Maariko 10
10
Okugabhura na okutaana
(Mataayo 19:1-12; Ruuka 16:18)
1Niwe Yeesu na abheeyigira bhaaye mbeemuka, mbagenda Ebhuyawudi. Mbaambuka okugenda ngʼambu ya oruuji rwa Yorodaani. Abhaanu bhaafu mbamwiyinda kweki, ˆnaamba okubheeyigisha rwa kutyo ꞉aariga anarire okukora.
2Rusuku rumwi, Abhafarisaayo mbaaja okumusakya. Mbamubhuusha ati, “Angu, okuriingʼaana na ebhiraagiro, eyiikirisibhwa omurume okutaana na mukaaye?” 3Yeesu ˆnaabhasubhya ati, “Musa ꞉aabharagiriiye kutiki?” 4Mbamusubhya mbaaika ati, “Musa ꞉eekirisiishe ati omurume akataana na mukaaye, amukaamire intaraaka.”#10:4 Ringira Ekiyiityo kya Ebhiraagiro 24:1.
5Yeesu ˆnaabhabhwira ati, “Musa ꞉aabhakaamiiye kutyo ku-nsonga ya obhukomeeye bhwa emitima gyemwe. 6Nawe, ku-bhwambiro, Nyamuwanga ꞉aabhumbire omuunu omurume na omugasi.#10:6 Ringira Obhwambiro 1:27. 7‘Ku-nsonga iyo, omuunu arisiga esemwene na nyiramwene, ˆnaayimbana na mukaaye, 8abhabhiri bhayo bharibha mubhiri gumwi.’#10:7-8 Ringira Obhwambiro 2:24. Woori, bhatakyari bhabhiri kweki, tari abhabha mubhiri gumwi. 9Mmbe, kinu Nyamuwanga agwatanyiishe, omuunu aasiga okukitaanya.”
10Bhunu ꞉bheengiiye mu-nyumba kweki, abheeyigira bhaaye mbamubhuusha iiguru ya amangʼana gayo. 11Yeesu ˆnaabhabhwira ati, “Omuunu unu kaataana na omugasi waaye ˆnaagabhura omugasi owundi, kaataara ameega. 12Na omugasi unu kaataana na omurume waaye ˆnaagabhurwa na omurume owundi, kaataara ameega.”
Yeesu kaaramira abhaana abhatooto
(Mataayo 19:13-15; Ruuka 18:15-17)
13Abhaanu ꞉bhaariga mbareetera Yeesu abhaana abhatooto abhakuunʼye-ko okubhayaana giinonkwe. Nawe abheeyigira bhaaye mbabhagonya. 14Bhunu Yeesu ꞉aarorere abheeyigira bhaaye mbakora kutyo, ˆnaabhiiyirwa, ˆnaabhabhwira ati, “Musige abhaana abhatooto bhaaje ku-anye, musige okubhagaanya! Abhaanu bhanu bhari rwa abhaana bhanu, obhukama bhwa Nyamuwanga ni bhwebhwe. 15Enibhabhwira ekimari ati, omuunu woonewoone unu atakwikirisha obhukama bhwa Nyamuwanga rwa omwana omutooto, atakutura okubhwingira-mo kajaanende.” 16Niwe ˆnaafumbeera abhaana bhayo, ˆnaabhatuurira-ko amabhoko gaaye, okubhayaana giinonkwe.
Omuniibhi na obhukama bhwa Nyamuwanga
(Mataayo 19:16-26; Ruuka 18:18-30)
17Bhunu Yeesu na abheeyigira bhaaye ꞉bheemukire, ku-njira, omuunu wumwi ˆnaamubhirimira, ˆnaamwifukamira. ˆNaamubhuusha ati, “Mwiyigisha owa omutima omujomu, nikoreki insonga niije ninyoore obhurame bhunu bhutakuweera?” 18Yeesu ˆnaamusubhya ati, “Kubhaki owumbirikira ati owa omutima omujomu? Atariwo omuunu wa omutima omujomu, tari ni Nyamuwanga omwene era.” 19Umenyere kujomu ebhiraagiro bhya Nyamuwanga, ebhyaika ati, “Waasiga okwita omuunu, waasiga okutaara ameega, waasiga okwibha, waasiga okubheeyeresha omuunu, waasiga okujimya, yaana abheebhusi bhaawo ekibharo. ”#10:19 Ringira Obhungʼaanyi 20:12-16; Ekiyiityo kya Ebhiraagiro 5:16-20. 20Omuunu uyo ˆnaaika ati, “Mwiyigisha, ebhiraagiro bhiyo bhyone kutyo nibhigwatirega okwambira mu-bhwana bhwani.”
21Yeesu ˆnaamuringira, ˆnaamwenda, ˆnaamubhwira ati, “Usuyiiwe engʼana rimwi era. Genda ugushe ebhiinu bhyone kutyo bhinu uri nabhyo. Ukanyoora giiyera, uyaane abhatobhu. Ukabhayaana, owubha wiibhiikiiye mu-rwire ku-Nyamuwanga. Ukamara okukora kutyo uuje unseete.” 22Nawe, omuunu uyo ꞉eejire oongwa kutyo, ˆnaafwa omutima, ˆnaasooka-wo asurumbaaye, kwa okubha ꞉aariga ari muniibhi muno.
23Yeesu ˆnaaringira abhaanu enu na enu, ˆnaabhwira abheeyigira bhaaye ati, “Eyiija okukomeera muno ku-bhaniibhi okwingira mu-bhukama bhwa Nyamuwanga.” 24Abheeyigira bhaaye mbaruguurira amangʼana gaaye. Yeesu ˆnaabhabhwira kweki ati, “Abhaana bhaani, muringire kutyo kukomeeye ku-bhaanu bhanu abheesiga obhuniibhi bhwebhwe okwingira mu-bhukama bhwa Nyamuwanga. 25Iwuuyire muno ku-ngamiya okutura mw-iwundu rya insindani okukira omuniibhi okwingira mu-bhukama bhwa Nyamuwanga!”
26Abheeyigira bhaaye mbagenderera okuruguurira muno riingʼana riyo. Mbabhuushaanya abheene na abheene ati, “Woori, raabhe ni kutyo, ni niga unu aritura okwerusibhwa?” 27Yeesu ˆnaabharingira, ˆnaabhabhwira ati, “Riyo abhaanu bhatakuritura, nawe ku-Nyamuwanga gatari kutyo, kwa okubha ku-Nyamuwanga goone kutyo agaturikana.”
28Peetero ˆnaamubhwira ati, “Iitegeeresha, eswe kisigire ebhiinu bhyone kutyo, nkikuseeta.” 29Niwe Yeesu ˆnaaika ati, “Kimari enibhabhwira ati, atariwo omuunu unu asigire iinyumba, abhamura bhaabho amwi ati abhasubhaati bhaaye, abheebhusi bhaaye, asigire abhaana, amwi ati amasambu gaaye, ku-nsonga yaani na ku-nsonga ya Amangʼana Amajomu, 30ariramira kaafu muno okukira bhiyo, akyari mu-kyaro anu. Arinyoora giinyumba, abhamura bhaabho, abhasubhaati, abheebhusi, abhaana, amasambu, na ebhinyansho bhyone arinyoora. Na mu-kyaro kinu kiriija, arinyoora obhurame bhunu bhutakuweera. 31Nawe, abhaanu bha okwamba woori anu, bharibha bha ku-bhuteero. Na abhandi bhanu bhari ku-bhuteero woori anu, bharibha abha okwamba.”
Yeesu kaaikira orwa akasatu okufwa na okusuuka kwaye
(Mataayo 20:17-19; Ruuka 18:31-34)
32Bhunu Yeesu na abheeyigira bhaaye ꞉bhaariga bhari mu-njira mbariinyagisha okuja Yerusareemu, Yeesu ꞉aariga abhatangatiiye. Abheeyigira bha Yeesu mbaruguura, na abhaanu abhandi bhanu ꞉bhaariga mbamuseeta, ꞉bhaariga bhayayire muno. Yeesu ˆnaabhirikira kweki abheeyigira bhaaye ekumi na bhabhiri ku-mbarika, ˆnaamba okubhabhwira ganu garimunyoora. 33ˆNaaika ati, “Mwitegeereshe, ekigenda Yerusareemu. Eyo niyo Omwana wa Adaamu, kaagenda okutuurwa mu-mabhoko ga abhakuru bha abhashengesi na aga abheeyigisha bha ebhiraagiro bhya Musa. Bhayo nibho abhaaja okumuramurira eetwe, na abhaaja okumusira ku-bhaanu bhanu bhatari Bhayawudi. 34Abhaanu bhayo abhaaja okumusangʼaya, okumufubhurira, okumubhuma ebhibhooko, bhakamara mbamwita. Nawe, orusuku rwa akasatu, arisuuka.”
Omukuru eetuure emwaro
(Mataayo 20:20-28)
35Yakobho na Yowana, abhamura bha Jebhedaayo, mbafugerera Yeesu mbamubhwira ati, “Mwiyigisha, ekikusabha ukikorere ryoneryone rinu kiraakusabhe.” 36Yeesu ˆnaabhabhuusha ati, “Omwenda nibhakorereki?” 37Mbamubhwira ati, “Bhunu uryamba okutunga mu-bhugungyo bhwawo, ekikusabha kiikare amwi na awe, owumwi ebhuryo, na owundi ebhumosi bhwawo.”
38Yeesu ˆnaabhabhwira ati, “Mutakumenya rinu omusabha. Angu, omutura okunywera ekikombe kya ebhinyansho kinu eninywera,#10:38 Omutura okunywera ekikombe kya ebhinyansho kinu eninywera? Insonga ya iingʼana iyo ni kunyanka rwa kutyo omwene kaaja okunyanka. amwi ati omutura okubhatiisibhwa obhubhatiisha bhunu enibhatiisibhwa?” 39Mbamusubhya ati, “Yee ekitura.” Yeesu ˆnaabhabhwira ati, “Mmbe, ekikombe kinu eninywera omuuja okukinywera, na obhubhatiisha bhunu enibhatiisibhwa omuuja okubhatiisibhwa.#10:39 Omuuja okubhatiisibhwa. Kuyo ni kubha mu-kabhaga akakomeeye rwa akaani. 40Nawe, okutuura omuunu eekare ebhuryo bhwani amwi ati ebhumosi, guyo gutari murimu gwani. Tari Nyamuwanga kaaja okutuura-wo, bhanu aramarire okutuurira-wo.”
41Abheeyigira abhandi ekumi ꞉bheejire bhoongwa amangʼana gayo, mbaamba okubhiiyirirwa Yakobho na Yowana. 42Niwe Yeesu ˆnaabhirikira abheeyigira bhoone kutyo, bhamufugere-ko. ˆNaabhabhwira ati, “Mumenyere kujomu ati abhatungi bha ebhyaro abhatunga abhaanu bheebhwe managa, na abhakuru bhayo, abhabhakosha emirimu. 43Nawe gaasiga okubha kutyo kw-imwe. Omuunu woonewoone unu keenda okubha omukuru agati weemwe, niwe abhe omujuuma weemwe. 44Na unu keenda okubha omutangasha agati weemwe, abhe mugaya wa bhoone kutyo. 45Enaaika kutyo kwa okubha, Omwana wa Adaamu woone, ꞉ateejire okukorerwa emirimu, tari ꞉eejire okukorera abhaanu na okusoosha obhurame bhwaye, insonga agombore abhaanu bhaafu.”
Yeesu kaawosha omuwofu
(Mataayo 20:29-34; Ruuka 18:35-43)
46Mmbe, mbayika Yeriko. Bhunu Yeesu na abheeyigira bhaaye ꞉bheemukire okusooka mu-musi gwa Yeriko bhari amwi na esangi enene erya abhaanu, mbanyookana na muunu wumwi riisiina ryaye ˆnaatogwa Bhatimayo, omumura wa Timayo. Omuunu uyo ꞉aariga ari omuwofu, ꞉eekaayega ku-mbarika ayeeyi na injira, ˆnaasabhiirishaga ebhiinu. 47Bhunu ꞉oonguuywe ati Yeesu wa Naajareeti niwe kaatura, ˆnaamura obhuraka ˆnaaika ati, “Yeesu, Omuyiiri Dawudi,#10:47 Omuyiiri Dawudi. Ringira riingʼana rinu mu-Mangʼana Amakomeeye. nuunfwire ekigongo!” 48Abhaanu bhaafu bhanu ꞉bhaariga bhari ayo, mbamugaanya, mbamubhwira ati ajibhire. Nawe omwene ˆnaagenderera okwamura obhuraka, ˆnaabhirikiraga ati, “Omuyiiri Dawudi, nuunfwire ekigongo!”
49Niwe Yeesu ˆnaayambaara ˆnaaika ati, “Mumubhirikire aaje anu.” Mbamubhirikira, mbamubhwira ati, “Iikomeesha, yambaara! Kaakubhirikira.” 50ˆNeesa riikabhuuti ryaye eyo, ˆnaayambaara bhwangubhwangu, ˆnaagenda ku-Yeesu.
51Yeesu ˆnaamubhuusha ati, “Oweenda nikukorereki?” Omuwofu uyo ˆnaamusubhya ati, “Mwiyigisha waani, eneenda noone nirore.”
52Yeesu ˆnaaika ati, “Genda iika, obhwikirisha bhwawo bhwakuwosha.” Ayoayo, omuunu uyo ˆnaamba okurora, ˆnaaseeta Yeesu.
Currently Selected:
Maariko 10: kya
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved
