Maariko 11

Yeesu keengira Yerusareemu

(Mataayo 21:1-11; Ruuka 19:28-40; Yowana 12:12-19)

1Bhunu Yeesu na abheeyigira ꞉bhaarebhereeye Yerusareemu, ayeeyi na amagunguri ga Bheetifage na Bhetaaniya, ku-kiima kya Emijeyituuni, Yeesu ˆnaatuma bhaanu bhabhiri mu-bheeyigira bhaaye. 2ˆNaabhabhwira ati, “Mugende mw-igunguri rinu riri imbere weemwe. Mukayika ayo era, omuuja okunyoora ekimoori kya insikiri kisibhikirwe. Ni kimoori kinu kikyariga kuriinywa-ko na muunu. Mukisibhure, mukindeetere. 3Omuunu woonewoone akabhabhuusha ati, ‘Kubhaki omukora kutyo?’ Mumubhwire ati, ‘Raatabhugenyi niwe kaakikena, kaaja okukisubhya.’”

4Mmbe mbagenda, mbanyoora ekimoori kya insikiri kibhoyerwe anja wa riirango, kw-iparapara riinene, mbakisibhura. 5Abhaanu abharebhe mu-bhanu ꞉bhaariga bhaayambaaye ayo, mbabhabhuusha ati, “Emwe! Omukoraki ayo? Kubhaki omusibhura ekimoori kiyo?” 6Abheeyigira mbabhasubhya rwa kutyo Yeesu ꞉aariga abharagiriiye. Mmbe abhaanu bhayo bhoone, mbabheekirisisha. 7Mbasira ekimoori kya insikiri#11:7 Ringira Jaakariya 9:9. ku-Yeesu, mbaanja gingibho gyebhwe ku-nsikiri iyo. Yeesu ˆnaariinya-ko ˆneekara, mbeemuka. 8Bhaanu bhaafu mbaanja gingibho gyebhwe ku-njira, abhandi mbatema amatabhi mu-masambu mbaanja ku-njira okukorera Yeesu ekibharo. 9Abhaanu bhanu ꞉bhaariga bhatangatire, na bhanu ꞉bhaamuseetaga iinyuma, bhoone kutyo mbaamura obhuraka mbaaikaga ati,

“Wosaana!#11:9a Wosaana. Insonga yeende-ko mu-Kiebhuraaniya, ꞉yaariga iri ati, “Yeerusha woori!” Nawe mu-kabhaga ka Yeesu ꞉bhaaikaga riingʼana riyo okukumangya Nyamuwanga amwi ati Masiya. Ringira Ijabhuri 118:25.

Ayaaywe giinonkwe unu kaaja kw-isiina rya Raatabhugenyi Nyamuwanga!#11:9b Ringira Ijabhuri 118:25-26.

10Bhuri na giinonkwe obhukama bhwa jaaji Dawudi bhunu bhuriija!

Wosaana Nyamuwanga wa mu-rwire!”

11Yeesu ˆneengira Yerusareemu, ˆnaagenda aroobhere, ˆneengira mw-iyekaru#11:11 Mw-iyekaru. Ringira riingʼana Riiyekaru mu-Mangʼana Amakomeeye. rya Nyamuwanga. ˆNaaringira kujomu ebhiinu bhyone kutyo bhinu ꞉bhyariga bhiri muyo. Nawe kwa okubha ꞉yaariga iri keegoro, ˆneemuka, ˆnaagenda Bhetaaniya na abheeyigira bhaaye ekumi na bhabhiri.

Yeesu keeyiima riiti rinu ritari na matwasho

(Mataayo 21:18-19)

12Mwejo weende-ko, bhunu Yeesu na abheeyigira bhaaye ꞉bhaariga mbasooka Bhetaaniya okusubha Yerusareemu, Yeesu ˆnoongwa omweko. 13ˆNaarora riiti rya giitiini riri areera-wo, ꞉ryariga riri na masha maafu. ˆNaarifugerera arore raabhe ritwasiishe giitiini. Bhunu ꞉aayikire-wo, ˆnaanyoora ritariko matwasho, riwundiishe amasha ageene era, kwa okubha ameesi ga amatwasho ꞉gaariga gakyari okuyika-wo. 14Mmbe ˆnaabhwira riitiini riyo ati, “Okwambira reero inu na akajaanende koone kutyo, omuunu aasiga okukurya-ko amatwasho!”#11:14 Yeesu keeyiima riiti rya giitiini okweresha kutyo Nyamuwanga ariramurira Abhayawudi, kwa okubha ꞉bhaariga bhatari na amatwasho ga gintungwa ginjomu. Abheeyigira bhaaye mboongwa amangʼana gayo.

Yeesu kaabhirimya abhasuruja mw-iyekaru rya Nyamuwanga

(Mataayo 21:12-17; Ruuka 19:45-48; Yowana 2:13-22)

15Bhunu ꞉bhaayikire Yerusareemu, Yeesu ˆneengira mw-ibhanja rya riiyekaru rya Nyamuwanga. ꞉Eejire eengira, ˆnaanyoora bhaanu bhaafu mbagusha na okugura ebhiinu mw-ibhanja muyo, ˆnaabhabhirimya bhoone kutyo. ˆNaagaramura giimeeja gya bhanu ꞉bhaariga mbaswenʼya giiyera, na ebhitebhe bhya bhanu ꞉bhaariga mbagusha ginguuti gya okusoosisha ebhimweso. 16꞉Ataasigire muunu woonewoone agege kiinu kyonekyone ekya kugusha mw-ibhanja rya riiyekaru.

17ˆNaamara ˆnaabheeyigisha, ˆnaaika ati, “Angu, itakaamirwe mu-Makaamo Amataakatiifu ati, ‘Iinyumba yaani iribha nyumba ya okusaasaamira-mo, ku-bhaanu bha mu-bhyaro bhyone kutyo?’#11:17a Ringira Isaaya 56:7. Nawe emwe muyikorere okubha nsenga ya abheefi!”#11:17b Ringira Yeremiya 7:11.

18Bhunu abhashengesi abhakuru, na abheeyigisha bha ebhiraagiro bhya Musa ꞉bhoonguuywe amangʼana gayo, mbaamba okwagara injira ya okumwita, kwa okubha ꞉bhaariga mbamuubhaya. ꞉Bhaariga mbamuubhaya kwa okubha abhaanu bhoone kutyo ꞉bhaariga mbaruguushwa na ameeyigisho gaaye. 19Bhunu riisuubha ꞉ryaguuye, Yeesu na abheeyigira bhaaye mbasooka mu-musi agati.

Okusabha Nyamuwanga uri na obhwikirisha

(Mataayo 21:20-22)

20Mwejo weende-ko bhunu ꞉bhaariga mbasubha Yerusareemu, ꞉bhaanyoorere riitiini rirya ryumire okwambira kw-isina. 21Peetero ˆnaayiita amangʼana ga Yeesu, ˆnaamubhwira ati, “Mwiyigisha, ringira! Riitiini rinu wiiyiimire, ryumire!”

22Yeesu ˆnaabhabhwira ati, “Mwikirishe Nyamuwanga. 23Kimari enibhabhwira ati, omuunu woonewoone unu aribhwira ekiima kinu ati, ‘Iiyika wiiyese mu-nyanja,’ asige okwitimaata mu-mutima gwaye, tari abhe na obhwikirisha ati gayo aaika gaamarire okubha-wo, na agabha gaaye. 24Mmbe, enibhabhwira ati, goonegoone ganu omusabha ku-Nyamuwanga mu-nsaara, mubhe na obhwikirisha era ati omugaramira, na garibha geemwe. 25Nawe mukayambaara okusabha ku-Nyamuwanga, mwabhire omuunu woonewoone unu abhakayiiye, insonga Esomwana wa mu-rwire woone abhaabhire ebhikayo bhyemwe. [26Nawe raabhe emwe mutakwabhira abhandi ebhikayo bhyebhwe, Esomwana wa mu-rwire atakuuja okubhaabhira emwe ebhyemwe.]” 

Riibhuusho iiguru ya bhuturo bhwa Yeesu

(Mataayo 21:23-27; Ruuka 20:1-8)

27Yeesu na abheeyigira bhaaye mbayika kweki Yerusareemu. Bhunu ꞉aariga ˆnaaribhata mw-ibhanja rya riiyekaru rya Nyamuwanga, abhashengesi abhakuru, abheeyigisha bha ebhiraagiro bhya Musa na abhakaruka bha Abhayawudi mbamuuja-ko. 28Mbamubhuusha ati, “Owukora amangʼana ganu ku-bhuturoki? Niga unu akuyaaye obhuturo bhwa okugakora?”

29Yeesu ˆnaaika ati, “Siga anye noone nibhabhuushe engʼana rimwi. Mukansubhya riyo, noone enibhabhwira enikora ganu ku-bhuturoki. 30Angu, obhuturo bhwa Yowana obhwa okubhatiisha abhaanu, ꞉bhwasookere aaki? ꞉Bhwasookere ku-Nyamuwangaa, ꞉bhwasookere ku-bhaanu? Munsubhye kirore!”

31Mbaamba okwaikana abheene na abheene ati, “Kikaaika ati, ꞉bhwasookere ku-Nyamuwanga, kaaja okukibhuusha ati, ‘Ndora mutaamwikirisiishe?’ 32Nawe, kikamusubhya ati, ‘꞉Bhwasookere ku-bhaanu,’ abhaanu abhaaja okukibhiiyirirwa.” ꞉Bhaariga mboobhaya abhaanu, kwa okubha bhoone kutyo ꞉bhaariga bhamenyere ati kimari Yowana ꞉aariga ari muragi. 33Okubha kutyo mbamusubhya ati, “Kitakumenya.” Mmbe, Yeesu woone ˆnaabhabhwira ati, “Anye noone nitakubhabhwira ati enikora ganu ku-bhuturoki.”

Currently Selected:

Maariko 11: kya

Highlight

Copy