Lukas 2

Kalenteꞌano Yesus

2:1-7

Mat 1:18-25

1Wakutuu anaꞌa Omputo Kaisar Agustus nofondawu pahintano nofotudu dabuhi neando kosasawindo mie weo kafopahintaꞌano Roma so dhiwaꞌa. 2Ainiꞌaemo dhiwaꞌa kabhao-bhaono tangasano Kirenius nembali gubernur we kadieno Siria. 3Dadiꞌanomo kosasawindo mie dokalamo we kotando seemie-seemie defebuhi neando.

4Pedamo dua anaꞌa, Yusuf nomaiꞌao we Nasaret we kadieno Galilea nokala we kadieno Yudea, we Betlehem, kota kalenteꞌano omputo Daud, kapaꞌamo anoa lee walaka bhe sampuꞌano Daud. 5Patudhuno dadhumiwada bhe Maria pohaeno. Ne naꞌa Maria nandoo nofowoowa. 6Gahaꞌa dohato we Betlehem, Maria nokapomo wulano nakokaana-ana. 7Nokoanaꞌaomo seemie moꞌane, titiisano, nowaweꞌianemo kabhini maka nofondolee weo kampomaaꞌando kadadi, kapaꞌamo miinamo datooleaꞌa ne lambu kabutuꞌa.

Dhagaꞌino dhumba

2:8-20

8Alo anaꞌa nandoo dhagaꞌino dhumba dodhagani kadadindo we pada ne owano liwu anaꞌa. 9Tambaꞌomo seemie malaꞌekatino Ompu neehe-ehe ne owando maka tilangano kakalabhiano Ompu tanohehamo nokaputida sampe doteꞌi sepaliꞌa. 10Nopugaumo malaꞌekati anaꞌa ambano, “Koise moteꞌiomua, kapaꞌamo amohatoangkoomu bhihita metaa, so kaowulaꞌano lalondo kosasawindo mie. 11Sealo itu we kotano Daud nolentemo so hintimiu Omputo Fosalamatino, Ompu Kristus. 12Nada ini katandaino, hintimiu meꞌawaomu seemie anaꞌi kaneꞌo lumenteno dowaweꞌiane kabhini nendole-ndole weo kampomaaꞌando kadadi.”

13Tambaꞌomo notiwoha dua setagua bhalano malaꞌekati sigaoꞌano dolibu-libu malaꞌekati saꞌituini. Andoa dopudhi Lahataꞌala ambado,

14“Nokalabhia mpuu Lahataꞌala te wawono wawo,

katohopo mpuu we dhunia,

so manusia posahasiꞌano lalo bhe Lahataꞌala.”

15Dokundo kaowu malaꞌekati naꞌa dosuli te surugaa, dhagaꞌino dhumba amaitu dopugaumo sapada-pada andoa ambado, “Dokalaanaomu we Betlehem doꞌondoꞌaoꞌomu kumadhadhiaꞌano ne watu peda nefohatoꞌaono Ompu saꞌituini.” 16Pada aitu tadopoagohimo dokala maka doꞌawamo Maria bhe Yusuf bhe anaꞌi kahobu anaꞌa nendole-ndole weo kampomaaꞌano kadadi. 17Dowohae peda maitu, dhagaꞌino dhumba naꞌa detula-tulaꞌaomo nefohatoꞌaono malaꞌekati nopulaoꞌao anaꞌi aitu. 18Kosasawindo mie tadomente dofetingke tula-tulando dhagaꞌino dhumba anaꞌa. 19Tamaka Maria tanofekataa bhahi-bhahiꞌae weo totono lalono bhe nofeki-fekihie kansuhu.

20Dhagaꞌino dhumba anaꞌa dosulimo we pada dopudhi dofekakalabhia Lahataꞌala, hampano kosasawiꞌae nefetingkendo bhe newohando nopobutu sepaliꞌa bhe nefohatoꞌaono malaꞌekati.

Yesus doowae ne wiseno Ompu we Lambuno Lahataꞌala

2:21-40

21Nokapo alu oleo, anaꞌi anaꞌa dosunaemo, neano dokonae Yesus. Neamo aini nefohatoꞌaono malaꞌekati wakutuuno miinaꞌo nawoowae inano.

22Pada aitu nohatomo tempono Yusuf bhe Maria dofekangkilo wutondo, seꞌise tutuha weo tubhono agama Yahudi tibuhino ne Kitabino Musa. Dadiꞌanomo dowowoꞌo Yesus we Yerusalem damowae ne wiseno Ompu. 23Aini doangkafi tibuhino weo pahintano Ompu, “Kotika anaꞌi moꞌane titiisa tabeano damowae ne Lahataꞌala mbali fehebuaꞌano mongkilono.” #Kel 13:2-12 24Andoa deowa dua so kapopanga peda nefotantu weo pahintano Ompu, sepasa burukou bhahaꞌi haa ulu anano dhaadhaha. #Im 12:6-8

25We Yerusalem nandoo seemie koneaꞌano Simeon. Anoa ini mie banara lumebeno, nontaa-ntaa kasalamatiꞌando miendo Israel. Rohino Lahataꞌala nopobhaiane, 26bhe padamo dua nofohatoe, paeꞌo namatea ane paeꞌo namoha Omputo Fosalamatino nedhandiꞌaono Ompu. 27Kamungkula aini noatoe Rohino Lahataꞌala se Lambuno Lahataꞌala. Wakutuu anaꞌa nopobutu dua anaꞌi koneaꞌano Yesus dowowoꞌoe kamungkulano dopesua weo Lambuno Lahataꞌala. Patudhundo damolapasiane tutuha peda tibuhino weo Kitabino Musa. 28Simeon lasao noala anaꞌi aitu maka noꞌawie bhe nopudhi Lahataꞌala ambano,

29“Ompu, aitu hunsaꞌanomo bhatuamu ini nahumunsa dhunia ini peda dhandimu;

notohopomo laloku.

30Kapaꞌamo padamo awohaꞌao wuntano mataku Fosalamatino katudumu.

31Anoamo ini nefontaa-ntaamu so sabhaha bansano liwu,

32Anoamo ini tapedamo tilanga umulawino sabhaha bansano liwu,

somo dua meowano kakalabhia ne umatimu Israel.”

33Inano bhe amano tadomente dofetingke sabhaha pugauno mulaoꞌano anando naꞌa. 34Pada anaꞌa Simeon nobarakatidamo bhe nopugau ne Maria inano anaꞌi anaꞌa ambano, “Kotu-kotuꞌu anaꞌi aini nofotantuemo Lahataꞌala so miendo Israel bhahino, sigaꞌa namobinasada, sigaꞌa namosalamatida. Anoa somo katandai maiꞌao ne Lahataꞌala, somo dapotaga-tagaliꞌao mie bhahi. 35Nadamo anaꞌa natipandeꞌaomo totono lalondo sabhaha mie. Gahaꞌa totono lalomu naopea kao-kaomo dakumansuꞌuane kampue.”

36Ne itu nandoo dua seemie anabii hobhine neano Hana. Neano amano Fanuel nomaiꞌao ne sampuꞌano Asyer. Anoa nokamungkulamo sepaliꞌa; pada nogaa tamaka fitu taꞌu kaowu dopomeatefi bhe moꞌaneno. 37Ampa aini nobhihinandamo, umuhuno alu fulu fato taꞌumo. Anoa ini miina nagumaati Lambuno Lahataꞌala, mentae mohondo nosombai Lahataꞌala, sadhia nopoasa bhe nosambahea. 38Pobutu doowa Yesus ne naꞌa, anoa nomaimo dua lasao nefoampe katumpuno lalo ne Lahataꞌala. Pada aitu nopugaumo nopulaoꞌao anaꞌi amaitu ne kosasawindo mie ntumaa-ntaano katitolosiꞌano Yerusalem.

39Nopalusi doalaꞌi kosasawiꞌae tutuha maraluuꞌano peda pahintano Ompu, dosulimo we liwu kaeateꞌando, liwuno Nasaret we kadieno Galilea. 40Anaꞌi aitu dhulu kabhala dhulu kaꞌosa, dhulu dua kapande, sadhia nopobhaiane kabarakatino Lahataꞌala.

Yesus weo Lambuno Lahataꞌala

2:41-52

41Setaꞌu-setaꞌu ne hohaeaꞌano Paska kamungkulano Yesus dokala we Yerusalem. 42Wakutuuno Yesus nokoꞌumuhu ompulu haa taꞌu, peda kaneando dokalamo toha we Yerusalem dapohohaea. 43Nopalusi hohaeaꞌa naꞌa dosulimo, tamaka Yesus neate we Yerusalem; gahaꞌa miina damandeꞌaanea kamungkulano. 44Kunaꞌendomo anaꞌi maitu nosulimo dua dopoangka-angkafi bhe sabhangkaꞌindo. Seꞌoleomo dokala kaneꞌomo doꞌondofie ne olotando bhahitieꞌindo bhe popandeꞌaoꞌando. 45Miina kaowu daohae, dosulimo we Yerusalem poowa doꞌondofie kansuhu. 46Nopooli tolu oleo dopoꞌawaanemo weo Lambuno Lahataꞌala, tangasano nengkoha-ngkoha ne wunta-wuntando guru agama. Anoa nofeti-fetingkeda bhe nofee-feena. 47Kosasawindo metingkeno domenteane sepaliꞌa kapandeno bhe katobhoosino.

48Sadowohae kamungkulano tadotonto, maka nopugau inano ambano, “Noafa kaꞌasi habu kainsami peda itu, anaku? Amamu bhe idi sakenda handa mani taꞌondofiko.” 49Tamaka Yesus tanotobhoosida ambano, “Noafa gahaꞌa ondofi kanauꞌomu? Miina mandeꞌaaneomua gahaꞌa Idi ini tabeano aeate weo lambuno Amaku?” 50Tamaka andoa miina dalumosangi maꞌanano pugauno naꞌa.

51Pada aitu Yesus nosulimo we Nasaret nopoowa-owa bhe kamungkulano. Ne itu Yesus sadhia neangka ne kamungkulano. Inano tanofekataa sabhaha kadhadhia amaitu weo totono lalono. 52Yesus dhulu kabhala dhulu kapande, dhulu noasiane Lahataꞌala bhe doasiane dua manusia.

Currently Selected:

Lukas 2: mnbSD

Highlight

Copy