Luka 21

1Leka akanyanyamwisi miho, na akaweni wakafi wakulekela fiyetulo fyawe pa fikokoli fila. 2Na akaweni nunuyu mfwili wakudula kulekela mumulamula senti siwili. 3Na akajowiti, Chakaka niwajowela, Mfwili uyu wa kudula alekili mumu kulutila wala woha: 4pakuya wala woha kuhapula pa fya kufuluka fyawe wakalekili pa fiyetulo: koma ndala uyu kuhapula pa kusowa kwake alekili fya kulamila fyake fyoha ayii nafyo.

5Na pakujowa wangi sya hekalu, umu yikakitili malidadi ni maganga manofu ni nyambiko, akajowiti, 6Panani pa ifi mufilolakesa, magono yagayiche, baho yalilekeke lepa liganga panani pa liganga liyini, lila yalileme kugwisika pasi. 7Na wakankotiti yombe, kujowa, Mwalimu, mumu ifi yafikitike ndali? ni kiki kiwalalilo kya mwaka pala findu ifi yafikitike? 8Leka yombe akajowiti, Mulole musisoweseka: pakuya wa mahele yawahiche pa lihina lyangu, kujowa, Nenga niyii; ni, Lukumbi luwandamila: musiwakisa wombe. 9Leka pala yamuyufwane fya ngondo ni njwawila, musiyogopeka: pakuya ifi nakukotoka kufihicha pakutumbula; koma umalakilo uyilepe hino apa.

10Bahalapala akawajowili, Mhuku yauwuke kuupindika mhuku, nu utwa kuupindika utwa: 11na manyukunyuku makulungu, na pandu pangi ulali ni fimpetupetu yafiye; ni yafiye fya kuyogofya ni fiwalalilo fikulungu kuhumila kunani. 12Leka palongolo pa ifi fyoha, yawawawikile mwenga mawoko gawe, yawawahyunge, kuwafumbukisa pa masunagoge ni pa kukungika, kuwatola mwenga pa watwa na manduna ndawa ya lihina lyangu. 13Yakiwonike kwa mwenga ulungamakiso. 14Mumu mwiwikile pa mioyo mwinu, kukita nakuholalela lepa palongolo fya kuhiga: 15pakuya nenga yaniwapele ndomo ni malango, gala woha wawapindika winu yawahotole lepa kugahiga pangi kugakana. 16Leka yamufumbulike haka na wala wakuwahogola, ni wakalongo, ni wenesi, ni wakosi; ni wangi wa mwenga yawawafwise. 17Ni yamuye wakuwipilika na wandu woha ndawa ya lihina lyangu. 18Na haka liyunju lya mu mutu winu yalitagike lepa. 19Pa kwisinga kwinu yamwipatile mawumi ginu.

20Leka apa yamuwone Yerusalem kusyungutiwa ni mabanja ga ngondo, bahalapala mumanyaye kukita mahame gake gawandamila. 21Bahalapala wala wa pa Yudaya wakimbalile pa fidunda; na wala wa mugati mwake wahame; na wa pa migunda wasiyingila. 22Pakuya aga gayii magono ga kulipalila, nausi fyoha fila fikalembiki fimemesike. 23Ling’aho kwa wala wayii ni neme ni kwa wala wakuyongesa pa magono gagala! pakuya yakuye kuhumbusika kukulungu pa ndima uwu, ni kudada pa nsafi uwu. 24Ni yawagwe pa ugi wa upanga, ni yawatoleke mateka pa mihuku yoha: ni Yerusalem yauye wa kuliwatiwa ni Mihuku, mpaka ngumbi sya Mihuku yasimemesike. 25Ni yafiye fiwalalilo pa lijuwa nu mwesi ni ndondwa; ni pa ndima uwu kufinyikasiwa kwa mihuku, pa kulyugalyuga ndawa ya kutimbuka nyanja ni mayiga gake; 26wandu kufwa kibuna kuhuma pa woga, ni pa kulindalila fila fiyii mu kuhicha pa ndima: pakuya mbafu sya kunani yasinyukunyike. 27Na bahalapala yawambone Mwana wa adam ni ahicha pa lifundi pamonga nu mbafu nu kukwisika kukulungu. 28Leka apa ifi fitumbula kufikitika, mukwinulile kunani, ni kuyinusa mitu yinu; ndawa kukombola kwinu kuwandamila.

29Na akajowiti kwa wombe ngongo: Mulolaye nkuyu ni mikongo yoha: 30pala yituka, muwona ni kumanya mwawene kukita hino apa kifuku kiwandamila. 31Wiwi kawili mwenga, apa muwona findu ifi fipata kuya, mumanyaye kukita utwa wa Mulungu uyii papipi. 32Chakaka niwajowela, Kihogosi iki yakilutile ngani lepa, mpaka pala fyoha fipatiti kuya. 33Kunani nu ndima yafilutile ngani: koma malowe gangu yagalutile ngani lepa.

34Leka mwilolalele, mioyo yinu yisitopaleka ni kufimbiwa, ni kugala, ni maholalelo ga kulamila apa, ni ligono lila liwachila kikenyemukile ngati ntego: 35pakuya wilawila yaliwachile woha wala watama pa kyene kya ndima woha. 36Leka mutame miho pa lukumbi luyi lwoha, kiluwile, nausi muyenele kuyokoka pa findu fila fiyii mu kuyicha, ni kuyima palongolo pa Mwana wa adam.

37Leka ligono ni ligono akayili mu kuyigalisa pa hekalu: ni kilo kiyi kyoha akapititi, ni kwihadisa pa kidunda kikemeleka kya Miseituni. 38Na nsafi woha wakalawiti kwake mu hekalu, kunjufwanila yombe.

Currently Selected:

Luka 21: MGS1937

Highlight

Copy