Mattayo 4
4
1Bahalapala Yesu akalongosiki nu Roho ku mapululu kugeseka nu diabolo. 2Leka apa akinotiti kyakulya magono makumi ncheche musi ni kilo, panyuma pake akaweni njala. 3Leka wakugesa yula akachiti nakajowiti kwa yombe, Wona uyii Mwana wa Mulungu, utauke nausi maganga aga gapate kuya mikate. 4Leka akahigiti kujowa, Yilembiki, Nukuya pa nkate wakape mundu yaulamile, koma pa lilowe liyi lyoha lyakupita pa ndomo wa Mulungu. 5Bahalapala diabolo antola yombe ku likaya liwalafu; nakanjimisi pa lusongo lwa hekalu, 6najowa kwa yombe, Wona uyii Mwana wa Mulungu, witage pasi: pakuya yilembiki,
Yawataukile wamalaika wake ya wenga:
Ni pa mawoko gawe yawakunyanyamule,
Usikuwala lwayo lwako pa liganga.
7Yesu akajowiti kwa yombe, Yilembiki kawili, Usingesela Bambo Mulungu wako. 8Kawili diabolo antola yombe ku kidunda kilacho nyahope, nandasa mautwa goha ga ndima nu kukwisika kwawe; 9nakajowiti kwa yombe, Ifi fyoha yanikupele, wona ugwa pasi kunigwilakimbo. 10Bahalapala Yesu anjowela, Wuka apa, Shetani: pakuya yilembiki, Bambo Mulungu wako ungwilekimbo, nuyombe wakape untumakilaye. 11Bahalapala diabolo andeka; na lolaye wamalaika wakachiti kuntumakila.
12Leka pakayufwini yombe kukita Yohana akafumbusiki, akawukiti mwanja ku Galilaya; 13ni kuwuka pa Nazareti, akachiti kuhwela pa Kapernaum, uwu uyii pa makigi ga nyanja, pa mipaka ya Zebulon ni Naftali: 14nausi limemasike lila likajowiki nu Isaya wakulweta, kujowa,
15Ndima wa Zebulon nu ndima wa Naftali,
Ndila ya luchi, lisi lila lya Yordan,
Galilaya wa Mihuku,
16Nsafi wakutama pa lwisi
Wakaweni lulangalila lukulungu,
Na kwa wala wakutama pandu na pa kifwili kya kifwa,
Kwa wombe lulangalila lukawakwelili.
17Kitumbulile lukumbi lula Yesu akatumbwili kuwandisa ni kujowa, Mupelaye; pakuya utwa wa kunani uwandamila.
18Leka kugendagenda mu makigi ga luchi lwa Galilaya, akaweni walongo wawili, Simon wakukemeleka Petro, nu Andrea nung’una mundu, na wayili mu kulekela lwafu pa luchi; pakuya wayili wakulowa somba. 19Nuyombe awajowela, Muhichaye munyuma mwa nenga, na yaniwakite wakulowa wandu. 20Leka hino apa wakalekiti njafu syawe na wakankisiti yombe. 21Leka pakagenditi palongolo kuhuma bahapa, akawaweni wangi wa walongo, Yakobo wa Zebedayo, nu Yohana nung’una mundu, pa liboti pamonga nu Zebedayo dadi wawe, na wayili mu kutendekesa njafu syawe; na akawakemili. 22Leka hino apa wakalekiti liboti nu dadi wawe, na wakankisiti yombe.
23Nu Yesu akasyungutili mu Galilaya moha, kuyigalisa mu ma‐sunagoge gawe, ni kuwandisa evangel ya utwa, ni kulwasa utamu uyi woha nu ulegelefu uyi woha pa nsafi. 24Lela ndumi syake sikabiti pa Suria poha: na wakantolili kwake wakulwala woha, awa wakamuliki ni fitamu fya misafi‐misafi na mahumbuso, awa wakamuliki ni ma‐daimon ni wakulwala ligoji, na wa kindengu‐ndengu; ni akawalwasiti wombe. 25Leka wakankisiti mapuga makulungu kuhuma pa Galilaya ni Dekapoli ni Yerusalem ni Yudaya ni lisi lila lya Yordan.
Currently Selected:
Mattayo 4: MGS1937
Highlight
Share
Copy
Want to have your highlights saved across all your devices? Sign up or sign in
First published by the British and Foreign Bible Society in 1937.
