Yohana 6

1Panyuma pa aga Yesu akawukiti kubita kwisi kwa nyanja ya Galilaya, yiyi ya Tiberia. 2Ni lipuga likulungu likankisiti, ndawa wakaloliti fiwalalilo fila akafikiti pa wala watamu. 3Leka Yesu akakweliti ku kidunda, na akatemi pasi kukulakula pamonga na wanafunsi wake. 4Leka pasaka yikayili papipi, ligono likulungu lya waYehudi. 5Mumu Yesu apa akanyanyamwisi miho gake, na akalolakisi kukita lipuga likulungu liyii mu kuhicha kwake, anjowela Filipo, Tihemele kuliku mikate, nausi awa wapate kulya? 6Leka akajowiti naha kwa kungesa: pakukita mwene akamanyiti iki alondaga kukita. 7Filipo akamhigiti, Mikate ya madenario mia siwili nakuwalinganila lepa, kukita ayi yoha ayupe uchokope. 8Yumonga wa wanafunsi wake, Andrea, nung’una wa Simon Petro, 9anjowela, Ayii mwana bahapa, ayii nayo mikate mhano ya shairi, ni somba siwili: koma ifi kiki kwa awa wa kuyoloka wila? 10Yesu akajowiti, Muwatamike wandu pasi. Leka linyasi lingi likayili pandu pala. Mumu wagosi wakatemi pasi, pa kuwalanga ngati elfu mhano. 11Mumu Yesu akatoliti mikate; ni apa akasengwisi, akawagawili wakutama pasi; wiwila kawili ni somba umu wakalondili. 12Leka apa wakatupili, awajowela wanafunsi wake, Muwunganise fimenyumenyu fya kusigala, kisitagika kindu. 13Mumu wakawunganisi, ni wakamemisi masenjele kumi na gawili fya fimenyumenyu fya mikate yila mhano ya shairi, fya kuwasigalila wala walili. 14Mumu wandu wala apa wakaweni kiwalalilo kila akakiti, wakajowiti, Uyu chakaka wakulweta yula yuahicha mu ndima uwu.

15Mumu Yesu, pakawalalili kukita wayii nu mwoyo kuhicha ni kunkamula, nausi wankite mutwa, akabiti kawili ku kidunda yombe wakape.

16Pa kukayili kimihi, wanafunsi wake wakaselili ku nyanja; 17na wakayingili mu liboti, ni wakayili mu kuyomboka ku Kapernaum. Ni hino apa lukayili lwisi, nu Yesu akona kuwachila lepa wombe. 18Ni nyanja yikayili mu kuyaulila pa kupupuma mbepo ngulungu. 19Mumu apa wakafigiti mastadia makumi gawili na mhano, pangi makumi gadatu, wandolalela Yesu wakugenda panani pa nyanja, na awandamila pa liboti: na wakayogwipi. 20Leka awajowela, Nenga niyii; musiyogopa. 21Mumu wakalonditi kunjupa kiyingalile mu liboti: ni hino apa liboti likayili ku ndima kula wakayili mu kubita kula.

22Lukela lwake lipuga lila likayimiti lisi lila lya nyanja likaweni kukita payilepe liboti lingi kuku, lema limonga, ni kukita Yesu akayingili lepa mu liboti pamonga na wanafunsi wake, koma wanafunsi wake wakawukiti wakape 23(koma maboti gangi gakahichiti kuhuma pa Tiberia papipi na pandu pala wakalili mikate, pala Bambo akasengwisi): 24mumu pala lipuga likaweni kukita Yesu pa waka pala, haka payilepe wanafunsi wake, wakayikili wene mu maboti, ni wakachiti ku Kapernaum, kundondandonda Yesu. 25Na apa wakankolili lisi lila lya nyanja, wakajowiti kwa yombe, Rabbi, ukafiki ndali apa? 26Yesu akawahigiti nakajowiti, Chakaka, chakaka, niwajowela, Munilondalonda nenga, nukuya ndawa mukafiweni fiwalalilo, koma ndawa mukalili mikate yila, ni kutupila. 27Muhengelaye mahengo, nakuya kwa kyakulya iki kitagika, koma kwa kyakulya iki kihwela mpaka kwa kulama kwa miaka, kila Mwana wa adam yawapele mwenga: pakuya Dadi, yuyu Mulungu, ambikili kiwalalilo. 28Mumu wakajowiti kwa yombe, Tikite wuli, nausi tihenge mahengo gake Mulungu? 29Yesu akahigiti nakajowiti kwa wombe, Ili lihengo lyake Mulungu, nausi munkele kikelile uyu akantumiti. 30Mumu wakajowiti kwa yombe, Ukita kiwalalilo kiki wenga nausi tikiwone, ni tikukele wenga? lihengo wuli uhenga? 31Wakadadi witu wakalili manna mu mapululu: ngati umu yilembikili, Nkate wa kunani akawapili wapate kulya. 32Mumu Yesu akajowiti kwa wombe, Chakaka, chakaka, niwajowela, Nakuya Musa akawapili nkate wa kunani; koma Dadi wangu awapela mwenga nkate wa chakaka wa kunani. 33Pakuya nkate wa Mulungu uyii wula wakuselela wa kunani, ni uupela ndima kulama. 34Mumu wakajowiti kwa yombe, Bambo, utipele magono goha nkate uwu. 35Yesu akajowiti kwa wombe, Nenga niyii nkate wa kulama: wa kunichila nenga yayiwone lepa njala, ni wakunikela nenga yawone lepa nywita magono goha. 36Koma nikajowiti kwa mwenga, kukita muniweni, na mukela lepa. 37Kiyi kyoha iki anipela Dadi yakinifikile; ni uyu wakunichila nenga yanintage lepa kunja. 38Pakuya niselili kuhuma kunani, nakuya nausi nikite umu nilondela namwene, koma umu alondela uyu akanipeliki nenga. 39Leka iki kilondo kya yula akanipeliki, nausi nisitaga kandu ka fyoha fila anipili, koma nifisyuse pa ligono lya kumalakila. 40Pakuya iki kiyii kilondo kya Dadi wangu, kukita ayi yoha uyu andolalela Mwana, ni akela pa yombe, aye ni kulama kwa miaka; ni uyu yaninsyuse pa ligono lya kumalakila.

41WaYehudi mumu wayili mu kunung’unukila yombe, ndawa akajowiti, Nenga niyii nkate wakuselela wa kunani. 42Na wakajowiti, Si uyu Yesu, mwana wa Yosefu, uyu timmanya dadi mundu nu nyongolo? ajowa wuli hino, Niselili wa kunani? 43Yesu akahigiti nakajowiti kwa wombe, Mukotoke kunung’unika yungi nu njini. 44Nukuya mundu ahotola kunichila, wona Dadi yuanipeliki nenga alemiti kunfuta: nu nenga yanisyuse pa ligono lya kumalakila. 45Yilembiki pa wakulweta, Na woha yawaye wakuwulika nu Mulungu. Ayi yoha uyu akayufwini kwa Dadi, ni kwiwula, anichila. 46Nakuya mundu ambweni Dadi, lema yombe wakuhumila pa Mulungu, yuyu ambweni Dadi. 47Chakaka, chakaka, niwajowela mwenga, Wa kukela ayii nako kulama kwa miaka. 48Nenga niyii nkate wa kulama. 49Wakadadi winu wakalili manna mu mapululu, na wakafwili. 50Uwu uyii nkate wa kuselela wa kunani, nausi mundu aye pa uwu, ni akotoke kufwa. 51Nenga niyii nkate wa kulama uwu ukaselili wa kunani: wona mundu alya pa nkate uwu, yalame kwa miaka ni miaka: ena, nu nkate uwu yanipele nenga uyii mbili wangu, pa mhalo wa kulama kwa ndima uwu.

52Mumu waYehudi wakapindakini yungi nu njini, kujowa, Ahotola wuli uyu kutipela mbili wake tilye? 53Mumu Yesu akajowiti kwa wombe, Chakaka, chakaka, niwajowela, Wona mulemiti kulya mbili wa Mwana wa adam ni kunywa mwasi wake, muyilepe nu kulama mugati mwinu. 54Uyu alya mbili wangu ni kunywa mwasi wangu ayii nako kulama kwa miaka; na nenga yaninsyuse pa ligono lya kumalakila. 55Pakuya mbili wangu uyii kyakulya kya chakaka, nu mwasi wangu uyii kyakunywa kya chakaka. 56Uyu adakula mbili wangu nu kunywa mwasi wangu ahwela pa nenga, na nenga pa yombe. 57Ngati umu Dadi wa kulama akanitumiti nenga, na nenga nilama ndawa ya Dadi; wiwila wa kunidakula nenga, yuyulayula kawili yalame ndawa ya nenga. 58Uwu uyii nkate ukaselili wa kunani: nakuya umu wakadadi winu wakalili, na wakafwili: wa kudakula nkate uwu yalame miaka ni miaka. 59Aga akajowiti mu sunagoge, pa kuyigalisa mu Kapernaum.

60Mumu wingi wa wanafunsi wake, pa wakayufwini, wakajowiti, Liyii linonono lilowe ili; nani ahotola kuliyufwana? 61Leka Yesu pakamanyiti mugati mwake kukita wanafunsi wake wayili mu kunung’unika pa iki, akajowiti kwa wombe, Wila ili mukuwala nalo ati? 62Mumu wuli wona mundolalela Mwana wa adam ni akwela uku akayili mwandi? 63Roho yilamisa; nyama nakuyenela kindu: malowe aga nilongela nu mwenga gayii roho, na gayii kulama. 64Koma wayii wangi wa mwenga wangali kukela. Pakukita Yesu akamanyiti kihumile pa kutumbula wa nani wala wangali kukela, na uyu yanfumbukise yombe. 65Nakajowiti, Kwa ndawa iyi nikajowiti kwa mwenga, pa waka mundu ahotola kunichila, wona alemiti kupelewa kipitile kwa Dadi.

66Kitumbulile pa iki wingi wa wanafunsi wake wakabiti munyuma, na wakagenditi lepa kawili pamonga nuyombe. 67Mumu Yesu akajowiti kwa kumi na wawili wala, Nu mwenga namu mulonda kuluta? 68Simon Petro akamhigiti, Bambo, tibitaye kwa nani? uyii nago malowe ga kulama kwa miaka. 69Na tenga tikeliti na timanya kukita wenga uyii Mbalafu wa Mulungu. 70Yesu akawahigiti, Si nenga nikawahagwili mwenga kumi na wawili, nu yumonga ayii diabolo? 71Leka akanjowiti Yuda wa Simon Iskariota, pakuya yuyu akayili nu mwoyo wa kunfumbukisa yombe, yumonga wa kumi na wawili wala.

Currently Selected:

Yohana 6: MGS1937

Highlight

Copy