यूहन्ना 14
14
यीशु केर अपन चेलामन के सांत्वना देवेक
1यीशु आगे कहलक, “तोहरेमन ना अकबकाबा, परमेश्वर केर उपरे बिसवास करा आउर मोर उपरे हों बिसवास करा। 2मोर आबा परमेश्वर केर घर में रहेक लगिन ढेइर ठाँव अहे, अगर एइसन नी होतक तो मोंय तोहरेमन के बताय देतो, काले कि मोंय तोहर लगिन ठाँव तेयार करेक जाथों। 3आउर ठाँव तेयार करेक केर पाछे मोंय फिन आमूँ आउर तोहरेमन के अपन संगे रहेक लगिन लेई जामूँ, ताकि जहाँ मोंय रहमूँ हूवाँ तोहरेमन हों रहबा। 4मोंय जे ठाँव जाथों, तोहरेमन हूवाँ केर डहर जानाला।”
डहर, सच्चाई आउर जिंदगी
5थोमा उकर से कहलक, “हे प्रभु, हमरे नी जानिला कि तोंय कहाँ जाथिस, तो हूवाँ केर डहर के कइसन जानब?” 6यीशु उकर से कहलक, “डहर आउर सच्चाई आउर जिंदगी मोंय हें हेकों, बिना मोर से होई के केऊ आबा परमेश्वर ठिना पोंहचेक नी पारी। 7अगर तोहरेमन मोके जानता, तो मोर आबा परमेश्वर के हों जानता। आउर अब से तोहरेमन उके जानाला, आउर तोहरेमन उके देखबो काइर हा।” 8फिलिप्पुस उकर से कहलक, “हे प्रभु, हमरे के आबा परमेश्वर के देखाय दे। एतना हें हमर लगिन ढेइर अहे।” 9यीशु उकर से कहलक, “हे फिलिप्पुस, मोंय एतना दिन से तोहर संगे अहों, फिन भी तोंय मोके नी जानिसला? जे मोके देइख हे, उ आबा परमेश्वर के हों देइख हे। फिन तोंय काले कहिसला कि आबा परमेश्वर के हमरे के देखाय दे। 10का तोंय बिसवास नी करिसला कि मोंय आबा में अहों आउर आबा परमेश्वर मोर में अहे? मोंय जे शिक्षा तोहरेमन के देवाथों, उ मोर अपन शिक्षा ना लगे। मगर आबा परमेश्वर मोर में रइह के अपन काममन के करेला। 11मोर इ गोइठ केर उपरे बिसवास करा कि मोंय आबा परमेश्वर में अहों आउर आबा परमेश्वर मोर में अहे, निहीं तो जे चमत्कार केर काममन के मोंय काइर हों, उकर खातिर मोर उपरे बिसवास करा।
12मोंय तोहरेमन से सच-सच कहाथों कि जे मोर उपरे बिसवास करेला, उ आदमी उ काममन के करी, जेके मोंय करोना। बल्कि उ इ काममन से हों बाड़ काममन के करी, काले कि मोंय आबा परमेश्वर ठिना जाथों। 13आउर जे कोनों तोहरेमन मोर नाँव से माँगबा, उके मोंय पूरा करमूँ, जेकर से बेटा बटले आबा परमेश्वर केर महिमा होवोक। 14अगर तोहरेमन मोर नाँव लेई के मोर से कोनों माँगबा, तो मोंय उके पूरा करमूँ।
पवितर आत्मा भेजेक केर करार
15अगर तोहरेमन मोर से प्रेम कराला तो मोर आगयामन के मानबा। 16मोंय आबा परमेश्वर से प्रार्थना करमूँ कि उ तोहर मदइत करेक लगिन एगो दूसरा मदइत करेक वाला के भेजोक, जे सोउब बेरा तोहर संगे रही। 17उ पवितर आत्मा हेके, जे परमेश्वर केर बारे में सच्चाई के देखायला, जेके दुनिया केर आदमीमन मानेक नी पारैना, काले कि उमन उके ना तो देखैना आउर ना जानैना। तोहरेमन उके जानाला, काले कि उ तोहर संगे रहेला, आउर उ तोहर में रही।
18मोंय तोहरेमन के अनाथ नी छोड़मूँ, मोंय तोहर ठिना फिन घूइर आमूँ। 19मोंय थोरहें देरी आउर रहमूँ, फिन दुनिया केर आदमीमन मोके नी देखबैं, मगर तोहरेमन मोके देखबा, काले कि मोंय जिंदा अहों, से लगिन तोहरेमन हों जिंदा रहबा। 20जब मोंय फिन से जिंदा होई के घूइर आमूँ तब तोहरेमन जाइन जबा कि मोंय अपन आबा परमेश्वर में अहों आउर तोहरेमन मोर में अहा, आउर मोंय तोहरेमन में अहों। 21जेमन मोर आगया के जानैना आउर उके मानैना, ओहेमन मोर से प्रेम करैना, आउर जेमन मोर से प्रेम करैना, उमन से मोर आबा परमेश्वर प्रेम करी, आउर मोंय हों उमन से प्रेम करमूँ, आउर उ मनक उपरे खुद के दिस्तार करमूँ।”
22दोसर यहूदा जे इस्करियोत गाँव केर नी रहे, यीशु से कहलक, “हे प्रभु, तोंय हमर उपरे खुद के दिस्तार करबे आउर दुनिया केर आदमीमन उपरे निहीं, इकर का कारण हेके?” 23यीशु उके जबाब देलक, “मोंय खुद के एइसन आदमीमन उपरे दिस्तार करोना, जेमन मोर से प्रेम करैना आउर मोर बचन के मानैना। उमन से मोर आबा परमेश्वर हों प्रेम करी, आउर हमरे उमन ठिना आवब आउर उमन संगे रहब। 24जेमन मोर से प्रेम नी करैना, उमन मोर बचन के नी मानैना, आउर जे बचन तोहरेमन सुनाला, उ मोर ना लगे, उ मोर आबा परमेश्वर केर हेके, जे मोके भेइज हे।
25इ गोइठमन के मोंय तोहर संगे रहते हें तोहर से कइह हों। 26मगर मदइत करेक वाला मतलब पवितर आत्मा, जेके आबा परमेश्वर मोर अधिकार के देई के भेजी, उ तोहरेमन के सोउब गोइठमन के सिखाई, आउर जे कुछ मोंय तोहरेमन से कइह हों, उ सोउब के तोहरेमन के याइद करवाई।
27मोंय तोहरेमन के शांति देई के जाथों, अपन शांति तोहरे के देवाथों, इ उ शांति ना लगे जेके दुनिया देवेला, तोहर जीउ ना घबराओक आउर ना डराओक। 28तोहरेमन मोके इ कहते सुनला, ‘मोंय जाथों आउर फिन तोहर ठिना घूइर आमूँ।’ अगर तोहरेमन मोर से प्रेम करता तो इ गोइठ से खुश होता कि मोंय आबा परमेश्वर ठिना जाथों, काले कि आबा परमेश्वर मोर से महान अहे। 29इ सोउब होवेक से आगे हें तोहरेमन के इ गोइठमन के बताय देलों, जेकर से जब इ गोइठ पूरा होई जाई, तो तोहरेमन मोर उपरे बिसवास करबा। 30मोर ठिना तोहर संगे गोठियाएक लगिन ढेइर समय नी बाइच हे, काले कि इ दुनिया केर सरदार शैतान आवाथे। मोर उपरे उकर कोनों अधिकार नखे। 31मगर इ जरुरी अहे कि दुनिया केर आदमीमन जाइन जाओक कि मोंय आबा परमेश्वर से प्रेम करोना। आउर आबा परमेश्वर मोके जइसन आगया देई हे, तइसनेहें मोंय करोना। चला उठा, हमरे हिंयाँ से जाब।”
Currently Selected:
यूहन्ना 14: SCK
Highlight
Share
Copy
Want to have your highlights saved across all your devices? Sign up or sign in
Sadri Bible by The Love Fellowship is licensed under Creative Commons Attribution-ShareAlike 4.0 License.
