Maariko 13
13
Yeesu kaaikira riiyekaru rya Nyamuwanga okukamburwa
(Mataayo 24:1-2; Ruuka 21:5-6)
1Bhunu Yeesu ꞉aariga ˆnaasooka mw-ibhanja rya riiyekaru rya Nyamuwanga na abheeyigira bhaaye, owumwi wa abheeyigira bhaaye ˆnaamubhwira ati, “Mwiyigisha, ringira kutyo amagina na giinyumba kutyo giri!” 2Yeesu ˆnaamusubhya ati, “Owurora giinyumba giinene ginu? Ritarisigara egina ryoneryone ku-rindi, goone kutyo garikamburwa!”
Iinyanko iinene inu iriija
(Mataayo 24:3-14; Ruuka 21:7-19)
3Bhunu Yeesu ꞉aariga eekaaye ku-kiima kya Emijeyituuni, ku-bhwerekera bhwa riiyekaru rya Nyamuwanga, Peetero, Yakobho, Yowana na Ndereya, mbamubhuusha bhari abheene era ati, 4“Nuukibhwire, amangʼana gayo garibha-wo rusukuki? Ni kimenyegeshoki, ekiija okweresha ati amangʼana gayo gari ayeeyi okubha-wo?”
5Niwe Yeesu ˆnaamba okubhabhwira ati, “Mwiyangarire, omuunu woonewoone aasiga okubhajimya! 6Abhaanu bhaafu bhariija kw-isiina ryani, wumwiwumwi ˆnaaikaga ati, ‘Ni anye Kiriisitu!’ Abhaanu bhayo bharijimya bhaanu bhaafu. 7Bhunu muryungwa amangʼana ga amaremo na amaremo agandi ganu ageenda okwamba, mwasiga okuubhaya. Gayo okubha-wo garibha-wo, nawe obhuteero bhwa amangʼana goone kutyo obhubha bhukyari.#13:7 Obhuteero bhwa amangʼana goone kutyo obhubha bhukyari. Amangʼana ganu agatura okubha, obhuteero bhwa ekyaro. Amwi ati obhuteero bha riiyekaru. 8Ekyaro ekimwi, ekiija okurwana na ekindi, na obhukama obhumwi, obhuuja okurwana na obhundi. Injara, na gaanyamutikima garibha-wo mbaara nyafu egya ekyaro. Gayo goone kutyo agabha gari muna bhinyonyi era, ku-bhusungu bhwa omugasi unu keenda okwibhura.
9“Mwiyangarire abheene, kwa okubha bharibhasira mu-mabharaja, na bharibhabhuma kubhiibhi mu-masunagoogi geebhwe. Bharibhasira ku-bhatungi na ku-bhakama, kwa okubha ati emwe muri bheeyigira bhaani. Mu-kabhaga kayo niwe murinyoora omwanya gwa okubhabhwira amangʼana gaani. 10Na eyeendwa Amangʼana Amajomu garaasibhwe okwamba mu-bhyaro bhyone kutyo. 11Bhunu bharibhagwata okubhasira mu-mabharaja okubharamurira, mwasiga okwinyansha ati omuuja okwaika kiinuki. Ganu muriyaanwa mu-kabhaga kayokayo, nigo mwaike. Kimari mutaribha emwe bhanu muryaikaga, tari ni Mwoyo Omutaakatiifu unu ari mw-imwe.
12“Omuunu arirya waamuwaabho injeejemo ˆnaamugura bhamwite. Omwibhusi wa ekirume arirya omwana waaye injeejemo ˆnaamugura insonga eetwe, nikwo kutyo na abhaana bhoone bharikora ku-bheebhusi bheebhwe, insonga bheetwe. 13Abhaanu bhoone kutyo bharibhasoka, ku-nsonga yaani. Nawe, unu arisimbiira okuyikira ku-bhuteero, uyo niwe aryerusibhwa.”
Ebhinyansho ebhinene bhinu bhiriija
(Mataayo 24:15-28; Ruuka 21:20-24)
14“Nawe bhunu murirora amangʼana amabhiibhi aga obhunyamusi #13:14 Amangʼana amabhiibhi aga obhunyamusi. Insonga eyindi eyitura okubha ati, obhunyamusi bhunu obhukora obhunaabhi. Ringira Daniyeri 9:27, 11:31, 12:11. gayambaaye anu gatakwenderwa okubha, woonewoone unu kaasoma amangʼana ganu, agasombookerwe kujomu, ayo niwe bhanu bhari Ebhuyawudi, bhabhirimire mu-bhiima! 15Omuunu unu ari kw-idaari eeke abhirime, aasiga okwingira mu-nyumba okugega ekiinu kyonekyone! 16Omuunu unu ari mw-isambu abhirime era, aasiga okufutata okugega ingibho yaaye. 17Garibhanyoora abhagasi bha ginda na bhanu bharineenʼyaga mu-nsiku giyo! 18Musabhe ati, amangʼana gayo gaasiga okubha-wo mu-kabhaga ka imbewo iinyafu. 19Ginsiku giyo iribha-wo nyanko nene muno inu ikyariga okubha-wo, okwambira anu Nyamuwanga ꞉aabhumbire ekyaro, okuyikira akabhaga kanu. Na itaribha-wo kweki. 20Raabhe Raatabhugenyi atakafuyayiishe ginsiku giyo, ataakabheeye-wo wa kwerusibhwa. Nawe Nyamuwanga arifuyiyasha ginsiku giyo, ku-nsonga ya abhasorwa bhaaye.
21“Mu-kabhaga kayo, raabhe omuunu aribhabhwira ati, ‘Mwitegeereshe, Kiriisitu ari anu!’ amwi ati ‘Ari erya!’ mwasiga okumwikirisha. 22Bhariija abharagi abhabheeyi na abhaanu bhanu bhariiyaaikaga ati nibho Kiriisitu. Bharikora bhimenyegesho na ebhiruguusho, insonga bhabhajimye, bhaakatura bhajimye na abhasorwa bha Nyamuwanga. 23Mmbe, mwiyangarire! Naabhabhwira amangʼana ganu goone kutyo, gakyari okubha.”
Okusubha kwa Omwana wa Adaamu
(Mataayo 24:29-35; Ruuka 21:25-33)
24“Mmbe, mu-nsiku giyo, bhunu iinyanko iyo iriwa, riisuubha ririsibhiirishwa nkibha kisuute, okwesi kutaribhara. 25Ginjota gyone girigwa ansi okusooka ku-rwire. Nyamuwanga arisingisha amanaga ga ku-rwire.#13:24-25 Ringira Isaaya 13:10, 34:4.
26“Ayo niwe abhaanu bharirora Omwana wa Adaamu ˆnaajaga ari ku-meere, ari na amanaga maafu na obhugungyo.#13:26 Ringira Daniyeri 7:13; Obhusomboorerwa 1:7. 27Arituma bhaamaraayika bhakumanye abhasorwa bhaaye okusooka mbaara gyone kutyo ena egya ekyaro, okusooka ku-bhuteero bhwa ekyaro, okuyikira ku-bhuteero bhwa orwire.
28“Mwiyigire okusooka kw-iti rya riitiini. Amasagi gaaryo gakaamba okufuuka, amasha nganyirira, omumenya ati akabhaga ka okugesa kari ayeeyi. 29Nikwo kutyo emwe mwone mukarora amangʼana gayo ngamba, mumenye ati, aayikire ku-rwigi. 30Enibhabhwira ekimari ati, orwibhuro runu rutakuyitiingʼana amangʼana gayo goone kutyo gakyari kukuumira. 31Orwire na ekyaro bhiriyitiingʼana, nawe amangʼana gaani garirama kajaanende.”
Nyamuwanga omwene era niwe amenyere orusuku rwa okusubha kwa Yeesu
(Mataayo 24:36-44)
32“Nawe, atariwo omuunu unu amenyere orusuku amwi insa inu Omwana wa Nyamuwanga arisubha, bhatari bhaamaraayika bha mu-rwire amwi ati Omwana wa Nyamuwanga, bhoone kutyo bhatakumenya. Raata omwene era niwe amenyere. 33Mmbe, mwikare mwiyangariiye! Mwituuye-wo, [musaasaamaga] kwa okubha mutakumenya akabhaga kayo, ati karibha-wo rusukuki.
34“Okuuja kwaye okurengekanyibhwa na omuunu unu kaagenda orugendo, ˆnaasiga abhagaya bhaaye bhamwangaririre iinyumba yaaye. ˆNaagabhira wumwiwumwi emirimu gyaye egya okukora. ˆNaaragirira omuriisi wa omusi ati, akyeeshega obhwire.”
35Yeesu ˆnaagenderera okwaika ati, “Emwe mwone, mukyeshega obhwire, kwa okubha mutakumenya orusuku runu omwene nyumba arisubha. Mutakumenya ati arisubha iri keegoro, mu-bhwire agati, mu-ruguru, amwi ati bhukyeye. 36Mukyeshe obhwire, insonga mukataka era eejire, aasiga okubhanyoora muwongeeye. 37Rinu enibhabhwira emwe, niryo enibhwira na abhaanu abhandi bhoone kutyo ati, bhakyeshe obhwire.”
Currently Selected:
Maariko 13: kya
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved
