Yohana 17
17
1Aga akalongili Yesu; ni kututuwusa miho gake kunani akajowiti, Dadi, saa yifiki; unkwisaye Mwanawo, nausi Mwana akukwise wenga: 2ngati umu wampili chengo panani pa nyama iyi yoha, nausi kindu kiyi kyoha umpili yombe, yawapele wombe kulama kwa miaka. 3Leka yiyi kulama kwa miaka, kukita wakumanye wenga Mulungu wakapekape wa chakaka, na uyu ukantumiti, Yesu Kristo. 4Nenga nikakukwisiti pa ndima, pakuya nikamalakisi lihengo lila unipili nikitaye. 5Na hino, Dadi, unikwisaye nenga pamonga nu wenga wamwene, nu kukwisika kula nikayili nako nu wenga palongolo pakutama ndima. 6Nikalilasiti lihina lyako kwa wandu wala ukanipili wa mu ndima: wako wakayili, ni ukanipili wombe; na wakaligohiti lilowe lyako. 7Hino wamanya kukita fiyi fyoha fila ukanipili fiyii fihumila pa wenga: 8pakuya malowe gala ukanipili nenga niwapili wombe; nawombe wakagayupiti, ni wakamanyiti chakaka kukita nikapititi pa wenga, ni wakeliti kukita wenga ukanitumiti. 9Niluwa ndawa ya wombe: niluwa lepa kwa ndima, koma kwa wala unipili; pakuya wayii wako: 10ni fyoha fya nenga fiyii fyako, ni fya wenga fiyii fyangu: na nikwisiki pa wombe. 11Na hino niyilepe mu ndima, na awa wayii mu ndima, na nenga nihicha kwako. Dadi mbalafu, uwagohele ngani wombe pa lihina lyako ili unipili, nausi waye kimonga, ngati tenga. 12Apa nikayili pamonga nawo, nikawagohiti pa lihina lyako ili unipili nenga: ni nikawalindalili, na haka yumonga wa wombe nakutagika lepa, lema mwana wa kitagiko; nausi lilembo limemaseke. 13Koma hino nihicha kwako; na aga nilongela mu ndima, nausi waye ni kiheko kyangu kimemeseke mwa wombe wene. 14Nenga niwapili lilowe lyako; nu ndima ukawawipili wombe, ndawa wayilepe wa ndima, ngati umu nenga nakuya wa ndima. 15Ni niluwa lepa kukita uwawuse kipitile pa ndima, koma kukita uwagohele ngani kipitile pa kiwifu kila. 16Wombe nakuya wa ndima, ngati umu nenga nakuya wa ndima. 17Uwawalase pa fya chakaka; lilowe lyako liyii lya chakaka. 18Ngati umu ukanitumiti mu ndima, wiwila nenga nikawatumiti mu ndima. 19Na ndawa ya wombe niwalasa namwene, nausi wombe wene waye wakuwalasika pa fya chakaka. 20Leka nakuya kwa awa wakape niluwa, koma kwa awa kawili wakunikela nenga pa lilowe lyawe; 21nausi woha waye kimonga; ngati wenga, Dadi, mwa nenga, na nenga mwa wenga, nausi na wombe kawili waye mwa tenga: nausi ndima ukele kukita wenga ukanitumiti. 22Na kukwisika kula unipili, niwapili wombe; nausi waye kimonga, umu tenga kimonga; 23nenga mwa wombe, na wenga mwa nenga, nausi waye wakumalakilana pa kimonga; nausi ndima upate kumanya kukita ukanitumiti, ni uwagana wombe, ngati umu uniganiti nenga. 24Dadi, kila unipili nenga, nilonda kukita, uko niyii nenga, na awa kawili waye pamonga nu nenga; nausi walolalele kukwisika kwangu, uku unipili: pakuya ukaniganiti palongolo pa kutamika ndima uwu. 25Dadi wakukita malinga, ndima ukakumanyiti lepa, leka nenga nikakumanyiti; na awa wakamanyiti kukita ukanitumiti; 26na nikawamanyisi lihina lyako, na yanimanyise; nausi kugana uku ukaniganiti nenga kuye mwa wombe, ni nenga mwa wombe.
Currently Selected:
Yohana 17: MGS1937
Highlight
Share
Copy
Want to have your highlights saved across all your devices? Sign up or sign in
First published by the British and Foreign Bible Society in 1937.
