Lukas 3
3
Yohanes Fokadiuno
3:1-20
Mat 3:1-12; Mrk 1:1-8; Yoh 1:19-28
1Ompulu lima taꞌumo Tiberius nembali Omputo Kaisar. Taꞌu anaꞌa dua Pontius Pilatus gubernur ne kadieno Yudea, Herodes noowa kadieno Galilea, Filipus bhahitieno Herodes noowa kadieno Iturea bhe kadieno Trakonitis, bhe Lisanias noowa kadieno Abilene. 2Wakutuu anaꞌa Imamu Bhalano Hanas bhe Kayafas. Ne taꞌumo anaꞌa Lahataꞌala nokobhoasaomo ne Yohanes anano Zakaria we pandaso bhalano. 3Pada aitu Yohanes nokalamo ne amai liwu ne kosekaꞌewaꞌae kadie ne owano umeleno Yordan nofosampe bhihita maiꞌaono ne Lahataꞌala. Ambano, “Fetompaꞌaoꞌomu dhosamiu, doliomu ne Lahataꞌala bhe mefekadiuꞌomu maka Lahataꞌala naꞌumamponi dhosamiu.” 4Aini nopokantibhamo bhe tibuhino weo Kitabino anabii Yesaya,
“Nandoo suaha mekei-keino we pandaso bhalano,
‘Mebhongkaomu kaangkaꞌano Ompu,
fekalaaꞌieꞌomu so kaangkaꞌano,
5sabhaha lonso damoꞌawoe,
sabhaha kabhawo bhe gunu dapotateane,
kowego-wegoꞌano damekalaaꞌie,
kontido-ntidoꞌano daposaheteane,
6kosasawindo mie damoha kasalamati maiꞌaono ne Lahataꞌala.’ ” #Yes 40:3-5
7Pada aitu Yohanes nopugaumo ne mie bhahi mai mefekadiuno, “Hintimiu sampuꞌano ule modai, ambamo laꞌae bhahaa lumapaomu ne amahano Lahataꞌala so humatoꞌano? 8Dadiꞌanomo fotiwohaomu ne podiumiu ingka gahaꞌa fetompaanemoomu dhosamiu. Koise nokofekihi we lalomiu, ‘Ingka insaodi ini sampuꞌano Abraham, ⸤ tetewei dasumalamati⸥ .’ Kapaꞌamo amohatokoomu, Lahataꞌala nokokuasa naefokonandoo sampuꞌano Abraham mahinggamo namaiꞌao ne kontu ini. 9Polulu nokantaa-ntaamo ne pahakano sau. Sabhaha sau tapa mokesaꞌano bhake tetewei datumuꞌoe maka daꞌumohoe weo efi.”
10Mie bhahi naꞌa dofeenaemo ambado, “Ane peda naꞌa, kaowu taeafamo bhahaa?” 11Notobhoosimo Yohanes ambano, “Kobhadhuno haa tuwu, nasetuwu waꞌane tapa kobhadhuno, koꞌotino dawue nada naꞌa dua.”
12Nandoo dua mealaꞌino sewa mai defekadiu bhe dofeena ambado, “Guru, insaodi ini taeafaꞌimo?” 13Ambano Yohanes, “Mesaloomu sewa peda netubho kaowu, koise nokolabhia!”
14Nandoo dua tantaraꞌi mai meenano ambado, “Kaowu insaodi ini taeafamo?” Ambano Yohanes, “Koise mesaohi buku kodhoino, koise fosangkati so kaowu meala dhoi, netaamo kaowu dadiꞌao gadhimu.”
15Wakutuu aitu mie bhahi notisangke lalondo sampe dofeena we lalondo, “Anoamo ini bhahaa Mesias, Omputo Fosalamatino nentaa-ntaantoomu?” 16Dadiꞌanomo Yohanes nopugaumo ne mie bhahi maitu ambano, “Idi ini akadiuangkoomu oe, tamaka so humatono mada kaowu nofoliu kanau kuasa, mahinggamo alumense katapuno kaampinino pae amantasia. Anoa naꞌa nakumadiuangkoomu Rohino Lahataꞌala bhe efino. 17Katepi nontiintahaemo so natumepisaoꞌao pae ampa naonggela. Onuno pae nahumompunaane weo lambu kaenteiꞌa oti, kulino bhe kansiano laano natumunuane efi tapa mopoopeono.”
18Nobhahi dua katangahi sigaoꞌano nepakeno Yohanes nefolele Bhihita Metaa ne mie bhahi. 19Mahingga kolaki Herodes mowano kadie aitu, notangahie dua Yohanes, mbaꞌinomo nogaa bhe Herodias mieno lambuno bhahitieno, bhe sabhaha diu modai sigaoꞌano nehabuno. 20Gahaꞌa kolaki Herodes tanofodhulu kadaino diuno, nofopesua Yohanes weo katohongku.
Yesus dokadiuꞌe
3:21-22
Mat 3:13-17; Mrk 1:9-11; Yoh 1:32-34
21Nopalusi kosasawindo mie naꞌa nokadiuda, Yohanes nokadiumo dua Yesus. Gahaꞌa tangasano Yesus nosambahea, tanosimoengkaꞌamo lani, 22maka Rohino Lahataꞌala nosampu te wawono nokatu futeꞌo. Tanotifetingkemo dua suaha nomaiꞌao te lani, ambano “Hintumo Anaku timoasiꞌaono, Hintumo posahasiꞌaono laloku.”
Siwulu kamaiꞌaoꞌano Yesus
3:23-38
Mat 1:1-17
23Wakutuuno Yesus notandaki kahadhaano umuhuno napetolu fulu taꞌumo. Weo fekihindo mie, Yesus anano Yusuf,
anano Eli, 24anano Matat,
anano Lewi, anano Malki,
anano Yanai, anano Yusuf,
25anano Matatias, anano Amos,
anano Nahum, anano Hesli,
anano Nagai, 26anano Maat,
anano Matatias, anano Simei,
anano Yosek, anano Yoda,
27anano Yohanan, anano Resa,
anano Zerubabel, anano Sealtiel,
anano Neri, 28anano Malki,
anano Adi, anano Kosam,
anano Elmadam, anano Er,
29anano Yesua, anano Elieser,
anano Yorim, anano Matat,
anano Lewi, 30anano Simeon,
anano Yehuda, anano Yusuf,
anano Yonam, anano Elyakim,
31anano Melea, anano Mina,
anano Matata, anano Natan,
anano Daud, 32anano Isai,
anano Obed, anano Boas,
anano Salmon, anano Nahason,
33anano Aminadab, anano Admin,
anano Arni, anano Hesron,
anano Peres, anano Yehuda,
34anano Yakub, anano Ishak,
anano Abraham, anano Terah,
anano Nahor, 35anano Serug,
anano Rehu, anano Peleg,
anano Eber, anano Salmon,
36anano Kenan, anano Arpaksad,
anano Sem, anano Nuh,
anano Lamek, 37anano Metusalah,
anano Henok, anano Yared,
anano Mahalaleel, anano Kenan,
38anano Enos, anano Set,
anano Adam, anano Lahataꞌala.
Currently Selected:
Lukas 3: mnbSD
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
