Lukas 1
1
Patudhuno kitabi aini
1:1-4
1Teofilus nefosibhalaku! Dobhahimo mie mebuhino bhihitano sabhaha kadhadhia ne olotantoomu. 2Nebuhindo naꞌa nopokantibha bhe bhihita netahimantoomu ne mie mohaꞌaono wuntano matano kadhadhia anaꞌa mpini kabhao-bhaono bhe molelenomo dua bhihita anaꞌa. 3Dadiꞌanomo pada afotinda-tindae sabhaha kadhadhia amaiane mpini pakatandano, saoku netaa dua abuhiangkoe weo kitabi amangkafi tulu-tulungano, 4neanomo mandeꞌaane kantoono sabhaha kafoguhu netahimamu.
Bhihita so kalenteꞌano Yohanes Fokadiuno
1:5-25
5Ne dhamanino Herodes nembali kolaki we kadieno Yudea, nandoo seemie imamu koneaꞌano Zakaria nomaiꞌao ne kaseꞌisendo imamu Abia. #1Taw 24:10 Neano hobhineno Elisabet, sampuꞌano dua imamu Harun. 6Kohoduando sanea mie lumebe ne pomatano Lahataꞌala, dodadi doangkafi kosasawiꞌae pahinta bhe tubhono Ompu, miina dakonilempagia. 7Ampamo kaowu miina dakoanaa mbaꞌinomo Elisabet noꞌafa, pakade kohoduando dokamungkulamo.
8Sewakutuu nohatomo paliꞌano kaseꞌisendo, Zakaria nodhalangi takano nembali imamu ne wiseno Ompu ⸤ we Lambuno Lahataꞌala⸥ . 9Kaneando imamu dopodaduane mbali dofotantuꞌao laꞌae so nekantibhano taka. Gahaꞌa Zakaria nekantibhano taka namesua weo Lambuno Lahataꞌala naetunu dupa weo boloku mongkilo. 10Tangasano notunu dupa naꞌa kosasawindo umati dohompu we simbali dosambahea we kadete. 11Gahaꞌa seemie malaꞌekatino Ompu tanosifotiwohaꞌamo wutono ne Zakaria. Malaꞌekati anaꞌa neehe-ehe ne suanano medha kaetunuꞌa dupa. 12Nowoha peda maitu Zakaria nokohedu bhe noteꞌi. 13Tamaka malaꞌekati anaꞌa nopugaumo ambano, “Koe moteꞌia Zakaria, kapaꞌamo sambaheamu notitahimamo. Hobhinemu Elisabet naefolenteangko seemie anaꞌi moꞌane maka tabeano kumonae Yohanes. 14Hintu moꞌia bhe naowula lalomu, pakade daobhahi dua mie sigaoꞌano so moꞌiano mbaꞌinomo kalenteꞌano anaꞌi anaꞌa. 15Anaꞌi anaꞌa naembali kabhala ne pomatano Ompu, paise naohoꞌu angguru tawa kafohoꞌu kaololanuꞌa sigaoꞌano. Rohino Lahataꞌala nakumabhintie mpini weo haebu. 16Naobhahi miendo Israel namodolida dasumuli ne Ompu Lahataꞌalando. 17Anoa namaꞌinduluki Ompu, rohino bhe kuasano napototo bhe anabii Elia. Namodoli lalondo kamungkula ne anaꞌindo bhe namodoli totono lalondo mie pata meangkano ne fekihindo mie banara. Nadamo naꞌa naefontaa-ntaa umati mantasiꞌano so tumahimano Ompu.” #Mal 4:5-6
18Ambano Zakaria ne malaꞌekati anaꞌa, “Nada amai amandeꞌaane bhahaa putae tetewei nakumadhadhia? Kapaꞌamo idi ini akamungkulamo, hobhineku nokoꞌumuhumo dua.” 19Notobhoosimo malaꞌekati anaꞌa ambano, “Idimo ini Gabriel, palima-limano Lahataꞌala, notudu kanau apotula-tulaangko, amohatoangko bhihita metaa ini. 20Pugauku ini nahumato tempono tetewei nakoꞌula. Tamaka hampano miina marasaea kanau, kotu-kotuꞌu mobhea, pae sepaliꞌa mooli pugaua ampa oleono bhahi-bhahiꞌae naꞌa nakumadhadhia.”
21Gahaꞌa mie bhahi we kadete tadontaa-ntaamo Zakaria. Andoa domente, noafa nompona sepaliꞌa neate-ate weo Lambuno Lahataꞌala. 22Hato nolimba gahaꞌa Zakaria miinamo namandea nopugaua, tanoale-aleandamo kaowu limano, mbaꞌinomo nobheamo. Dadiꞌanomo mie bhahi dopandeꞌaomo lalondo putae Zakaria nokopowoha weo Lambuno Lahataꞌala.
23Nokapo kaowu tempono takano, Zakaria nosulimo se lambuno. 24Miina naomponaa Elisabet, hobhineno Zakaria nofowoowamo. Lima wula kaomponano miina namotiwoha wutono ne komieꞌano, maka nopugau ambano, 25“Pedamo aini habuno Ompu ne idi ini, aitu noniniꞌa kanaumo, nofosali kaambanoku ne pomatando mie.”
Kafohato so kalenteꞌano Yesus
1:26-38
26Nokapo nomo wula Elisabet nofowoowa, Lahataꞌala notudumo toha malaꞌekati Gabriel nakumala we Galilea ne seꞌonu kota koneaꞌano Nasaret. 27Ne itu nakumala ne seemie kalambe koneaꞌano Maria. Kalambe aini nopopohae bhe Yusuf sampuꞌano omputo Daud. 28Sapesuano weo lambuno Maria, malaꞌeakati nofeabhamo ambano, “Megau ae itua, hintu tibarakatino, Ompu nopobhaiangko.”
29Maria nokohedu nofetingke peda naꞌa, sampe nofeena totono lalono, bhahaa o ae maꞌanano kafeabha anaꞌa. 30Ambano dua malaꞌekati anaꞌa, “Koise moteꞌia Maria, kapaꞌamo hintu meꞌawamo rahamatino Lahataꞌala. 31Hintu fowoowa maka koanaꞌao seemie moꞌane bhe tabeano kumonae Yesus. 32Anaꞌi anaꞌa naembali kabhala bhe dakumonae Anano Lahataꞌala Foliuno Kuasa. Ompu Lahataꞌala nasumangkee so omputo nameda omputo Daud awuano. 33Anoa naembali omputo so mowano sampuꞌano Yakub ampa suhue dhamani, kafopahintaꞌano pae bhe kawoloa.”
34Ambano Maria ne malaꞌekati anaꞌa, “Nada amai nakumadhadhia bhahaa, ingka idi ini miinaꞌo akomoꞌanea?” 35Notobhoosimo malaꞌekati, “Rohino Lahataꞌala nasumampu ne hintu bhe kuasano Lahataꞌala foliuno kalangke nakumaputiko, dadiꞌanomo anaꞌi so lumenteꞌano naꞌa dakumonae Mie mongkilo, Anano Lahataꞌala. 36Amohatoko bhahitiemu Elisabet tangasano dua nofowoowa, mahinggamo nokamungkulamo, ampa aini nomo wulamo. Mie nekonando noꞌafa naꞌa nakoanaꞌao seemie moꞌane. 37Kapaꞌamo so Lahataꞌala miina bhe pata nepoolino.” 38Ambano Maria, “Ingka idi ini bhatuano Ompu, hunsaꞌanomo nakumadhadhia ne idi peda pugaumu naꞌa.” Pada aitu malaꞌekati naꞌa nohunsamo Maria.
Maria nokala nodongawi Elisabet
1:39-45
39Miina naompona palusi anaꞌa Maria nokalamo te tombuno kabhawo ne seꞌonu liwu we kadieno Yudea. 40Nohato ne itu nopesuamo ne lambuno Zakaria maka nofeabha ne Elisabet. 41Nofetingke kafeabhano Maria, anaꞌi newoowano Elisabet nebhapunda weo haebu maka Elisabet nokabhintie Rohino Lahataꞌala. 42Elisabet lasao nopugau nofekahaa-haaꞌi ambano, “Hintu tibarakatino foliuda sabhaha hobhine, notibarakati mpuu bhakeno wutomu so lumenteno itu. 43Laꞌae bhahaa idi ini sampe inano Ompuku nodongawi kanau? 44Kapaꞌamo saꞌafetingke kafeabhamu, anaꞌi newoowaku ini nebhapundaꞌao kaꞌia. 45Kodawua mpuu hintu, kapaꞌamo parasaea putae kafohato nefetingkemu ne Ompu tetewei nakumadhadhia.”
Lagu katumpuno lalono Maria
1:46-56
46Pada aitu nopugaumo Maria ambano,
“Apudhi afekakalabhia Ompu,
47noꞌia totono laloku hampano Lahataꞌala Mosalamati kanau,
48kapaꞌamo noniniꞌa kanau,
idi bhatuano mepandano kaengkohaꞌa ini.
Sakotuꞌuno notandamo aini mieno sabhaha dhamani dakumona kanau akodawua,
49mbaꞌinomo Kokuasano nofokonandoo kanau habu kumalabhia.
Nongkilo mpuu neano.
50Nopomantulu-ntulu nofotiwoha kabhelano lalono
ne mie moteꞌino ne Anoa.
51Kaꞌosano kabhalano kuasano
sampe limano negasa mie melangkeno diu,
bhe nohungga patudhundo.
52Kabhala kokuasano nofosampuda maiꞌao te kaengkohaꞌando,
tamaka mie mepandano kaengkohaꞌa nofofonida.
53Mie moꞌaho nofekaweꞌianda sabhaha metaaꞌano,
tamaka mie hangkaea notududa dakumala haa mbali limando.
54Anoa notulumi Israel bhatuano,
noangkafi podhandino bhe awuaꞌintoomu.
55Ompu miina naolimpuꞌao podhandino;
nofotiwoha kabhelano lalo ne Abraham bhe sampuꞌano ampa suhue dhamani.”
56Napetolu wula kaomponano Maria neate bhe Elisabet maka nosuli we lambuno.
Kalenteꞌano Yohanes Fokadiuno
1:57-66
57Nokapo kaowu wulano, Elisabet nokoanaꞌaomo seemie moꞌane. 58Santieneno bhe bhahitieꞌino dofetingke putae Ompu nofotiwohamo kabhelano lalono ne Elisabet, dadiꞌanomo andoa dosimoꞌi-moꞌiaꞌamo bhe anoa.
59Nokapo alu oleo andoa ini dosimai-maiꞌamo dasumuna anaꞌi anaꞌa, maka patudhundo dakumonae Zakaria dapototoane bhe neano amano. 60Tamaka ambano inano, “Koise, tabeano dakumonae Yohanes.” 61Ambado dua, “Ingka miina bhe bhahitiemiua koneaꞌano peda naꞌa.” 62Pada aitu dofetapamo ne amano depake tanda bhahaꞌi dakumonae laꞌae anaꞌi amaitu. 63Zakaria nesalomo kontu kaebuhiꞌa maka nobuhie peda ini, “Neano Yohanes.” Kosasawindo tadomente. 64Gahaꞌa Zakaria tambaꞌomo notobhoka nopugau, kapokaꞌuluno lelano notilensemo, lasao nopudhi Lahataꞌala.
65Mie poꞌowatiꞌando doteꞌi sepaliꞌa, sampe sabhaha kadhadhia anaꞌa nembalimo lansano wiwindo mie meateno te tombuno kabhawono Yudea. 66Kosasawindo mie metingkeno dokofekihi we lalondo, “Naembali ae bhahaa anaꞌi aini?” Kapaꞌamo nopobhaiane kuasano Ompu.
Lagu katumpuno lalono Zakaria
1:67-80
67Zakaria amano anaꞌi anaꞌa nokabhintie Rohino Lahataꞌala maka nokosuahamo peda seemie anabii ambano,
68“Fosibhala kaitaomu Ompu Lahataꞌalando miendo Israel,
kapaꞌamo Anoa nodongawi umati natumulumida, nomai notolosida.
69Anoa nefoehe seemie fosalamatino kokuasano,
nomaiꞌao ne sampuꞌano omputo Daud palima-limano.
70Aini nopobutu bhe bhoasaono endefiꞌini,
nefosampendo ana-anabii mongkilono.
71Ambado Lahataꞌala nafofosalamati maiꞌao ne kaewantoomu,
nafofolapa ne kuasando kosasawindo mie fobansino.
72Pedamo anaꞌa namotiwoha kabhelano lalono ne awuaꞌintoomu
bhe namekakoꞌula podhandino mongkilono.
73Dhandino naꞌa nobhoasaꞌaane bhe notunda ne Abraham awuantoomu
74putae dalumapaomu maiꞌao ne kuasano kaewa
bhe paemo dakateꞌi-teꞌia dasumombai Anoa,
75sadhia daongkilo bhe dadumadi metaa ne wiseno suhue dadinto.
76Hintu anaku dakumonako seemie anabiino Lahataꞌala Kokuasano,
kapaꞌamo hintu maꞌinduluki Ompu mebhongkaane kaangkaꞌa,
77somo mohatono umatino putae Lahataꞌala namosalamatida,
hampano dhosando naꞌumamponie.
78Kosasawiꞌae ini hampano kanini kaasi bhe kabhelano lalono Lahataꞌalantoomu,
Anoa nofodongawi nafotulumi,
tapedamo tilangano oleo bheteno te melangkeꞌano
79naꞌumulawi mie dumadino weo kahohondo bhe mewisekino mate.
Anoamo so tumonda kaita ne kaangkaꞌa humopeꞌano ne katohopono dadi.”
80Anaꞌi anaꞌa dhulu kabhala dhulu kamatangka rohino. Anoa neate we pandaso bhalano ampa ne oleono namotiwoha wutono ne miendo Israel.
Currently Selected:
Lukas 1: mnbSD
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
