Matius 16
16
Miendo Farisi bhe Saduki desalo tanda tapa mentela
16:1-4
Mrk 8:11-13; Luk 12:54-56
1Sewakutuu dohatomo miendo Farisi bhe Saduki patudhundo damansoꞌalai Yesus. Andoa desalo namotiwohaanda tanda tapa mentela, so katandaino kuasano Yesus nomaiꞌao ne Lahataꞌala. 2Tamaka Yesus tanotobhoosida ambano, “Ane maꞌoleo nodedea lani, ambamiu ingka naombena toha oleo naewine. 3Ane hangkowine lani nodea lalo mohawu, ambamiu nakoꞌuse bhe nakokawea. Tanda-tanda te lani pandeꞌaaneomu maꞌanakieꞌomu, tamaka tanda-tanda kumadhadhiano ne dhamani aini miina. 4Mie dhamani aini nodai diundo bhe miina daeangka, gahaꞌaitu desalo seꞌise tanda. Tamaka paise damaꞌanda, ampamo kaowu tandano anabii Yunus.” Pada nopugau peda anaꞌa, Yesus nohunsadamo.
Ragindo miendo Farisi bhe Saduki
16:5-12
Mrk 8:14-21
5Pada aitu anaguhuꞌino Yesus dohatomo we sewetano teꞌi, gahaꞌa dolimpu dewowoꞌo roti. 6Nopugaumo Yesus, “Kodhagaomu bhe posiꞌondoomu ne ragindo miendo Farisi bhe Saduki.” 7Dofetingke peda naꞌa dopugaumo sapada-pada andoa, “Kapugauꞌano peda anaꞌa mbaꞌinomo miina daewowoꞌoomu roti.” 8Yesus nopandeꞌaane nepuga-pugauꞌaondo maka ambano, “Kakuhano kaparasaeamiu! Noafa gahaꞌa puga-pugauꞌaomu miina bhe rotia? 9Gahaꞌa miinaꞌo dua lumosangieꞌomua? Miina meꞌulaiꞌeomua lima onu roti apakandeandae dolima hewu mie, fee kalangka gahaꞌa kabhilaꞌando nefoꞌonumiu? 10Pedamo dua aitu roti fitu onu apakandeandae dofato hewu mie, bhahaa fee kalangka kabhilaꞌando nefoꞌonumiu? 11Noafaꞌao dua miina lumosangieꞌomua, ingka suano roti patudhuku saꞌituini. Kodhagaomu bhe posiꞌondoomu ne ragindo miendo Farisi bhe Saduki!” 12Pada anaꞌa kaneꞌomo dolosangie patudhuno Yesus, gahaꞌa suano ragi kaefoꞌendeꞌa rotia, tamaka daposiꞌondo ne kafoinaꞌuno miendo Farisi bhe Saduki.
Petrus noꞌakui putae Yesus o Mesias
16:13-20
Mrk 8:27; Luk 9:18-21
13Nohato kaowu we kadieno Kaisarea Filipi, Yesus nofeenamo ne anaguhuꞌino ambano, “Ambado mie, laꞌae gahaꞌa Anano Manusia - Idi ini?” 14Ambado, “Nandoo mugauno Hintu Yohanes Fokadiuno, nandoo mugauno Hintu anabii Elia, tamaka nandoo dua mugauno anabii Yeremia tawa seemie anabii sigaoꞌano.” 15Yesus nofeenadamo, “Ane ambamiu, laꞌae gahaꞌa Idi ini?” 16Notobhoosimo Simon Petrus ambano, “Hintumo Mesias, Omputo Fosalamatino, Anano Lahataꞌala dumadino ⸤ suhue dhamani⸥ .” 17Ambano Yesus, “Kodawua sepaliꞌa Simon anano Yunus, kapaꞌamo suano manusia mohatoangkoe, tamaka Amaku te surugaa. 18Amohatoko, hintumo Petrus ⸤ maꞌanano nea aini o kontu dempa,⸥ maka te wawono dempa aini amoehe umatiku. Mahingga kuasano mate pae natumaloea. 19Hintu amaꞌangko kunsino Kafopahintaꞌano Lahataꞌala. O ae so neꞌeleaꞌaomu we dhunia ini, tokamo dua notiꞌeleaꞌao te surugaa. O ae so neꞌundaꞌaomu we dhunia ini, tokamo dua notiꞌundaꞌao te surugaa.” 20Pada nopugau peda naꞌa noꞌeleꞌaandamo anaguhuꞌinoa daekapu-kapuna ne laꞌae maka dua putae anoa maitu Mesias, Omputo Fosalamatino.
Yesus nofofohatoꞌao kakadee-dee so nenamisino
16:21-28
Mrk 8:31—9:1; Luk 9:22-27
21Notandamo wakutuu anaꞌa Yesus nofohatomo anaguhuꞌino mentalea-mentalea, putae Anoa tetewei nakumala we Yerusalem. Ne itu naobhahi naeꞌawa kakadee-dee maiꞌao ne kamungkulaꞌi, neangkaꞌindo imamu bhe pande-pande Kitabi. Andoa damongkoe, tamaka ne katolu oleono namanu namaiꞌao ne mate. 22Nofetingke peda naꞌa Petrus nohelamo Yesus ne sohihino maka notangahie ambano, “Paise, Ompu. Sio-siomo Lahataꞌala pae sepaliꞌa namolapasako ne balaa anaꞌa. Pae sepaliꞌa nakumadhadhia.” 23Yesus nodolimo maka nopugau ne Petrus, “Gampi hintu seetani! Hintu onto-ontomi kanau, kapaꞌamo fekihimu suano fekihino Lahataꞌala, tamaka fekihino manusia.”
24Pada peda maitu Yesus nopugau ne anaguhuꞌino, “Laꞌae maka so mangkafi kanau tabeano nahumunsa kafaraluuno wutono, natumongku sau salipuno ⸤ maꞌanano doꞌunda mahingga damate⸥ maka namangkafi kanau. 25Laꞌae so potaamiꞌaono inawano, namiinae inawano. Tamaka laꞌae miinaeno inawa mbaꞌinomo noangkafi Idi, tetewei namehapi dadi mpuuno. 26O ae fahalaano seemie manusia naeꞌawa kosasawiꞌae kahangkaeano dhunia ini tamaka namiinae inawano? Nalumoliane ae bhahaa inawano maitu? 27Kapaꞌamo namada kaowu Anano Manusia namai weo kakalabhiano Amano dapoangkaꞌaane malaꞌekatino. Wakutuu anaꞌa namaꞌandamo ⸤ kabarakati tawa kahukumu⸥ ne manusia seemie-seemie naposahataa bhe habuno. 28Amohatokoomu, kotu-kotuꞌu ne olotando mie meehe-eheno aitu nandoo so pataꞌo mateno, ane pae daoha kadeki Anano Manusia namai naembali Omputo weo Kafopahintaꞌano.”
Currently Selected:
Matius 16: mnbSD
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
