Marko 1

1Ndumbulo ya evangel ya Yesu Kristo, Mwana wa Mulungu.

2Umu yilembekili pa wakulweta Isaya,

Lola, nituma ntenga wangu palongolo pa kyene kyako,

Yuyu yatendakese ndila yako;

3Njowelo ya wakukuwa mu mapululu,

Muwikile ngani ndila ya Bambo,

Mugolosaye barabara yake;

4Yohana akachiti, uyu akabatisi mu mapululu ni akawandisi ubatiso wa kupela kwa kulekelekesa sambi. 5Ni wakapititi kwa yombe ndima woha wa Yudaya, na woha wa pa Yerusalem; ni wakabatisiki nuyombe mu nkuka Yordan, kufumbula sambi syawe. 6Nu Yohana akafwatakiki nu lwagi lwa ngamila, nu lukoto lwa kikumba mu kiwuno mwake, na kyakulya kyake mapalasi ni uchi wa ku dasi. 7Ni akawandisi, kujowa, Ahicha mwene mbafu kulutila nenga kunyuma kwangu, nukulinganila lepa nenga kuyinama ni kuwopola lugoyi lwa sapato syake. 8Nenga niwabatisi mwenga pa machi: koma yombe yawabatise pa Roho Mbalafu.

9Ni ikayili kukita pa magono gagalagala, Yesu akachiti kuhumila pa Nazareti wa Galilaya, na akabatasiki nu Yohana pa Yordan. 10Na hino apa pa kufuwuka pa machi, akaweni mafundi gakachwiki, ni Roho ngati njiwa kiselalile pa yombe: 11ni njowelo kuhumila kunani, Wenga Mwanangu wakuganika, pa wenga niganasiki nyahope.

12Na hino apa Roho antaga kunja kuyingila pa mapululu. 13Ni akayili mu mapululu magono makumi ncheche kugeseka ni Shetani; ni akayili pamonga ni filugu; na wamalaika wakantumakili yombe.

14Na panyuma pa kufumbulika Yohana, Yesu akachiti mu Galilaya, kuwandisa evangel ya Mulungu, 15ni kujowa, Lumemasiki lukumbi, ni utwa wa Mulungu uwandamila: mupelaye, ni mukelaye pa evangel.

16Ni pa kuluta mu masekwa ga nyanja ya Galilaya, akambweni Simon ni Andrea nung’una wa Simon kulekela luwafu pa nyanja: pakuya wakayili wa kulowa somba. 17Nu Yesu akawajowili, Muyichaye munyuma mwa nenga, ni yaniwakite wakulowa wandu. 18Na hino apa wakalekiti njafu ni wakankisiti. 19Ni apa akagenditi palongolo pachokope, akambweni Yakobo mwana wa Zebedayo, nu Yohana nung’una mundu, wombe kawili wakayili mu liboti kutendakesa njafu syawe. 20Na hino apa akawakemili: na apa wakandekiti dadi wawe Zebedayo mu liboti pamonga na wa lihengo, wakabiti munyuma mwake.

21Ni wayingila mu Kapernaum; na hino apa pa sabato akayingili mu sunagoge ni akayigalisi. 22Ni wakakangichi nyahope pa mayigaliso gake; pakuya akayigalisi ngati mwene chengo, nukuya ngati wakulembela. 23Na hino apa akayili mu sunagoge yawe mundu wa roho ya wafu; na akakuwiti kujowa, 24Kiki kwa tenga nu wenga, Yesu wa Nazareti? uchiti kutiyananga ati? Nikumanya wenga uyii wa nani, Mbalafu yula wa Mulungu. 25Nu Yesu akandakalili, kujowa, Utame kinunu, ni upite pa yombe. 26Na roho ya wafu kunkachula yombe ni kukuwa ni njowelo yikulungu, yikapititi pa yombe. 27Na wakaganaganiti woha, mpaka wakakotini yungi ni njini kujowa, Kiki iki? mayigaliso ga hino! kwa ndingo wa mwene chengo ataukila roho haka sya wafu, ni sinjufwanila. 28Ni ndumi ya yombe yikapititi hino apa poha poha pa ndima woha wa kusyungutila wa Galilaya.

29Na hino apa, pala wakapititi pa sunagoge, wakayingili mu nyumba ya Simon nu Andrea, pamonga ni Yakobo ni Yohana. 30Leka mkohano mundu Simon akayili mu kulwala kupyupa; na hino apa wantawalile fya yombe: 31na pakachiti akankamwili kiwoko, na akanjimwisi; ni kupyupa kukandekiti, na akawatumakili wombe.

32Leka pa kimihi, pala lijuwa likatipimi, wakantoliti watamu woha ni wa kukamulika ni madaimon. 33Ni likaya lya mfilimila likakokini pamonga pa ndyango. 34Ni akalwasiti wingi wakulwala ni fitamu fya misafi‐misafi, ni akatagiti kunja madaimon mingi; na akayitakili lepa madaimon kulongela, ndawa gakammanyiti.

35Nu lukela, pa kilo‐kilo, akayimwiki, nakapititi, nakabiti ku mapululu, nakasaliti kukula. 36Na Simon na wala pamonga nako wakankisiti; 37na wakankolili yombe, ni kunjowela, Woha wakulondalonda wenga. 38Leka awajowela, Tiwuke kungi kungi pa makaya ga papipi, nausi kukulakula kawili niwandise; pakuya kiyingalile pa iki nikapititi. 39Na akayingili mu masunagoge gawe pa Galilaya poha, kuwandisa ni kutaga kunja madaimon.

40Ni anchilila wa matana, kumpembesa, ni kunfugamila, ni kunjowela, Wona ulonda, uhotola kuniguyula. 41Na pakatoliki ni lipyana, akatambalisi kiwoko kyake, nakankwafiti, nanjowela, Nilonda; uguyulike. 42Na hino apa matana gakandekiti, ni akaguyuliki. 43Na akandakalili nyahope, 44na hino apa akantagiti kunja, na anjowela yombe, Lola usijowa kindu kwa mundu: koma ubitaye, wilase wa mwene kwa kasisi, ni ulekele kwa kuguyulika kwako fila akataukili Musa, kwa ulungamakiso kwawe. 45Leka akapititi, na akatumbwili kuyenesa muni, ni kuwandisa ndumi yake, mpaka Yesu akahotwili lepa kuyingila kawili pa likaya pa lulanga, koma akayili kunja pandu pa lipululu: ni wakanchilili kuhumila poha poha.

Currently Selected:

Marko 1: MGS1937

Highlight

Copy