooro ndiijura ginswi mbataamibhwa okurifuta. 7Mmbe, omwiyigira unu Yeesu ꞉aariga eendere muno, ˆnaabhwira Peetero ati, “Ni Raatabhugenyi!” Bhunu Simooni Peetero ꞉oonguuywe ati ni Raatabhugenyi, ˆneebhoya ingibho yaaye inu ꞉aariga afuurire bhunu ꞉aambire okutega, ˆneeyesa mu-manji. 8Abheeyigira abhandi mbafuga obhwato mbabhuyikya ku-ngego ya omwaro, kwa okubha ꞉bhaariga bhatari areera na ku-kyaro. ꞉Bhaariga bhari muna maguru egana rimwi kutya. Mbafuta riikokooro riijuuyega ginswi.

9Bhunu ꞉bhaayikire ku-ngego ya omwaro, mbarora-wo omuriro gwa amakara. Ku-muriro kuyo ꞉gyariga giriko ginswi na omukaate. 10Yeesu ˆnaabhwira abheeyigira bhaaye ati, “Mureete anu ginswi egindi ginu mwatega woori anu.”

11Mmbe Simooni Peetero ˆneengira mu-bhwato, ˆnaafutira riikokooro ku-kyaro riijuuyega ginswi. Mw-ikokooro muyo ꞉gyariga girimo ginswi giinene egana rimwi makumi gataanu na esatu (153). Raabhé kutyo ꞉gyariga girimo nswi nyafu muno, nawe riikokooro ꞉ritaatamukire.

12Yeesu ˆnaabhwira abheeyigira bhaaye ati, “Muuje murye.” Na atariwo omwiyigira unu ꞉aasakire okumubhuusha ati, “Ni awe niga?” Bhoone kutyo ꞉bhaariga bhaamenyere ati ni Raatabhugenyi. 13Mmbe Yeesu ˆnaagenda, ˆnaagega omukaate, ˆnaayaana abheeyigira bhaaye. ˆNaagega na inswi, ˆnaakora kutyokutyo. 14Ruyo ꞉rwariga ruri orwa akasatu Yeesu okwiyeresha ku-bheeyigira bhaaye, okwambira bhunu Nyamuwanga ꞉aamusuurire okusooka mu-bhafuuye.

Yeesu kaaika na Peetero

15Bhunu ꞉bhaamarire okurya, Yeesu ˆnaabhuusha Simooni Peetero ati, “Simooni, omumura wa Yowana, angu, unyendere okukira kutyo abheejaanyu bhanu bhanyendere?” Peetero ˆnaamusubhya ati, “Yee, Raatabhugenyi, awe umenyere ati nikwendere.” Yeesu ˆnaamubhwira ati, “Reebha giingʼondi gyani.” 16Yeesu ˆnaabhuusha Peetero orwa akabhiri ati, “Simooni, omumura wa Yowana, angu unyendere?” Peetero ˆnaamusubhya ati, “Yee, Raatabhugenyi, awe umenyere ati nikwendere.” Yeesu ˆnaamubhwira ati, “Yangarira giingʼondi gyani.” 17ˆNaamubhuusha orwa akasatu ati, “Simooni, omumura wa Yowana, angu unyendere?” Mmbe, Peetero ˆnaasurumbara kwa okubha Yeesu ꞉aamubhuusiishe ebhuusho riyoriyo kasatu, ˆnaamusubhya ati, “Ee Raatabhugenyi, awe umenyere goone kutyo. Umenyere ati nikwendere.” Yeesu ˆnaamubhwira ati, “Reebha giingʼondi gyani. 18Enikubhwira ekimari ati, bhunu ꞉waariga ukyari mumura, ꞉waariga nuufwara awe omwene nuugenda enu oweenda. Nawe bhunu uribha mukaruka uriimusha amabhoko gaawo, omuunu owundi arikufwafya gingibho, ˆnaakugega, ˆnaakusira enu utakwenda okuja.” 19Yeesu ꞉aaikire kutyo okweresha ati Peetero arifwa rufuki runu rurikora Nyamuwanga akumangibhwe. Bhunu Yeesu ꞉aamarire okwaika gayo, ˆnaabhwira Peetero ati, “Nseeta.”

20Peetero ˆneekebhuukira, ˆnaarora omwiyigira unu Yeesu ꞉aariga eendere muno, ˆnaabhaseetaga. Omwiyigira uyo ni unu ꞉aariga eeyekekere ku-kifubha kya Yeesu bhunu ꞉bhaariga mbarya ebhyokurya, ˆnaamubhuushaga ati, “Raatabhugenyi, nniga unu kaaja okukurya injeejemo?” 21Mmbe, bhunu Peetero ꞉aarorere omwiyigira uyo, ˆnaabhuusha Yeesu ati, “Raatabhugenyi, kandi unu weeki?” 22Yeesu ˆnaamusubhya ati, “Awe agakusaasaki, raabhe eneenda abhe-wo okuyikira anu nirisubha? Awe nuunseete.” 23Ku-nsonga iyo, abheeyigira abhaafu ꞉bhaariga mbatoga ati omwiyigira uyo atarifwa. Nawe Yeesu ꞉ataabhwiriiye omwiyigira uyo ati atarifwa, tari ꞉aaikire ati, “Awe agakusaasaki, raabhe eneenda abhe-wo okuyikira anu nirisubha?” 24Omwiyigira uyo niwe unu kaaika amangʼana ganu, na niwe ꞉aagakaamire. Na eswe kimenyere ati ganu kaaika ni kimari.

Yeesu ꞉aakorere amangʼana agandi maafu

25Gariwo amangʼana agandi maafu ganu Yeesu ꞉aakorere. Raabhe goone kutyo gaakakaamirwe, enigamba ati ekyaro kyone kutyo kitaakeesire okutuura-mo ebhitabho bhinu bhikakaamirwe.

Currently Selected:

Yowana 21: kya

Highlight

Copy