Markus 16

Kawanuꞌano Yesus nomaiꞌao ne mate

16:1-8

Mat 28:1-10; Luk 24:1-12; Yoh 20:1-10

1Nopalusi oleono Sabat, Maria Magdalena, Salome bhe Maria inano Yakobus, dokalamo deꞌoli mina-mina. Patudhundo dakumala daminaki maeatino Yesus. 2Ne oleono Ahadhi samentaeno, oleo kabhao-bhaono weo ahadhi aitu, nofoni oleo dokalamo we kobuhu. 3We laano sala tadopofee-feenamo ambado, “Laꞌae bhahaa so fotulumino dadumole kontu kasongkono kobuhu?” Kapaꞌamo kontu anaꞌa nobhala sepaliꞌa. 4Dohato we kobuhu, gahaꞌa dowohamo kontu bhalano naꞌa notidolemo. 5Nelaa dopesua weo liano kobuhu naꞌa, dowohamo seemie anaꞌi moꞌane nepake dhuba kapute, nengkoha-ngkoha humanda we suana. Andoa dokohedu sepaliꞌa. 6Tamaka ambano mie naꞌa, “Koe moteꞌiomua! Apandeꞌaanemo ingka ondofiomu Yesus miendo Nasaret, tikantaino te sau salipu. Miinamo bhe Anoa ne ini, nowanumo! Ondoeꞌomu katifondoleꞌano ini! 7Aitu sulimoomu, maka fohatodaomu anaguhuꞌino, fohatoeꞌomu dua bhe Petrus, putae Yesus nopaꞌindulukikoomu we Galilea. Ne watu mohaemoomu peda pugauno endefiꞌini ne hintimiu.”

8Pada anaꞌa lasao dolimba maiꞌao weo liano kobuhu maka dofilei, mbaꞌinomo doteꞌi sepaliꞌa bhe noguguda. Kaꞌosano kateꞌindo, miina sepaliꞌa daetula-tula ne mie sigaoꞌano. #16:8 Nandoo dua kitabino Bhihita Metaa nebuhino Markus bhe aeati katubhahino peda aini: Tadofosampemo kaowu seendai kaowili saꞌituini ne Petrus bhe sabhangkaꞌino. Nopalusi anaꞌa Yesus wutono notudu anaguhuꞌino daefolele Bhihita Metaa notanda te mata oleo ampa we kansoopa. Bhihita Metaa nefolelendo ini nongkilo bhe pae nabinasaa, somo meowano kasalamati suhue dhamani.

Yesus nobhahi pakuno nofotiwoha wutono ne anaguhuꞌino

16:9-18

9[Nowanu kaowu, ne oleono Ahadhi kahangkowineno, kabhao-bhaonoꞌo Yesus nofotiwoha Wutono ne Maria Magdalena. Nomaiꞌao ne Maria ini, Yesus padamo nefolimba fitu bansa seetani. 10Hobhine aitu lasao nokala nofohato sabhangkaꞌino Yesus. Andoa ini tangasano noguguhu lalondo bhe doꞌae. 11Wakutuuno dofetingke Yesus nodadi toha, pakade padamo nowohae Maria Magdalena, andoa miina damarasaea.

12Pada anaꞌa Yesus nofotiwoha dua Wutono ne anaguhuno dohodua, tangasano dokala we simbalino kota; ulano segaatiꞌa dua. 13Kohoduando ini lasao dosuli dofohato sabhangkaꞌindo, tamaka miina dua damarasaeada.

14Panda-pandano Yesus nofotiwoha Wutono ne anaguhuꞌino koompulu seemiendo, tangasano dohumaa. Nofeꞌalada mbaꞌinomo miina damarasaea, pakade notuꞌa fotundo sampe dongahe damarasaea ne mie mohae nopalusi kawanuꞌano. 15Pada aitu Yesus nofohatodamo ambano, “Kalaomu ne amai liwu ne dhunia ini maka foleleomu Bhihita Metaa ne kosasawindo manusia! 16Ane damarasaea bhe dakumadiuda, dasumalamati; tamaka ane pae damarasaea daeꞌawa kahukumu. 17Mie marasaeano ne Idi naembali daehabu tanda tapa mentela: daefolimba seetani damake neaku; damande dua dapugauꞌao sabhaha wamba buꞌou. 18Ane daeintaha ule bhahaꞌi daohoꞌu hasu, pae daeꞌawa balaa. Ane datumei limando te wawono mie mosaki, mosakino aitu naoꞌosa.”

Yesus notisangke te surugaa

16:19-20

Luk 24:50-53; Tul 1:9-11

19Pada nopugau peda anaꞌa, Ompu Yesus notisangkemo te surugaa maka nengkoha ne suanano Lahataꞌala. 20Pada anaꞌa anaguhuꞌino dokalamo defolele Bhihita Metaa ne amai liwu ne dhunia ini. Ompu noposabhangkaanda kansuhu, bhihita nefolelendo nofekatangkaane tanda-tanda tapa mentela.]

Currently Selected:

Markus 16: mnbSD

Highlight

Copy