Maariko 12
12
Ekirengekanyo kya abharimi abhakosi bha amabhiibhi
(Mataayo 21:33-46; Ruuka 20:9-19)
1Yeesu ˆnaamba okuroma nabho mu-bhirengekanyo, ˆnaaika ati, “꞉Aariga ariwo omuunu wumwi unu ꞉aariga ari na riisambu. Mw-isambu ryaye muyo, ꞉aariga ayambire-mo emijabhiibhu, arisitiiye orubhago, ˆnaasimba na riitoko erya okumigira-mo amanji ga giijabhiibhu mw-isambu agati, kweki ˆnoombaka-mo ekiisonge kireera ku-nsonga ya abhariisi. Mmbe, riisambu riyo ˆnaariyaana abharimi#12:1 ˆNaariyaana abharimi. Ku-Bhayawudi omuunu akayaana abharimi riisambu bharime, abharimi bhayo bhakagesa, abhagabhana ebhigeswa bhinu bhanyoorere na omwene esambu. bharirimega, ˆnaakora orugendo. 2Akabhaga ka okugesa giijabhiibhu nkayika, omwene esambu ˆnaatuma owumwi wa abhagaya bhaaye ku-bharimi bhayo, ati bhamuyaane omugabho gwaye gwa giijabhiibhu okusooka mw-isambu ryaye. 3Nawe, abharimi bhayo mbagwata omugaya uyo, mbamubhuma, mbamusubhya mabhoko ageene. 4Omwene esambu ˆnaatuma kweki omugaya waaye owundi ku-bharimi bhayo. Uyo woone mbamubhuma mbamuwutaasha kubhiibhi ku-mutwe, mbamukorera amangʼana amabhiibhi muno. 5ˆNaatuma omugaya waaye owundi, abharimi bhayo mbamwita. ˆNaatuma abhagaya bhaaye abhandi, abhaafu okukira bhanu ꞉aatumire okwamba. Abharimi bhayo mbabhuma abhandi, abhandi mbabheeta. 6Omwene esambu ˆnaasigara na muunu wumwi era owa okutuma, omwana waaye omwende. Ku-bhuteero ˆnaamutuma ku-bharimi bhayo, ˆneeganiirisha ati, ‘Unu ni mumura waani abhaaja okumwiswara.’
7“Nawe bhunu ꞉aayikire, abharimi bharya mbaaikana ati, ‘Unu niwe omugabhi wa ebhiinu bhya esemwene. Kimwite, omugabho gwaye gubhe gweswe.’ 8Niwe mbamugwata, mbamwita, mbamusoosha mw-isambu.”
9Yeesu ˆnaabhabhuusha ati, “Angu, bhunu omwene esambu ariija aribhakora kutiki? Ariita kubhiibhi abharimi bhayo, na riisambu riyo, aririyaana abhaanu abhandi. 10Angu, mukyari okusoma Amakaamo Amataakatiifu ganu?
‘Abhoombaki ꞉bhaaremere riigina rinu.
Nawe, riigina rinu niryo ribheeye riigina riinene erya mu-rufuka.#12:10 Riigina riinene erya mu-rufuka. Abhayawudi abhoombaki ꞉bhaariga mbagega riigina riinene mbarituura ku-bhukoti bhwa omusingi gwa iinyumba ndigwatirira mbaara ebhiri egya indugu, na iinyumba yoone kutyo.
11Riingʼana rinu risookere ku-Raatabhugenyi,
na ni engʼana rinu erikiruguusha.’#12:11 Ringira Ijabhuri 118:22-23.”
12Abhashengesi abhakuru, abheeyigisha bha ebhiraagiro bhya Musa na abhakaruka bha Abhayawudi, mbamenya ati ekirengekanyo kiyo ꞉kyariga nkyaikira abheene. Niwe mbeenda okumugwata, nawe mboobhaya riisangi rya abhaanu, mbamusiga, mbeemuka.
Riibhuusho rya okuteganya Yeesu
(Mataayo 22:15-22; Ruuka 20:20-26)
13Niwe abhatangasha bha Abhayawudi mbatuma Abhafarisaayo abharebhe na abhasakisi bha omukama Yerode Antipa, bhateganye Yeesu okuriingʼaana na amangʼana gaaye omwene. 14Mbamuuja-ko, mbamubhwira ati, “Ee Mwiyigisha, kimenyere ati awe uri muunu wa ekimari. Kimenyere kweki ati awe utakuubhaya muunu woonewoone, raabhé akabha na kibharo kinene. Owiiyigisha amangʼana ga Nyamuwanga ku-kimari kyago. Woori, okuriingʼaana na ebhiraagiro bhya Musa, ekyendwa kiriye riigooti ku-Kayijaari?#12:14 Kayijaari. Ringira riingʼana rinu mu-Mangʼana Amakomeeye. Kiriye amwi ati wuri?”
15Nawe, Yeesu ꞉aamenyere obhubheeyi bhwebhwe, ˆnaabhabhwira ati, “Ndora omwenda okunteganya? Mundeetere iidinaari#12:15 Iidinaari. Iiyera ya Ekiruumi. Mu-nsiku giyo, iidinaari eyimwi ꞉yaariga iri ndiyo ya rusuku rumwi. iyo niyirore.” 16Niwe mbamureetera, ˆnaabhabhuusha ati, “Orususo runu na riisiina rinu rikaamirwe ku-dinaari inu, ni bhyaga?” Mbamusubhya ati, “Ni bhya Kayijaari.” 17Yeesu ˆnaabhabhwira ati, “Ebhya Kayijaari muyaane Kayijaari, ebhya Nyamuwanga muyaane Nyamuwanga.” Mbamuruguura muno.
Yeesu kaaikira obhusuuki bhwa abhafuuye
(Mataayo 22:23-33; Ruuka 20:27-40)
18Kimwi Abhasadukaayo,#12:18 Abhasadukaayo. Ringira riingʼana rinu mu-Mangʼana Amakomeeye. bhanu ꞉bhaariga mbeeyigisha ati abhafuuye bhatakutura okusuuka kajaanende, mbagenda ku-Yeesu, mbamubhuusha ati, 19“Mwiyigisha, Musa ꞉aakibhwiriiye mu-bhiraagiro bhyaye ati, raabhe omuunu akafwa ˆnaasiga mukaaye ateebhuuye nawe omwana na wumwi, omumura waabho agabhe omugasi uyo, insonga ayambaasishe omufu waabho omusi.#12:19 Ringira Ekiyiityo kya Ebhiraagiro 25:5-6. 20Mmbe kyaike ati, ꞉bhaariga bhariwo bhamura mungati bhasookere nda yimwi. Owa okwamba ˆnaagabhura omugasi, ˆnaafwa akyari kwibhura nawe. 21Owa akabhiri ˆnaagabha omugasi uyo, woone ˆnaafwa, atasigire-ko omwana. Owa akasatu woone niibha kutyo. 22Niibha kutyokutyo ku-bhamura mungati bhoone kutyo, ꞉bhaafuuye bhateebhuuye nawe. Ku-bhuteero, omugasi uyo woone ˆnaafwa. 23Woori nuukibhwire, raabhe abhafuuye abhasuuka, bhunu bharisuuka, omugasi uyo aribha mugasi waaga? Bhoone kutyo mungati ꞉bhaamugabhuuye.”
24Yeesu ˆnaabhabhwira ati, “Angu emwe mutakubhura, kwa okubha mutakumenya ganu gakaamirwe mu-Makaamo Amataakatiifu, na mutakumenya obhuturo bhwa Nyamuwanga kutyo bhuri? 25Bhunu abhaanu bharisuuka, bhatarigabhura amwi ati kugabhurwa. Abhaanu bharibha rwa bhaamaraayika bha Nyamuwanga kutyo bhari mu-rwire, abheene bhatakugabhura amwi ati kugabhurwa. 26Nawe, iiguru ya abhafuuye ati bharisuuka, mukyariga okusoma mu-kitabho kya Musa, kutyo Nyamuwanga aaikire mu-kasaka kanu ꞉kaariga nkooka omuriro? Nyamuwanga ꞉aabhwiriiye Musa ati, ‘Anye niri Nyamuwanga wa Bhurayimu, Isaaka, na Yakobho.’#12:26 Ringira Obhungʼaanyi 3:6. 27Mu-mangʼana gayo Nyamuwanga kaaika ati, omwene atari Nyamuwanga wa abhafuuye, tari weeki ni wa bhanu abheesha omwoyo. Okubha kutyo emwe mubhurire muno.”
Ekiraagiro ekinene okukira bhyone kutyo
(Mataayo 22:34-40; Ruuka 10:25-28)
28Bhunu Yeesu ꞉aariga ˆnaabhambashaanya na Abhasadukaayo, omwiyigisha owumwi wa ebhiraagiro bhya Musa ˆnaayika, ˆnoongwa kinu ꞉bhaariga mbabhambaashaanira. Bhunu ꞉oonguuywe ati Yeesu aabhasubhya kujomu, ˆnaamubhuusha ati, “Mu-bhiraagiro bhyone kutyo, ekya okwamba ni kiiya?”
29Yeesu ˆnaamusubhya ati, “Ekya okwamba ni kinu ati, ‘Abhaijirayeeri mwitegeereshe! Raatabhugenyi Nyamuwanga weeswe, niwe Raatabhugenyi omwene era. 30Yeenda Raatabhugenyi Nyamuwanga waawo ku-mutima gwawo gwone kutyo, ku-mwoyo gwawo gwone kutyo, ku-bhwiganiirisha bhwawo bhwone kutyo, na amanaga gaawo goone kutyo.’#12:30 Ringira Ekiyiityo kya Ebhiraagiro 6:5. 31Na ekya akabhiri ni kinu, ‘Wende omwikashaanya waawo, rwa kutyo owiiyenda omwene.’#12:31 Ringira Abharaawi 19:18. Kitariwo kiraagiro ekindi ekinene okukira ebhibhiri bhiyo.”
32Omwiyigisha wa ebhiraagiro uyo ˆnaabhwira Yeesu ati, “Nikwo kutyo Mwiyigisha, waaika ekimari ati Raatabhugenyi Nyamuwanga ni wumwi era, atariwo wundi, tari omwene era. 33Na waaika ekimari ati, umwende mu-mutima gwawo gwone kutyo, obhwenge bhwawo bhwone kutyo, amanaga gaawo goone kutyo, na wende omwikashaanya waawo, rwa kutyo owiiyenda omwene. Gayo nigo amaragiriro amanene okukira okusoosha omugabho na ebhimweso bhyone kutyo.”
34Bhunu Yeesu ꞉aarorere ati omuunu uyo aasubhya kujomu, ˆnaamubhwira ati, “Awe utari areera na obhukama bhwa Nyamuwanga.” Okwambira ayo, ꞉ataabheeye-wo muunu unu ꞉aasakire okubhuusha Yeesu engʼana ryoneryone.
Yeesu ni muyiiri Dawudi na niwe Raatabhugenyi
(Mataayo 22:41-46; Ruuka 20:41-44)
35Bhunu Yeesu ꞉aariga ˆneeyigisha abhaanu mw-ibhanja rya riiyekaru rya Nyamuwanga, ˆnaabhabhuusha ati, “Kubhaki abheeyigisha bha ebhiraagiro bhya Musa abhaaika ati Kiriisitu ni muyiiri omukama Dawudi?#12:35 Muyiiri omukama Dawudi. Ringira riingʼana Omuyiiri Dawudi mu-Mangʼana Amakomeeye. 36Dawudi omwene bhunu ꞉aatangasibhwaga na Mwoyo Omutaakatiifu, aaikire ati,
‘Raatabhugenyi Nyamuwanga ꞉aabhwiriiye Raatabhugenyi waani,#12:36a Raatabhugenyi waani. Anu eyeeresha Yeesu Kiriisitu.
iikara orubhaara rwani orwa ebhuryo,
okuyikira anu nikatuure abhasoko bhaawo emwaro,
awe ubhatunge.’#12:36b Ringira Ijabhuri 110:1.
37“Dawudi omwene kaaika ati, Kiriisitu ni esebhugenyi. Mmbe, Kiriisitu kaatura kutiki okubha muyiiri waaye?” Abhaanu bhaafu ꞉bhaariga mbamwitegeeresha bhajomeeywe.
Okwikenga na abheeyigisha bha ebhiraagiro bhya Musa
(Mataayo 23:1-36; Ruuka 20:45-47)
38Mu-meeyigisho gaaye agandi, Yeesu ˆnaaika ati, “Mwikenge na abheeyigisha bha ebhiraagiro bhya Musa. Abheeyigisha bhayo bheendere okufwara giikanju gyebhwe ndeera, mbakeesibhwa na okuyaanwa ekibharo mu-maguriro. 39Bheendere okwikara ku-bhitebhe bhya ekibharo mu-masunagoogi, na mu-bhugenyi. 40Abhateesha abhakimari bha ekigasi ebhiinu bhyebhwe, abhasabha nsaara ndeera insonga abhaanu bhabharore ati ni bharengeresi. Abhaanu bhanu, Nyamuwanga aribharamurira makomeeye muno.”
Omugabho gwa omugasi omukimari
(Ruuka 21:1-4)
41Yeesu ˆneekara ayeeyi na riisandiko rya okusoosisha-mo emigabho#12:41 Emigabho. Ringira riingʼana rinu mu-Mangʼana Amakomeeye. mw-iyekaru rya Nyamuwanga. ꞉Aariga ˆnaaringira kutyo abhaanu ꞉bhaariga mbatuura emigabho mw-isandiko. Abhaniibhi abhaafu ꞉bhaariga mbasoosha yera nyafu. 42ˆNaaja omugasi wumwi omukimari na ni mutobhu, woone ˆnaasoosha nchapa ebhiri#12:42 Nchapa ebhiri. ꞉Gyariga giri na ekibharo kitooto okukira giiyera gyone kutyo egya mu-kabhaga kayo. era. 43Bhunu Yeesu ꞉aarorere gayo, ˆnaabhirikira abheeyigira bhaaye, ˆnaabhabhwira ati, “Kimari enibhabhwira ati, omukimari omutobhu unu, aasoosha yera nyafu okukira bhoone kutyo bhanu bhaasoosha. 44Enaaika kutyo kwa okubha abhandi bhoone kutyo bhaasoosha bhitooto era ku-bhiinu bhyebhwe ebhyafu. Nawe omugasi omukimari unu ku-bhutobhu bhwaye, aasoosha bhyone kutyo bhinu ari nabhyo.”
Currently Selected:
Maariko 12: kya
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved
