Yohana 12

1Mumu Yesu magono ntanda palongolo pa pasaka akachiti ku Betania, pala akayili Lazaro, uyu akansisimwisi Yesu pa wakufwa. 2Mumu wakankitili kyakulya kya ndalilo kukulakula: nu Martha akatumakili; leka Lazaro akayili yumonga wa wala wakatemi pasi pamonga nuyombe. 3Mumu Maria akatoliti pound ya muro ya nardo ndupu ya uhemesi ukulungu, ni akambakisi pa njayo sya Yesu, ni akasungwili njayo syake ni liyunju lyake: ni nyumba yikamemasiki kunungalila kwa muro. 4Leka Yuda Iskariota, nuyombe yumonga wa wanafunsi wake, yula akayili nu mwoyo wa kunfumbukisa, akajowiti, 5Kwa kiki muro iyi nukuhemeleka lepa kwa madenario mia sidatu, ni kuwapela wagaju? 6Leka akajowiti iki, nakuya kindu kwa yombe wagaju; koma ndawa akayili mwifi, ni pakuya nalo lihaku akatoliti fila fya kutagika mumu. 7Mumu Yesu akajowiti, Mundeke yombe nausi aligohe ligono lya kuwikika kwangu mu manyinja. 8Pakuya wagaju muyii nawo magono goha; koma nenga muyilepe namu magono goha.

9Mumu lipuga likulungu lya waYehudi wakawalalili kukita ayii bahalapala: na wakachiti, nukuya ndawa ya Yesu wakape, koma nausi wambone Lazaro kawili, yula akansyusiti pa wakufwa. 10Leka makasisi makulungu wakapangiti luhala nausi wankome Lazaro kawili; 11pakuya wingi wa waYehudi wakabiti ndawa ya yombe, na wakakeliti pa Yesu.

12Lukela lwake lipuga likulungu lila likachiti ku ligono likulungu, pa wakayufwini kukita Yesu ahicha ku Yerusalem, 13wakapinditi ndafi sya mawali, na wakapititi kumpingamila, ni wakakuwiti, Hosana: Wakuhikalika yombe yuahicha pa lihina lya Bambo, ena Mutwa wa Israel. 14Leka Yesu, pakakolili kapunda, akatemi panani pake; umu yilembikili, Usiyogopa, mwana ndala wa Sion: 15lola, Mutwa wako ahicha, atemi panani pa mwana wa lipunda. 16Aga wanafunsi wake wakawalalili lepa pakutumbula: koma pala Yesu akakwisiki, bahalapala wakakumbukili kukita aga galembiki ga yombe, ni kukita wakankitili aga. 17Mumu lipuga lila likayili nuyombe pala akankemili Lazaro kupita pa manyinja, ni akansyusiti pa wakufwa, wandungamakili. 18Ndawa ya iyi kawili lipuga likampingamili yombe, pakukita wakayufwini kukita akakiti kiwalalilo iki. 19Mumu waFarisayo wakajowiti yungi nu njini, Mulolaye umu mulinganila lepa kindu: lola, ndima wa mfilimila uwukiti kunkisa yombe.

20Leka wakayili wangi waGriki wa wala wakukwela kugwilakimbo pa ligono likulungu: 21mumu awa wakachiti kwa Filipo, uyu akayili wa Betsaida pa Galilaya, na wakankotiti, kujowa, Bambo, tilonda kumbona Yesu. 22Filipo ahicha ni kunjowela Andrea: Andrea ayicha nu Filipo, na wanjowela Yesu. 23Leka Yesu awahiga, kujowa, Saa yifiki, kukita Mwana wa adam akwisike. 24Chakaka, chakaka, niwajowela, Lungele lwa trigu wona lulema kugwa pa lidupi ni kufwila, lwombe luhwela pa lwakape; koma wona lufwila, lupambika fipambiko fingi. 25Wa kugana wumi wake awutaga; nu wa kuwipila wumi wake pa ndima uwu yaugohe kwa kulama kwa miaka. 26Mundu wona anitumakila nenga, anikise nenga; ni kuku niyii nenga, bahalapala yaaye wa kunitumakila wangu kawili: wona mundu anitumakila nenga, Dadi yanginike. 27Hino wumi wangu uyambanika; na yanijowe kiki? Dadi, uniyokole kipitile pa saa iyi. 28Koma kwa ndawa iyi nikachiti mpaka saa iyi. Dadi, ulikwese lihina lyako. Mumu lilowe likachiti lya kunani, Nilikwisisi, ni yanilikwise kawili. 29Mumu lipuga lila, lyayili bahalapala ni kuyufwanila, wakajowiti kukita mafundi gawulwimi: wangi wakajowiti, Malaika alongili nuyombe. 30Yesu akahigiti nakajowiti, Lilowe ili likafiki nakuya ndawa ya nenga, koma ndawa ya mwenga. 31Hino kuyii kupaula kwa ndima uwu: hino nduna wa ndima uwu yatagike kunja. 32Nu nenga, wona ninyanyamulike pa ndima uwu, yanifute kwangu woha. 33Leka akajowiti iki, kulasa kifwa wuli kila yaafwe nakyo. 34Mumu lipuga likamhigiti yombe, Tenga tayufwini mu torah kukita Kristo ahwela miaka ni miaka: ujowa wuli wenga, Mwana wa adam yakotoke lepa kunyanyamulika? 35Mwana wa adam uyu ayii naa? Mumu Yesu akajowiti kwa wombe, Lwakona lukumbi luchoko apa lulangalila luyii pagati pa mwenga. Mugendegende baho muyii nu lulangalila, nausi lwisi lusiwakamula: na uyu agendagenda mu lwisi amanya lepa kuku abita. 36Baha muyii nalo lulangalila, mukele pa lulangalila, nausi muye wana wa lulangalila.

Aga akalongili Yesu, na akawukiti nakafihimi kwa wombe. 37Leka haka akafikiti fiwalalilo fya kufuluka wila pa miho gawe, wakankeliti lepa yombe: 38nausi lilowe lya Isaya wakulweta limemaseke, lila akalijowiti,

Bambo, nani akakeliti mbili yitu?

Na kiwoko kya Bambo kifunukulike kwa nani?

39Kwa ndawa iyi wakahotwili lepa kukela, pakuya Isaya akajowiti kawili,

40Awadinditi yombe miho gawe, ni akagulumbisi mioyo yawe;

Wasilola ni miho gawe, ni kuwalalila nu mwoyo,

Ni kung’anamuka,

Na nenga kuwalamisa.

41Aga akajowiti Isaya, pakuya akakuweni kukwisika kwake; na akalongili ya yombe. 42Haka wiwi wingi wa wakuluwakulu wakakeliti pa yombe; koma ndawa ya waFarisayo wakanfumbwili lepa, nausi wasitagika kunja kwa sunagoge: 43pakuya wakaganiti kukwisika kwa wandu kulutila kukwisika kula kwa Mulungu.

44Nu Yesu akakuwiti, nakajowiti, Wa kunikela nenga, anikela lepa nenga, koma yula akanitumiti. 45Na wakunilolalela nenga andolalela yula akanitumiti. 46Nenga nichiti lulangalila kwa ndima, nausi wakunikela nenga asihwela ngani mu lwisi. 47Ni wona mundu ayufwana ifi nifitawila, ni kufigoha lepa, nimpaula lepa: pakuya nichiti lepa kuupaula ndima, koma kuuyokola ndima. 48Wakunihepa nenga, wona alema kuyupa fila nitawila, ayii nako wa kumpaula: lilowe lila nikalongili, lililalila yalimpaule yombe pa ligono lya kumalakila. 49Pakuya nenga nikalongili lepa fya namwene; koma Dadi yula akanitumiti nenga, yuyu anipili luwimbi, kila yanijowe, na kila yanilongele. 50Na nimanya kukita luwimbi lwake luyii kulama kwa miaka: mumu aga nilongela, ngati umu Dadi anitawili, mumulamula nilongela.

Currently Selected:

Yohana 12: MGS1937

Highlight

Copy