Mattayo 19
19
1Na ikayili kukita pala Yesu akamaliti malowe aga, akawukiti pa Galilaya, na akayingili pa mipaka ya Yudaya lisi lila lya Yordani; 2na wakankisiti mapuga makulungu; na akawalwasiti kukula.
3Na wakanchilili waFarisayo, kungesa yombe, ni kujowa, Yiyitikalika ati kukita mundu ansule mhanu mundu kwa ndawa iyi yoha? 4Nuyombe pakahigiti akajowiti, Musomiti lepa, ati, kukita uyu akawapangiti kitumbulile akawapangiti ngosi ni ndala, 5nakajowiti, Kwa ndawa iyi mundu yaleke dadi mundu nu nyongolo, na yakumbatilane nu mhanu mundu; na wawili awa yawaye nyama yimonga? 6Mpaka nukuya kawili wawili, koma nyama yimonga. Mumu iki Mulungu akikungiti mu lingoli‐ngoli limonga, mundu asipatula. 7Wanjowela yombe, Mumu ndawa kiki Musa akataukili kupela kalembo ka kupatulana, na kundeka? 8Awajowela wombe, Musa ndawa ya kunonopa mioyo yinu akayitakili kuwasula wahanu winu: koma kitumbulile kikayili lepa wila. 9Leka niwajowela mwenga, Ayi yoha uyu yansule mhanu mundu, lema ndawa ya ukeme, ni yantuwule yungi, akita ukeme: na yula antuwula wakusulika akita ukeme. 10Wanafunsi wanjowela, Wona kiyili wila nu mundu nu mhanu mundu, kunogela lepa kutuwula. 11Leka akawajowili, Nukuya woha walinganila kuyupa lilowe ili, koma wala kupeliwi kwawe. 12Pakuya wayii wagida, awa nawombe wahogoliki wiwila kihumile mu luleme lwa nyongolo: na wayii wagida awa nawombe wawagidiki na wandu: na wayii wagida awa nawombe wagida wene ndawa ya utwa wa kunani. Uyu ahotola kukiyupa akiyupe.
13Bahalapala wakatoliki kwake wana, nausi awawikile mawoko pa wombe, ni kusali: leka wanafunsi wakawalakalili. 14Koma Yesu akajowiti, Mutulekese tuwana, nu mukotoke kutusiwilikisa tusinichila; pakuya utwa wa kunani uyii wa ntundu uwu. 15Na apa akawawikili mawoko gake, akawukiti kuku.
16Na lola, nunuyu akanchilili, kujowa, Mwalimu, kiki kinofu yanikite, nausi nitame nako kulama kwa miaka? 17Leka akanjowili, Unikotela kiki ya kinofu kila? Yumonga ayii nnofu: koma wona ulonda kuyingila pa kulama, ugohe mimbi. 18Anjowela, Siliku? Nu Yesu akajowiti, Usikoma, Usikita ukeme, Usiyiwa, Usikupikisila, 19Ginikaye dadiyo nu nyoko: na, Uganaye mwenesi wako ngati wamwene. 20Mpalo anjowela, Isi syoha nigohiti: kinisowa kiki kawili? 21Yesu akajowiti kwa yombe, Wona ulonda kuya wakumalakilana, bitaye, uhemele fyoha uyii nafyo, na uwapele wakiwa, na yautame ni kikokoli kunani: na uhichaye, unikise nenga. 22Leka apa mpalo akayufwini lilowe ili, akawukiti kuniongoneka: pakuya akayili nafyo fyuma fya mahele.
23Leka Yesu akajowiti kwa wanafunsi wake, Chakaka niwajowela, Kya kutopa kwa nkafi kuyingila pa utwa wa kunani. 24Leka kawili niwajowela, Kiyii kya nyata kukita ngamila yilute pa liho lya sindano, si kukita nkafi ayingile pa utwa wa kunani. 25Na wanafunsi pa wakayufwini, wakakangichi nyahope, kujowa, Nani ati ahotola kuyokoka? 26Leka Yesu apa akawalolakisi, akawajowili, Kwa wandu iki kiyii nakuhotoleka lepa; koma kwa Mulungu fyoha fihotoleka. 27Bahalapala Petro pakahigiti akajowiti kwa yombe, Lola, tenga talekiti fyoha, ni takukisiti; na tenga nati yatitame ni kiki, ati? 28Leka Yesu akawajowili, Chakaka niwajowela kukita, mwenga munikisiti, pa kuhogoleka kawili pala Mwana wa adam yatame pa kitihu kya kukwisika kwake, na mwenga kawili yamutame pa fitihu kumi ni fiwili, kupawula mitangilo kumi ni yiwili ya Israel. 29Na ayi yoha uyu nayombe alekiti nyumba, pangi walongo, pangi walumbu, pangi dadi, pangi nyina, pangi wana, pangi migunda, ndawa ya lihina lyangu, yayupe mingi, na yayingile mu kulama kwa miaka lipwela. 30Leka wa mahele wa wakutumbula yawaye wa panyuma, na wa panyuma wakutumbula.
Currently Selected:
Mattayo 19: MGS1937
Highlight
Share
Copy
Want to have your highlights saved across all your devices? Sign up or sign in
First published by the British and Foreign Bible Society in 1937.
